المساعد الشخصي الرقمي

مشاهدة النسخة كاملة : نصيحه :- اوعى تقف لـ بنت فى المترو ؟؟؟؟؟



حسام المصرى
02-18-2010, 09:45 PM
صباحـ الفلـ ومساء الورد .. بتوقيت الى جى



نخش فـ الموضوع ع طول

ياجماعة احنا لازم نعمل وقفة .. من اللى هيه كده

دلوقتى الأخت سحر الجعارة تطلع تقول ان المرأة لها نفس حقوق الرجل في المجتمع،

والأخت إيناس الدغيدى تطلع تقول ان الراجل همجى مش بيعرف في المرأة غير جسمها،

والأخت إقبال بركة تقول إن مصدر جمال المرأة هو عقلها مش جسدها ولازم التعامل معاها كعقل بدون النظر إلى الجسد
ده باعتبار ان الواحدة تبقى ماشية في الشارع وواحد بقى يعاكسها يا ابو عقل جامد..ياواد انت ياابو مخيخ ملبن .. حوش شعرك عشان نشوف جمال عقلك يا قمر
والواحد بقى يكلم صاحبه وهما شايفين بنت ماشية .. شفت ياد العقل اللى لابس أحمر ده ؟؟ !!

والأخت هالة سرحان بيجيلها تخلف عقلى لو سمعت ان راجل قال لمراته حضَّرى العَشا
باعتبار ان العشا رجس من عمل الشيطان !!

والأخت العزيزة سعاد حسنى قالت البنت زى الولد ماهيش كمالة عدد..ومش عارف مين قال ان البنت كمالة ؟؟ !!

والأخت عبير صبرى ربنا يهديها تقول ازاى الراجل المتوحش القاسى التنين اللى بيطلع نار من مناخيره بيتعامل مع الأنثى اللى هيه نسمة ماشية ع الأرض يا ولداه !!

طبعا انا باعدى الكلام ده لأنى عارف الولد المحترم بيعامل البنت المحترمة ازاى .. والزوج المحترم بيعامل الزوجة المحترمة ازاى
ومش محتاجين نصايح اسم الله على جمالهم وأدبهم اللى فاتوا

المشكلة بقى

مادام بيقولوا البنت زى الولد..أنا ليه باقف في المترو عشانهم بقى ؟؟
أيوة اوعى تمشى استنى .. دى مشكلة كبيرة مش صغيرة..
يعنى أنا لما اركب المترو كام مرة في اليوم وكل مرة اكتشف انى لازم اقف عشانهم تبقى مشكلة

http://img704.imageshack.us/img704/346/81694300.png


أدخل المترو في أمان الله واقعد بعد جهد جهيد وانا شايف واحدة موظفة مع صاحبتها راجعين من الشغل وصحتهم زى الفل ..
وقاعدة تحكى لها ازاى تعمل محشى الكوسة وقاعدة تقور في الهوا يمين وشمال عشان يبقى الشرح عملى وصوتها عالى ..
واول ما تدخل المترو تلاقى الشلل الرعاش حلّ عليها.. وعينيها مش قادرة تفتح من الإرهاق وتيجى هيه وصاحبتها قدامى بالظبط وتعلـّى صوتها
وتقول لصاحبتها:
معدتش باقدر أقف كتير يا سنية ..
ترد عليها زميلتها واللبانة ف بقها :
ومين سمعك يا حبيبتشى ..
الدكتشور قال لى انى لو وقفت على رجلى خمس دقايق هارجًّع ع اللى قدامى علطول

وللا البنت اللى لسة شباب ..
تبقى قاعد لا بيك ولا عليك وتلقى المحروسة داخلة المترو ..
بنت حلوة وشعرها ع الخدود يهفهف ويرجع يطير ..
وتيجى تقف قدامك.. وفجأة تفضل تظبط شعرها وترميه ورا ضهرها زى إعلان صابون كامى عطر فرنسى
ومتوقعة ان الزبون اللى هوه انا هاقوم ابوس ايديها انها تقعد مكانى ..
والله لو خلعتى شعرك كله واديتهولى على سبيل المقايضة زى قدماء المصريين .. برضه مش واقف
وبعدين الأول كانت عربيات السيدات في المترو قدام ومع ذلك كانوا منتشرين في كل العربيات وقلنا ماشى ..
بعد ماحصلت حادثة مترو حلوان البسيطة اول المترو.. قالوا لا .. هاتوا السيدات في نص المترو..ليه بقى ؟؟
ده باعتبار ان لو حادثة حصلت في أول المترو والسيدات قدام هيصوتوا ويلموا الدنيا
انما الرجالة بتموت من سكات !!! صلاة النبى

