المساعد الشخصي الرقمي

مشاهدة النسخة كاملة : ****بـــــرمــــــــج عـــــــقــــــلك ****



حسام المصرى
11-07-2009, 04:33 PM
السلام عليكم
اقدم لكم موضوع من حلقات بعنوان برمج عقلك
طبعا لست انا من كتب الموضوع لكنه عبارة عن مجموعه مقالات للدكتور شريف عرفه جمعتها لكم لعلكم تستفيدون وتستمتعون معي بعبقريه هذا الرجل

الحلقه الاولى
برمـج عقلــك!!

أهلا بيكم في الموضوع الجديد ده (برمج عقلك)!

ممكن تستغربوا من العنوان الغريب ده... إيه برمج عقلك ده؟؟
ممكن واحد ييجي يسألني:
هو كمبيوتر ولامؤاخذة؟؟ يعني بدل ويندوز 98 ننزل إكس بي عشان مخنا يمشي أحسن ولا إيه يعني؟
تصدقوني بقى إن هو ده يبقى الموضوع بالضبط؟؟

تعال أسالك سؤال....

لو عندك كمبيوترين من نفس النوع واحد شغال بالإكس بي, والتاني شغال بالدوس.. هتكون كفاءتهم وقدراتهم واحدة؟؟ طيب لو عايز تدخل منتدى مساحة... ينفع تستخدم الكمبيوتر أبو (دوس)؟؟

لأ طبعا.. عارف ليه؟ لأنك علشان تنجح في دخول المنتدى لازم يكون عندك البرنامج المناسب... صح؟

فيه علم ظهر حديثاً اسمه البرمجة اللغوية العصبية.. (نقول برمجة العقل أظرف).. العلم ده قائم على فكرة إنك ممكن تعمل أي حاجة لو عرفت تبرمج عقلك بالبرنامج المناسب.. تخيل؟؟

يعني لازم تحط البرنامج المناسب في مخك عشان تعرف تستخدمه بطريقة أكفأ.. وتوصل للهدف اللي إنت عايزه.

تعال أسألك كمان كام سؤال....

عمرك حسيت إن اللي قدامك مش فاهمك وإنك مش عارف توصل له وجهة نظرك أو اللي إنت حاسس بيه؟؟

حسيت قبل كده إنك تايه ومش عارف تخطط لبكره كويس؟؟

لاحظت إنك مش فاهم والديك وإنهم مش فاهمينك؟؟

عمرك حسيت إنك متضايق كده من غير سبب ومش عارف تعمل إيه؟؟

عايز تطور قدراتك الوظيفية ومش عارف ازاي؟؟

أهي برمجة العقل بقى هي العلم اللي متخصص في حل كل المشاكل دي..

لو إجاباتك لمعظم الأسئلة اللي فاتت هي (أيوه).. إذن الموضوع ده هيعجبك قوي....

تابع معانا

حسام المصرى
11-07-2009, 04:36 PM
يللا نبدأ...

بتكلم نفســك أزاي؟؟؟



هل تعلم.. إننا كلنا بنكلم نفسنا؟؟
طبعا مش قصدي نقف قدام المراية نكلم نفسنا .. بهزر طبعا..
لكن أقصد الحوار اللي بيحصل بينك وبين نفسك وإنت قافل بقك.. فاهم حاجة؟؟

تعالوا نخش في الموضوع..



لم تأتِ خطيبة "زكي" لزيارته في عمله كالعادة.. وكلمها على الموبايل فوجده مغلقا.. فدارت في ذهنه هذه الأفكار:

لماذا لم تأتِ؟!
أكيد متضايقه مني!
متضايقة ليه؟
أكيد لا تحترمني ولا أمثل لها أي أهمية!
لماذا أغلقت هاتفها؟
لأنها لا تبالي بي ولا تريد أن أكلمها لأنني أسبب لها إزعاجا!
إنها لا تحبني!
أنا لا أمثل لها أية أهمية!
حسنا.. أنا أكرهها ولن أتصل بها!!
وسأتشاجر معها كذلك!!

