المساعد الشخصي الرقمي

مشاهدة النسخة كاملة : كلام في حب مصر..........



Mr.EGYPT
10-16-2009, 01:17 AM
http://farm3.static.flickr.com/2038/2459075282_bd3a372122_o.gif

السلام عليكم ورحمة الله وبركاته

بس انا مش هتكلم معاكم عن الام اللى هى الام الفعليه
انا هتكلم عن الام المجازيه اللى هى بلدنا الغاليه مصر
عاوزين نتكلم عن حب مصر
مصر اللى عشنا وهنفضل عايشين فيها طول حياتنا
مصر اللى اتربى فيها اهلنا وكبروا فيها وربونا فيها
مصر اللى نفديها بحياتنا ودمنا
مصر اللى ربنا ذكرها فى القرآن وكرمها وفضلها عن كل بلاد العالمئ


مصر اللى كانت القائد للعرب وهتفضل كده على طول
مصر اللى العالم كله بيتمنى انه يكون مكانها ومنها
مصر اللى علمت العالم كله الرقى والحضارة
مصر اللى كانت منارة العلم
مصر ارض النيل
مصر التاريخ
مصر اللى طلع منها اعظم واكبر العلماء والمفكرين والادباء
مصر دى حاجه كبيرة خالص
ليه بقى انا حاسس ان حبها قل فى قلوبنا؟؟؟؟؟
لانى بصراحه فى الفترة الاخيرة ملاحظه ان فيه شباب معندهاش الحب لبلدها
وأى حد يسافر برة او يعرف حد سافر برة ورجع اتكلم معاه شويه
تلاقيه بيقول شعر فى بلاد بره
وبيقول ما قاله مالك فى الخمر فى مصر ويبدأ يقارن بقى
الشوارع هناك نظيفه وهنا الدنيا كلها زباله
الناس هناك بتتعامل بكل احترام وادب وذوق
والناس هنا بعيد عنك عاوزة تتحرق بجاز
المواصلات هناك سهله ومريحه
وهنا ياساتر يارب قرف وتعب وحاجه فظيعه
المصالح الحكوميه هناك حاجه زى الفل
وهنا الروتين والرشاوى والفساد
الاسواق هناك فيها كل حاجه متوفرة ورخيصه
وهنا بقى احتكار وغلا وبلا ازرق
وغيره وغيره كتييييييييييييييييييير
وكأنه لما كان عايش هنا مكنش عارف كل الحاجات دى
وكأنه مكنش واحد من الناس اللى وصلت بمصر للحال ده
وكأن مصر دى حاجه وحشه ومفيهاش اى حاجه كويسه
وبعد دا كله يقول انه بيحب بلده بس يعنى لو تنظف شويه
بس يعنى لو يبطلوا الحاجات الوحشه اللى فيها
بس يعنى لو يوفرو فيها الزبده اللورباك والقشطه المش عارف ايه
بس يعنى لو العربيات اللى ماشيه فى الشوارع تبقى كلها حديثه
وبس وبس وبس
فين الحب ده ؟؟؟؟؟؟؟؟؟؟؟؟؟
صحيح فيه عيوب كتير فى بلدنا
بس مين السبب فى العيوب دى ؟؟؟
مش احنا ؟؟؟؟
حتى ولو كان بشكل غير مباشر ؟؟
احنا بسكوتنا على الفساد وعلى كل حاجه وحشه
احنا بقبولنا للوضع اللى احنا فيه
احنا بكسلنا وعدم عملنا على التغيير للاحسن
احنا بعدم اللامبالاة اللى عايشين فيها
احنا بنظام الفهلوة اللى مش بنشتغل الا بيه
احنا بعدم العمل بتعاليم ديننا الحنيف والحرص عليه
احنا بمحاولة تقليدناالاعمى للغرب
احنا باستهتارنا وتسيبنا
وبعدين لو بصينا للبلاد التانيه دى هنشوف ايه ؟؟؟؟
الناس اللى هو بيتكلم عليها دى بتشتغل واى تقصير يقابله عقاب
فيه قانون الكل بيحترمه ومافيش فهلوة
هو لما يقعد يتكلم عن الرزق والشغل يقول انه هناك المعايش صعبه والفلوس اللى بيكسبها دى بيدفع بدالها من دمه واعصابه
طب مااحنا لو عملنا ده هنا فى مصر بلدنا
احترمنا القانون
حافظنا على نظافة الشوارع
احترمنا بعض
بطلنا فهلوة وتزويغ
راعينا ربنا فى شغلنا
لو كل واحد فينا عمل اللى عليه وحب البلد بجد من قلبه
هنبقى اعظم بلد
هنرجع مجدنا الغابر وحضارتنا البائده
انا مش عاوزه كلامى يبقى كلام انشا ومن نوعية الخطب والمواعظ
انا عاوزه نتكلم مع بعض ونحاول نفكر فعلا فى حلول عملية
يمكن نقدر من خلال كلامنا اننا نتوصل لحاجه تنفعنا وننفع بيها بلدنا
ومش عاوزه حد يزعل من كلامى ويفتكر انى بتهمه بعدم حب البلد
لأ
انا اللى خلانى افكر اكتب الموضوع ده
حالة عدم الانتماء اللى شوفتها عند شباب كتير
لما نتكلم ونقول كلمة مصر الاقيه قال مصر ايه ياعم
هو احنا شوفنا منها ايه كويس
لاتعليم ولاشغل ولاعيشه ترضى ربنا
سخط وكره وبلاده فى المشاعر
ليه دا كله ؟؟


