فكره وياريت حد يرد عليا او يقترح عليا اقترح احسن !!!!!

[ahmed ghareeb]

السلام عليكم ورحمه الله وبركاته

كان ليا اقتراح صغير على قدى وده لطلبه 3 مساحه
احنا يا جماعه اول ما اتقبلنا فى الشعبه كان عددنا حوالى 132 طالب فى الشعبه ومن يومين سمعنا ان بقينا حوالى 194 طالب تخيلو العدد ده قد ايه وكلنا عارفين ان احنا مطلوب مننا رسم خرائط فى سنه 3 وفى سنه 4 واحنا بنرسم الخرائط دى على تربيزات وعلى ما اظن ان فى القسم حوالى 3 تربيزات بس دول اللى شفتهم فى مدرج 58 فعدد الطلاب الكبير ده هيقدر يتحمل 3 تربيزات بس ولا كل مجموعه هتقعد تتعارك مع التانيه علشان التربيزه ويبقى شكلنا وحش
اقتراحى .ان شعبه 3 مساحه تقدم طلب لرئيس القسم ان القسم يوفرلنا التربيزات دى ولو ان الموضوع ده منفعش ممكن الرابطه تجتمع بالطلبه بعد محاضره ولا حاجه وتطلب من كل طالب انهم يخدو منو مبلغ معين بحيث ان احنا نجمع فلوس ونعمل تربيزات تانيه على حسبنا وفى الاخر ده لمصلحتنا وهيبقى فى صورتنا احنا لما الدكاتره تقول ان شعبه 3 مساحه هى الكلام ده ده كان اقتراحى وياريت حد يوافقنى فيه او يقترح اقتراح احسن من كده علشان نبدا نتحرك من دلوقتى

[ALY ELSAYED]

والله دي كلام جميل اوي يا احمد

ظبط مع زميلك وكل واحد يساهم بالي بقدر عليه

واكيد الرابطه والدكتور سيد حيدعمكم

ربنا يوفقكم

[Wild_Angel]

والله اقتراح جميل
بس للاسف ممكن فى القسم يقولو الميزانيه متكفيش
بس لو ممكن فعلا اى حد يتبرع مثل الرابطه بأنها تتولى هذا الموضوع وتحاول انها تهدى ترابيزات للدفعه
واتمنى من كل قلبى
ان القسم يعمل مكان للرسم (مرسم )
لاننا بالفعل وجودنا فى طرقة القسم شئ متعب جداً
على الاقل ان المرسم يحوى 10 ترابيزات ويكون جيد التهويه

يا جماعه بجد معظم الدفعات اللى اتخرجت حاولت بكل الطرق حل مشكلة الترابيزات اننا نقسم عددنا على ايام الاسبوع
بس الاقتراحات دى عشان العمل يكون بشكل اسرع وافضل
وأسفه على الاطاله

[Ma7amed Adel]

اقتراح جميل جدا منك ويارب تسعو الى ان تحولو ان تشتروا ويستفيد منها الجميع

[sajen_zenda]

فعلا الاقتراح اللي اقترح الاخ كويس جدا اننا نجمعوا وكده حتي ولو نشتروا تربيزات علي حسابنا اصل فعلا مش هينفع خاصه ان عدد التربيزات 3 وبعين العقل وبحسبه بسيطه لو اتقسموا علي عددنا يبقي مش هنخلص ولا اي شغل هيتم مننا فياريت نبص للموضوع ده بعين العقل شويه وشكرا

[maroooo_14]

والله بجد اقتراح جميل جدا جدا وكمان طالما احنا حندفع فلوس يبقى اكيد القسم حيهتم وانا مستعد للدفع وكمان اول واحد.
كمان لو الموضوع ده حيتم ان شاء الله يبقى طلبة سنة رابعة هى كمان حتشارك اكيد معانا ده لو الموضوع حيخلص على طول عشان هما كمان يستفيدوا بيها كمان

[دندونه]

انا موافقه بجد على الفكره دى وكويس ان فى ناس بتبص وتفكر لادام مش دلوقتى وبس وياريت نلاقى حل بجد لان انا اعرف ناس صحابى كانوا بييجوا من الساعه7ونص الصبح
عشان يلحقوا يخدوا تربيزه فياريت نلاقى حل بجد