طب حد مننا اعترض ان السيدات ماليين مترو الرجالة.. أبدا..
انما شوف بقى ياعم الحاج لو حظك الأغبر وقعك انك ركبت سهوا في عربية السيدات..


http://arabic.cnn.com/2009/scitech/6/11/egypt.swine/st.cairo.metro.gi.jpg_-1_-1.jpg


ياداهية دقى .. تسمع بقى أحلى كلام ..

أولالا .. سوفاااج .. سوهاج .. راجل؟؟ .. واللى تحط وشها في الأرض من الكسوف..واللى تقول أوووه .. راجل . .فانتستيك .. صلاة النبى..

انتى عمرك ماشفتى راجل ياضنايا ؟؟؟ مش برضه انتى جاية من شغلك وهوه هناك وراجعة بيتك هتلاقى واحد من نفس الفيرجن في وشك زى القضا المستعجل
والبنت اللى في الجامعة آه لو شافت راجل في المترو .. هيغمى عليها من الخضة ..
ماانتى لسة جاية من الجامعة وكنتى انتى والولاد قاعدين تلعبوا صلح وعسكر وحرامية .. عمرك ماشفتى راجل يا شابة؟؟؟

أيوة مادام فيه مساواة تبقى ف كل حاجة.

زى ماانا باشتغل وهيه بتشتغل .. يبقى اللى يلحق الكرسى يقعد باعتبار انها إبراهيم ابن خالتى يعنى عادى ..
ومادام فيه مساواة ولازم نتعامل مع عقل البنت .. يبقى بلاش تلعب لى ف شعرها وتورينى دايما انها بتحط هيد أندشولدرز ضد القشرة عشان اقوم .. لأنها زى ما بتحط هيد أندشولدرز أنا باحط برضه هيد أنشولدرز ومن الحجم الكبير كمان أبو عشرين جنيه

المشكلة دى يحس بيها اللى بيركب المترو يوميا زيى
نفسى أحس انى جاى بدرى ولحقت كرسى بعرق جبينى وقاعد أصلى ركعتين شكر على الكرسى اللى فلت من بين يدى القوات الأنثوية الغاشمة
اوعى حد يفتكر انى مش باقوم عشان حد يقعد
.بس اقوم عشان حد يستاهل
يعنى ست كبيرة مريضة
راجل عجوز تعبان
ست شايلة تسع عيال على ايديها ..
كده يعنى.. حالات تستاهل .. انما واحدة عندها تلاتين اربعين سنة وقاعدة عاملالى فيها حسين رياض لما اتخرس في رد قلبى ..

أقف ليها ليه؟؟

وكمان شوف الموقف ده
اقف أنا عشان واحدة ست تقعدواقف جنبها .. ول ما تيجى تنزل محطتها تشاور لاقرب بنت أو ست عشان تقعد مكانها !!
صلاة النبى..حتى الكرسى بيتورث يا جدعان؟؟
خيال مآتة واقف جنب الكرسى أنا ؟؟؟
دانا واقف عشانك .. طب خليها بجميلة حتى ..

وموقف ورا موقف تكتشف في لحظة ان كل الستات والبنات قاعدين .. وكل الرجالة ماسكين جرايد وقاعدين يهووا عليهم :


وللا البنت اللى تيجى تقعد جنبك ومش طايقة نفسها قال إيه المكان ضيق ومش قادرة تقعد مرتاحة ..