وكمان ممكن نتهم مصر الحبيبه با لخيانه



فى كده حرام حرام ارحمونا بقا


ياريت تشاركونى التفكير فى الموضوع ده


تحياتى ودمتم ودامت مصرنا الغاليه بكل خير وود وسعادة
والسلام عليكم ورحمة الله وبركاته

Marwa Mahmoud
10-16-2009, 02:08 AM
فى البدايه اهلا وسهلا بيك نورتنا

وبحييك على موضوعك الجميل ده



والله الموضوع ده خطير وبدأت سلبياته تظهر عواقبها علي المجتمع ولازم يبقي فيه حملات قويه لمعالجه الموضوع ده لانه مش بس مظهر قدام الدول لا ده بالفعل روح السلبيه منتشره في المجتمع ودي حاجه خطيره يعني استحاله تسال اي مواطن عن اي حاجه الا وتلاقيه بيرد بسلبيه حتي ولو كانت نوع من السخريه بس سخريه المصري زمان كانت من سبيل الدعابه انما دلوقتي فعلا روح سلبيه والروح السلبيه عمرها ماتبني ولا تعمر بلد ودة الى احنا وصلنا ليه دلوقت

بس تفتكروا كدة ايه اللى وصلنا للحال اللى احنا فيه دة
العيب فينا احنا فين القيم الاخلاقيه اعتقد انها بدأت تختفى
تأملوا كدة فى سلوكيات المجتمع المصرى بالبلدى كدة
كل واحد بيقول يارب نفسى وبس .. وأنا مالى

بس اللى حصل دة

نتيجة ان الشعب المصرى شعب مغلوب على أمرة أه والله

لو تقدر تشترى عيش من غير قله قيمه وبهدله وقله ادب!! ولو تقدر تخلص مصلحة حكوميه بدون ما تفوت عليهم بكره وبعده وبعده يبقى سعتها صعب نطالب الشعب انة مبيبقاش سلبى الظروف الى حوليه هيا اللى بتفرض عليه كدة وعشان نصلح الاحوال دى كلها لازم نرجع ونعالج الاسباب اللى وصلتة للحالة دى

بس فى كلمة صغيرة ممكن نلخص بيها الموضوع دة أن
لو الشعب ده حاسس ان البلد دى بلده مش بلد رجال الاعمال والداخليه والسياسيين حتختفى كل مساوئ هذه البلد!!

Mohamed Hashem
10-16-2009, 02:10 AM
يسلم بقك قبل ايديك
اللى كتبت الكلام الجميل ده
مش لاقى تعليق ابلغ من كلماتك العفوية الصادره من القلب
تحيه غاليه ليك واقف احتراما لشاب
بيحب امه
مصر

Mohamed Hashem
10-16-2009, 02:13 AM
معلش يا مرمر
اختلف معاكى
لو كل واحد قال مش حاسس انها بلدى
دى بلدهم هما .. اللى عايشين بالطول وبالعرض
يبقى مفيش حد حيعمل حاجه
المبدأ : ابدأ بنفسك
والأصل فى حب البلد
حفظ جميلها .. مش حب ناسها
لاننا جزء من التكوين ده
واكيد فى ناس تانيه شايفه تصرفاتنا وليها نقد على طريقتنا .. جايز يكونوا أفقر مننا
وجايز يكونوا .. أكثر علما مننا
احنا بنحب مصر علشان هى بلدنا
بحلوها ومرها
وتقبلى رأيى أختى العزيزة

S2AH
10-16-2009, 02:47 PM
بجد مش عارفة اقول اية بس فعلا العيب فينا لو كل واحد عمل حاجة ولو صغيرة اوى بلدنا هتقوم تانى
تسلم ايدك على التوبيك الجميل دة