المساعد الشخصي الرقمي

مشاهدة النسخة كاملة : كانو تعساء ..



Mimi
12-27-2008, 12:32 PM
كلنا عارفين طبعا ابراهام لنكولن أحد رؤساء الولايات المتحدة الامريكية

ابراهان لنكولن كان قبل سنوات قليلة من توليه لمنصب الرئاسة على حافة الانهيار العصبي لانه كان تعيس في جوازه وكان ولاده بيموتو واحد ورا التاني دا اللي خلاه يقول : انا دلوقتي أتعس مخلوق في الكون على قيد الحياة ولو وزعو تعاستي على كل اللي على الارض بالعدل مش هتلاقي وش واحد مش تعيس على وجه الكرة الارضية

لامسين مدى تعاسته وحزنه ؟ تعالو نشوف باه لما تولى منصب الرئاسة وبقى رئيس الولايات المتحدة الأمريكية مكنش لاقي اي وقت يتكلم او يشتكي من حياته الخاصة كل اللي كان مهتم به قضية التحرر العام ( للعبيد )

ياترى كم واحد ربط همومه بالشكل دا واتحملها عشان ينشغل بهموم الناس ؟

كان في واحدة ست عندها كل حاجة ..زوج وسيم جدآ وثري جدآ ولو طلبت لبن العصفور يجيبهولها مع اني مش عارفه ايه لبن العصفور بس المهم كان بيهديها كل شهر ساعة بقيمة 300 ألف أو خاتم بقيمة 50 ألف او قطعة أرض بمليون او عربية آخر موديل .. ماشي ؟

بس هيا مكنتش بتيجي فرصة الا ولازم تشتكي فيها من بخله الشديد !! كدا هو بخيل جدآ بالنسبالها وكل يوم مش بتعرف تنام لانها دايما بتتصور انه هيحب واحدة تانية عليها ويخونها وأكيد اللي بيحبها دي بيصرف عليها كل فلوسه عشان كدا هو بخيل معاها !!!! وبسبب الغيرة المجنونة دي وصلت لايه ؟ سابها جوزها

ياترى لو شغلت نفسها بهموم الناس كانت وصلت للي وصلتله دا ؟ مش كانت حست بقيمة اللي هيا فيه ؟

الايدين المشغولة عمرها ما هتشتكي من الفراغ والعقل المشغول بمتاعب الناس مش هيفكر ابدآ في متاعبه ...يعني بشوف اننا لو انشغلنا بهموم الناس دا ممكن يكون علاج للتخلص من همومنا

كان في دكتور بيقول ان كان في واحدة عندها فوبيا انها تتجنن ..اه والله بجد في ناس عندهم هوس المرض بيخافو يمرضو فما بالك دي متخيله انها هتتجنن في يوم من الايام وبعد ما اتجوزت وجابت اول طفل انشغلت بيه فنسيت شوية الهوس اللي بيصيبها دا وهكذا بعد ست شهور خف اكتر لحد ما خلفت 6 أطفال وانشغلت بيهم وبتربيتهم وخفت تماما من الهوس دا

أحب أختم في النهاية بحاجتين

أول حاجة مثال أخير بيلخص الموضوع وهو رواية عن الأصمعي قال فيها أنه دخل في يوم على الخليل بن أحمد الفراهيدي ولقاه قاعد على حصيرة فقاله تعالى اقعد جنبي فرد عليه الأصمعي : " أخاف أن أضيق عليك" فرد الفراهيدي مه..مه (كلمة تعجب) الدنيا بأسرها لا تسع المتباغضين. وإن شبراً في شبر يسع المتحابين، والدنيا بأسرها لا تسع إنساناً لا يرى غير نفسه وتتسع لكل من يعيش لنفسه وغيره.

تاني حاجة كنت عايزه أعرف رائيكم في الموضوع دا ..هل فعلا من الضروري اننا ننشغل بامور الحياة وباحتياجات الناس اللي حولينا عشان نقدر نعيش كويس بعيد عن اي هموم او احزان ؟

Ahmed Mohamed
12-27-2008, 12:44 PM
معلش هو الصراحة مش لازم لاني اعرف ناس مش مهتمين غير بمشاكلهم الخاصة
عشان يقدروا يحلوها وفعلا بتتحل .

وفي رأيي انا : انه لازم نشوف مشاكل وهموم الناس عشان نقدر نحل مشاكلنا احنا

وفي حديث بيقول " حب لأخيك كما تحب لنفسك " يعني حاول بقدر الامكان انك تساعد الناس
في حلول لمشاكلهم وهمومهم .

بس ايه رأيك في الكلام المتناقض ده

:D:D:D:D

اه صحيح موضوع جاااااااااااااااامد اخر حاجة

الله ينور

Mimi
12-27-2008, 01:29 PM
انت قلت حاجتين عكس بعض فعلا يااحمد بس مفيش تناقض لانك قلت حقيقة وقلت رأي

الحقيقة ان في فعلا ناس مشغولة بمشاكلها عشان تحلها وبتقول احنا هنلاقيها منين ولا منين بس دا غلط لأنهم مش هيعرفو يوصلو لحاجة بسهولة غير لما يحاولو يساعدو غيرهم وياخدو الخبرة في التخلص من همومهم لكن لو لوحدهم هيتوصلو للهروب من همومهم مش التخلص منها نهائيا

والهروب بيعرضك في لحظة لمواجهة همومك مرة تانية لانك في الحقيقة متخلصتش منها

لكن عن رائيك الشخصي فهو دا اللي بقيده جدآ ومعاك في كل كلمة قلتها " حب لأخيك كما تحب لنفسك "

يبقى رائي باختصار لردك :

الانشغال بمشاكلنا --- يوصلنا --- للهروب من مشاكلنا

الانشغال بمشاكل الغير --- يوصلنا --- للتخلص من مشاكلنا

وشكرا يااحمد مشاركاتك جميلة

ميرا مار
12-27-2008, 04:02 PM
جودى ..انتى بتجيبى حاجات تخلى الواحد يفكر كدة
بصى هو الموضوع جميل قوى للمناقشة..