طب ما دام انتى متضايقة كده ماتقومى تقفى بلاش القعدة المقرفة دى ..
وللا يعنى عشان كل مرة واحد محترم شباب هوه اللى يقف عشان المكان يوسع للهانم

القاعده
الله يخرب بيت هالة وإيناس وسحر وعبير وإقبال وكل اللى عقدونا ف عيشتنا بكلامهم اللى لا دين ولا منطق بيأيده .

. بيطالبوا بحقوق المرأة اللى على كيفهم ..
مع ان ديننا جعل المرأة جوهرة يتحافظ عليها وتتعامل أحسن معاملة مش سلعة وموضوع في كل برنامج شوية .

لو كنت قاعد على كرسى في المترو .. دايما حاول انك تربط رباط جزمتك وانت قاعد لمدة العشرين محطة اللى انت راكبهم وماتبصش لأى حد واقف عشان قلبك المعفن الطيب

خد معاك وانت راكب المترو .. علبتين هيد أنشولدرز عشان أى بنت جاية تتدلع بشعرها عشان تقعد تعرفها ان اللى معاه شامبو أكتر هوه اللى هيقعد

خد معاك مطوة عشان لو قلبك الطيب خلاك تقعَّد واحدة منك وبعدين وهيه نازلة شاورت لواحدة تانية تقعد مكانها وطنشتك .. تغزها بالمطوة غزتين عشان تفوق

مش كده ولا ايه

MUHAMED SAMY
02-18-2010, 10:08 PM
لالالالا موضوع جاااامد فعلا...كله بيقول مساواة...نفسى اشوفهم فى التربية العسكرية مع المقدم ولييييد والعريف الرخم...
بس الحمد لله مبركبش مترو..وبطلنا نركب قطره واتوبيساات كمان.وربنا يوفق الدنيا على بعضها

mohamed ali
02-18-2010, 10:42 PM
موضوووووووع جميل
مش هم بينادو المساوه بين الرجل والمراءه
طيب لية ما بيدخلو فى الجيش
بس مش احلى من عصر سى السيد
:p:p:p:p:p

bata_batot
02-18-2010, 11:37 PM
انا شايفه بقى اننا مش بنادى بالمساواه ولكن بنادى بالعدل فى التعامل لكن من المعروف والمذكور فى القران

بسم الله الرحمن الرحيم

(الرجال قوامون على النساء)

صدق الله العظيم

والاعلامين تناولوا بعض الاراء وده نتيجه للى شافوه من بعض الرجال فبيعرضوا للى شافوه زى حضرتك لما مش عجبك موضوع الترام كده تناولته عادى عرضت رايك


بس وفى النهايه يعنى وراء كل رجل عظيم امراه عظيمه ولا تنسى ان النساء نصف المجتمع يعنى ينفع كده تعيشوا بنصف واحد بس ولا ايه

salma elsayed
02-19-2010, 12:20 PM
اولا بحييك جدا على الموضوع
انا ضد المساواه خالص لان المساواه من وجهه نظرى يعنى التشبه (تشبه النساء بالرجال)
ولو على الحقوق انا شايفه ان الاسلام اعطى للمراه حقوقها كامله وكرمها على اكمل وجه واحنا اللى ظلمنا نفسنا بالكلام عن المساواه بالرجل
وانا شايفه ان احلى عصر هو عصر الرسول وممكن سى السيد بس مش اوى كده
انا اسفه طولت فى الرد

KAREEM
02-19-2010, 01:39 PM
حسام تسمح لى أغلس عليك


الموضوع مكرر
وموجود فى قسم الضحك
والفرفششششششششششة
للعضو ماهرووووووووووو

ايه رأيك فى الغلاسة دى

بس كويس انك أحييت الموضوع تانى

لانه موضوع كوميدى جدا
وحيعمل قلباااااااااان

alaa eid
02-19-2010, 08:03 PM
اولا بحييك علي الموضوع جدا ياحسام
ثانيا بقي انا معاك ان فيه بنات بتتستبهل بس سوري يعني فيه رجالة بيستهبلوا اكتر واكتر ومافيهاش حاجة لو واحد شاب قام لانسه انا مش شايفة فيها حاجة يقف هو احسن ماتقف هي واللي رايح وجاي يخبط فيها وغير اللي بنسمعه من الشباب والاسلام اعطي للمرأة الحرية الكاملة مش هايجي ناس زي دول ويقولوا كلام وغير كدا بصراحة انا اوقات بركب وتلاقي واحد قايم لواحدة فالست اول ماتيجي تقوم بتشاورلي اقعد ومفروض من نفسك حتي لو نادت عليك تخلي واحدة تقعد ولا ايه؟؟؟؟؟
بشكرك كتير علي المووضوع الجميل دا وطرييقة عرضه شيقة جدا

