المساعد الشخصي الرقمي

مشاهدة النسخة كاملة : ارجو المشاركه للاهميه



مى الشورى
01-05-2009, 09:25 PM
اليوم الموافق 5/1/2009
فى جريدة الجمهوريه كان فيه خبر كان لابد اننا نقول راينا فيه
والخبر كان بيدور حول
الاقتراح اللى كان فى التجربه الدنماركيه
وهو تدريس الثقافه الجنسيه
فى المدارس
ارجو منكم التعليق بارائكم على هذا الامر

ميرا مار
01-05-2009, 09:40 PM
موضوع جميل يا مى وجرئ باشكرك على طرحة ..ويارب يكون
فى جراه والتزام فى ابداء الاراء

انا بقى راييى انهم مش عارفين يدرسوا العلوم والاداب فى المدارس
ونظام تعليمنا اثبت فشله..

فاقتراحى انهم يعملوا دروس اجبااااااااااااااااااارية للاباء والامهات ..
وتكون المناهج فى محورين
الاول ..محو امية الاباء والامهات انفسهم وذلك بتدريسهم الثقافة الجنسية على اسس علمية
التانى ..تربوى بانهم يعلموهم ازاى يبداو بالحوار مع اولادهم وازاى يوصلو المعلومة..

وكدا اعتقد انه اسلم واامن طريق
شكرا مى ع الموضوع المتميز

Sara Gamal
01-05-2009, 10:00 PM
فعلا يامى زى ما قالت ميرا موضوع جرئ جدا احييكى عليه...ويستحق واقفة ومناقشة

اولا انا مش ضد الاقتراح لانه بيؤكد دور المدرسه او الهيئات التعليمية فى تاهيل الاجيال فى كافة مناحى الحياة
لكن السؤال هنا ..هل المجتمع عموما وتلاميذنا فى المدارس خصوصا مؤهلين لدراسة مثل تلك المقرارات والاستفاده منها بالوجه المرغوب فيه؟
انا من وجهه نظرى ان ده غير متوفر لان مثل تلك المقرارت محتاجة قبل دراستها لقاعده صلبة وقويه من العقيدة الدينية والاخلاقية اللى هتوجه التعليم فى المجال ده غير انها محتاجة زى ما ميرا اشارت لتاهيل للاباء والامهات ومحو اميتهم انفسهم فى هذا الجانب عشان يقدروا يوضحوا لابناءهم النقاط اللى ممكن تغيب عن الدراسة فى المدرسة او النقاط التى قد لا تسطيع المدرسة توصيلها .

لكن يظل فى تخوف عندى من شئ وباكد عليه هل المجتمع المسلم والعربى بالقدر من المتانه لتحمل مثل ذلك النوع من الثقافه احنا طبعا كلنا شايفين نتايج القنوات الفضائيه والمواقع الغير مسؤله على الانترنت النتايج اللى بقينا بنشوفها فى شوارعنااو فى وسائل الاعلام سواء مقروءه او مسموعه واللى مكنتش موجوده على ايام اباءنا او اجددنا ...وهنا هرجع بردو لنقطة الدين.الدين .الدين

AYMAN GAMAL
01-05-2009, 10:03 PM
الموضوع ده صعب جدا و حساس بس انا رايي من وجهة نظري ان المرجعية تبقى من الوالدين ومفيش داعي للمنهجة

الموضوع مش حياة او موت يعني

Hassan Mohamed
01-05-2009, 10:10 PM
موضوع جرئ جدا يا مي وانا هقول رأيي بصراحة مطلقة

بصي يا مي احنا نحمد ربنا علي نعمة الاسلام ... شوفي المجتمعات الاجنبية دي نتيجة تدريسهم للثقافة دي نتائجها ايه عندهم تعالي مثلا نشوف امريكا ... الشاب يمارس الجنس مع الفتاه وفي النهاية لو بقت حامل يتجوزها ( يصلح غلطتوا زي مبيقولوا ) ولو لم تحمل منه يقولوا احنا اصحاب ؟ هل دينا يسمح بكده؟؟!!!

الدنمارك اللي بيقولوا عليها عندهم يوم في السنة الناس بتمشي عرايا هل دينا يسمح بكده ؟؟!!!

اعتقد ان لو تم تدريس الثقافة دي في المدارس هيبقي الموضوع عادي عندنا وهتشبه بالغرب ومجتمعنا العربي والاسلامي هيبقا مجتمع اوروبي بالدرجة الاولي

وانا هقولك بصراحة الكلام في حاجة زي كده بتثير مشاعر الشباب والبنات واكيد هتدعوهم للتجربة زي ما بيحصل في المجتمعات الغربية وفي النهاية بيقولوا اصحاب وصاحبي وصاحبتي

وفي النهاية عاوز اقولك ان كل انسان منا جواه الثقافة دي بالفطرة وابسط ما يدل علي ما اقوله هو آدم وحواء ياتري عارفو الكلام ده منين ... اكيد بالفطرة والغريزة اللي بداخل كل شاب وكل فتاة

