اليكم النظام المصرى القديم فى ترقيم الخرائط المليونية

[Ahmed Hosny]

النظام المصرى القديم فى ترقيم الخرائط المليونية

NH36


اول حاجه دي خريطة مليونية

طيب اعرف موقعها ازاى ؟؟

اولا اول حرف لازم يكون يا اما N او S

N <<<< يعنى تقع فى نصف الكره الشمالى اى شمال خط الاستواء


S <<<< يعنى تقع فى نصف الكره الجنوبى اى جنوب خط الاستواء

طب اعرف ازاى دوائر العرض اللى بتقع بينها اللوحة ؟
سؤال ذكى جدا من انسان اذكى منه جدا
بص يا ابو الزماله دلوقت انت عندك حرف ابجدى من الحروف الابجدية الانجليزية وليكن H
نجد ان حرف H فى اللغة الانجليزية رقمه 8
اضرب 8 *4 يساوى 32
هات الرقم اللى قبله وبيقبل القسمة على 4 هيكون 28
اذن اللوحة تقع بين دائرتى عرض 28 ، 32

طب ازاى احسب خطوط الطول ؟
وده برضو سؤال اذكى من السؤال الاولانى
بص يا زميل
انت عندك دلوقتى رقم بعد الحرف الابجدى الرقم ده لوكان اكبر من 30 اذن الخريطة تقع فى النصف الشرقى "من 31 : 60"
اما لو كانت اقل نجد انها فى النصف الغربى "1 :30 "

طب دلوقتى عرفنا انها بتقع فى النصف الشرقى
طب انت بردو مريحتنيش هى بتقع بين اى خطى طول
انت مستعجل جدا على فكرة مينفعش كده
انت دلوقتى معاك رقم وليكن 36 اطرح منه 30
يتبقى 6 تمام جدا او جميــــــل جدا
اضرب ال6 *6 هيديك 36 هات الرقم اللى قبله اللى بيقبل القسمة على 6 وهو 30
اذن الخريطة تقع بين خطى طول 30 / 36

وبكدة خلصت الخريطة المليونية


استنى يا عم شوية لسة بدرى انت مصدقت ولا ايه
الخريطة 500,000:1
تنقسم الخريطة المليونية الى 4 لوحات نصف مليونية
وبالتالى فان ابعادها 2 درجة عرضية * 3 درجات طولية
والصورة دى بتوضح ده




ولكن فى النظام المصرى القديم فانه يهمل ترقيم تلك الخرائط

وتنقسم الخرائط المليونية الى 24 خريطة ربع مليونية 250,000:1
تاخذ حروف ابجدية انجليزية capital letters من A حتى p
ويكون ابعادها 1 درجة عرية و1 درجة طولية





كل خريطة من الخرائط ربع مليونية تنقسم الى 6 لوحات 100,000:1 بابعاد 30 دقيقة *30 دقيقة
وتاخذ ارقام من 1 : 6




وايضا كل خريطة من الخرائط 100000 فانها تنقسم الى 4 لوحات 1: 50,000 بابعاد 15 دقيقة فى 15 دقيقة
وتاخذ حروف ابجدية small letters من a الى d



وهذه الخريطة 1 : 50,000
ممكن نقسمها الى 4 خرائط 25,000
وتكون ابعادها 7 دقائق و 30 ثانية طولية ونفس الابعاد فى الاتجاه العرضى
وتاخذ الخرائط الجديدة ارقام من 1 الى 4

ملحوظة هامة جدا
لو عايزين كتاب ندرسه عندك كتاب الجغرافيا العملية بتاع سلقونا "سنه اولى "
فى كل اللى احنا هندرسه


وممكن نحل المسالتين دولن ولو محدش حلهم هيتمد المرة اللى جاية

NS 55 P3c2
SP 37 N2b1


وان شاء الله دى هتكون بداية انطلاقة جديدة لشعبة المساحة والخرائط الفرقة التالتة
ومن النهاردة مفيش حكومة "نظم " احنا الحكومة احنا الحكومة

[KAREEM]

الله ينوووووووور امعلم حسنى
وانا شخصيا استفدت من الكلام دا
جزااااااااااك الله كل خير

[Ahmed Hosny]

الله ينوووووووور امعلم حسنى
وانا شخصيا استفدت من الكلام دا
جزااااااااااك الله كل خير

شكرا يا كيمو على تشريفك للموضوع
وجزانا الله واياك

[esraa]

بسم الله ما شاء الله عليك يا احمد


اسلوب رائع فى عرض الموضوع



ربنا يبارك لك و يبارك فيك


جزاك الله خيرااااااااا

[dola]

يا حسنى يا جامد ايه ده طول عمرى بقول الواد ده ناقصله سماعة ويبقى د

[Horiaa Swedan]

COLOR="Navy"]

بجد يا احمد مش عارفه اقولك ايه الله ينور يا باشا بجد تمممممممممممممممممممام جدا وانت فدتنا اووووووووووووووووى لان عندنا فى برنامج الجى اى اس السنادى نحول الاحداثيات واما طلبنا توضحها الاستاز قلنا ارجعوا لورق اولى

وطبعا الكلام ده اتبخر


فبجد عوده رائعه والله الموفق

[/COLOR]

[mohamed ali]

الف شكرررر با ابو الزمالة على موضوعك الجميل

والعرض الشيق وجزاك الله كل خير

[صلاح عبد الفتاح]

شكرا يا ابو حميد
بس بعد كدة محدش هيقدر يكلمك
ماانت الحكومة
هههههههههههههههههههه

[MUHAMED SAMY]

ربنا يبارلك يا حسنى
الواحد فخور انك صاحبه
شغل رائع

[KAREEM]

شكرا يا كيمو على تشريفك للموضوع
وجزانا الله واياك

تشريف مين يااااااااض
ولا انت حتنسى نفسك ولا انا حنسى نفسى
احمد حسنى
يعنى الاول على الدفعة فى سنة تانية
يعنى الجدعنة والشهامة والرجلوة والاخلاق
يعنى حبيب قلبى من عند الأورط
بحبك فى الله احسنى وربنا يعلم

ومن النهاردة مفيش اشراف
انا الاشراف انا الاشراف
ههههههههههههههههههههههههه

حلوة منك دى
هههههههههههههههههههههههههههههههه