المساعد الشخصي الرقمي

مشاهدة النسخة كاملة : مين مش هيعمل بطاقة انتخابية ؟؟؟؟؟؟؟؟؟؟



KAREEM
01-28-2010, 04:26 PM
سلامو عليكو

فاضل لحد 31 يناير فقط عشان تعمل
بطاقة انتخابية وعشان تعمل بطاقة
لازم تروح القسم بنفسك

الحمد لله العملية كانت سهلة بالنسبة لى

رحت أول يوم كان يوم عيد الشرطة
وكانوا معلقين نور وبيحتفلوا بعيد الشرطة

العسكرى ع الباب قاللى تعالى الساعة 8

انا قلت بيبعتونى دول ولا ايه ؟؟؟؟؟


المهم سمعت الكلام ورحت بالليل ع الساعة 8

طلعوا بيشتعلوا زى الموظفين عادى
من 8 الى 2 ظ
ووردية باليل ساعتين
من 7 الى 9 م

المهم الموظف فضل يدور فى
الدفاتر وانت
ساكن فين ؟؟؟
واتولدت فين ؟؟؟

خلى بالكوا عشان بتخلف !!!!!!
يعنى لو اتولدت فى البيت قول له
اتولدت فى البيت
لو اتولدت فى مستشفى قول له
المستشفى انهى ؟؟؟؟
لو اتولدت فى تاكس حتى

المهم خدت ورقة فيها بياناتى
ورقم القيد بتاعى دا أهم حاجة

وتعالى بكرة يامعلم عشان لختم طبعا
مش بيبقى موجود بالليل
المهم رحت النهاردة
والموظف استلمنى من على
باب القسم
فاكرنى !!!!!!

تعالى مش انت اللى كنت عايز تعمل بطاقة
و ملالى البيانات كلها تمام
وقال لى : مع ان والله الظابط واقف موضوع
البطايق دا خالص بس انا مقدرش اقول لك
لأ انت مش من القبارى ؟؟ ابن منطقتى يعنى

وتعالى ورايا عند الظابط عشان اختمها لك
دخلت
سلامو عليكو
ممكن اختم دى لو سمحت

راح مشاور لى ع الختم
لقيت الموظف جاى
من ورايا وسحب الختامة
وختم بنفسه
اتارى الظابط وافق
بس المفروض ان انا
اختمها لنفسى

لكيت كتير عارف

بس المهم انى فرحان جدا
انى طلعت بطاقة انتخابية
كانى خدت شهادة التخرج

وحاسس ان كل اللى مش حيطلع
بطاقة انتخابية قبل 31 حيندم بعد كدا

مين عاااااااااااااااااالم ؟؟؟؟؟؟؟!!!!!

بالرغم من الاشراف القضائى
اللى اتلغى من ع الانتخابات

يمكن يعملوا رقابة دولية

وبعدين يبقى كدا كدا الواحد عمل
اللى عليه ومفرطش فى صوتى
واديه للى يستحقه وان لم يوجد
فسوف امتنع عن التصويت


دلوقتى بقى


بسأل السؤال

عملت بطاقة انتخابية ؟؟؟؟؟


طب حتروح تعملها ؟؟؟؟؟؟؟؟؟
( ياعمى كدا كدا ملهاش لزمة )


يلا مستنى أرائكم ياااااا
أهالى المنتدى الكرام

MUHAMED SAMY
01-28-2010, 04:32 PM
كيمو يعنى انت استلمتها وانت واقف....اصل لما رحنا قلنا تستلموها فى شهر5 ....وعندنا مدورش فى الدفاتر ولا حاجة...؟؟؟؟
هم كده بيشتغلونا ولا ايه...واخيرا كان نفسى تعمل الموضوع بدرى عن كده زى ماعملناه ع الفاس بوك...اللهم ولى من يصلح

http://www3.0zz0.com/2010/01/02/11/298166906.gif

KAREEM
01-28-2010, 04:41 PM
كيمو يعنى انت استلمتها وانت واقف....اصل لما رحنا قلنا تستلموها فى شهر5 ....وعندنا مدورش فى الدفاتر ولا حاجة...؟؟؟؟
هم كده بيشتغلونا ولا ايه...واخيرا كان نفسى تعمل الموضوع بدرى عن كده زى ماعملناه ع الفاس بوك...اللهم ولى من يصلح

http://www3.0zz0.com/2010/01/02/11/298166906.gif


اه انت لو رحت الصبح
حتستلمها وانت واقف

بس انت لو جيبت رقم القيد
بتاعك حتبقى العملية سهلة
بعد كدا حتى لو عدت المدة
ممكن تروح تاخدها وتختمها فى
اى وقت بعد كدا طول ممعاك
بياناتك اللى خدتها منه
وممضى عليها من الموظفين