انا سجلت رفضي في الاستفتاء للتدريس الثقافة الجنسية

واتمني ان تكون مدخلتي خفيفة علي قلبكم

Hassan Mohamed
01-05-2009, 10:16 PM
الموضوع ده صعب جدا و حساس بس انا رايي من وجهة نظري ان المرجعية تبقى من الوالدين ومفيش داعي للمنهجة

الموضوع مش حياة او موت يعني


فعلا يا ايمن الموضوع مش حياة او موت ... حتي ولو مفيش مرجعية من الاب او الام دي حاجة فطرية ... يعني مثلا الحيوانات عندها مدارس لتدريس هذه الاشياء ؟ ولا الوالد والوالده بيحكولهم حاجة زي كده ؟

Hassan Mohamed
01-05-2009, 11:49 PM
فين يا جماعة آراء بقية لاعضاء ... الموضوع مش مخجل للدرجة دي لازم يكون لينا رأي ... لان راي كل واحد فينا بيعبر عن شخصيته

Mimi
01-05-2009, 11:57 PM
لفتة مهمة يامي شكرآ ليكي

من رأيي لا أؤيد هذه الفكرة

طبيعة المسألة التعليمية في مصر فيها مشاكل يعني في كل المواد اللي بتدرس المدرسين وهيئة التعليم سالكين فيها مسلك خاطئ وطرق التعليم خاطئة

وحاجة حساسة زي دي اذا ما اتقنوش طريقة تدريسها وتهيئة الظروف المناسبة لتدريسها فهي هتكون نتايجها سلبية بشكل كامل

وبعدين ظروف مجتمعاتنا الشرقية والاسلامية لا تحبذ تدريس هذا النوع من الثقافات بشكل عام للشباب فأنا برفض الفكرة لان نتايجها سيئة

وبالمناسبة أقوى رأي هو رأي حسن لانه حلل الموقف بسهولة وأثبت سلبية الفكرة

Hassan Mohamed
01-05-2009, 11:59 PM
لفتة مهمة يامي شكرآ ليكي

من رأيي لا أؤيد هذه الفكرة

طبيعة المسألة التعليمية في مصر فيها مشاكل يعني في كل المواد اللي بتدرس المدرسين وهيئة التعليم سالكين فيها مسلك خاطئ وطرق التعليم خاطئة

وحاجة حساسة زي دي اذا ما اتقنوش طريقة تدريسها وتهيئة الظروف المناسبة لتدريسها فهي هتكون نتايجها سلبية بشكل كامل

وبعدين ظروف مجتمعاتنا الشرقية والاسلامية لا تحبذ تدريس هذا النوع من الثقافات بشكل عام للشباب فأنا برفض الفكرة لان نتايجها سيئة

وبالمناسبة أقوى رأي هو رأي حسن لانه حلل الموقف بسهولة وأثبت سلبية الفكرة



بشكرك يا جودي انك بتأيديني في الرأي

Mahro
01-06-2009, 12:23 AM
هى ناقصه مصايب والله حكومه فاضيه فعلا يعنى هو زويل كان اخد ثقافه فى المدرسه ولا فاروق الباز ولا غيره وغيره الموضوع اكبر من الهبل الى الحكومه فيه ده توفر تساهيل للجواز روحوا شوفوا ليبيا النظام فى الجواز والأولاد عامل ازاى الحكومه بتاعتنا شكل مقرها مش فى مصر ولا ايه .....

احمد عبد الحليم
01-06-2009, 01:32 AM
مي اولا انا بحييكي علي فكرة الموضوع وكمان بحييكي علي
اشراكنا في الرأى
والحقيقة انا شايف ان الموضوع سابق لاوانه بالنسبه للتلامذة
وتدريسها مش هايفيد في المرحلة دى قد ما هيضر

وعموما التربيه ليها دور لان اللي عاوز يعرف حاجة
مش هايستنى لما يدرسوها ما عندة النت فيه كل حاجه .
ولا ايه.....

مى الشورى
01-06-2009, 01:34 AM
على فكره يا جماعه اللى كانوا بيقترحوا
ذلك الاقتراح هم علماء الازهر

مى الشورى
01-06-2009, 01:50 AM
فاضل انا بقى اقول راى
اولا انا بشكركم على تفاعلكم فى الموضوع ده
ثانيا انا لما قررت انى اناقش الموضوع ده
بجد اترددت من ساعة ما شوفت الخبر
ثالثا اعتقد انه من حقنا اننا نقرر ايه اللى نحب ندرسه او يدرس
لاولادنا فى المستقبل
رابعا انا معاكم كلكم فى كل اللى قلتوه
كما انه معتقدش ان حاجه زى دى
تتماشى مع دينا او ثقافتنا
حتى لو كما قال لى البعض لا حرج فى الدين
او لا حياء فى الدين بقول ده كلام خطا
لانه لما طلب النساء من الرسول ان يعلمهم كيفية
الاغتسال مثلا
كان هناك كان فيه تهذيب فى التعليم
وتوصيل المعلومه
ولما كان بيبقى فيه موضوع فيه احراج او خجل
كان بيطلب من اهل بيته توصيل المعلومه بدل منه