ساره احمد عبد الفتاح
02-19-2010, 08:51 PM
هو فعلا موضوع جميل

بس المساواه اللى بتنادى بيها المرأه مش اللى بتنادى بيها ناس زى دول

"المطالبين الحقيقين بالمساواه" كان يقصدوا ان المراه تاخد حقوقها"الاسلاميه مش اللى بنشوفها دى"

وبعدين انته لما بتقوم لوحده فى المواصلات انته بتقوملها عشان دى اخلاق واتيكيت وذوق او ثواب...مش اكتر

ومعنى كلامك ان يا حرام البنت بتطلع اى مواصله بتلاقى اللى يقوم مع ان ممكن تكون فى واحده بيغمى عليها خلاص والرجاله ولا فى اى حاجه بتحصل

وحكايه الجيش فانا مع ان الستات تدخله لان بصراحه ومن غير زعل انا لما بمشى فى الشارع واشوف الشباب واللى عاملينوا فى نفسهم ...بقول لنفسى اننا لو دخلنا حرب مش حنلاقى اللى يدافع عن الوطن

"وانا مش بعمم فى كلامى انا اقصد ناس انتوا عاريفنهم كويس"

mostafa hassan
03-01-2010, 02:22 PM
جامد اوي الموضوع ده يا حسام

حسام المصرى
03-01-2010, 03:22 PM
لالالالا موضوع جاااامد فعلا...كله بيقول مساواة...نفسى اشوفهم فى التربية العسكرية مع المقدم ولييييد والعريف الرخم...
بس الحمد لله مبركبش مترو..وبطلنا نركب قطره واتوبيساات كمان.وربنا يوفق الدنيا على بعضها

هههههههههههههههههههههههه على رأيك ربنا يوفق الدنيا على بعضها



موضوووووووع جميل
مش هم بينادو المساوه بين الرجل والمراءه
طيب لية ما بيدخلو فى الجيش
بس مش احلى من عصر سى السيد
:p:p:p:p:p

قولهم يا محمد وعلى صوتك سمعنى كمان ليه مش بيدخلواالجيش



انا شايفه بقى اننا مش بنادى بالمساواه ولكن بنادى بالعدل فى التعامل لكن من المعروف والمذكور فى القران

بسم الله الرحمن الرحيم

(الرجال قوامون على النساء)

صدق الله العظيم

والاعلامين تناولوا بعض الاراء وده نتيجه للى شافوه من بعض الرجال فبيعرضوا للى شافوه زى حضرتك لما مش عجبك موضوع الترام كده تناولته عادى عرضت رايك


بس وفى النهايه يعنى وراء كل رجل عظيم امراه عظيمه ولا تنسى ان النساء نصف المجتمع يعنى ينفع كده تعيشوا بنصف واحد بس ولا ايه

تسلم ايدك يا بطة بطوط رأيك سليم مليون فى الميه ودوركم مهم اكيد

حسام المصرى
03-01-2010, 03:24 PM
اولا بحييك جدا على الموضوع
انا ضد المساواه خالص لان المساواه من وجهه نظرى يعنى التشبه (تشبه النساء بالرجال)
ولو على الحقوق انا شايفه ان الاسلام اعطى للمراه حقوقها كامله وكرمها على اكمل وجه واحنا اللى ظلمنا نفسنا بالكلام عن المساواه بالرجل
وانا شايفه ان احلى عصر هو عصر الرسول وممكن سى السيد بس مش اوى كده
انا اسفه طولت فى الرد