على فكرة انا واخد فكرة الموضوع منك فعلا
بس مشكلتنا فعلا بنزنق نفسنا على اخر
حاجة حتى فى الامتحانات مبنذاكرش الا
قبليها بيوم

وعندك حق احنا تعبنا من كل الاحزاب والجماعات
والكلام دا وكله بيضرب فى بعضه
ونفسنا حد مستقل يستاهل يرشح
نفسه ويكون عايز يخدم بجد

ساعات كنت بشوف ناس مستقلة بتشرشح نفسها
بس مفيش دعايا كويسة !!!!!

حسام المصرى
01-28-2010, 04:42 PM
موضوع حلو يا كريم

انا مش هروح فى انتخابات مجلس الشعب بصراحة

بس بأذن الله هروح فى انتخابات الرئاسة 2011

حسام المصرى
01-28-2010, 04:44 PM
اه صح يا كريم نسيت اقولك

مثلا كريم مرشح نفسه ضد محمد

وكريم لازم ينجح بالطول او بالعرض

بتروح عند اللجان تلاقى عربيات نقل
بتفضى الناس عند اللجان والناس تدخل وعارفة

رمز الجمل اديله احسن ما يطلع عينه

وفى الاخر النتيجة معروفة والناجح يرفع ايده

حسام المصرى
01-28-2010, 04:45 PM
واسمحلى اقولك الخطوات يا كيمو وسورى انا رديت كتير ورا بعض


خطوات استخراج البطاقة الانتخابية:

1. اذهب الى قسم الشرطة التابع لمحل سكنك.

2. اذهب للمكتب المسؤول عن البطاقات الانتخابية.

3. أطلب من الموظف عمل بطاقة انتخابية, وأحرص على وجود صورة بطاقة الرقم القومى و صورة شهادة الميلاد معك.

4. أذا كنت من مواليد 1989 - 1991:
أ. سيتم البحث عن أسمك داخل الكشوفات الجديدة.
ب. موعد استلام البطاقة سيكون خلال ثلاثة أو أربعة أشهر من الان.

5. اذا كنت من مواليد أى عام قبل 1989:
أ. سيتم البحث عن أسمك داخل الكشوفات القديمة.
ب. تسليم البطاقة سيكون بعد 10 دقائق.

6. اخر موعد لعمل بطاقة انتخابية هو 31 يناير 2010 .

KAREEM
01-28-2010, 04:59 PM
اضافة جميلة جدا يا حسام
بس انا مواليد 90 واستلمتها
خلاص مش عارف بقى ايدا ؟؟؟

وحزين لنبرة عدم التفاؤل الموجودة فيك ؟؟؟
دا هى دى الحاجة الوحيدة اللى فاضلة لنا
( التفاااااااااؤل مهما كاااااااااااااااااان )

اتمنى انك تعملها يمكن تغير رأيك
او وقتها يحصل حاجة تخلي صوتك
يبقى ليه قيمة فعلاااااااا

MUHAMED SAMY
01-28-2010, 05:03 PM
بالنسبة لاستلام البطاقة تقريبا حسب القسم يعنى اول منتزة وانت واقف...وتانى منتزة فى شهر5

MUHAMED SAMY
01-28-2010, 05:11 PM
http://www.youtube.com/watch?v=DH0RaX2G5G0

حسام المصرى
01-28-2010, 05:20 PM
بص يا كريم الدائرة اللى انا فيها مفيش فيها حد عدل للاسف
واسأل محمد وهو يقولك