مى الشورى
01-06-2009, 02:00 AM
يا جماعه فيه 25% اراء اخرى
يا ريت يعرفونا الاراء
دى من فضلكم

Hassan Mohamed
01-06-2009, 12:12 PM
انا شايف ناس شاركت في التصويت من غير متقولنا رأيها ليه قالت لا او ليه قالت نعم ياريت يكون فيه رأي لكل واحد فينا

ميرا مار
01-06-2009, 01:23 PM
مى
اقر واعترف انى حزينة جدا من اراء الكتييير
ورايك يا مى حقيقى جميل انتى وسارة..
الموضوع فعلا يا ايمن مش حياه او موت
والشهادات والتعليم العالى مش حياه او موت
والفلوس الكتير مش حياه او موت
ويبقى عندك عربية مش حياه او موت
وحتى يبقى عندك صحاب مش حياع او موت
وكتييييييييييييييييييييييييييييير ع الارض مش حياه اوموت

لكن الفرق اننا نختار لنفسنا الافضل طالما فى طريقة لكدا
ويا حسن زعلتنى والله ازاى مش عايز يبقى فيه مرجعية حتى من الاب والام؟؟؟
اتفضل شوف الافكار الكتير الغلط بسبب انتشار ثقافات غلط بين الشباب
وللاسف الانسان عنده شغف لمعرفه اى شئ غامض عنه..
يضطر يلجا لكتاب غلط او موقع غلط ..او صاحب غلط..

مافيش حاجة اسمها فطرة بس ربنا خلق لنا العلم وجعله فريضة
والله ينور عليكى يا مى
رسولنا الكريم علم وطلب من نساؤه يعلمو كافة المؤمنين

انا مش هاطول عليكم
مثال بسيط
البنت ..بتتولد بغريزة الامومة صح بالفطرة مش محتاجة حد يعلمها ازاى تبقى ام..صح؟؟
غلط
شوف بنت جاهلة بتربى ولادها ازاى..
وشوف تانية متعلمة بتربيهم ازاى..
وشوف التالتة متعلمة واشترت كتب ودورت على العلم المتخصص
فى تربية الطفل والتعامل مع نفسية الطفل..

اللى عايزة اقوله تعليم فى مدارس مرفوض..لان نظام تعليمنا اثبت فشله
لكن لااااااااااازم الاب والام يتكلموا مع ولادهم
عشان كدا لازم نعلم الاب والام الاول وطبعا فى اطار دينى..

Hassan Mohamed
01-06-2009, 01:41 PM
اولا انا مقولتش ميكونيش فيه مرجعية من الاب والام !!!!


ثانيا انا مؤمن جدا بوجهه نظري ...

ثالثا انتي قولتلي كلام ملوش علاقة بالتحليل اللي انا حللته خالص ... انا كل كلامي عن مدي تأثير تلك الدراسة علي عقولنا وعلي دينا

انتي بتتكلمي في منظومة تعليم فاشلة وانها هتكون غير قادرة علي توصيل المعلومة بشكل صحيح او باسلوب علمي جيد

ونسيتي ما قولته عن تأثير تدريس الثقافة دي علي المجتمعات الغربية ... لو المجتمع الغربي متقدم في كل حاجة إلا انه ما يسئ ليه ما يحدث فيه من علاقات مشبوهه ومرفوضة لينا جميعا

ياريت منفتحش الباب جهنم علي انفسنا

يا بشمهندسة مسئلتيش نفسك عن كيفية تدريس تلك الثقافة هتكون عاملة الزاي؟

توقعي كده معايا الدراسة هناك عاملة الزاي؟؟؟

ابسط شئ ممكن اقولهولك انهم ممكن يجيبوا شرائط غير محترمة ويعرضوها علي الطلاب هناك ويقولوا ده علم ؟؟؟

استغفر الله العظيم هل دينا يسمح بكده بردو يا بشمهندسة ؟ ده شئ غير مقبول بالمرة

ولا تتخيلي انهم هيدرسوها عن طريق الصور ولا هيبقا عن طريق كلام يقال وما علينا ان نتخيل

ياريت تفكري في ابعاد الموضوع كلها قبل متقولي حزينة من الآراء

الموضوع ابعادة كتيرة جدا

Sara Gamal
01-06-2009, 01:53 PM
فعلا يا ايمن الموضوع مش حياة او موت ... حتي ولو مفيش مرجعية من الاب او الام دي حاجة فطرية ... يعني مثلا الحيوانات عندها مدارس لتدريس هذه الاشياء ؟ ولا الوالد والوالده بيحكولهم حاجة زي كده ؟