هل لاحظت تسلسل الأفكار التي جالت بخاطره؟؟
لم يحدث أي حوار فعلي بينه وبين خطيبته لتخبره بسبب تأخرها.. تسلسل أفكاره قاده لافتراضات معينة لا ذنب لها فيها أصلا!!

من الممكن أن تكون قد تأخرت لأنها تحضر له مفاجأة، وهاتفها مغلق لأن بطاريته قد نفدت.. ممكن طبعا!!


إيه اللي حصل هنا؟
اللي حصل حاجة اسمها: الحوار الداخلي..


الحوار الداخلي

هو الحوار الذي يدور في ذهن كل منا.. قد نتخيل أننا نكلم شخصا ما ونفترض أنه سيجيب بطريقة معينة قد تؤثر على حكمنا عليه.. أو أننا نجري حوارا بيننا و بين أنفسنا نفترض فيه افتراضات سلبية أو إيجابية.


حكمة:



احذر الحوار الداخلي السلبي، واحذر تأثيره..

حين نتخيل حوارا مع شخص.. فهذا الحوار الوهمي قد يؤثر في حكمنا عليه فعلا.. لذلك حاول أن تفهم الشخص ذاته ولا تفترض فيه افتراضات مسبقة.. ولا تفترض دائما الأسوأ في أي موقف..



اقرأ معي هذا الخبر الغريب:
رجل يقتل زوجته لأنها رفضت السهر!

خبر مرعب طبعا.. لكن لو دققنا النظر سنجد أن السبب الرئيسي لهذه الجريمة ليس رفض الزوجة السهر.. لكن الحوار الداخلي للزوج (الذي يعاني مشكلة نفسية غالبا) هو السبب الرئيسي لما حدث..

ما الحوار الداخلي السلبي الذي دار في ذهنه مثلا؟

لم لا تسهر معي؟
لأنها لا تحترمني..
ألا تعرف أنني رجل البيت هنا؟؟
ألا تقدر ما أفعله من أجلها؟
تصرفها هذا يعني إهانة لرجولتي..
يجب أن أثأر لكرامتي...


في هذا الحوار السلبي افترض أنها أهانت رجولته فأخرج السكين وطعنها (بما أنه يعاني مشكلة نفسية غالبا).. ربما لم تقصد بهذا إهانة رجولته لكن قصدت بهذا الراحة بعد يوم عمل شاق مثلا!!

احذر الحوار الداخلي السلبي.. تعلم كيف تتوقع الأفضل دائما.. اجعل حوارك الداخلي إيجابيا لا سلبيا كي تعيش سعيدا.. هذا هو مفتاح سعادتك مع الناس..



طيب.. ما الحوار الداخلي الإيجابي بقى؟؟

قول إنت بقى.. الدور عليك..

المثالين اللي فاتوا كتبنا مع بعض حوار داخلي سلبي لكل منهما.. اكتب إنت الإيجابي..



لم تأتِ خطيبة "زكي" لزيارته في عمله كالعادة.. وكلمها على الموبايل فوجده مغلقا.. فدارت في ذهنه هذه الأفكار الإيجابية:

حين تأخرت اليوم افتقدتها.. إنني أحبها فعلا..
بالتأكيد تأخرت لأنها تحضر لي خبرا سارا..




أكمل أنت بقية هذا الحوار
لتدرب نفسك على الحوار الداخلي الإيجابي
.....................................
.....................................
.....................................
.....................................
.....................................


رجل عاد للبيت متأخرا فوجد زوجته ترفض السهر..
سيدور في ذهنه هذا الحوار الإيجابي:

لقد أرهقت نفسها اليوم كثيرا من أجلي لأنها تحبني..
لن أجبرها على السهر كي تعرف كم أحبها...



أكمل أنت بقية هذا الحوار
لتدرب نفسك على الحوار الداخلي الإيجابي

.............................
.............................
.............................
.............................

مارس هذا التدريب في كل موقف يمر عليك في حياتك.. تعلم كيف تفترض افتراضات إيجابية تفسر أي موقف يمر عليك.. هل تعلم أن (80 %) من أسباب القلق سببها طريقة تفكيرنا السلبية ولا علاقة لها بما يحدث فعلا؟؟

اجعل كلامك مع نفسك إيجابيا ولاحظ الفرق الذي سيصنعه ذلك لحياتك ولنظرتك للأشياء...