الاتنين اللى نجحوا واحد بيعمل دورات رمضان والتانى محدش بيسمع عنه حاجة رغم ان ابنه كان معايا فى الفصل ههههههههه وكان فاشل فشل ذريع طالع للابوه واضح مع ان ابوه نجح يوصل للكرسى بس يمكن علشان تبع الاخوان

ما علينا

يا كريم انا علشان ارشح حد لازم اكون راضى عنه

وبما انى مش راضى

مش هرشح حد

ويا ريت والله الشعب كله يقاطع الانتخابات لان فى عدد معين لو الانتخابات موصلتش ليه تتلغى

وساعتها هيتم مناقشة الاسباب الحقيقة وراء امتناع الناس عن التصويت

مع ان الناس لو امتنعت عن التصويت

هتلاقى مكتوب 60 مليون شاركوا فى الانتخابات ولا حياة لمن تنادى

بالنسبة للانتخابات الرئاسة هى دى الامل والحل الوحيد

لان لو التغير جيه من فوق
يبقى تحت هيتغير رسمى نظمى فهمى

ولما نشوف مين هيرشح نفسه فى الانتخابات الجاية

ادى البرادعى قال مش هيرشح نفسه خلاص

MUHAMED SAMY
01-28-2010, 05:42 PM
انا بصراااااااحة فى انتخابات مجلس الشعب فى واحد قريبى لو نزل هرشحه...بس صعب انه يكسب..

KAREEM
01-28-2010, 06:10 PM
انا بصراااااااحة فى انتخابات مجلس الشعب فى واحد قريبى لو نزل هرشحه...بس صعب انه يكسب..


هههههههههههههههههههههههههههه
وانا اللى فكرتك بتدور على حقك بجد
بس لو انت مقتنع بقريبك فعلا
بدون عواطف يبقى صوت له

وحسام
مش متخيل ان التشاؤم يطلع من
شخصية زيك معهدناش عليها كدا
بس برضو متقدش الامس يمكن
حد يرشح نفسه يكون عليه القيمة

ومتحطش أمل أوى كدا فى انتخابات الرياسة

MUHAMED SAMY
01-28-2010, 08:35 PM
اهو واحد فى سننا وبيكلم فى السياسة....الله ينور عليك ياشيكو


http://www.youtube.com/watch?v=c9rg-6QzsQk

Wild_Angel
01-28-2010, 08:41 PM
اولا احييكم على الموضوع ومناقشته
وبجد ده إن دل فيدل على ان الشباب واعى حقيقي

مش عارفه بقى والله يا كريم حروح ولا لا
وخصوصا انى اتعقدت من القسم لما روحت عملت بطاقه
عشان لقيت ظابط بيضرب مواطن كان واقف بيعمل بطاقه
ومن ساعتها مخنوقه من الظباط بصراحه

بس اتمنى انى احاول اعملها قبل ما المده تخلص لو لقيت حد فى البيت ممكن يشجعنى

KAREEM
01-28-2010, 09:13 PM
اولا احييكم على الموضوع ومناقشته
وبجد ده إن دل فيدل على ان الشباب واعى حقيقي

مش عارفه بقى والله يا كريم حروح ولا لا
وخصوصا انى اتعقدت من القسم لما روحت عملت بطاقه
عشان لقيت ظابط بيضرب مواطن كان واقف بيعمل بطاقه
ومن ساعتها مخنوقه من الظباط بصراحه

بس اتمنى انى احاول اعملها قبل ما المده تخلص لو لقيت حد فى البيت ممكن يشجعنى


شجعى انتى اللى فى البيت
انا خايف اللى ميملش بطاقة
انتخابية يندم خاصة انهم بيعاملونا
فى القسم أحسن معاملة
زى مبقول لك الموظف اللى استلمنى
من ع الباب دا مكنش عايز منى
ولا هدية ولا رشوة ولا اكرامية خااااااالث
:D :D :D

والله الواحد بيعمل اللى عليه

وحاولى انتى تشجعى اللى فى البيت
متستنيش هما اللى يشجعوكى

وشكرا لمرورك الكريم دا

الورده البيضاء
01-28-2010, 09:44 PM
مبروك عالبطاقة ياكريم
وان شاء الله هاعملها قبل الفترة المتاحة ماتخلص
بس يارب اعرف