اسمحلى ياحسن بعد تحيتى وشكرى ليك على المشاركة ..الا انى عندى راي تانى مقدرش اقول انه معارض لكن مكمل
**أولا ياحسن هناك فرق شاسع جدا جدا جدا بين ايام ادم وحوا ودلوقتى ..احنا دلوقتى عايشين فى عالم مفتوح حتى لو حاولنا اننا نغلق على انفسنا مش هنسلم منه ومن افكاره ..وده معناه ان الافكار دى بخير وشرها هتوصلنا ولان مفيش توجيه المجتمع هياخد الافكار دى بحالتها الخام ويطبقها حتى لو جزء رفض الا ان الاغلبية هتمشى مع الموجه....
المقصود ياحسن من تدريس المقرارات دى او اللى اقصده انا من الموافقه على الموضوع هو ان يشترك كل من الدين اولا والعلم متمثل فى المدرسة والاسره فى توجيه الافكار دى وتوضيح ما يمكن وما لا يمكن للاجيال الحاليه واللى جايه لان الانفتاح بيزيد وتوراد الافكار والثقافات محدش ابدا هيقدر يوقفه
تشبيه بسيط اوى اوى ياحسن انت لو عندك فيضان مثلا مش هتقدر توقف الفضياان ده وتقوله بس كدا كفايه ارجع لكن عندك فرصه تستغله تبنى عليه سد يسمح بمروره لكن تحت اشرافك انت وتحت عنيك تحدد قواعد تحددها ويحددها دينك واخلاقك
***ثانيا ياحسن وانا متاسفة للجميع لان الرد ممكن يكون مش مقبو ل الى حد ما لكن اتوقع اننا اكثر ادراك لده...الحيوانات ياحسن الغريزه اللى داخلها تختلف تماما عن الانسان الحيوان غريزته فقط من اجل البقاء والحفاظ على نوعه لكن الغريزة البشريه معناها اوسع بكتير جدا صحيح بيدخل فيها جانب الحفاظ على النوع وبقاء النسل لكن تشمل جوانب روحيه وشهوانية ..معذرة...هى الاقوى تاثير فى مثل هذه الامور
عشان كدا لابد من تهذيب تلك الرغبات داخل الانسان ووضعها فى اطار يوضحها ويحجمها

وفقدان المجتمع لمثل هذه القواعد هو اللى نتج عنه زى ما اشرت للنتايج المخزية اللى ترتبت على القنوات والفضاائيات والمواقع الاباحية والمواد المسمومه فكريا من كتب ومجلات وخلافه التى لا يمكن ان ينكر احد منا انتشارها فى صورة وباء فى المجتمع العربى والاسلامى بدون رادع او واعز دينى واخلاقى من المجتمع سواء الاسره او المساجد او المدارس

إذا كان ياحسن انت وغيرك رافضين لتدريس هذه المناهج لسبب اخلاقى ودينى فاسمحلى اقولك ان الرافضين هما الفئه القليله الواعيه واللى مش محتاجه تتفهم مثل هذه الامور وللاسف ان الفئه الغالبة غير مدركة وتحتاج الكثير والكثير لفهم تلك الامور وادراك حدودها وقواعده الدينيه والاخلاقيه والانسانية

انا اسفه جدا جدا للاطاله لكن انا شايفه ان الموضوع يستحق منا الكثير وخصوصا اننا على اعتاب الخروج الى المجتمع وصفوف المسؤليه ...ده اذا مكنش فينا ناس مسؤله بالفعل

وقبل مختم باكد تانى على كلام ميرا وبأيده ..وأيد راى جودى فى إن العملية التعليميه فى مصر فاشله وضايعه..ولازم تطوير شامل لجميع مناهجنا التعليميه وتاهيل الاباء والابناء ووضع قواعد دينيه سليمة...ثم التطرق لمثل هذه المواضيع الحساسة والهامة جدا جدا

Hassan Mohamed
01-06-2009, 02:00 PM
اكيد طبعا يا سارة كل واحد مننا ليه رأي وانا قولت رأي وبكل وضوح وبكل صراحة

ومعنديش كلام اقوله اكثر من كده في الموضوع ده

عشان كده انا بنسحب من المشاركة في الموضوع ده تاني لاني خلصت كل لكلام اللي عندي

والسلام عليكم ورحمة الله وبركاته

Zooma
01-06-2009, 02:13 PM
موضوع فعلا جرئ منك يا مى

وهو الموضوع كله زى ما حسن قال وانا مع رأيه لان فعلا هو ده ايلى بيحصل برة
وبما اننا مش بناخد غير السلبيات فى المجتمعات الاوروبيه و الغربيه يبقى
اكيد هيطبق عندنا بسلبياته مش باجابياته.
وكمان ده ممكن يفتح مجال للمواقع الاباحيه ويزيد منها فى مصر
يبقى الوله قاعد فى البيت وفاتح المواقع البزيئه دى ولا همه حد
يدخل باباه او مامته تقوله ايه ده يقولها لا اصل احنا بندرسه فى المدرسه :mad::mad:
ده فعلا ايلى ممكن يحصل مين عارف ؟؟!!
فالوضوع ده هيشيل كلمه الحياء من المجتمع المصرى
والحل فى الموضوع ده هو من نحيه الاباء يعنى الام تاخد بنتها صديقه ليها
والاب نفس النظام مع ابنه كده هيشيل حاجز الكسوف بين الاباء والابناء
وهيكون فى حوار مابنهم

