المساعد الشخصي الرقمي

مشاهدة النسخة كاملة : علي القهوه ( الحلقه الحاديه عشر حتشتري الساعة )



سلمي جمال
02-22-2009, 03:40 AM
السلام عليكم و رحمة الله و بركاته

الموضوع اسمة
على القهوة

و الموضوع دة عبارة عن دردشة مع بعض

تخيل لو انك جلست علي قهوة او كافيه مع اصدقائك و بدردش معاهم في مشاكل الحياة التي تواجهك

هي دية فكرة الموضوع

انك تتخيل نفسك علي قهوة مع اصدقائك و بتقول لهم عن مشكلة واجهتك او واجهة احد اصدقائك

http://www12.0zz0.com/2009/02/22/01/770327956.jpg

نفسك تتكلم بصوت عالي و تفضفض معانا

http://www12.0zz0.com/2009/02/22/01/152619278.jpg

سنقوم بطرح موضوع للنقاش كل اسبوع

و ذلك حسب رغبة الجماهير

او مشكلة تريدوا ان تتكلموا عنها

و ستقوموا بارسال المشكلة عن طريق الرسائل الخاصة حتى يكون للعضو (صاحب موضوع النقاش) خصوصيته

ثم نقوم بعرضها و كل عضو يرد بما يراه من وجهه نظره في هذا الموضوع الذي يناقش



موضوعات علمية

http://www12.0zz0.com/2009/02/22/01/787154462.jpg

موضوعات سياسية

http://www12.0zz0.com/2009/02/22/01/272395968.jpg

موضوعات دينية

http://www12.0zz0.com/2009/02/22/01/216982930.jpg

موضوعات اجتماعية

http://www12.0zz0.com/2009/02/22/01/918334567.jpg



حاسس بالوحدة؟؟؟؟؟

http://www12.0zz0.com/2009/02/22/01/839229452.jpg

مشكلة عائلية

http://www12.0zz0.com/2009/02/22/01/447802705.jpg

مشكلة مع الاصدقاء

http://www12.0zz0.com/2009/02/22/01/991832569.jpg

مشكلة في الدراسة

http://www12.0zz0.com/2009/02/22/01/650176429.jpg

مشكلة في العمل

http://www12.0zz0.com/2009/02/22/01/753625001.jpg

مشكلة عاطفية

http://www12.0zz0.com/2009/02/22/01/241383921.jpg

مشكلة مع نفسك

http://www12.0zz0.com/2009/02/22/01/288716592.jpg



كل هذا نناقشه هنا مع بعضنا
و كل واحد يقول رأيه و اقترحاته

اتمنى ان ينال الموضوع اعجابكم


و ما هي اقتراحتكم في اول موضوع للنقاش:confused:؟؟؟؟؟

Zooma
02-22-2009, 03:49 AM
موضوع جميل جدا يا شكشك
بس اهم حاجه انك قولتى ع القهوة يعنى
براحتى فى الكلام :D:D
بالنسبه للاقتراحات مش هتبان دلوقتى هتبان
مع اول مشاركه او اول مناقشه هتحصل
وشكرا يا سولى اى خدمه بدلعك اهو :D

Zooma
02-22-2009, 03:52 AM
اه ع فكرة القهوة دى فى الحسين وانا اعد فيها قبل كده
فى وش المسجد ع طول بس شكلها الصبح احلى من بليل :D

Marwa Mahmoud
02-22-2009, 08:57 AM
شكرا ليك ىيا اسلمى
موضوع راااااااااااااااائع
وهيكون فىة تفاعل جميل جداااااا بين الأعضاء
تسلمى يا قمر على الحجات الجميلة دى

reda_bebo99
02-22-2009, 11:34 AM
موضوع جميل ونرجو من الجميع المشاركه

ميرا مار
02-22-2009, 02:05 PM
[
موضوع حلو قوى يا سلمى
وطريقة عرضك للموضوع رااااااااااائعة ..
فى انتظار اول موضوع للنقاش..

سلمي جمال
02-23-2009, 10:11 PM
الموضوع الاول

ماذا تفضل زواج الصالونات ام انك تعيش قصة حب؟

و ما هي مميزات الاتنين؟

و ما هي عيوب الاتين؟
و هل لك تجربة في اي منهم؟

او تعرف احد له مشكلة في احدهما؟

خالد أبوسعده
02-23-2009, 10:37 PM
الموضوع الاول

ماذا تفضل زواج الصالونات ام انك تعيش قصة حب؟

انا افضل قصه حب
و ما هي مميزات الاتنين؟

مميزات قصه الحب انها بتكون قايمه علي تفاهم بين اتنين
شعور متبادل
مستحملين بعض
بيخافوا علي بعض
مشاكلهم بينهم و بين بعض بتتحل بسرعه و التضحيات فيه بتكون كتير
اما جواز الصالونات
فهو رغم انى مبحبهوش
بس ليه مميزات
انه كل حاجة بتبقى علي نور من اولها
و بيقصر المسافات اوى و بينجز الموضوع اسرع بكتير من قصه الحب