اخويا مرة قاللى حاجة..قاللى كل واحد عنده مشكلة او حاجة شاغلاه
واللى ماعندوش بيدور على حاجة تضايقة عشان يقدر يعيش
ههههههههههههههههههههههههه
وطلع عنده حق..
بس خلينا فى رايك الجميل
انا فهمت ان قصدك نحاول نشغل نفسنا بالكون
لانه اوسع من قوبنا اللى فيها همومنا الشخصية..

انا مشيت بالمبدا ده لفترة.. لقيت انى بردو الف الف
وارجع احط راسى على المخدة وانا حزينة..

ووصلت ان فاقد الشئ لا يعطيه
لكن احلى الحلول الوسط

مش لازم اعيش فى قوقعتى لغاية ماحل مشكلتى
لكن على الاقل اخلي لها ساعة فى اليوم افكر فيها

كمان علم النفس بيقول لو انت عندك مشكلة فكر فيها شوية
وبعدين اشغل نفسك فى حاجة تانية لفترة
هتتفاجأ فى مرة منهم بحل ماخطرش على بالك قبل كدة..

شكرررررررررررررررررررررررررا يا قمر على الموضوع الجميل..وفى انتظار المزيد
من موضوعاتك المتميزة
اه على فكرة اكيد دا كان حال الست اللى عندها ست عيال
تعيييييييييييييييييسة ولا حد حاسس بيها

http://i126.photobucket.com/albums/p107/boubie_2006/12232.jpg

heba
12-27-2008, 05:03 PM
شكرا يا جودي على الموضوع ودايما بتفدينا بموضوعاتك المتميزة
عارفة ياجودي مفيش حد عاجبه حاله وانا فهمت قصدك بأننا لازم نشغل وقتنا ,بس في حاجات كتير بتبقى خارجة عن ارادتنا وتحسي انها بطاردك في كل مكان مهما عملتي وملهاش حل غير الرضا بقدر الله .كما في قول الله تعالى في سورة البقرة (كتب عليكم القتال وهو كره لكم وعسى ان تكرهوا شيئا وهو خير لكم وعسى ان تحبوا شيئا وهو شر لكم والله يعلم وأنتم لا تعلمون)

Mimi
12-27-2008, 05:42 PM
هههههههههههههههههههههههههه نفسي اعرف بتجيبي منين الصور دي ياميرا بس الست اللي عندها 6 عيال دي مكنتش تعيسة بيهم بالعكس دا هما اللي خرجوها من تعاستها بس الصورة جامدة موت هههههههههههههههههههه

رائيك مناصف جدآ ياميرا شايفة انك وازنتي بين الحاجتين لا نهمل الانشغال بمشاكلنا ولا نتقوقع زي ما قلتي مع نفسنا ومنهتمش بالناس

رائ مريح ومنطقي وانا اوافق عليه شكرا ليكي ياحبيبتي ردك ذكي وعجبني جدآ

Mimi
12-27-2008, 05:47 PM
شكرا يا جودي على الموضوع ودايما بتفدينا بموضوعاتك المتميزة
عارفة ياجودي مفيش حد عاجبه حاله وانا فهمت قصدك بأننا لازم نشغل وقتنا ,بس في حاجات كتير بتبقى خارجة عن ارادتنا وتحسي انها بطاردك في كل مكان مهما عملتي وملهاش حل غير الرضا بقدر الله .كما في قول الله تعالى في سورة البقرة (كتب عليكم القتال وهو كره لكم وعسى ان تكرهوا شيئا وهو خير لكم وعسى ان تحبوا شيئا وهو شر لكم والله يعلم وأنتم لا تعلمون)



مبسوطة جدآ برائيك ومشاركتك ياهبة والله ..ما شاء الله عليكي كلامك صح اوي

وفعلا من الآية اللي دعمتي بيها رائيك المفروض اننا لو لقينا مشاكلنا بتطاردنا فين ما رحنا حتى لو انشغلنا بوقتنا نحاول نبصلها بمنظور ايجابي لان فعلا عسى ان تكرهو شيئآ وهو خير لكم

ودايمآ ربنا ليه حكمة في كل حدث بيحصل فلازم نعقد النية من دلوقتي اننا نبتدي نستفيد من جانب ايجابي باي ابتلاء يصيبنا زي التقرب لربنا مثلا والدعاء له بفك كرباتنا او التفكير بشكل ايجابي في تحليل مشاكلنا للوصول لحل

مش نخضع لهمومنا ونفضل مهمومين كل يوم اكتر من اللي قبله

رأي سليم وجميل جدآ ميرسي ليكي ياقمري ومبسوطة بجد من كل الردود اللي جت في الموضوع دا