وشكرا بجد يا مى على انك طرحتى الموضوع ده

ميرا مار
01-06-2009, 02:18 PM
الله ينور عليكى يا سارة
قلتى اللى انا ماعرفتش اقوله والله بجد كلامك يلخص الموضوع ومافيش حاجة تتقال اكتر من كدا..شكرا لك يا سارة

اما موضوع الغرب دا..
صدقنى ..هناك عندهم فى اغلب العائلات الولد او البنت اول مايتم 18 سنة بيبقى مسئول عن نفسه
ويروح يعيش لوحده لكن هنا رعاية الاهل حتى الممات..فى فرق

+++++ اننا عندنا قيم واخلاق دينية اتربينا عليها
ولما نلاقى كل اللى حوالينا بسرق لازم نكلم ولادنا شوية عن السرقة ونفهمهم انها غلط
وان لا رب ولا دين يرضو عنها مش نسيبهم
وبعدين على فكرة فى بعض اسر امريكية ديانتها مسيحية بيحرموا اقامة هذه العلاقات
وطبعا اللى متمسك منهم بدينه بيساعد اولاده على تخطى هذه المرحلة الصعبة
دا طوفان على راى سارة
وايه احسن طريقة لمواجهته غير العلم
اما الطريقة بقى دى نسيبها لاصحاب العلم باشراف رجال الدين.. ولاخر مرة هاقول
نخلى الوسيط الاب والام ..

ميرا مار
01-06-2009, 04:27 PM
ياااااااااااااااااا 103 مشاهدات للموضوع و20 مشاركة بس؟؟؟؟؟؟؟؟؟؟؟؟؟؟
ياترى ليه؟؟؟
يا جماعة اكيد لكل واحد رايه.. يبقى يتشجع ويعبر عنه ولو بكلمات بسيطة..
مش لازم نخوض فى الموضوع بس على الاقل
زى مانتو شوفتوا اراءنا تشاركونا بما لديكم من اعتراض حتى

Ahmed Mohamed
01-06-2009, 05:43 PM
انا بقه رأيي جزء من حسن وجزء من ميرا ليه انا قولت كده :

1- لان حسن دخل في موضوع الغرب واللي بيحصل فيه نتيجه هذه الثقافه ( وانا بأيده في النقطة دي )
2- اما ميرا اتكلمت عن الاهل والاب والام والزامية تعليمهم حتي يستطيعوا مواجهة اولادهم والحديث معهم
في مثل هذه المواضيع ( لان الاب والام ساعات لما الابن او البنت يفتحوا الموضوع ده معاهم يخجلوا وممكن يتهربوا منهم )
فالبتالي البنت او الولد حيضطر يدور علي اجابة لسؤاله فين بقه وعند مين هي دي المشكلة )
3- انا بايد كمان فكرة ان التعليم عندنا فاشل فازاي حيتم تدريس مثل هذه الثقافة ( مينفعش )


واخيرا احب اشكر مي علي الموضوع الجامد ده

free eagle
01-06-2009, 06:07 PM
والله يا جماعة انا اعرف ان الوزارة بتاعة التعليم اسمها وزارة التربية والتعليم



يعنى زى مانتم شايفين ان التربية قبل التعليم

دة المفروض بس الحمد لله دلوقتى ولا فيه تربية ولا تعليم والله حرام عليهم اللي بيعملوا فينا


موضوع بجد جامد

ياجماعة هم عايزين يشغلونا بس عن اللي بيحصل ف غزة مش اكتر هو النظام دة كدة ف مصر اشغلو الشعب علشان محدش يفكر فاللي بيحصل بس

دة برده فكر حكومة هما طبعا مش هيقدر يعمل كدة بس علشان يشغلوا الناس بس ربنا على الظلم والمفترى يا رب


اللهم ارينا فيهم يوما اسودا

ميرا مار
01-06-2009, 06:52 PM
احمد روميو..
اهنيك على رايك
راى حكيم ومتزن

اسامه البنا
01-06-2009, 07:16 PM
هى ناقصه مصايب والله حكومه فاضيه فعلا يعنى هو زويل كان اخد ثقافه فى المدرسه ولا فاروق الباز ولا غيره وغيره الموضوع اكبر من الهبل الى الحكومه فيه ده توفر تساهيل للجواز روحوا شوفوا ليبيا النظام فى الجواز والأولاد عامل ازاى الحكومه بتاعتنا شكل مقرها مش فى مصر ولا ايه .....