و ما هي عيوب الاتين؟

و الله الاتنين من رايى عيبهم واحد
تعب قلب

و هل لك تجربة في اي منهم؟
اه كان ليا تجربه و انتهت

او تعرف احد له مشكلة في احدهما؟
هههههههههههههههههههههه
انا كل الى اعرفهم عندهم مشاكل فى الموضوع دا



متنسيش السحلب و الشيشه معاكى وا نتى جايه يا سلمى

farida
02-23-2009, 10:40 PM
موضوع جميل يا سلمي

هو انا افضل ان الانسان يعيش قصة حب احسن

عشان زواج الصالونات بتكونوا قاعدين مع بعض و متعرفوش عن بعض حاجة

فبالتاكيد حيحصل مشاكل بعد كل واحد يعرف التاني علي حقيقته و عرف عيوبه و مميزاته

انما ان الواحد يعيش قصة حب فانه بيعطي لنفسه فرصة وللتاني انه يعرف كل واحد الاخر

بس يا سلمي ممكن يكون برضه زواج الصالونات كويس علي حسب الزوج ده

و سواء زواج صالونات او قصة حب لازم الانسان ان يصلي استخارة الاول في تحديد الخير له

علشان ميستمرش في الغلط و الاوهام و يندم في الاخر وطبعا ربنا حيقدم الي فيه الخير

معلش يا قمر طولت عليكي

Youssef Mostafa
02-23-2009, 11:21 PM
الموضوع الاول

ماذا تفضل زواج الصالونات ام انك تعيش قصة حب؟
زواج الصالوناااات
و ما هي مميزات الاتنين؟
مميزات زواج الصالونات:-
1-زى مالكتاب مقال يعنى فى الحلال ادخلوا البيوت من ابوابها مش من قصة حب
2-يقيم ثقة قوية بين الزوجين وكمان حيبقوا لسة متعرفين على بعض فحتبدا بقى قصة الحب اما التانية فحيكونوا زهقانين من بعض

اما مميزات قصة الحب فانا مش لاقى فيها مميزات او ممكن يكونوا الاتنين بيضحكوا على بعض

و ما هي عيوب الاتين؟
عيوب زواج الصالونات:-

طول محنا ماشيين بما يرضى ربنا مش حيكون فى مشاكل ابدا
عيوب قصة الحب:-
يعنى ايه واحد يحب واحدة سنتين 3 وفى الاخر يقولها انا مش نصيبك واكيد حتلاقى واحد احسن منى!!!!!

والله الواحد شايف ان الحب الايام دى بقى عقيدة عند بعض الناس بس لسة الدنيا بخيييير
و هل لك تجربة في اي منهم؟

لأ
او تعرف احد له مشكلة في احدهما؟

اممممممممممممم اظن قابلنا ناس كتييير سواء كانوا قريبين منا او لأ كبار مثلا يكونوا جربوا الاتنين

وبجد يعنى ياسلمى موضوع اكتر من رائع

سلمي جمال
02-23-2009, 11:38 PM
مرسي كتيييييييييييييييير اوي علي رأيكم كلكم و لكوا مني مشروب علي حسابي كلكم

و لسة مستنين الردود
و انا ملاحظة ان في اخلافات في الرأي في الموضوع دة و دة يسخن الموضوع اكتر
و شكرا لكم بجد

Zooma
02-24-2009, 12:42 AM
ماذا تفضل زواج الصالونات ام انك تعيش قصة حب؟
قصه حب بس تكون حقيقيه مش حب من طرف واحد
لانها لو كانت حب من طرف واحد يبقى مش قصه حب

و ما هي مميزات الاتنين؟
قصه الحب :
يكون فى توافق بينهم لو انتهى بزواج
بيكونوا عارفين صفات بعض ووخدين ع بعض اكتر
الواحد كده بيحس احساس جمييل لو فعلا اخد ايلى بيحبها

الصالونات :
مممممممممممم
الميزة الوحيده ان العريس بيكون جاهز فيه مش اكتر

و ما هي عيوب الاتين؟
قصه الحب :
ممكن تفشل ولو فشلت اثارها النفسيه بتكون وحشه قوى
بس انا متهيألى ان طالما قصه حب ناجحه وحقيقه مش هيكون فيها عيوب
الصالونات :
ده انا شايفه انو الواحد بيلجأ ليه لما البت تعنس
تقول خلاص هتجوز جواز تقليدى ايلى يجيلى يا ماما انا موافقه عليه :D
او قولى لبابا انا وافقت على العريس ايلى جايبه
فبيكونوا مش عارفين بعض لسه بياخدوا على بعض.
مش عارف مابيكونش فيه قصه يعنى مغامرة حصلت
ونجحت فيها لا ده انا روحت اه ماشى عايز دى :mad::mad:
مبحبهوش مش عارف ليه

