المساعد الشخصي الرقمي

مشاهدة النسخة كاملة : لسة في الكلية أو اتخرجت وعايش في فراغ؟ عايز ترتبط بواحدة ومحتار؟ إدخل هنا



aafm
03-19-2010, 10:55 PM
الموضوع منقول للفائده


ازيكوا يا شباب


في الحقيقة أنا لقيت موضوع دة بيدور في زهن كل شاب وخاصة انى اعيش التجربة دى فعلا فحبيت اقول شوية اقتراحات ياريت تقولولى رايكم اية



فكل شاب بيسأل انا عايش في فراغ وانا في الكلية أعمل إيه؟؟


أو انا اتخرجت ومش عارف إيه الخطوات اللي أقوم بيها دلوقتي ولا عارف هدفي


سؤال تاني بيتكرر برضه أنا عايز أرتبط بواحدة أعمل إيه؟؟؟



إيه اللي أقدر أعمله عشان الارتباط ده ما يفشلش قبل ما يبدأ؟؟




طبعا زي مانتو شايفين كده الموضوع انقسم لاتنين


الارتباط والفراغ


ولأن ليهم علاقة ببعض هتعرفوها من خلال الموضوع


فحبيت أعمل الموضوع ده عشان يفيد كل الشباب


وأتمنى فعلا إنه يفيدهم بجد


في البداية لازم نعرف إن الموضوع ده أولا وأخيرا هو تفكير بالعقل أكثر من القلب


وده برضه هتعرفوه من خلال متابعة الموضوع




نبدأ أولا بالجزء الأول من موضوعنا وهو


الفراغ وخطوات المستقبل الجيد




الخطوات اللي المفروض يمشي عليها كل شاب واللي من المفضل تكون من أيام الكلية


عشان بعد كده تساعده في مستقبله


كتير من الشباب بيكون عايش في فترة الكلية أو من بداية تانية ثانوي لحد الكلية


في حالة من اللا وعي


يعني إيه؟؟


يعني عادي الأهل بيصرفوا عليه وهو مش شايل هم حاجة وعايش الدنيا بالطول وبالعرض


وفجأة بعد ما يتخرج يتصدم بالواقع المرير


أنا آعد على الرصيف ليه؟؟


ما فيه ناس زيي ومتخرجين معايا واشتغلوا


إشمعنى أنا؟؟


وممكن كمان الشباب ده مايفوقش بعد التخرج
ده ممكن يوصل لسن 28 و 30 ولسة للأسف ما فاقش


غير كده كمان في الكارثة


بعض الشباب مش بس عايشين في لا وعي


لا وكمان بيشربوا مخدرات (بيحششوا يعني وبانجو وكلام من ده)


يعني ولا بيشتغلوا ولا فارق معاهم


وبعضهم ييجي وقت معين تلاقيهم مزهولين (وقت مايلاقوا حب حقيقي صادفهم)


أنا عملت إيه في دنيتي؟؟


أنا ضيعت العمر ده كله من غير أي فايدة؟؟


يا ترى انا هقدر أتجوز ازاي دلوقتي؟؟


هقول لأهلها إيه وهتجوز منين وازاي؟؟


ولو الشاب مش فارق معاه حاجة طول حياته دي مأساه لوحدها
مش هنتكلم فيها دلوقتي


دلوقتي الموضوع ده للشباب اللي عنده استعداد يفوق


عنده استعداد يغير حياته عشان وقت مايحب يرتبط أو يتجوز


يلاقي نفسه واقف ثابت وواثق من نفسه


للشباب اللي عنده إرادة لكن مش عارف يوجهها ازاي


لسة ماعندوش إرادة أو ممكن نقول مافكرش في الموضوع غير قليل
وعايز حد ينصحه أو يوجهه




الناس اللي لسة في الكلية (أو اللي اتخرجوا)


حاسين بفراغ وقت الأجازات أو وقت الفراغ؟؟


الحاجات اللي ممكن تفيدكوا كويس جدا كالتالي




أهم حاجة يا جماعة الكورسات،
وماحدش ييجي يقولي لا انا الانجليزي بتاعي كويس مش محتاج كورس ولا بتاع
هقولك طيب تمام الانجليزي كويس ادخل أي مركز معتمد
وروح اختبر نفسك انت في المستوى الكام
وطلع منهم شهادة على الأقل بالمستوى اللي انت فيه لو مش عايز تزيد عنه
وده لأن انتوا عارفين بلد الشهادات ومش بس مصر،
حتى لو فكرت تسافر برة لازم يكون فيه إثبات على قدراتك،
إيه اللي هيثبت للي هتعمل معاه الإنترفيو انك فعلا كويس
هو مش هيضيع وقته في المقابلة عشان يعرف انت فعلا فاهم انجليزي وللا لا،
لازم يتأكد من شهادة تثبت ده وبعدها يبقى يعمل معاك المقابلة،
وطبعا ده بينطبق على ناس معينة مش كل الشركات بتعمل كده


طبعا غير كورسات اللغة كمان كورسات تدعم الدراسة اللي انت بتاخدها


لو انت مقتدر ماديا ممكن تاخد كورسات كويسة جدا تفيدك لو فرضنا انك في اداب مساحة


فيه كورسات جامدة جدا في الرابطة
مجرد ماتكون معاك أكيد هتشتغل في مكان كويس إن شاء الله


المنحة الكندية وغيرها من المنح اللى بتعلن عنها الرابطة






*********


ولو انت مش مقتدر ماديا فيه منح دراسية


زي منحة ITI لو تسمعوا عنها للخريجين التسع شهور وماتدفعش فيها ولا مليم


بس تمضي على إقرار بـ 15000 جنيه لو سيبتها في نصها وده لما تخلصها بيتقطع


ودي منحة في جميع تخصصات الكمبيوتر حسب ما تختار انت المجال اللي تحبه


منحة ICDL من وزارة الاتصالات ودي مش شرط تكونوا اتخرجتوا مدتها 3 شهور


وده لينك التقديم فيها


http://www.icdlegypt.gov.eg/


أو ممكن تسأل في أي مركز كمبيوتر معروف في محافظتك وتسأل عندهم منحة الـ ICDL


بس يستحسن تشترك في الموقع وتختار الشركة اللي قريبة منك


هيجيبولك رقم تليفونها تتصل بيهم وتروح


ودي بتكون بمبلغ تأمين 120 جنيه تاخدهم لما تيجي تاخد الشهادة بتاعت الـ ICDL


وحاجات كتير


حد ييجي يسألني مثلا


مانا أعد مرتاح في بيتنا إيه يجبرني أتعب نفسي في دراسة تانية؟؟


أرد عليك بقى بالجزء التاني من الموضوع


كل واحد من الشباب لازم يكون عنده عزيمة إنه يعمل حاجة في حياته


عشان مستقبله، عشان لما يفكر يرتبط أو يتجوز،
عشان ما يبقاش زي اللي أعدين من غير شغل ولا هدف في الحياة


كل واحد يحاول يعمل اللي عليه وإن شاء الله ربنا هيوفقه لما فيه الخير







الجزء التاني من الموضوع


الارتباط والوقت المناسب وبعض النصائح




كتير تساؤلات من الشباب


أنا نفسي ارتبط بواحدة أعمل ايه؟؟ أقولها؟؟ هتستناني؟؟


تعالوا نفكر بعقلنا قبل قلبنا في الموضوع ده


واحد دلوقتي لسة شاب في الكلية


أو اتخرج خلاص


اللي بيفكر يرتبط مش لازم يكون أد الفكرة دي الأول؟؟


السيناريو اللي بيحصل كالتالي




واحد يعجب بواحدة يقولها أنا عايز ارتبط بيكي.. شوية بعد سنة وللا اتنين


يكتشف انه مش جاهز دلوقتي وإن اللي كان مخططله اتلخبط


يروح يقولها معلش احنا لازم نسيب بعض (أصله طيب وابن حلال مش عايز يظلمها معاه)


أمال هو عمل إيه من الأول ما هو كده ظلمها


هييجي واحد حسن النية يقولي لا


أنا ما ظلمتهاش، انا لما طلبت الارتباط كان هيبقى فيه فرصة عمل كويسة
كنت هقدر منها أعمل مبلغ وكنت هـ وكنت هـ..


بس في الآخر ده ما حصلش


يبقى لازم قبل أي حاجة تكون حاطط رجلين على خطوات ثابتة ومعروفة
مش حاجة مستقبلية باني عليها حياتك


قبل ما تفكر في الارتباط فكر الأول لو الحاجة اللي انت متصور انها هتحصل دي ما حصلتش


هل هتقدر تعمل حاجة؟؟ وقت ما تيجي ترتبط هل وقتها تقدر تتقدم لأهلها؟؟


مش هتقدر تتقدم لأهلها وتشرح ظروفك وتلاقي قبول يبقى خلاص بلاش من الأول


ليه تظلمها وتظلم نفسك؟؟


سيناريو تاني بدل ما هو يقولها اسيبك عشان حرام أعلقك معايا


واحد يلاقيها اتخطبت بعد ارتباط كام سنة وحب سنين ومش عارف إيه


طيب ماهو مش كل البنات هتقدر تستنى


ولو قولنا إن البنت كويسة (أهلها عايزين مصلحتها من وجهة نظرهم مش هيخلوها تستنى)


مش هقول لازم يكون معاك شبكة بمش عارف كام ولا شقة تمليك ولا الكلام ده


بس على الأقل يكون معاك مبلغ تجيب بيه دبل


وتكون في شغل ثابت مرتبه ممكن يأجر شقة ويعيشها كويس مش على الرصيف


الشغل ده بقى بالمرتب ده ييجي منييييييين؟؟
من الحاجات اللي قولناها في الأول.. إنك تكون متميز عن باقي زمايلك بالكورسات اللي خدتها


إنك تكون طموح وعندك هدف في الحياة ماشي وراه عشان تحققه



يبقى هنا أهم خطوة لما تحب ترتبط بواحدة هي إيه؟؟


تشوف الأول ينفع تتقدم لأهلها وللا لا


مش هينفع بأي شكل خلاص ما تتعبش نفسك وتتعبها معاك


تطلب منها ارتباط وبعد كده ترجع تقولها اسيبك عشان ماعلقكيش
مانت علقتها خلاص تسيبها بعد إيه؟؟


ده بالنسبة لتعمل إيه قبل ما تفكر في الارتباط


طيب انت دلوقتي ما فكرتش لسة في الارتباط


تعمل إيه بقى عشان لما تفكر ترتبط تكون أدها؟؟


وده إجابته الجزء الأول من الموضوع
واللي كنا بنتكلم فيه عن إن المفروض إنك تمشي بخطوات طموحة في مستقبلك
عشان وقت ماتفكر في الارتباط تلاقي نفسك جاهز ليه رسمي
مش ترتبط في الضلمة وموضوع يفشل لأي سبب من الأسباب


وماحدش يقولي لا مش في الضلمة دانا أهلي عارفين


طيب أهلها هي عارفين؟؟ أبوها وأمها؟؟ وللا واحد بس فيهم؟؟ وللا ولا واحد؟؟ لا؟؟
يبقى في الضلمة مش في النور


أتمنى إن الموضوع ده يفيدكوا حقيقي


وأتمنى تشاركوني فيه بالمناقشة

sajen_zenda
03-20-2010, 01:33 AM
جزاك الله كل خير وربنا يحفظ الجميع من المخدرات والبلاوي الزرقا اللي ماليه حياتنا وربنا يوفق الجميع والمنحه اللي بتقول عليها دي ليا اصحاب كتير فيها وبجد جميله اوي وبيستفادوا منها

ALY ELSAYED
03-20-2010, 02:13 AM
موضوع رائع جدا يا احمد

وبيتناول قضيه واقعيه بتحدث فعلا

وللاسف شباب ياما بيكونوا ضحيه كدا

والبطاله من اكبر اسباب انتشارها وانتشار المخدرات

وفعلا لازم الواحد ينمي ويطور نفسع بالكورسات

لان فعلا حتفرق كتير مع الواحد

موضوع رائع يستحق المتابعه والنقاش

جزاك الله كل خير

Amir Elshazly
03-20-2010, 02:21 AM
الله عليك يااحمد

بجد موضوع جميل جدا انا قريته كله


وعجبنى طريقة كلامه وتعبيرك


وتفكيرك بجد يارب يكون فيه زيك كتيير



موضوع فعلا يستاهل النقاش لانك عرضت


معظم المشاكل اللى بتواجه اى حد فينا


تسلم ايدك

KAREEM
03-20-2010, 02:41 AM
اهو دا بجد الموضوع اللى احييك عليه
لانك كتبته من قلمك واسلوبك فى النقاش
والتفكير أكثر من رااااااااااااااائع

كلامك انا استفدت منه كتير جدا
وان شاء الله اخش اناقش معاكو
فى الموضوع دا دايما ........

ننتظر منك المزيد من ذلك
يا أخ احمد

mohamed ali
03-20-2010, 02:54 AM
بجد والله موضوع هايل وكلامك ده

انا بسمعه كتير فى الكليه

وخارجها ( يعم طنش اما نتخرج يبقى بحلها الف حلال )

موضوع جميل وجزاك الله خيرا

Soma
03-20-2010, 03:18 AM
الله ينور عليك والله
بجد موضوع رائع وموجود فعلا بين الشباب
الكورسات فعلا مهمة جدا وبتعلم حاجات جديدة
ربنا يحمى الشباب كلهم ويهديهم للطريق الصح يارب
جزاك الله كل خير

حنين الحياة
03-20-2010, 11:07 AM
طبعا في البدايه اقولك موضوع اكثر من رائع وحضرتك بتناقش فيه مشكله واقعيه وده الي بيحصل ان الانسان بيفوق متاخر اوي بعد ماالعمر يضيع وبعد كده بيندم علي الوقت الي ضيعه من عمره علي الفاضي بس يفيد بأيه الندم وفي مثال يقول لا بكاء علي اللبن المسكوب بس المشكله لو احنا بصنالها من الاول هنعرف انهامشكله التربيه من ناحيه الاهل بمعني ان لو الاهل ربوا الابناء علي تحمل المسؤليه من الاول هتكون المشكله اقل في حدتهافيكون الابن قادر علي التفكير السليم ويبني حياته ويخطط لمستقبله ويحقق كل حاجه عاوزهاوكمان هيتعلم انه يكون انسان جاد في حياته مش هيقضيها هزار وكلام بس حتي لما يجي يقرر انه يرتبط بواحده هيكون قادر علي كده ماهو اتربي صح وبيفكر صح وبيتحمل المسؤليه وان من رأي ان الشاب مفروض يشتغل اثناء الاجازه وفي بعض ايام الدراسه عشان يتعود يعتمد علي نفسه ويتعلم من الحياه ويوفق بين دراسته وشغله

Mohamed Gaber Aly
03-20-2010, 05:12 PM
شكرا على الموضوع يااحمد

محمد احمد89
03-20-2010, 10:53 PM
سبحان الله فعلا حاسس فى كلامك انك عايز تفيد
ناس ياما فى منتديات كتير وحتى بره النت بتقدم خدمات للناس لكن الاحساس برغبتك فى افادة الناس كان كبير وانا باقرا الموضوع
جازاك الله خير وتقبل تحياتى

aafm
03-20-2010, 11:35 PM
جزاك الله كل خير وربنا يحفظ الجميع من المخدرات والبلاوي الزرقا اللي ماليه حياتنا وربنا يوفق الجميع والمنحه اللي بتقول عليها دي ليا اصحاب كتير فيها وبجد جميله اوي وبيستفادوا منها


جزانى وجزاكى الله كل خير

aafm
03-20-2010, 11:37 PM
موضوع رائع جدا يا احمد

وبيتناول قضيه واقعيه بتحدث فعلا

وللاسف شباب ياما بيكونوا ضحيه كدا

والبطاله من اكبر اسباب انتشارها وانتشار المخدرات

وفعلا لازم الواحد ينمي ويطور نفسع بالكورسات

لان فعلا حتفرق كتير مع الواحد

موضوع رائع يستحق المتابعه والنقاش

جزاك الله كل خير


فعلا يابشمهندس لازم الواحد يطور نفسة اول باول لان العلم دايما فية جديد

aafm
03-20-2010, 11:41 PM
اهو دا بجد الموضوع اللى احييك عليه
لانك كتبته من قلمك واسلوبك فى النقاش
والتفكير أكثر من رااااااااااااااائع

كلامك انا استفدت منه كتير جدا
وان شاء الله اخش اناقش معاكو
فى الموضوع دا دايما ........

ننتظر منك المزيد من ذلك
يا أخ احمد



جزانى وجزاك الله كل خير يا كريم

ودايما خليك معانا

aafm
03-20-2010, 11:46 PM
بجد والله موضوع هايل وكلامك ده

انا بسمعه كتير فى الكليه

وخارجها ( يعم طنش اما نتخرج يبقى بحلها الف حلال )

موضوع جميل وجزاك الله خيرا


الكلام دة بيقال كتير برة بس المهم اننا نعمل بية

وجزاك الله خيرا
انا من جنوب بورسعيد ورحت اسكندرية فى الرابطة واخدت دورات هناك فلازم الواحد سعى ويعمل اللى علية وبعد كدة يقول يارب

aafm
03-20-2010, 11:50 PM
الله ينور عليك والله
بجد موضوع رائع وموجود فعلا بين الشباب
الكورسات فعلا مهمة جدا وبتعلم حاجات جديدة
ربنا يحمى الشباب كلهم ويهديهم للطريق الصح يارب
جزاك الله كل خير


امين يارب يهدي كل الشباب
جزاكى الله كل خير

aafm
03-20-2010, 11:53 PM
طبعا في البدايه اقولك موضوع اكثر من رائع وحضرتك بتناقش فيه مشكله واقعيه وده الي بيحصل ان الانسان بيفوق متاخر اوي بعد ماالعمر يضيع وبعد كده بيندم علي الوقت الي ضيعه من عمره علي الفاضي بس يفيد بأيه الندم وفي مثال يقول لا بكاء علي اللبن المسكوب بس المشكله لو احنا بصنالها من الاول هنعرف انهامشكله التربيه من ناحيه الاهل بمعني ان لو الاهل ربوا الابناء علي تحمل المسؤليه من الاول هتكون المشكله اقل في حدتهافيكون الابن قادر علي التفكير السليم ويبني حياته ويخطط لمستقبله ويحقق كل حاجه عاوزهاوكمان هيتعلم انه يكون انسان جاد في حياته مش هيقضيها هزار وكلام بس حتي لما يجي يقرر انه يرتبط بواحده هيكون قادر علي كده ماهو اتربي صح وبيفكر صح وبيتحمل المسؤليه وان من رأي ان الشاب مفروض يشتغل اثناء الاجازه وفي بعض ايام الدراسه عشان يتعود يعتمد علي نفسه ويتعلم من الحياه ويوفق بين دراسته وشغله



فعلا من تربى كويس يقدر يفكر كويس


وشكرا ليكى

aafm
03-20-2010, 11:55 PM
شكرا على الموضوع يااحمد


شكرا ليك يا بشمهندس وشرفتنا بمرورك

blue_sky
03-21-2010, 12:45 AM
بجد موضوع رائع الله ينور عليك
أنا شايفة شباب كتير بيأيدوا كلامك بس يارب ينفذوه
بجد لو كل شاب فكر بالطريقة دي حياتنا هتبئى أفضل من كدة بكتييييييييييييييييييييييير

aafm
03-21-2010, 12:51 AM
بجد موضوع رائع الله ينور عليك
أنا شايفة شباب كتير بيأيدوا كلامك بس يارب ينفذوه
بجد لو كل شاب فكر بالطريقة دي حياتنا هتبئى أفضل من كدة بكتييييييييييييييييييييييير




ا كيد طبعا لوكل الشباب عمل بالكلام دة اكيد هنبقى افضل بكتير