ايه؟ يا واد الكلام ده
الله ينور عليك

اسامه البنا
01-06-2009, 07:23 PM
بس انا رافض الموضوع يكون هنا او نتناقش فيه


الدنيا في حجات كتير احنا بصراحه مشكلتنا اننا لازم نطور العنصر البشري لينا
ولازم نحاول نرتقي بنفسنا والمشاكل ان شاء الله هتتحل

witch evil
01-06-2009, 07:51 PM
موضوع حلو يا مى

بس انا من رئى زى مقال بعض الاعضاء ان لازم المرجعيه فى الموضوع ده تبقى للاهل وليس للتعليم

وياريت يدوروا الاول على المواد اللى مش بتاخد حقها فى التدريس بدل مبيحشوا دمغنا وخلاص

يعنى ابدى انهم يراعوا ماده الدين اللى بقت من المواد اللى مش بنشوفها غير نادرا واللى يقولك بذاكر دين تقوله ايه يا جدع ذاكر كيمياء ولا رياضه

لو اساسا صح فى المواد المؤسسه زى الدين مش حنبقى محتجين مناهج جديده لان الحمد لله ربنا انعم علينا بالاسلام

والاسلام مسبش حاجه الا واتكلم عنها

مى الشورى
01-06-2009, 08:32 PM
بجد يا جماعه انا بشكر كل اللى شارك
فى الموضوع ده واخده على محمل من الجد
وارجو ان تكون المشاركات
على اد المشاهدات
وفى النهايه بقول
ان الاختلاف فى الراى لا يفسد للود قضيه

The[H]KinG
01-06-2009, 11:16 PM
شكرا يا مى على الموضوع الجااااامد ده
بس أحنا منفعش نكون فى المواضيع دى
لان نص الشعب مش بالغ عقليا
يعنى معندهمش اى وعى عشان يتقبل الكلام ده خاااالص
واللى يقولك ده عيب واللى يقللك ايه قلة الادب دى وهنسمع كلام كبير اوووووووووى
ده غير راى الاخوان المسلمين اللى يحكموا بدورهم على اللى هيعلم النوع ده من التعليم بحد الحرابة واللى ميعرفش يعنى ايه حرابة
هى :الافساد فى الارض وحكمها القتل أو تقطيع الايد والرجول
فطبعا أحنا مننفعش للكلام ده
طب هقوللك على حاجة انتى لو عندك بنت توافقى ان مدرس راجل يعنى يشرحلها الموضوع ده
وبعدين الناس اللى بيقولوا ان الكلام ده يكون من الاباء
أغلب الناس تقوللك عيب ويتحرجوا ومش عارف ايه ويقوللك طب ما احنا جينا كده ومخلفين (بغاااااااال) أهو من غير ما نعرف حاااااااجة
ومن الاخر يعنى هى المشاكل خلصت ومفيش غير دى
دا البلد مليانه مشااااكل

وشكرا على أتاحة الفرصة للمشاركة وأتمنى رأى ميزعلش حد

مى الشورى
01-07-2009, 01:23 AM
شكرا يا كنج على مشاركتك
وتاكد ان الاختلاف فى الراى لا يفسد للود قضيه
عشان كده رايك مضايقش حد
لان كل واحد ليه رايه وليه وجهة نظره

ميرا مار
03-06-2009, 01:52 PM
انا باشكرك جدااااااااااا يا مى على جراتك وادراتك للمناقشة بحكمة
وطبعا مافيش حد بيبقى رايه زى التانى..

باشكرك للمرة التانية

مى الشورى
03-10-2009, 12:05 AM
انا باشكرك جدااااااااااا يا مى على جراتك وادراتك للمناقشة بحكمة
وطبعا مافيش حد بيبقى رايه زى التانى..

باشكرك للمرة التانية


انا اللى بشكرك يا ميرا على رايك ده
والحمد لله انه قدرنى على ادارة المناقشه
وعلى المواصله

sandra_sa
06-28-2009, 07:52 AM
الموضوع لايمكن ان يدر س فى المدارس بالطبع حيث انه موضوع حساس ومخجل لدرجة كبيرة لذا انا من راى ان نكتفى بتوعية الاباء لابنائهم

GooD_DrSh
06-29-2009, 02:46 AM
بشكرك الاول جداا جدا جدا يا مى ع القضيه دى
اولا ان رائى ان متفق مع ساره ف الكلام اللى قالته
لان بجد كلاام وااقعى مش كلام كتب ومجلات وهو دا اللى بيحصل فعلا
يعنى اى شاب او اى بنت بيحب يعرف اى معلومه ممكن يسال حد مش أهل للسؤال .. او ممكن يسال اقرب واحد ليه وهو صاحبه او صاحبتها
وهيعرف المعلومه بس هيعرفها غلط .. يعنى كدا كدا هيعرف اللى هو عاوزه او الى عاوز يعرفه .. لاكن لما يكون فى مصدر صحيح اللى هو المنهج اللى هيدرس تحت اشراف من علماء الدين ودكاترة الجامعه ويقدروا يحددو المحاور الى هيدرس عليها الموضوع ف بكدا هيقدر يوصل للمعلومه بطريقه صح ..