[Ahmed Mohamed]

ربنا معاكم وتلاقو حل بجد عشان احنا فكرنا في كده السنة للي فاتت والطلبة احتجت علي دفع فلوس

وطبعا بما ان الطلبة والطالبات امتنعوا يبقي اكيد الاقتراح باظ بس انتم شدو حيلكو

ولو دفعتكم رضت علي الاقتراح ده نفذوا في اسرع وقت عشان تلحقوا

وربنا معااااااااكم باذن الله ويوفقكم

[e4e]

السلام عليكم ورحمة الله وبركاته
فعلاً اخى فى الله الترابزات ده مشكلة كل سنة. والسنة ده الدفعة زاد عددها جداً ووصل الى 234. فعلينا ان نتوصل الى حل عملى يرضى كل الاطراف . وتأكد اننا لن نحصل على موافقة 100% على اى قرار نتوصل اليه بأذن الله.
فالمطلوب الى ان نتوصل الى قرار يرضى الاغلبية ثم المضى فيه انشاء الله.
وكما ذكرت اخى الفاضل الخطوة الاولى هى كتابة طلب وليكن تحت اشراف أحد الدكاترة فى القسم والذى سيتفهم المشكلة انشاء الله او احد السادة المعيدين ومن ثم أخذ تواقيع أكبر عدد ممكن من الطلبة لهذا الطلب. ونرجوا من الله التوفيق.
الحل الآخر لا قدر الله اذا لم يتم الموافقة على الطلب من الممكن محاولة ان نجمع مبلف مالى من الطلاب لشراء ترابيزات اذا وافق ما نسبته 90-95% من الدفعة.
وجزاكم الله خيراً.
وفقنا الله واياكم الى ما يحبه ويرضاه.

[mohamed ali]

بسم الله الرحمن الرحيم
جزاك الله كل خير رغم انك سبقتنى فى عرض هذا الموضوع
وانا وانا اوافق على هذه الاقتراحات

[Ahmed Hosny]

السلام عليكم ورحمة الله وبركاته
انا عارف ان مشاركتى جاية متاخرة بس انت اقتراحاتك جميلة اوى واتمنى انها تتحقق
وشكرا لحضرتك

[ahmed ghareeb]

والله يا جماعه شكرا على ردكم واقتراحتكم بس يا ريت نقفو مع بعض علشان الحكايه دى والوقت ميضعش مننا ونحاول نشوف حل يا اما نكلم رئيس القسم او نعمل التربيزات على حسابنا اكيد الطلبه لو طلبنا منهم فلوس مش هيعارضو علشان ده لمصلحتهم وكمان عايزين يحددولنا مكان نرسم فيه بدل البهدله بتاعت الطرقه دى انا عن نفسى لما كنت فى تانيه وبخبط فى الناس اللى كانو بيرسمو كانو بيزعقولى علشان بوظطلهم حاجات فياريت نشوف مكان للرسم ونبدا نتحرك من دلوقتى

[amoola]

[SIZE="7"]بجدوالله دى فكره جامده موت[/SIZE

[Horiaa Swedan]

الموضوع فعلا مهم جدا بس انا عندى مفجاه يمكن مش كتير اللى يعرفها ان حيجى وقت عليكم حيكون تالته ورابعه شغلين خرايط يعنى ال 3 تربيزات دى حتتقسم على الفرقتين فيارب تقدرو تلقوا حل اما بالنسبه للكتر من 40 طالب اللى دخلوا الشعبه دى فياريت حد يفهمنى الموضوع ده ازاى الفرقه كبرت كده وكل دول جم منين اخر حاجه الواحد وصلها ان تم قبول حتى 29 نقطه لو اخدو اقل من كده ياريت حد يقول

[حب مستحيل]

ياريت والله الكلام ده يكون بجد لان احنا فعلا حنتعب جدا من الشغل على العدد القليل ده من الترابيزات وانا معنديش اى مانع ان احنا نعمل كده بس لازم يكون فى حد مسؤل عن الموضوع ده علشان يتحقق ويارب كل التوفيق

