المساعد الشخصي الرقمي

مشاهدة النسخة كاملة : الجواز على مر السنين



free eagle
12-01-2008, 06:57 PM
انا شدني الموضوع دة

هو في شوية ضحك بس هو دة الحال دلوقتى مع قصة حسن واحلام اللي انا اصلا معرفهمش



اسيبك مع الموضوع



مصر الفرعونيه
- بابا انا عايز اتجوز اختى حت حور
- خلاص يا ابنى خليها تنقل حاجتها فى قوضتك .. وابقى هاتلها حجرين صوان هدية .. مبروك يا تاح
..........................




مصر فى عصر الرومان
- تتجوزينى يا افروديت
- اتجوزك يا بانسيلوس
- يللا بينا نبنى كوخ ع البحر ونعيش هناك
- يللا
............................



مصر بعد الفتح الاسلامى
- ولدى خالد يا شيخ احمد بيريد يتجوز ابنتك البكر الكريمة .. وبيبنى خيمة .. ويقدم مهر بعير
- والله خالد ولدك زين الرجال .. وايش اتمنى غير رجل صالح يكون زوج لبنتى .. وكما قال رسول الله صلى الله عليه وسلم " ان جاءكم من ترضون دينه وخلقه فزوجوه " .... قيموا الافراح
...........................



مصر 1919
- انت ح تتجوز بنت الحاج عبد الجليل .. انا كلمته خلاص ووافق .. وضب قوضتك وهات خلخال .. فرحك يوم الخميس اللى جاى
- طب مش اشوفها الاول يا با
- انت اتجننت يا ولد تشوفها ده ايه .. انت ح تتجوز والا تخبص
- حاضر يا با
.............................



مصر 1960
- بقى يا ستى بنتك آمال جالها عريس
- ياألف نهار ابيض يا ألف نهار مبروك
- جدع طيب وابن حلال موظف فى الحقانية .. وماهيته مش بطالة .. اهو يبنوا حياتهم سوا بعد الجواز.. والا ايه رأيك يا أم العروسة؟
- الرأى رأيك يا أبو العروسة .. والله العيال ح يعجزونا يا ابو محمد
- فشر .. تدبل الوردة وريحتها فيها يا نرجوستى
..............................




مصر فى عصر الانفتاح
- اخرسى يا بنت ... انا اللى يتجوز بنتى لازم يكون عنده شقة تمليك وعربية وسوبر ماركو
- بس يا ماما
- ما فيش بس .. انا وابوكى قبل ما يموت فى الحرب كانت بتعدى علينا ايام ما بنلاقيش ناكل .. انا يا بنتى مش عايزاكى تتعذبى زى ما احنا اتعذبنا .. انتى ح تتجوزى فتحى ابن خالتك
- بس انا مش بحبه يا ماما
- الحب ما بيأكلش تونة فى الزمن ده يا فالحة
- امرك يا ماما
........................

مصر الان 2006


نهار خارجى ... احد الكافيتريات المغلقة ... موسيقى هادئة تملا المكان

حسن : يا حبيبتى انا مرتبى 250 جنية بعد الضرايب والمستنقعات .. وبعد الشغل بحاول اعمل اى مصلحة يعنى باصفى فى الشهر حوالى 400 450 ... وما عنديش شقة ومش محوش ولا مليم .... اهلك عمرهم ما ح يوافقوا بيه

احلام : ياحسن يا حبيبى بابا وماما متفاهمين جدا ... وما يهمهمش غير سعادتى ... الفلوس دى آخر حاجة ممكن يتكلموا فيها

حسن : انتى شايفة كده ... ماشى .... حددى لى ميعاد مع باباكى الجمعة الجاية الساعة 6
.........................................

المشهد الثانى

فى منزل احلام ... منزل قديم .... فرش متواضع جدا .. يجلس الاب الذى يبلغ من العمر الثالثة والستين .... وبجواره العم 55 عاما ... والخال 56

الخال : منورنا والله يا استاذ حسن
حسن : ده نورك يا عمى
الاب : فين الشاى يا ام احلام
ام احلام من بعيد : جاية اهه يا ابو احلام