وقصة بقى ان استاذ راجل يشرح ل بنت حاجه زى كدا .. هى دى مثلا اللى خلاص مش هنعرف نتصرف فيها ..؟
طاب ممكن يعملوا حصه زى التدبير المنزلى للبنات يعنى تكون مدرررسه فاهمه الحاجات دى وتعرف توصل معلومه صح .. ونفس القصه للشباب زى حصة الصناعه او الزراعه يعنى استاذ يكون فاهم اللى بيقوله ويشرحه للطلبه .. ؟؟

وانا من رائى ان دى حاجه او قضيه حساسه جدا و مينفعش اننا نمشى وندور وشنا عنها ونقول خليها لوقتها او مش هى دى االى هتصلح الدنيا

لاء بدل ما هى مشكله بقت دلوقتى وبتكبر يوم بعد يوم .. يبقى ع لاقل كفايه ان احنا مش متعلمينهاا انما كمان يجى الجيل اللى ورانا ويقول احنا كمان منعرفش حاجه او عندنا جهل بالثقافه الجنسيه .. يعنى كل الاعضاء اجمعوا ان لازم الاب والام ف البيت هما اللى يقدرو يوصلو المعلومات دى طيب لما الاب والام مش عندهم الثقافه دى بطريقه صحيحه .. يبقى احنا نحاول نصلح من الجيل اللى بعد كدا عشان ع الاقل يبقى معندوش جهل او ميبقاش جيل جاااهل زينا كدا ...وتتكرر نفس الغلطه هى هى ...

يعنى يا جماعه باختصار القضيه دى بالظبط زى لما بناخد اسم من الثعبان ف احنا بدل ما نموت بناخد السم دا وبنعالج بيه نفسنا ..
ف بدل ما كدا كدا المعلومات الغلط موجوده ع النت وع الفضاءيات وباسهل الطرق تقدر تعرفها .. يبقى لو فى جنبها مصدر صحيح نقدر ناخد منه المعومات هيبقى فى نوع من الوعى والمعرفه ....

معلش طولت عليكو .. وبحترم جداا جميع الاراء اللى اتقالت قبل كدا واللى هتققال من بعدى

alaa eid
06-29-2009, 05:26 AM
اولا بشكرك جداااااااا يا مي علي طرح هذا الموضوع
وانا معاكي يا ميرا ان الاباء والامهات هما اللي يوصلوا تلك المعلومات للابناء والبنات ويجب تعليمهم اولا واعطاءهم بعض الدروس للتوعية لان زي ما قال درش في بعض الاباء والامهات لا يدركوا المعني الصحيح وعندهم جهل فانا من راي اننا الاول نقوم بتعليم الاباء والامهات وبعدها الاب يعلم ابنه ما يتمشي مع الدين والام كذلك بدلا من ان الابن يطلع علي النت او من رفاقه وبذلك ان هناك معلومات خاطئة جدا فانا معاكي يا ميرا في رأيك
وجزاكي الله كل خير

مى الشورى
07-13-2009, 01:24 AM
جزاكم الله خيرا على المرور
وعلى الاراء المهمة دى
وبرجع وبقول فى النهاية ان كل واحد بينظر للموضوع من وجهة نظره هو
لذلك الاختلاف فى الراى لا يفسد للود قضية
وانا بجد سعيدة لاخذكم الموضوع بمحمل من الجد

مروة على
07-16-2009, 06:17 PM
اولا انا بشكرك على الموضوع الهايل ده
ثانيا انا رأيى مع رأى البشمهندس حسن لأن فعلا بسبب معرفت الغرب للثقافة دى بشكل عشوائى وبغير نظام ادى لحاجات كتير يرفضها الدين وانا من رأيى برضه ان الاب والام المفروض يكون ليهم دور اولا لأن تدرسها هيسبب مشاكل فى المجتمع ثانيا عشان الابن او البنت ميحاولش يعرف حاجات ممكن تضر بيه وبحياته اسفة على الاطالة وشكرا على الموضوع

geography_man2010
03-07-2010, 08:37 PM
ازاى يا مى نطبق سياسة الفساد دى وكمان دى دولة اساءة للرسول ميدوالمصرى

هبه محمود
03-07-2010, 08:58 PM
الموضوع جرئ وجميل جداااااااا يا ميمي
بس انا اعتقد اني مش هوافق لان ده يعتبر دور الاسره يعني دور الاب والام
وما ينفعش يكون دور المدرسه لاننا مجتمع شرقي مسلم
واعتقد ان الكثير هيرفضوا لان مش الثقافه الجنسيه هي الهتخلينا نتقدم ولا نتطور المفروض نهتم بحاجات تانيه تفيد المجتمع

KAREEM
03-12-2010, 02:43 AM
أولا يا مى بحيكى طبعا على اختيارك لموضوع
جدير بالنقاش والجرأة فى فتحه
ودى حاجة كويسة وتحسب لك

