المساعد الشخصي الرقمي

مشاهدة النسخة كاملة : استمتع بقصيدة للشاعر جمال بخيت(مش باقى منى ) و مقدمة فيلم دكان شحاتة



Mohamed Saad Yassin
10-18-2009, 03:32 AM
مش باقى منى
قصيدة للشاعر جمال بخيت



مش باقي مني غير شوية ضي ف عينيا



أنا هاديهوملك




وامشي بصبري ف الملكوت




يمكن ف نورهم تلمحي خطوة




تفرق معاكي




بين الحياة والموت





مش باقي مني غير شوية نبض ف عروقي




خُدي.. وعيشي..




وافتحي لي تابوت




أفرح بريحة ورد فرعوني




وربنا ف عوني




إذا دخلت الجنة ولاّ النار




هاشتاق إلي ضحكتك




وقعدتي ف الدار




والقهوة متحوجة




من طيبة العطار..




ف كل يوم الصبح




باشرب حليب قبطي




وف النهار والمسا




بامسك ستار الكعبة لو سبتي




واثبت إذا هربتي




أهديكي عمري وحسي وجوارحي




أهديكي جرحي




هو اللي باقي ف دنيتي لما خلص فرحي




مش باقي مني




غير شوية لحم ف كتافي




بلاش يتبعتروا ف البحر




بلاش يتحرقوا ف قطر الصعيد




ف العيد




بلاش لكلب الصيد.. تناوليهم




خدي اللي باقي من الأمل فيهم




وابني لي من عضمهم




في كل حارة مقام




وزوريني مرة وحيدة




لو كل ألفين عام




ألم الجراح يتلم




مش باقي مني غير شوية دم




متلوثين بالهم




مُرين وفيهم سم




كانوا زمان شربات




والنكتة سكرهم




شربتهم الخفافيش




في قلب أوكارهم




مش باقي مني غير شوية دم.. ماأقدرشي




أسقيكي.. مواجعهم




وبرضه ما أقدرشي




أرميكي..




وأبيعهم




يمكن ف مرة تعوزي تطلبيني شهيد




هاحتاج يوميها الدم




يمضي علي شهادتي




مش باقي مني




غير شوية قوة ف إرادتي




علي شوية شِعر من خطي




حاسبي عليهم وانتي بتخطي




وانتي ف صبح الدلال




بتعطري شطي..




مش باقي مني




غير شوية ضي ف عينيا




أنا مش عايزهم




لو كنت يوم هالمحك




وانتي بتوطي




في معركة مافيهاش




ولاطيارات ولاجيش




وانتي ف طابور العيش




بتبوسي إيد الزمن




ينولك لقمة




من حقك المشروع




مش باقي مني.. غير




شهقة ف نفس مقطوع..




بافتح لها سكة




ما بين رئة.. وضلوع..




ما بين غبار.. ودموع..




وأنا تحت حجر «المقطم»




ف الدويقة باموت




أنا.. والعطش.. والجوع..




يئن تحتي التراب




وانا صوتي مش مسموع..




ياحلمنا الموجوع..




من المرور ممنوع..




مستني لما يمر




موكب سلاطينك..




مش باقي مني




غير شوية رحمة من طينك..




علي شوية صبر من دينك..




مش باقي مني غير حبة غُنا تايهين




ف الضلمة مش لاقيين




حس الفواعلية..




ولا صوت مراكبي عَفي




فوق المعدية..




ولا صوت بناتي العذاري




في كل صبحية..




والغنوة.. أمنية




«ياما نفسي أقابل حبيبي..




وانا ع الزراعية»..




صوتك وصوتهم غاب..




وانا تحت حجر المقطم.. باموت لوحديّا..




الليلة راحت عيوني




تطل ع البستان..




وجناين الرمان..




رجعت لي توصف عناد الغل والدخان




وسحابة سودا تضلل




علي الغُنا الغلبان..




رجعت لي توصف هبوب الموت




علي الألوان..




رجعت لي توصف..




.. خيال الذل..




ف موائد الرحمن..




مش باقي مني غير شوية كُفر بشروقك




وأنا..




منبع الايمان..




مش باقي مني..




غير شوية ضي..




وعينيا




مش قادرة تلمحني..




في وحدتي محني..




خايف أموت م الخوف




والضعف يفضحني..




...




السجن عشش ف قلبي




وماشي ف شوارعك..




نفس اللي باعني وخدعني




بالرخيص بايعك..




هاشيل حمولي انا




ولا هاشيل حملك ؟!




ماعدت أملك شيء..




فيكي.. ولا فيّا




ولا قيراط ولا بيت..




ولا نسمة صافية تلاغي النيل بحرية..




مش باقي مني




غير شوية حب جارحّني




ولا باقي مني




غير شوية ضي ف عينيا
.........



و مقدمة فيلم


دكان شحاتة


http://www.youtube.com/watch?v=I6I6vcaMLR0

Mahmoud Slem
10-18-2009, 03:39 AM
الصراحة الكلمات جميله جدا
بس كان نفسى اعرف مين اللى بيغنيها
وهما مكتبوش كمان
شكرا ليك يا استاذ محمد

ALY ELSAYED
10-18-2009, 03:40 AM
الله ينور يا استاذمحمد سعد

فيديو رائع

Mohamed Saad Yassin
10-19-2009, 10:34 PM
الصراحة الكلمات جميله جدا

بس كان نفسى اعرف مين اللى بيغنيها
وهما مكتبوش كمان
شكرا ليك يا استاذ محمد



غناها أحمد سعد أخو عمرو سعد

KAREEM
10-19-2009, 10:58 PM
كلمات جامدة فعلا
يا أستاذنا والله
والاحلى صوت احمد سعد
المليان احساس وكله تعبير
عن المعانه والالم اللى
فيه الشعب المصرى
وفكرتنى بأغنية تانية
لأحمد سعد برضو
بحبها برضو عن البطالة
بتاعة مسلسل هيما
شكرا جزيلا ليك استاذنا

AHMED FTIHA
10-19-2009, 11:23 PM
شكرا يا استاز محمد الكلاام مليان معانى كتير اوى واوجاع كتير اوى جزاك الله كل خير

Mohamed Saad Yassin
10-20-2009, 02:30 AM
شكرا على المرور
و على فكرة تم اضافة نص القصيدة

مى رسمى
10-20-2009, 02:58 AM
على فكره الكلمات اكثر من رائعه


بشكرك استاذى الجليل على انتقاء الموضوع الجميل

والفديو الاجمل

بس اللى يسمع ويفهم الكلام بقى

جزاك الله كل خير استاذى

Mohamed Saad Yassin
11-06-2009, 11:43 PM
شكرا على المرور

Ma7amed Adel
11-06-2009, 11:59 PM
جميله جداااااا يا استاذ محمد واختيار رائع لقصيده رائعه

Marwa Mahmoud
11-07-2009, 02:41 PM
جزاك الله كل خير أستاذ محمد