وانتظرونا في العدد القادم من برمج عقلك............... ومنتظر ارائكم اكمل ولا لا

Marwa Mahmoud
11-07-2009, 05:11 PM
موضوع متميز جداا وجديد من نوعة

بحييك على مجهوداتك الجميلة دى

وفى أنتظار المذيد والى الامام دائما

حسام المصرى
11-12-2009, 12:27 AM
يسلموا مروة على المرور وان شاء الله يعجب باقى الاعضاء

alaa eid
11-12-2009, 11:19 AM
الموضوع رااااااااائع
بحييك علي المواضيع الجميلة ديه
وان شاء الله مستنية باقي الموضوع
الي الامام دايما
جزاك الله كل خير

ahmedko
11-12-2009, 11:30 AM
موضوع جميل احييك عليه اخ كريم
و فى انتظار باقى الحلقات

حسام المصرى
11-12-2009, 12:33 PM
الموضوع رااااااااائع
بحييك علي المواضيع الجميلة ديه
وان شاء الله مستنية باقي الموضوع
الي الامام دايما
جزاك الله كل خير


واياكم يا الاء ويسلموا على مرورك وكلامك الجميل ده


موضوع جميل احييك عليه اخ كريم
و فى انتظار باقى الحلقات


يسلموا احمديكو بس ممكن اسألك فى سؤال هو احمديكو ده اسم روسى زى ابراهيموفيتش كده مثلا

حسام المصرى
11-12-2009, 12:43 PM
الحلقة التانية

طريقة تفكيرنا لها تأثير كبير على حياتنا و الأحداث التى تحدث لنا نتيجة هذا التفكير سواء ايجابياً أو سلبياً

و فى القرآن الكريم

يا أيها الذين آمنوا اجتنبوا كثيراً من الظن إن بعض الظن إثم ولا تجسسوا ولا يغتب بعضكم بعضا
الى آخر الآية

اذن فالظن السيئ قد يؤدى بالانسان الى ارتكاب الآثام
فكما يشرح كاتب الموضوع اذا اتصلت بى صديقة و لم أرد عليها
من الممكن أن تسئ بى الظن و تتهمى بالتكبر و التعالى و هى لا تعرف أننى لم أسمع رنين الهاتف مثلاً
او لو انقطع اتصالى بها لفترة كبيرة
قد تظن أننى أتجاهلها و هى لا تعرف أننى أمر بظروف نفسية صعبة تمنعنى من الحديث مع أى أحد و من ثم قد يحدث خلاف بينى و بينها بلا داعى

أعتقد يا ضحى أن العقل يجد مكانه هنا
فالعقلاء هم فقط من يحسنون الظن
و المطلوب هو الاعتدال فلا نسيئ الظن طوال الوقت فنرتكب الآثام و نقطع علاقتنا بمن نحبهم
و كذلك لا نحسن الظن فيما هو واضح وضوح الشمس فنصبح كالبلهاء

حقــــــــــــق هــــــــدفــــــــك (1)!!





هل محدد أهدافك؟
هل تعرف بالضبط إنت عايز تعمل إيه؟
هل ماشي في طريقك ومش بتحود يمين أو شمال؟


مسألة تحقيق الأهداف دي من المسائل اللي اتكتب فيها كلام كتير واللي تهم كل واحد مننا طبعا..
عشان كده قلت إننا لازم ندردش حواليها شوية..


الموضوع ده ينقسم لقسمين..
أولا: اكتشاف الأهداف نفسها..
ثانيا: العمل على تحقيقها..


هنتكلم المرة دي عن اكتشاف أهدافك


أولا: اكتشف أهدافك


ماينفعش نحقق أهدافنا واحنا مش عارفين هي إيه أساسا.. عشان كده لازم نركز في معرفة أهدافنا الأول..


فيه كذا طريقة ممكن بيها نعرف أهدافنا.. هاديلك هنا أبسطها..
الموضوع ده ممكن ياخد كذا يوم.. ماتستعجلش يعني

في اليوم الأول:
جيب ورقة فاضية واكتب فيها كل اللي نفسك فيه.. كل أهدافك وأحلامك..
ماتحطش أي قيود.. وسيبك من اللي يقول لك: "احلم على قدك" عشان الجملة دي بتاعة الناس الفاشلين في حياتهم.. وهتحد من قدراتك وتطلعاتك..
وبعدين انسَ الورقة دي النهارده.. كمل يومك عادي وارجع لها يوم تاني..