الاب : ها يا ابنى .. ح تدفع كام وتشيل
حسن : اللى تأمر بيه يا عمى
الاب : الامر لله يا ابنى .. احنا مش طالبين كتير .. شقة تمليك فى اى حتة تكون نضيفة .. ومهر 25 الف جنية يا دوب ده احنا ح نحط ادهم مرتين علشان نجيب العفش وانت ح تجيب الاجهزة والسجاد وحاجة المطبخ والستاير والذى منه .. وح تجيب شبكة بزيهم .. طبعا انت عارف ان الدهب غلى يعنى مش ح يجيبوا حاجة بس انت وذوقك بقى .. مش كده والا ايه يا ام احلام
ام احلام : آه يا أخويا دى عفاف بنت خالتها خطيبها جايبلها شبكة بخمسين الف جنية .. ده غير الاجهزة الحديثة اللى جايبهالها معاه وهو جاى من السفر
الاب : اما الفرح فى قاعة صغيرة بس طبعا لازم تساع الحبايب واحنا حبايبنا كتير .. والقايمة والمؤخر طبعا انت سيد العارفين .. وفى الاول والآخريا ابنى .. احنا بنشترى رجالة
حسن : بس يا عمى انا ممعاييش المبالغ اللى حضرتك بتتكلم فيها دى
الاب : اللى ممعهوش مايلزموش يا ابنى .. واحنا فى الاول والآخر بنأمن لبنتنا حياة سعيدة .. امال عايز تاخدها رخيصة والا ايه؟
حسن : يا عمى لو بنتك رخيصة ما كنتش خبطت على بابكم .. وسكك الغلط فى الزمن ده سهلة .. واكتر م الهم ع القلب .. وبعدين احنا ممكن نلم الدور .. وحضرتك عارف ظروف الحياة اللى بنعيشها .. وانت لسه قايل بعضمة لسانك ان كل حاجة غليت .. والظاهر ان الانسان بس هو اللى عمال بيرخص
الاب : قصدك ايه؟
حسن : قصدى يعنى دبلتين .. وشقة قانون جديد على قد الحال .. ومهر ربع جنية .. واجيب انا عفش بيتى على قد فلوسى .. وفرح بسيط مش بهرجة ورقص ومسخرة .. ده احنا بنبتدى مع بعض علاقة نضيفة .. اجيب كمبيوتر اجيب تليفزيون .. اجيب تلاجة صغيرة والا كبيرة .. فى الاول والآخر احنا اللى ح نستعملها .. ولو باظت اكيد انا برضه اللى ح اجيب غيرها مش ح آجى واقولك هاتلى .. وحضرتك ممكن تاخد رايها على الكلام ده
الاب : انت جاى تشتمنى والا ايه ؟ .. احنا ما عندناش بنات تمشى كلامها على ابوها .. الظاهر انك جيت البيت ده غلط

حسن : لا ياحج انا طبعا ما جتش غلط .. بس ممكن اكون عايش فى زمن غلط .. مع ناس مش عايشة فيه .. وبعدين هو مش حضرتك مصرى برضه .. ومسلم طبعا ؟ .. يبقى انا ما جتش غلط .. انت اللى قاعد غلط وبتتكلم غلط فى غلط
الاب : احترم نفسك يا ولد
حسن : بلا احترم نفسى بلا نيلة بقى .. احترموا انتوا ظروفنا اللى انتوا حطتونا فيها .. احترموا انتوا دينكم اللى بتعتقدوه وبتعلموهولنا .. احترموا انتوا عقولنا بكلامكم اللى مالوش اى علاقة لا بالعقل ولا بالواقع
الاب : اطلع برة .. ده انا عمرى ما ح اجوزهالك حتى ولو على جثتى
حسن : حتى دى كمان غلط .. ولا تمت للحقيقة بصله .. والحدق يفهم .. سلامو عليكو
.......................
يخرج حسن من منزل احلام .. يسب ويلعن ويضرب الارض بقدميه .. بعد قليل يدق جرس هاتفه المحمول
حسن : ايوة
احلام : ايه يا حسن اللى انت هببته مع بابا ده
حسن : باباااااااااااا .. انا ماشفتش بابا يا طنط .. انا شفت نخاس بيبيع جارية فى سوق العبيد .. شفت جزار بيبيع معزة للى يدفع اكتر
احلام : ايه يا حسن الكلام ده انت بتغلط فيه .. طب وانا ذنبى ايه .. انا مش عايزة فلوس ولا دهب ولا حتى غسالة عادية .. هاتلى طشت ياحسن .. هاتلى قلة .. مش عايزة غير عشة وانسان احبه ويخاف علية واخاف عليه .. واظن ده من حقى انا مش مراهقة ولا طفلة .. انا عندى اربعة وعشرين سنة ...يعنى اقدر اتحمل مسؤلية قرارى .. واختار الانسان اللى ح يعيش معايا حياتى كلها تحت سقف واحد ... اهىء اهىء اهىء
حسن : خلاص بقى بطلى عياط حقك علية .. معلش انا كمان زعلان من اللى حصل واعصابى مشدودة
احلام : طب وح نعمل ايه دلوقت
حسن : العمل عمل ربنا اللى مايرضيهوش اللى بيحصل ده .. ده حتى حرام وظلم وافترا
احلام : طب ايه رايك يا حسن .. لو اسم نفسى كده وكده .. وتيجى تنقذنى ونتجوز
حسن : لا اااااااا .. انا فى عرضك .. الا ما الحقش انقذك وتروحى فيها .. وبعدين كده تبقى روميو وجولييت .. وانا ما ينفعش انهى القصة عليها .. ستين واحد ح يخش يقولى يا حرامى .. دى نهاية مفقوسة وقديمة حتى اسأل جدو شكسبير
احلام : طب ح نعمل ايه يا حسن؟
حسن : اهو كل واحد يقفلها براحته .. انا قلت اللى عندى خلاص