[lolaa fahmy]

اقترح جيد جدا وكويس انك فكرت فيه

بس ياريت يتنفذ واكيد لو شرحنا للطلبه الموضوع هيوافقوا علي التبرع بجزء واحنا عددنا كبير يعني

هيبقي المبلغ المدفوع من كل طالب مش كبير

وده عشان نرتاحوا كمان السنه الجايه

جزاكم الله كل خير ويارب نلاقي حل للمشكله دي

[soso 13]

بجد فكرة جميلة وياريت تتنفذ واكيد محدش من الطلبة ممكن يمانع في الاشتراك معانا لان دي حاجة هتفدنا كلنا وياريت ناخد في الموضوع دا خطوة بجد

[hamza_dodge]

[size="6"] موافقه
[/size جداجداجدا

[دكتور / السيد الزغبى]

شكرا على مشاركتكم الايجابية ومن ناحيتى سا اقوم بعرض الموضوع على الاستاذ الدكتور / محمد الفتحى بكير رئيس القسم واعتقد ان سيادته لن يتاخر فى مساعدتكم وفى حال تعذر القسم فى المساعدة بسبب الموارد المالية ستقوم الرابطة بايجاد حل لهذه المشكلة بالمساهمة المالية مع الطلاب

[Horiaa Swedan]

الله الله الله يا دكتور سيد وهنا الرابطه تضع كلمتها الاخيره

بجد انا بحى حضرتك على روحك المتعونه معانا لانك الاب الروحى لينا وديما الواحد مطمن فى منتدنا هنا بتنا التانى اننا بنلاقى اللى يدعمنا ويثبت خطنا ويفدنا بارائه ونصائحه العظيمه

بشكر حضرتك كل الشكر على مرورك الكريم اللى ازاد الملتقى نورا واشراقا

[bata_batot]

اوووووووووك يا احمد اقتراح جميل بجد

وكده احسن لينا وخاصه بعد ما وصل العدد لاكتر من 200 طالب وبجد مش هينفع 3 تربيزات على العدد ده وكمان المكان مش هيكفى فياريت لو يكون فى المرسم او فى ملحق اداب اوسع من الطرقه

وربنا يوفقنا للخير

[ahmed ghareeb]

والله يا جماعه الله ينور على الردود الكتير دى ويار يت ان كل الكلام ده يتحول لفعل علشان خلاص اهو الترم الاول قرب يخلص واحنا لسه مبداناش فى حاجه يا ريت نعجل فى الموضوع ده وكمان شكرا للدكتور سيد الزغبى على رده وياريت يكمل الجميل اللى هو هيعملهلنا واحنا كمان نقف معاه :downloading:

[KAREEM]

على فكرة فى الحفلة بتاعة
اليوبيل الذهبى لشعبة المساحة
الدكتور أشرف فراج صرح ان فى دعم
مالى جاى بمبلغ كبير مش متذكره حاليا
وهيخض لصالح تطوير الشعبة يجيب اجهزة جديدة
وطرابيزات وحاجات زى دا كدا

يارب يكون خير ووش الدفعة حلو ع القسم

[ahmed ghareeb]

طيب يا كريم يا مسهل ويارب الكلام اللى انت قولتو ده فعلا يكون صحيح و يحصل فى القسم

[boo_mn82]

فكرة كويسة جدا ياريت نبدأ فيها بسرعة علشان الوقت بيجرى وأحسن حاجة أن لو ميزانية القسم ما تقبلش ندفع أحنا أهو نستفيد منها ونكسب ثواب الدفعات اللى بعدينا وياريت واحد يكون هو المسئول عن الكلام ده ويسأل عن التكاليف ويحدد كل طالب يدفع كام ويقسمهم على تالتة ورابعة أكيد كل طالب مش هيدفع كتير علشان العدد ماشاء الله كتير خاصة الفرقة التالتة مساحة كلنا عارفين طبعا أنها السنة دى وصلت للرقم القياسى اللى ما حصلش قبل كدة ولا هيحصل