حسام تسمح لى أغلس عليك


الموضوع مكرر
وموجود فى قسم الضحك
والفرفششششششششششة
للعضو ماهرووووووووووو

ايه رأيك فى الغلاسة دى

بس كويس انك أحييت الموضوع تانى

لانه موضوع كوميدى جدا
وحيعمل قلباااااااااان



اولا بحييك علي الموضوع جدا ياحسام
ثانيا بقي انا معاك ان فيه بنات بتتستبهل بس سوري يعني فيه رجالة بيستهبلوا اكتر واكتر ومافيهاش حاجة لو واحد شاب قام لانسه انا مش شايفة فيها حاجة يقف هو احسن ماتقف هي واللي رايح وجاي يخبط فيها وغير اللي بنسمعه من الشباب والاسلام اعطي للمرأة الحرية الكاملة مش هايجي ناس زي دول ويقولوا كلام وغير كدا بصراحة انا اوقات بركب وتلاقي واحد قايم لواحدة فالست اول ماتيجي تقوم بتشاورلي اقعد ومفروض من نفسك حتي لو نادت عليك تخلي واحدة تقعد ولا ايه؟؟؟؟؟
بشكرك كتير علي المووضوع الجميل دا وطرييقة عرضه شيقة جدا


هو فعلا موضوع جميل

بس المساواه اللى بتنادى بيها المرأه مش اللى بتنادى بيها ناس زى دول

"المطالبين الحقيقين بالمساواه" كان يقصدوا ان المراه تاخد حقوقها"الاسلاميه مش اللى بنشوفها دى"

وبعدين انته لما بتقوم لوحده فى المواصلات انته بتقوملها عشان دى اخلاق واتيكيت وذوق او ثواب...مش اكتر

ومعنى كلامك ان يا حرام البنت بتطلع اى مواصله بتلاقى اللى يقوم مع ان ممكن تكون فى واحده بيغمى عليها خلاص والرجاله ولا فى اى حاجه بتحصل

وحكايه الجيش فانا مع ان الستات تدخله لان بصراحه ومن غير زعل انا لما بمشى فى الشارع واشوف الشباب واللى عاملينوا فى نفسهم ...بقول لنفسى اننا لو دخلنا حرب مش حنلاقى اللى يدافع عن الوطن

"وانا مش بعمم فى كلامى انا اقصد ناس انتوا عاريفنهم كويس"


جامد اوي الموضوع ده يا حسام



شكرا ليكم كلكم

وفعلا لو النساء ياخدوا حقوقهم اللى الدين قال عليها هتبقى الحياة احسن

هبه محمود
03-01-2010, 03:59 PM
الموضوع جميل اوي يا حسام

انت زعلان علشان المترو يعني انت ما جربتش تركب القطر وتقف علي رجلك اكتر من 6 ساعات وتلاقي شويه شباب واقفين \قدامك نازلين هزار ضحك وكانهم مش شايفين ان فيه بنات واقفين خالص
وانت قيليل اوى هتلاقي ولد يقف لبنت ويقعدها
والمشكله انه ده يحصل في قطر الصعيد
بس امترو ده بصراحه ليك حق انك تضايق لان فيه عربيات للسيدات ولو واحده عاوزه تكون مرتاحه تركبها

حسام المصرى
03-01-2010, 04:18 PM
الموضوع جميل اوي يا حسام

انت زعلان علشان المترو يعني انت ما جربتش تركب القطر وتقف علي رجلك اكتر من 6 ساعات وتلاقي شويه شباب واقفين \قدامك نازلين هزار ضحك وكانهم مش شايفين ان فيه بنات واقفين خالص
وانت قيليل اوى هتلاقي ولد يقف لبنت ويقعدها
والمشكله انه ده يحصل في قطر الصعيد
بس امترو ده بصراحه ليك حق انك تضايق لان فيه عربيات للسيدات ولو واحده عاوزه تكون مرتاحه تركبها


انا والله لما بيحصل وبركب مواصلات عامه بقف للناس الكبيرة وللبنات عادى
ومش بهزر بصوت عالى فى اى مواصلات سواء فى بنات ا ولا

بس فعلا المترو فيه عربيات للستات ودى المشكلة

تسلمى على مرورك

AL Gaber
03-08-2010, 04:39 PM
تسلم ايدك يا استاذ