ميرا مار
12-01-2008, 07:11 PM
وجعت قلبى والله يا ايجل
هارجع اقرا اول حكاية يمكن اضحك تانى اصلها كانت حلوة ..

free eagle
12-01-2008, 07:16 PM
شكرا وحمد لله على السلام والله الواحد كان وحشه التعليقات بتاعتك



هههههههههههههههههههههههههههههه

free eagle
12-03-2008, 06:38 PM
محدش عايز يعلق



طيب انا زعلان


ايهئ ايهئ ايهئ

lolaa fahmy
12-04-2008, 01:02 AM
هههههههههه
بس لازم يعني تيجب في الاخر وتغمناا حراام عليك

بس موضوع لزيز

free eagle
12-04-2008, 01:20 AM
اعمل ايه يا لولا هو دة الواقع المصرى والله انا مش قصدى اغمك ولا حاجة


المرة الجاى هجيب حاجة كلها فرح على طول

semsema
12-05-2008, 07:11 PM
ربنا يخليك
خليك متفائل شويه
علشان ربنا يكرمنا
انت فاهم ها

free eagle
12-05-2008, 07:15 PM
ربنا يخليك
خليك متفائل شويه
علشان ربنا يكرمنا
انت فاهم ها






حاضر يا استاذة سمسمة من عنيا


ربنا يسهل واكون متفائل

semsema
12-05-2008, 07:19 PM
ربنا يخليك
خليك متفائل شويه
علشان ربنا يكرمنا
انت عارف بقى
ولا ايه؟

free eagle
12-06-2008, 05:02 AM
ربنا يخليك
خليك متفائل شويه
علشان ربنا يكرمنا
انت عارف بقى
ولا ايه؟




ايو ة

المشكلة انى عارف
هههههههههههه

Youssef Mostafa
12-06-2008, 05:06 AM
موضوع جميل جدا وحقيقى فعلا

free eagle
12-06-2008, 05:08 AM
هو حقيقي والالم فيه برده حقيقي لانه كدة بيهد حلم اتنين بنوا مع بعض



بس الله فيه خير يقدمه ربنا

وزى المثل الجواز قسمة ونصيب

free eagle
12-11-2008, 01:54 AM
ودة كله حرام اللي يحصل للاتنين اللي بيحبوا بعض

bosy
12-11-2008, 02:43 AM
ههههههههههههههههههههههه

هو حلو بس ايه السواد ده كله

free eagle
12-11-2008, 02:59 AM
مش سواد ولا حاجة دة اللي بيحصل ف اغلبية الاوقات



والله الواحد مش عارف يعمل ايه

سلمي جمال
12-12-2008, 01:44 AM
يا عيني مش عارفة لية
حسة ان الحكاية الاخيرة دية حصلتلك

بس متقلقش حصلت لناس كتير

علي فكرة في كتير من الاباء دلوقتي بترضا بناس زي حسن دة و متقلقش
ان شاء الله موضوع حسن حيتحل
ههههههههههههههههههههه

free eagle
12-12-2008, 01:48 AM
والله يا سلا هو لسه محصلش بس ربنا يستر



ويا رب يكون ابوها زى منتى بتقولى كدة

ههههههههههههههههههههههههههههههههههههههههههه

free eagle
01-26-2009, 01:17 AM
ربنا يستر يا سلمى


والله الواحد بقي خايف

white_heart
01-26-2009, 03:13 AM
موضوع جميل وعاجبنى

بس ما بنى على باطل فهو باطل

دى وجهة نظرى

انا شايفة ان اخر موضوع دة الاهل فية بنو افكارهم على تفاهات ملهاش لالزمة

Marwa Mahmoud
01-26-2009, 01:44 PM
بجد شكرا ليك على الموضوع جميل جدااااا
فعلا هى دى الحقيقة وهو ده الواقع المؤلم اللى كتير بيعيش فيه .
نهايه مؤلمة لحب جميل ومين السبب الاهل ولا هى الحياه كدة ولا ايه .
http://www10.0zz0.com/2009/01/17/21/710103174.jpg