ودا هيدينى دافع اتكلم بجرأة أكتر
انا أعتقد ان الام والاب عليهم
عامل كبيييييييير جدا
انهم اول ميحسوا ان ابنهم او بنتهم
دخل فى مرحلة البلوغ وداخل
على سن المراهقة
يبدأ الاب يقعد مع ابنه يفهمه
الموضوع ماشى ازاى وايه
الاخطاء اللى ممكن يقع فيها
واللى بيقع فيها معظم الشباب
- الا من رحم ربى -
نتيجة عدم وعى وملقوش حد يوجههم
كلك الامر بالنسبة للام تقعد مع بنتها
وتفهمها وتوعيها ..... الى اخره

فانا شايف انها متنفعش تدرس فى المدارس
ولكن هناك عامل كبير جدا على الاب والام
والاسرة بشكل عاااااااام

وشكرا ليكى مرة تانية لفتحك
لهذا النقاش المهم والحيوى جدااااااا

برنسيس الهمسات
03-24-2010, 01:19 AM
كل دا يختصر لو الانسان عرف دينه كويس ها يتعلم وهايعرف وخير معلم لينا رسولنا الكريم صلوا علية "عليه افضل الصلاة والسلام وخير منهج "القران الكريم" فعلا لو مشينا على كدا عمرنا ماهانقع فى حيرة وها نرتقى بجد دا رايى وميرسى ليكى لطرحك للموضوع

عصام العادلى
07-05-2010, 06:02 AM
ردى مختلف عن كل المشتركين لانى بصراحة موافق ان الموضوع دة يدرس فى المدارس وبكرر الموضوع مش المادة الدراسية الكاملة لكن بشكل مختلف بردة عن راى الوزارات لان الموضوع لازم يدرس فى شكل دراسة اخلاقية وتراكمية وايضا وباهمية قصوى دون الاختلاط بين الجنسين ولابد من تواجد جزء دينى فى كتابة هذة الدراسة وتدرس بدءا من عمر دراسى يستوعب ويدرك ما يدرس لة حيث ان هذة الشبكة والtv لا يوجد طفل الان الا ويعلم كيفية التعامل معهم وكلنا نعلم ذلك بلا شك فبقصد او بدون قصد يتعلم الطفل امور جنسية قد لايدركها وهنا سيتعامل معها بالفطرة ولا يفكر بلا شك فى السؤال عنها لانة دائما لايجد اجابة الا (انت لسةصغير على الكلام دة )
والان السؤال ؛ من الافضل فى التعليم؟؟؟؟؟؟؟؟؟ هذة الشبكة والtv الذين يلقنون الطفل كما يعلمون الكبير ام التعليم بشكل منظم وحضارى مع مراعاة السن والنوع والدين والتقاليد؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
وهل ؟؟؟؟؟؟؟؟؟لايوجد فى مصر حالات زواج عرفى وزواج مسيار وتصحيح اخطاء وحالات زنة كاملة وغير كاملة بشكل او باخر ؟؟؟؟؟؟؟؟؟؟؟؟؟؟!!!!!!!!!!
جايز الموضوع دة لو يدرس فى المداس بشكل صحيح دون تدخل خارجى فية يقلل من الحاجات دية مش يزودها اما بقى بالنسبة لموضوع الاهالى فجزء كبير منهم اكيد مشغول فى شغلة وجزء تانى بيشوف ان الموضوع دة لية وقتة وهوة قبل الجواز من وجهة نظرهم ولاتتناسو ان مع تطور الحياة تتغير بعض الافكار لكى نواكب هذا التطور لكى لا يكون اضرارة اكثر من فوائدة
واخيرا لماذا نجعل الغرب يوجهون الغريزة والفطرة الى ما تشتهى النفس الامارة بالسوء دون ان نتدخل ونوجة ونوعى بما يتناسب مع العقول؟؟!!!!!!؟؟

عصام العادلى
07-05-2010, 06:07 AM
يجب ان نعلم كل شىء عن بعض الشىء
وبعض الشىء عن كل شىء

geography_man2010
07-07-2010, 09:00 PM
ياترى هى دى تعاليم الدين الاسلامى ياحجة:a30:

esraa marey
07-26-2010, 05:28 PM
اولا بشكرك يامى عرض الموضوع وانا من راى ان الفروض يكون فى توعية للمقبولين على الزواج فى طريقة تربية ابنائهم فى هذه النقطة 0ولو حاتدرس تكون فى المرحلة الثانوية وتكون ضمن منهج الدين يعنى تدرس من الناحية الدينية والاخلاقية 0 حتى نتجنب وقوع المشاكل0

مى الشورى
07-29-2010, 11:45 PM
اولا يا جماعة انا بشكركم كلكم على مشاركتكم الفعالة دى
واحب اقول ان راى كل واحد منكم يحترم جدا
لان كل واحد بيتكلم من وجهة نظره ومن خلال رؤيته للموضوع
ومن خلال فكره وقراته
لذلك ارجع واقول ان الاختلاف فى الراى لا يفسد للود قضية
وانا بجد سعيدة لارائكم الجميلة والجريئة دى