دكتور / السيد الزغبى
01-28-2010, 11:39 PM
احلى موضوع حقيقى تستحق عليه جائزة بجد ليك تكريم ياكريم فعلا مطلوب ايجابية ومافيش مبررات للسلبية تحت اى ظروف احيك ياكريم وبهذه المناسبة ادعو الجميع لسرعة استخراج البطاقة الانتخابية خلال المدة الباقية والعملية سهلة جدا كما ذكر الابن العزيز الجميل كريم فالمشاركة السياسية مهمة جدا حتى لو كان يعتقد الكثير انها مش ضرورية لكننى اقول لابد من ترسيخ ثقافة المشاركة السياسية وده للمستقبل مرة تانية احييك ياكريم ولك جائزة اهم موضوع عام على المنتدى ستمنح لك فى اقرب مناسبة

KAREEM
01-28-2010, 11:57 PM
احلى موضوع حقيقى تستحق عليه جائزة بجد ليك تكريم ياكريم فعلا مطلوب ايجابية ومافيش مبررات للسلبية تحت اى ظروف احيك ياكريم وبهذه المناسبة ادعو الجميع لسرعة استخراج البطاقة الانتخابية خلال المدة الباقية والعملية سهلة جدا كما ذكر الابن العزيز الجميل كريم فالمشاركة السياسية مهمة جدا حتى لو كان يعتقد الكثير انها مش ضرورية لكننى اقول لابد من ترسيخ ثقافة المشاركة السياسية وده للمستقبل مرة تانية احييك ياكريم ولك جائزة اهم موصوع عام على المنتدى ستمنح لك فى اقرب مناسبة


اوباااااااااااااااااااااااا
دا كلام كبير اوى عليا
وكمان جايزة :animation343py::animation343py:
حضرتك شوقتنى والله يا دكتور

بس اعذرنى مش حقدر ارشح نفسى السنة دى
لسه ورايا دراسة ومعدتش السن القانونى تقريبا :D

بجد كلام حضرتك هو أكبر تكريم ليا
وفعلا كان المقصود من الموضوع
توضيح سهولة العملية دى
وتنشيط حتة الايجابية شوية

ادى المنتخب كسب والناس هيصت
وخارجة فى الشوارع وقالبين الدنيا

هل انتمائنا كله هنلخصه فى ماتش كورة ؟؟؟؟!!!!!

لا وألف لا
احنا لينا دور أكبر من كدا
بكتيييييييييييييييييير

الكلام خدنى اوى :donatello: !!!


بشكر حضرتك لمرورك
اللى شرف الموضوع

KAREEM
01-29-2010, 12:06 AM
مبروك عالبطاقة ياكريم
وان شاء الله هاعملها قبل الفترة المتاحة ماتخلص
بس يارب اعرف


شكرا لمرورك يا امل
ويلا انتى عديتى ال 18
شدى حيلك قبل 31

KAREEM
01-30-2010, 12:51 AM
ايه يا جماعة
اخر ميعاد بكرة

حد رايح ولا ايه
؟؟؟؟؟؟؟؟؟

alaa eid
01-30-2010, 01:00 AM
بصراحة انا شايفة اللي هما عايزينه ينجح ولا ببطاقة او من غير
فأنا عمري ماروح اعمل بطاقة لان مالهاش لازمة بصراحة
علشان صوتنا ف الاخر مش بيهم
شكرا ليك ع الموضوع

KAREEM
01-30-2010, 02:58 PM
بصراحة انا شايفة اللي هما عايزينه ينجح ولا ببطاقة او من غير
فأنا عمري ماروح اعمل بطاقة لان مالهاش لازمة بصراحة
علشان صوتنا ف الاخر مش بيهم
شكرا ليك ع الموضوع


لا يأس مع الحياة
ولا حياة مع اليأس

شكرا لمرورك الكريم

حسام المصرى
01-30-2010, 11:45 PM
هههههههههههههههههههههههههههه
وانا اللى فكرتك بتدور على حقك بجد
بس لو انت مقتنع بقريبك فعلا
بدون عواطف يبقى صوت له

وحسام
مش متخيل ان التشاؤم يطلع من
شخصية زيك معهدناش عليها كدا
بس برضو متقدش الامس يمكن
حد يرشح نفسه يكون عليه القيمة

