المساعد الشخصي الرقمي

مشاهدة النسخة كاملة : يا فرخة ما تمت



Night Moon
09-22-2009, 10:11 AM
ابو سيد :يا عزيزة يا ولاد يا عزيزة يا ولاد انا جيت
ام سيد: فى ايه يا ابو سيد عامل غارة ليه يا اخويا

ابو سيد: تعالى يا عزيزة هاقولك على خبر هايفرحك

ام سيد:خبر ايه خير يا رب

ابو سيد بفرحة : ده خير قوى يا ام سيد انا النهارده قبضت الجمعية

ام سيد:طب الحمد لله بس اوعى تنسى تروح تديهم لابو اشرف انت عارف الراجل اول ما طلبناهم منه عشان نعمل الحمام اللى كان هايقع على دماغ الجيران ما اتأخرش علينا و ادانا الـ 500 جنية على طول مش عايزين نتأخر عليه

ابو سيد:لأ أتأخر عليه ايه ده انا عديت عليه على القهوة قبل ما اجى

ام سيد:طب الحمد لله يا اخويا ربنا يسدد ما عليك و يا رب يكون ليك ما عليك . اقوم انا اشوف الغسيل

ابو سيد:استنى بس غسيل ايه ؟ خدى يا ام سيد

ام سيد:ايه ده جبت الـ 50 جنية دى منين

اول ما العيال سمعوا سيرة الـ 50 جنية جم جرى

ابو سيد:اصل الجمعية يا ستى طلعت 550 و اتارينا كنا حسبينها غلط

ام سيد: يا ما انت كريم يا رب

ابو سيد:قولى لى بقى هانعمل ايه بالـ 50 جنية

ام سيد:اقولك احنا نشيلهم انت بتشوف لما حد من العيال بيعيا بنحتاس بيه

العيال :لا يا بابا مش عايزين نشيل حاجه

ام سيد:اخرس ياواد منك ليه

ابو سيد:انا برضه من رأى العيال الفلوس دى احنا ما كناش عاملين حسابها يعنى جت من باب الله . انا شايف اننا نتشبرق بيها

ام سيد:نتشبرق بـ 50 جنية انت اتجننت يا راجل احنا نشيلهم احسن بيقولوا البلد داخلة على ايام سودا و فيه انفلونزا خنازير افرض حد مننا لقط ما نعرفش ساعتها نعالجه

ابو سيد :انفلونزا اللى انتى شايله همها يا وليه يا خلل امال الحكومة بتعمل ايه انا قولت هانصرفهم يعنى هانصرفهم

ام سيد :طب خلاص مادام مصمم تصرفهم يبقى تجيب لك جزمة جديدة بدل الجزمة اللى دابت فى رجلك دى

ابو سيد:جزمة ايه ما الجزمة زى الفل اهى هى كانت اشتكت لك

ام سيد :ما اشتكتليش انا بس اشتكت لعبده الجزمجى اخر مرة قاللى لو دقينا فى الجزمة مسمار زياده هاتفجر نفسها و تخلص من القرف اللى هى فيه

ابو سيد:و النبى قولى له يتلهى . هو يعرف يجيب زيها . بلا جزمة بلا زفت انا باقول نعمل بكرة غدوة محترمة بالفلوس

ام سيد:يا لهوى غدوة بخمسين جنية ليه . انت اتجننت يا راجل

العيال :ايوه يا بابا ربنا يسترك احنا عايزين نعمل اكله حلوه و النبى

ام سيد :اكلة ايه يا منيل انت و هو . يا ابو سيد اشترى لك جزمة احسن
الاكل ده كله فى الاخر سد جوع و ما حدش شايف بناكل ايه

ابوسيد:و هى الناس مالها انا عايز اجيب اكله حلوة للعيال

ام سيد:يا راجل الناس ليها الظاهر و المثل بيقول ادخل على الناس معرش و لا تدخل مكرش

ابو سيد:معرش ايه و مكرش ايه يا ام سيد خلينا نفرح العيال و النبى ما تكسرى بخاطرهم

العيال:اه و النبى يا ماما

ام سيد:طب خلاص عايزين تاكلوا ايه

ايه رايكم يا عيال نجيب كيلو لحمة و نطبخ

العيال:لحمة ايه لا يا بابا العيد قرب و عم سلامة الجزار اكيد هايجيب لنا لحمه . احنا نفسنا فى الفراخ

ام سيد:نفسكم فى الفراخ !!! امال لو ما كنتوش واكلينها الاسبوع اللى فات

العيال:و هو انتى بتسمى اجنحة الفراخ اللى بتأكليها لنا دى فراخ احنا عايزين فراخ بحق و حقيقى

ام سيد:دلوقتى الاجنحة ما بقيتش عاجباكم يا نمرود منك ليه

العيال:ايوه يا ماما عايزين فراخ و يا ريت بقى تعمليها لنا زى ام حماده ما بتعملها لهم
ام سيد:و ام حماده بتعملها ازاى ان شاء الله

سيد:امه بتحطها فى البيض و بقسماط و بتقليها بيقول بتبقى طعمها حلو قوى

العيال كلهم فى نفس واحد ايوه يا ماما اعمليها لنا كده

ابو سيد:لا بقى مادام الكلام على فراخ يبقى حلة محشى كرنب لكن بيض و ما اعرفش ايه ده ما يلزمناش . فرخة يعنى مرقة و محشى و لا ايه رأيك يا ام سيد

ام سيد:و هو انت محروم من المحشى يا راجل

ابو سيد:لأ مش محروم لكن على مرقة الفراخ اكيد غير لما يبقى اورديحى

ام سيد:خلاص يبقى محشى و فراخ

ابوسيد:و ما تنسيش الملوخية يا عزيزة

ام سيد:و ملوخية كمان عشان عيونك هو انا ليا اعز منك يا ابو سيد

ابو سيد:تسلمى لى يا غاليه يا سلام دى هاتبقى ليله يا عمده

هههههههههههههه
تانى يوم الصبح ام سيد بتصحى خلف عشان يروح الشغل

ام سيد:يا خلف(ابو سيد) يا خلف قوم يا راجل هاتتأخر على الشغل

ابو سيد:لأ شغل ايه انا مش رايح النهارده

ام سيد:مش رايح ليه ؟ انت عيان كفى الله الشر

ابو سيد:لأ مش عيان بس قاعد مستنى المحشى و الفرخة

ام سيد:فرخة ايه اللى هاتقعد لها قوم يا راجل شوف اكل عيشك

ابو سيد:يا عزيزة سيبينى الله يسترك انام كويس عشان اقوم اساعدك و كمان انا مش عايز اسرح النهارده و البلدية يغيروا دمى و اجى فى الاخر قرفان ما اعرفش اتهنى بالمرقة

ام سيد:يا دى النيلة على المرقة اللى هاتجننك

ابوسيد:يا ستى سيبينى الله لا يسيئك و انزلى انتى هاتى الحاجة

ام سيد:خلاص براحتك عيشنا و شوفنا الراجل هايجرج فى البيت عشان الفراخ

ابو سيد:و هو انتى كنتى شوفتى الفراخ فين قبل كده

ام سيد:طب نام يا اخويا نام

ابوسيد:اول ما تيجى تصحينى عشان اشوف الفرخة

ام سيد نزلت السوق جابت الكرنب و الملوخية و مستلزمات المحشى من خضرة و رز و راحت طالعة على الفرارجى و لاول مرة تدخل المحل بقلب جامد و منفوخة على اخرها ما هى كل مرة كانت بتتكلم بصوت واطى و تدخل متدارية عشان ما حدش من الجيران يشوفها و هى بتجيب الاجنحة

ام سيد:عايزة فرخة يا حسن

الفرارجي:تكون قد ايه يا ستى

ام سيد:عايزاها كبيرة

الراجل وزن لها الفرخة و نضفها بالهنا و الشفا يا ستى

ام سيد:يا ابو سيد قوم اصحى يا راجل

ابو سيد:جبتى الفرخة يا عزيزة

ام سيد:اه يا خلف(ابو سيد) جبتها

ابو سيد:وريهالى كده يا سلام يا سلام دى اكيد هاتطلع مرقة ما حصلتش

و قعدت ام سيد و ابو سيد يقطفوا الملوخية سوا و يحلموا بالمحشى على شوربة الفرخة لحد ما سمعوا صوت حاجه بتترزع فى المطبخ