في اليوم الثاني:
ارجع للورقة واقرا الأهداف اللي كتبتها.. هتلاقي إن فيه حاجات مالهاش لازمة أو مش مهتم بيها قوي.. اشطبها أو عدلها.. اتأمل الورقة شوية وبعدين سيبها.. ارجع ليها بعدين!!


في اليوم الثالث:
بص في الورقة بتاعة أهدافك.. كلها حاجات مش بطالة، مش كده؟؟
ابتدي بقى رتب الأهم فالأهم.. رتبها حسب أهميتها ليك ولحياتك.. والغي أي حاجة مالهاش لازمة لو لقيت..

بص في الورقة كويس.. وبعدين سيبها وارجع ليها بعدين!!


في اليوم الرابع:

ارجع لورقتك.. حدد أهم أهداف من اللي إنت حاططها في الأول وحاسس بأهميتها..
خد لك هدفين أو تلاته تبتدي بيهم... وبعدين اكتب:
1- ما الأسباب اللي خلت ده هدفك؟
2- ما النتائج الرائعة التي ستحصل عليها إذا حققت هذا الهدف؟

اكتب في كل نقطة على الأقل خمسة أسباب.. اكتب عشرة, عشرين لو عايز.. اكتب على قد ما تقدر..

السؤالين دول لما تجاوب فيهم كتير عارف بيعملوا إيه؟

بيزودوا عندك الرغبة في تحقيق الهدف.. لأنهم بيساعدوك على تخيله والتركيز على فوايده في حياتك.. بتبرمج عقلك اللاواعي على أهمية الهدف ده والسعي إليه..
الرغبة الحقيقية دي هي أول خطوة فعلية في تحقيق هدفك..

دي إحدى الطرق البسيطة اللي ممكن تحدد بيها أهدافك.. فيه طرق تانية طبعا هنبقى نقولها (احنا ورانا حاجة؟) لكن خلينا في دي..

في العدد ده عملنا خطوتين مهمين:
تحديد الهدف.
غرس الرغبة في تحقيق الهدف.


العدد الجاي هنتكلم عن خطوات تحقيق الهدف نفسه.. ابقوا قولوا لينا أهدافكم اللي طلعتوها بالتجربة دي عشان ندردش عنها المرة الجاية..
"تشاو" يا شباب.

MUHAMED SAMY
11-12-2009, 10:10 PM
موضوع جامد طحن ........يا د.ابراهيم الفقى قصدى ياحسام

Ma7amed Adel
11-12-2009, 10:18 PM
موضوع رائع جدااااااااا جزاك الله خيرا يا حسام وبجد مواضيعك كلها رائعه وفى انتظار المزيد من المواضيع الرائعه دى

حسام المصرى
11-16-2009, 04:17 PM
حقـــــــــــــق هدفــــــــك (2)!!



هل حددت أهدافك في الحلقة اللي فاتت؟
هل عرفت فعلا إنت عايز تعمل إيه ورتبت أهدافك حسب الأهمية؟

تعالَ بقى نخش في الموضوع:

كيف تحقق هدفك اللي حددته؟؟

في الأول تعالَ نتكلم عن أنواع الأهداف..

أولا: أهداف طويلة المدى:
زي: عايز أكون دكتور – عايز أطلع ضابط – عايز أكون مليونير....
ودي بتاخد وقت كتير عشان تتحقق..

ثانيا: أهداف متوسطة المدى:
عايز آخد الدورة الفلانية – عايز أسافر...
ودي بتاخد وقت أقل شوية عشان تتحقق..

ثالثا: أهداف قصيرة المدى:
زي: عايز أشتري بنطلون - عايز أزور فلان...
وده بيحتاج خطوات بسيطة وممكن يتحقق في فترة قصيرة..