ومتحطش أمل أوى كدا فى انتخابات الرياسة

كيمو احنا مصر غير اى بلد

التغير فى اى بلد والبناء بيبدأ من تحت لفوق

عندنا لازم العكس
والا مفيش امل ولا عمر ولا نور حتى ولا مهند

صدقنى

الامل
والحرية الحقيقية
فى انتخابات الرئاسة 2011
لو مفيش تغير فيها

يبقى خلاص

MUHAMED SAMY
05-28-2010, 12:29 AM
الحمد لله استلمتها النهارده


انت استلمتها ولا لسسسسسه؟؟
:a27:

KAREEM
06-02-2010, 11:57 AM
الحمد لله استلمتها النهارده


انت استلمتها ولا لسسسسسه؟؟
:a27:




هههههههههههههههههههههههه
مبروك يا سمسم
على فكرة انا مستلمها فى يوميها وانا واقف
بس مش عارف حاسس ان مبقاش ليها قيمة دلوقتى
واولها فى انتخابات الشورى اللى معرفتش ارشح حد فيها
عارف ليه ؟؟؟؟؟؟؟ عشان مفيش غير واحد وطنى نزل
وفاز بالتزكية
مابالك بقى مجلس الشعب
ربنا يدينا ويديك طولة العمر

MUHAMED SAMY
06-02-2010, 06:03 PM
هههههههههههههههههههههههه
مبروك يا سمسم
على فكرة انا مستلمها فى يوميها وانا واقف
بس مش عارف حاسس ان مبقاش ليها قيمة دلوقتى
واولها فى انتخابات الشورى اللى معرفتش ارشح حد فيها
عارف ليه ؟؟؟؟؟؟؟ عشان مفيش غير واحد وطنى نزل
وفاز بالتزكية
مابالك بقى مجلس الشعب
ربنا يدينا ويديك طولة العمر



انا بصراحة رشحت اتنين معرفش
اساميهم ايه؟:a28:
وعارف انهم موش هينجحوااا
بس عاادى يعنى
وبصراحة الاهتمام كله كان يمرشح الوطنى
واحلى حاجة عجبتنى وانا دااخل على المدرسة
لقيت مشغااالين
اغنية شادية للى تيع الوطنى برده
اصل كان موجود وقتها فى المدرسة دى
اكتر حاجة نرفزتنى ان فى
ناس من اللى تبع الوطنى سالونى انا وصاحبىواحنا داخلين
انتو من شياي الحزب
قلنا لالالالالالالالا
طب هترشحووووو ميييييين؟؟؟؟
قلنا ليه وقعدت تكلم شوية
ولما مريحنهاش فى الكلام قلتنا
طب يالا بقى دورتو على لجنتكم؟؟؟؟؟
حبيبتى أمصر

mohamed ali
06-02-2010, 10:21 PM
الناخبين يرشحو اللى يعجبهم

بس الحكومة بتنجح اللى عايزاه ينجح

انتا فى بلد ديموقراطى

mo_medya
06-07-2010, 12:52 AM
بصراااااااااحة ونعم الديمقراطية
يعنى اللى ما يطلعشى البطاقة الانتحابية لحد 31 يناير مش حيطلعها
ولو طلعها يعنى حيعمل إيه؟
ده أنا حتى سمعت من واحد صاحبى أن الانتخابات خلصت السنة اللى فاتت وعرفوا مين اللى فازوا فى الانتخابات
بس بيعيدوها فيديو
علشان ما حدش ينسى ويقول ما حصلش

KAREEM
06-07-2010, 12:34 PM
على رأييييييييييييك
والله بجد حاسس انى طلعتها ع الفاضى
كان نفسى احضر ايام ما القضاء كان بيشرف
ع الانتخابات عشان يبقى صوتى يبقى ليه قيمه
دى انتخابات الزمالك واى نادى اخر اشرف
من انتخابات مجلس الشعب ... عارفين ليه ؟؟؟
لان عليها اشراف قضااااااااااااائى
الحاجة الوحيدة الشريفة اللى لسه ساندة البلد
حتى الاااااااااااااااااااااااان
شكرا لمروركم جميييييييييييعا :a18: