المساعد الشخصي الرقمي

مشاهدة النسخة كاملة : اين الرجل المصرى بتاع زمااااان؟؟؟



Youssef Mostafa
11-15-2008, 03:26 PM
عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى

عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك

ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله

بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق

هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت

عشان انت مصرى وده للاسف
فلازم تاسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف
مش انت اللى مصرى؟؟؟ جتك القرف

Rania Ismail
11-16-2008, 07:44 PM
ههههههههههههههههههه
جميله جدا والله وكلامها معبر قوى
مشكووووووووووووووووووووووور

Youssef Mostafa
11-17-2008, 07:10 PM
شكرا يارانيا على مرورك وعلى فكرة انا اشتركت معاكى فى اللجنة الاجتماعية

Rania Ismail
11-17-2008, 07:18 PM
تنورنى يا يوسف بجد ده شرف ليا انك تكون موجود معايا فى اللجنه وتبقى تيجى عند مكتب الجمعيه نتعرف عليك اكتر

ميرا مار
11-17-2008, 07:39 PM
هههههههه جميلة يا يوسف
بس مكئبة قوووووووووى
تفاءل يا معلم جدى ..

Youssef Mostafa
11-17-2008, 09:47 PM
حنعمل ايه بس مش دة اللى حاصل