free eagle
01-26-2009, 08:24 PM
موضوع جميل وعاجبنى

بس ما بنى على باطل فهو باطل

دى وجهة نظرى

انا شايفة ان اخر موضوع دة الاهل فية بنو افكارهم على تفاهات ملهاش لالزمة




والله يا ويت الواحد مش عارف يعمل ايه ربنا يستر ويعدى الايام اللي جاي على خير ويا رب الناس الكبيرة تغير المفهوم اللي هما حاطينه ف دمغهم علشان المركب تمشي



وشكرا يا ويت على التعليق

free eagle
01-26-2009, 08:27 PM
بجد شكرا ليك على الموضوع جميل جدااااا
فعلا هى دى الحقيقة وهو ده الواقع المؤلم اللى كتير بيعيش فيه .
نهايه مؤلمة لحب جميل ومين السبب الاهل ولا هى الحياه كدة ولا ايه .
http://www10.0zz0.com/2009/01/17/21/710103174.jpg




والله الواحد مبقاش عارف ايه مين السبب


بس برده نرجع ونقول الجواز قسمة ونصيب


وشكرا يا مرمر على التعليق

Night Moon
01-31-2009, 10:47 PM
بجد الموضوع حلو يافري ايجل لانة بيناقش حاجة تقريبا بقت فكرة سائدة في المجتمع اهو ربنا يستر عليكو وعلينا

Marwa Magdy
01-31-2009, 10:58 PM
موضوع حلو اوى يا يسرى
بس الحكاية اللى فى الأخر دى مش حلوة
بس هو دة الواقع اللى احنا عايشين فية
وانا شايفة ان نهاية القصة دى
ان مافيهاش حاجة انهم يعيشوا على قدهم فى اول حياتهم
ويطلعوا السلم واحدة واحدة مع بعض
و المفروض الأب يبقى متفهم كدة

farida
01-31-2009, 11:24 PM
موضوع جميييييييييييييل جدا يا يسري
وده فعلا الواقع الي احنا عايشين فيه
في ناس كتير شايفة ان الفلوس كل حاجة يعني لازم المهر يبقي قد كدة و السبكة قد كدة و السقة قد كدة
طب فيها لو كانت شقة عادية و شغلانة كويسة و خلاص يعني يعيشوا علي قدهم و شوية شوية حتفرج

free eagle
02-01-2009, 01:59 AM
بجد الموضوع حلو يافري ايجل لانة بيناقش حاجة تقريبا بقت فكرة سائدة في المجتمع اهو ربنا يستر عليكو وعلينا




شكرا يا نيت وبجد والله ربنا يستر عليــــــــــــــكم وعلينا


احسن الواحد خايف موت

free eagle
02-01-2009, 02:01 AM
موضوع حلو اوى يا يسرى
بس الحكاية اللى فى الأخر دى مش حلوة
بس هو دة الواقع اللى احنا عايشين فية
وانا شايفة ان نهاية القصة دى
ان مافيهاش حاجة انهم يعيشوا على قدهم فى اول حياتهم
ويطلعوا السلم واحدة واحدة مع بعض
و المفروض الأب يبقى متفهم كدة





والله يا ريت يا ميرو الناس كلها تعمل كدة علشان يريحوا ويستريحوا



ربنا يستر

free eagle
02-01-2009, 02:04 AM
موضوع جميييييييييييييل جدا يا يسري
وده فعلا الواقع الي احنا عايشين فيه
في ناس كتير شايفة ان الفلوس كل حاجة يعني لازم المهر يبقي قد كدة و السبكة قد كدة و السقة قد كدة
طب فيها لو كانت شقة عادية و شغلانة كويسة و خلاص يعني يعيشوا علي قدهم و شوية شوية حتفرج





المفروض يا فريدة بس نعمل ايه بقي


احنا كمان لازم تطلع عينا

طيب محنا هنعيش على قدنا وربنا يكرمنا مع بعض


بدل الواحد ميعمل حاجة كدة ولاكدة

ربنا يستر