نداء لكل الجغرافيين

[ذات الحلم الطائر]

اولا احب اعبر عن انبهاري واعجابي الشديد بالمنتدى
فعلا حاجه تشرف كل الجغرافيين
اولا انا خريجه اداب قسم جغرافيه شعبه عامه
جامعه عين شمس
واحب استفسر منكم عن شي
انا عايزة اعرف الاماكن الي ممكن احصل على كورسات
للمساحه او نظم المعلومات منها وتكون بشهدات معتمده
وياريت لو تكون في القاهره

وعايزة اعرف الافضل دبلومه في نظم المعلومات
ولا المساحه
واتمنى اسمع ردكم بسرعه

[ذات الحلم الطائر]

ياجماعه ارجوكم حد يقولي رايه
انا لسه مستنيه ردودكم

[دكتور / السيد الزغبى]

اهلا بيكى ذات الحلم الطائر انصحك بدراسة برامج GIS باتقان وكذلك الاوتوكاد فهذه البرامج هامة ومطلوبة ولها مستقبل وطبعا مع اللغة
وتوجد فى رابطة دورات فى نظم المعلومات لكن للاسف انتى من القاهرة لكن يوجد فى المنتدى قسم للتعليم عن بعد حاولى فيه وساحاول اعرف مكان فى القاهرة تاخدى فيه الدورات وانا على علم ان جامعة عين شمس رائدة فى هذا المجال حاولى تستفسرى عن ذلك لانكم لديكم شعبة نظم معلومات جغرافية بقسم الجغرافيا وتحياتى لكى

[ذات الحلم الطائر]

متشكره جدا على ردك
وانشاالله هعمل الي قلتلي عليه
بس انا سمعت ان المساحه دلوقتي مطلوبه
وعشان كده انا محتاره
ومش عارفه انهي الاصلاح

[ALY ELSAYED]

منورانا والله يا ذات الحلم الطائر

ومنوره المنتدي كله

وفعلا المساحه دلوقتي مطلوبه بس صعب ان الفتاه

تشتغل في الموقع بالذات في المساحه

وافضل حاجه للبنت المكتب الفني عشان كده

من الاحسن انك تكوني ملمه بالبرامج المساحيه

اوتوكاد والاند بجانب دبلومه gis

انا سعيد جدا بوجودك معانا

واتمني اشوف مشاركاتك دايما

وان شاء الله تستفادي معانا

جزاكي الله كل خير

[مى رسمى]

منوره المنتدى ياقمر

وطبعا الدكتور سيد وضحلك رد سؤلك

وتفضل مشكور الاستاذ على بتوضيح الفكره

ارجو انك تتابعى قسم التعلم عن بعد ونظم المعلومات

وان شاء الله تحسى يستفاده

[محمد الفرارجي]

طبعا بعد كلام الدكتور سيد مفيش كلام تاني.

عموما

وبعد إذن الدكتور سيد.

بصي يا ستي

أنا خريج الدبلومة عندوا أيام ما كان ماسكها الدكتور محمود عاشور وبعده دكتور أحمد نافع.

الدبلومة محترمة جدا وراقية جدا ومنسباكي جدا جدا جدا للتالي:-

1- انتي قاهرية وخريجة عين شمس يبقى مرحتيش بعيد.

2- الطلب على خريجي النظم كبير جدا جدا ومرتباته كويسة جدا برضه وعندك تقريبا كل الشركات الخاصة بالنظم في القاهرة زي توكيل إيزري مصر إللي كان إسمه كيو إس. وعندك جلوبال جيوبيتس التابعة للمقاولين العرب. وعندك جيو لاب وغيره من الشركات الكتير .
دا غير إن التخصص ده بقى يدخل في تخصصات تانية زي شركات الاتصالات وشركات الملاحة والمواصلات وشركات البترول وكمان يا ستي الجهاز المركزي للتعبئة العامة والاحصاء وجهاز المحاسبات ووزارة البيئة ووزارة الكهرباء ومركز دعم اتخاذ القرار برئاسة مجلس الورزاء. ومراكز كتير وشركات كتير جدا بقت بتطلب التخصص ده.
3- انتي في الدبلومة هتلاقي ناس شغالين بياخدوا الدبلومة معاكي فهيطلبوا ناس تشتغل معاهم وده إللي بيحصل كل سنة فهتلاقي المهندسين إللي بيحاضروكوا زي المهندس زكريا أو المهندس عادل أو المهندس محمد أو المهندس إبراهيم الناس دي دايما بتطلب ناس تشتغل معاهم فتقريبا هتشتغلي وانتي في سنة أولى في الدبلومة إن شاء الله.
4- موضوع المساحة. بصي الكلام ده أنا قلته ميت مرة بس هعيده لك تاني.

بصي يا ستي
- تقدري تباتي بره البيت؟
- طيب تقدري تباتي وسط شباب في شقة واحده؟
- طيب بلاش دول تعرفي تسيطري على عمال كل حياتهم شيل وحط وخبط وترزيع؟

بصي
العمل الحقلي صدقيني مش مناسب للبنات والعمل المكتبي بيبقى رخم بالنسبة للولاد فخليكي في المكتبي وتميزي فيه وسيبي الحقلي للغلابة إللي مش لاقيين شغل في الحقلي.

صدقيني أنا خريج 2001 ما شفتش لحد النهارده مساح بنت صعبة قوي قوي قوي

خصوصا زي ما قلت لك مفيش مقاول هيشغلك عمل ميداني
لأنك باختصار وبصراحة هتبوظي له الشغل لأسباب منها:-
- عدم سيطرتك عالعمال.
- عدم صبرك على ظروف صعبة كالعمل في الكامبات والعمل في الصحراء والمناطق المقطوعة.
- عدم تمكنه من توفير سكن خاص بيكي لوحدك عشان انتي أكيد إللي هتبقي البنت الوحيدة في الموقع.

وعموما ربنا يوفقك إن شاء الله

[ذات الحلم الطائر]

بجد متشكره على ردودكم جميعاااااااااااااا
فعلا افدتوني
هي بس المشكله كانت بالنسبه ليه
انو اتعرض عليه شغل في المساحه كتير
وبعروض محترمه جدا
بس طبعا بعد كمك يااستاذ محمد
اكيد غيرت فكرتي بالمره
وانشالله هعمل الجي اي اس وخصوصا ان الدكتور احمد
نافع سبها وبقه المسئول عنها دكتور محمد طه
لو تعرفو يعني
وبجد شكرا جدا على المعلومات الي افدتوني بيها
وانشاالله هتابع القسم التعليمي باانتظام