جريوا هما الاتنين على المطبخ لقوا الحلة الى فيها الفرخة واقعة على الارض و الشباك مفتوح بيبصوا من الشباك لقوا قطة ماسكة الفرخة بسنانها و بتجرى

ابو سيد طلع جرى و دخل فى سباق 100 متر حر مع القطة انه يقدر يحصلها و ينقذ الفرخة لكن ما قدرش

طبعا ام سيد قعدت تعيط على الفرخة اللى ما لحقوش يتهنوا بيها و على الـ 50 جنية اللى راحت بلاش

ده غير العيال اللى اتنكدوا ده حتى الواد سيد لقوه واخد السكينة و مصمم يدبح قطط الشارع كله

بعد ما اضطروا ياكلوا المحشى اورديحى زى كل مرة ابو سيد قال لام سيد
ابو سيد:دى حتى القطة بنت اللذين ما صبرتش لما كنا نسلقها و خطفتها نيه

ام سيد:و كان ايه الفرق يعنى

ابو سيد:اهوه كنا ندوق المرقة بتاعتها على لاقل

ام سيد:يا دى المرقة اللى جننتك مش انت اللى قعدت تنق فيها و هاتبقى ليلة يا عمده أهى الفرخة طارت يا ابو العلا

وتوتة توتة فرغت الحدوتة عجبتكم ولا لاء

اسامه البنا
09-22-2009, 12:07 PM
والله يا اسماء

مع انها طنويله جدا

الا انها بتحكيمعانها الشعب الي احنا عيشينه

وهي مش للضحك خالص

هههههههههههههههههه

ديه للهم واننا نحس بالناس دول

تسلم ايدك

شيماء رمضان الوهيبى
09-22-2009, 03:06 PM
بجد قصة حلوة جدا
وحسيت كأنى بتفرج على فيلم قصير و اكتر حاجة عجبتنى اللغة الى اتكتبت بيها لان اللغة الشعبية دية بيبقلى ليها طعم تانى و هى اللى كانت محلية القصة
تسلم ايدك وياريت كل كام يوم تجيبى تانى

raul
09-22-2009, 05:45 PM
تسلم ايديك قصة حلوة اوى
تقبلى مرورى

Night Moon
09-23-2009, 01:44 PM
والله يا اسماء

مع انها طنويله جدا

الا انها بتحكيمعانها الشعب الي احنا عيشينه

وهي مش للضحك خالص

هههههههههههههههههه

ديه للهم واننا نحس بالناس دول

تسلم ايدك



ميرسي يا اسامة علي مرورك وبالنسبة ان القصة طويلة انا عارفة انها طويلة بس لو كنت قسمتها كنت هقسمها علي اد ايه فحبيت انزلها مرة واحدة احسن


بجد قصة حلوة جدا
وحسيت كأنى بتفرج على فيلم قصير و اكتر حاجة عجبتنى اللغة الى اتكتبت بيها لان اللغة الشعبية دية بيبقلى ليها طعم تانى و هى اللى كانت محلية القصة
تسلم ايدك وياريت كل كام يوم تجيبى تانى


تسلميلي انتي عي مرورك والكومنت الجميل دة وان شاء الله تشوفي من القصص دي كتير

تسلم ايديك قصة حلوة اوى
تقبلى مرورى



ميرسي راؤل علي مرورك نورت التوبك

alaa eid
09-23-2009, 03:01 PM
جمييييييييييييلة جدا جدا يا سمسمة


تسلم ايدك يا قمراية

MEROOO
09-23-2009, 11:04 PM
كلماتك روووووووووووووووووعة

نايس توبيك

وتقبلى مرورى

Night Moon
09-23-2009, 11:10 PM
ألاء
ميرو
ميرسي علي مروركم ونورتو التوبك

S2AH
09-24-2009, 12:55 AM
جميلة والله يا اسماء القصة دى
وفعلا دة حال ناس كتير مش لاقية حتى تمن الاكل
تسلم ايدك

Night Moon
09-24-2009, 12:00 PM
تسلميلي انتي عي مرورك اللي اسعدني دة

Soma
09-24-2009, 12:19 PM
تسلم ايدك يا نايت القصة جميلة جدا
جزاكى الله كل خير

Night Moon
09-25-2009, 02:42 PM
وجزاكي ويانا ياسوما ميرسي لمرورك