وإليك كيفية تحقيق أهدافك:

1-وضع إطار زمني:

عشان تبتدي تحقق أهدافك لازم تعرف نوعها.. هل هي طويلة أم قصيرة أم متوسطة لوضع إطار زمني لتحقيقها.. ماتسيبيهاش مفتوحة.. حط تاريخ محدد باليوم والشهر لتحقيق الهدف..

2- تقسيم الهدف:

لو كان هدفك طويل المدى قسمه لأهداف قصيرة أو متوسطة.. وحط لكل واحد منها إطار زمني لتحقيقه.. خلّي بالك دي أهم نقطة.. لو ماحددتش وقت معين لتحقيق أهدافك هتطنش عليه خالص وتنساه..



الهدف طويل المدى: أكون دكتور..

يتقسم لأهداف:

متوسطة: أعمل جدول مذاكرة لكل أسبوع - أذاكر وأجيب مجموع لا يقل عن 98 %.
قصيرة: لازم أخلص الفصل الخامس النهارده عشان أراجعه بكره تاني.

3 – أسلوب الخطوة:

ماتسمحش لنفسك تنام بالليل مستريح, لو في اليوم ده مامشتش خطوة (ولو بسيطة) تقربك من هدفك.. كل يوم لازم تكون قربت من هدفك ولو خطوة واحدة..



الهدف: أتعلم فرنساوي..
الخطوات:

أسأل عن المراكز اللي بتدرسه (خطوة)
أعرف مكانها (خطوة)
أسأل عن أسعارها (خطوة)
وبكده هتلاقي نفسك بتقرب من هدفك واحدة واحدة لحد ما في النهاية تلاقي إنه اتحقق...

4- التقييم:

بعد ما تمشي في الخطوات السابقة بتاعتك.. بص على النتائج اللي حققتها وقيم نفسك.. هل إنت ماشي لطريقك بمعدل كويس؟ هل ممكن تكون أسرع من كده؟ هل إنت راضي عن أسلوبك؟
هل فيه طريقة أحسن من دي تقربك من الهدف؟

قيم نفسك كل فترة (كل أسبوع مثلا) وشوف إنت عملت إيه وقربت لهدفك قد إيه..
لو راضي عن أدائك: كمل وربنا معاك يا بطل..
لو مش راضي عن أدائك: اعرف الخلل فين بالضبط.. هل عدم التزام منك؟ هل أسلوبك غلط؟ هل فيه طرق أحسن؟ عدل اللي إنت عايزه وارجع تاني كمل مشوارك...

5 – الفعل:

لازم تنفذ كل الخطوات السابقة بالتزام تام.. لازم تعمل مش مجرد إنك تفكر في الخطوات دي وماتعملش بيها.. قرر وإنت قادر إنك تبدأ تحقق حلمك.. لو بدأت فعلا تمشي ناحيته..

6 – الإيمان:

مافيش حاجة اسمها الظروف.. كل العقبات اللي هتواجهك دي لازم تلاقيها لو إنت ماشي في طريقك صح.. لو مافيش أي عقبات يبقى مش هتحقق أي حاجة... كل ما تقاوم الظروف أكتر, كل ما نجاحك هيكون أروع وأفضل.. وطول ما إنت مع ربنا هينصرك لأنه فوق كل الظروف وكل العقبات.. لو هو معاك هيوصلك لأي هدف لأنه فوق الأسباب...

7- تصرف وكأنك حققت هدفك فعلا:

تخيل دايما نفسك وإنت عايش حلمك.. وعيش الحلم ده فعلا.. حس إنك حققته فعلا واتصرف على هذا الأساس.. تخيل مثلك الأعلى وهو محقق الحلم ده.. وراقبه... بيتكلم ازاي؟ بيفكر ازاي؟ بيتصرف ازاي؟ بيلبس إيه؟ اعمل زيه –من الآن– في كل الحاجات اللي اتقالت دي..

تخيلك ده هو اللي هيبرمج عقلك اللاواعي عشان يوصلك لهدفك اللي إنت بدأت تعيشه فعلا..

وألف مبروك يا شباب على تحقيق أهدافكم..
ونتقابل الحلقة الجاية...

MUHAMED SAMY
11-25-2009, 12:16 AM
جااااااااااااااااااااااااااااااامد.....