و هل لك تجربة في اي منهم؟
لا ولا واحده فيهم

او تعرف احد له مشكلة في احدهما؟
نو

احمدالمقدم
02-24-2009, 12:52 AM
بجد موضوع هايل يا سلمي
وديما بتفجاينا بمواضيعك الجميله الهدافه
اولا الجواز التقليدي ده احسن من مليون قصه حب
لانه ستره للبنت ودي كمان استقرار للشاب وراحه
بدل ما يعملو حاجه في الخفي هتبقي في العلانيه
وبجد ربنا يوفقك يا سلمي كمان وكمان
ـــــــــــــــــــــــــــــ
مثل العذاب
بكابورت المحبه انطفح وطرطش علي كومي
الناس كلها اتجوزت
وانا قاعد جنب امي
هههههههههههههههههههههههههههههههههه

سلمي جمال
02-24-2009, 01:11 AM
ههههههههههههههههههههههههههههه

شكرا اوي لمشاركتكم و برأ]كم الجميل دة
بس انا مش معاك يا بوجي في حتة ان البنت تكون عنست
انا اعرف قصص نجحة كتير اوي و كانت صالونات

و شكرا لكم بجد

spring sun
02-25-2009, 07:03 PM
الصالونات يا سلمي

عريس جاهز وجد

مش جاي يهزر

ومفيش مشاكل

اما قصص الحب فمفهومها غلط عندنا

وبتنتهي بالفشل دايما

سلمي جمال
02-25-2009, 09:31 PM
رايك جميل اوي يا اميرة

مرسي يا جميل علي المشاركة

eslam mamdouh
02-25-2009, 09:50 PM
الموضوع الاول

اولا الف شكر لحضرتك على المواضيع الجميله والمميزه

ماذا تفضل زواج الصالونات ام انك تعيش قصة حب؟

بصراحه جواز الصالونات افضل جدا

و ما هي مميزات الاتنين؟

جواز الصالونات كل شى فيه بيكون واضح من البدايه وبيكون هناك جديه من الطرفيين وغالبا بينتهى بزواج والحب ياتى بعد ذلك.......حتى لو مكنش حب بمعنى الكلمه او انه الفه وموده بيكون برضه افضل

و ما هي عيوب الاتين؟

قصه الحب لو انتهت بالفشل بتسسب مشاكل وذاكره مؤلمه للطرفيين

وبتاثر على الزواج بعد كده





شكرا جدا لحضرتك على الموضوع الجميل

سلمي جمال
02-25-2009, 09:59 PM
انا الي بشكرك علي مشاركتك و علي رايك الجميل دة و انا احيك علية بجد

heba
02-26-2009, 01:03 AM
اولا بشكرك يا سلمى على موضوعك ودايما مواضيعك متميزة
وبالنسبة للموضوع فأنا بفضل جواز الصالونات .يعنى علشان كل حاجة بتبقى في وسط اهلك الي بيفرحولك ويتمنولك الخير طبعا
وطبعا بتبقى فيه فترة الخطوبة . يعنى ممكن يتعرفوا على بعض اكتر وقبل كل ده صلاة الاستخارة
اما بالنسبة لقصة الحب اعتقد انها دايما بتنتهى بالفشل

سلمي جمال
02-26-2009, 01:21 AM
مرسي يا بيبو يا جميل علي رأيك و انا معاكي في الرأي دة

و لكن اختلف في ان قصص الحب بتنتهي بالفشل
في قصص بتنجح الحمد لله

و نتمني انك تيجي القهوه كتير
و المرة الجاية كل المشروبات علي حسابي

سلمي جمال
03-01-2009, 04:55 PM
الحلقة الثانية

و هي تتحدث علي

هل انت تفضل الدراسة و فترة التعليم ام العمل و ان تمضي ب10 فاكثر في عملك
لو كان موقع او مكتب او شئ اخر؟

اريد اعرف راي الخريجي و كذلك الطلاب

هل تنتظر انتهاء الدراسة ام تحب هذه الفترة من حياتك؟

Youssef Mostafa
03-01-2009, 06:15 PM
والله ياسلمى انا كان نفسى اشتغل وانا بدرس او حتى فى الاجازة بس للاسف جدول المحاضرات ميسمحش بكدة خالص حتى لما ببقى عاوز اشتغل فى الاجازة والدى يقولى لأ عشان دراستك خلص الاول....... وانا بحب حياة العمل بجانب التعليم

وحلقة حلوة اوى ياسلمى كالعادة

سلمي جمال
03-01-2009, 08:47 PM
يعني انت عايز تخلص و تشتغل

ولا حابب المرحلة الي انت فيها دية و مش عايزها تخلص

خالد أبوسعده
03-01-2009, 09:22 PM
سلمى باشا

انا بقى بحب الشغل جدا عن الدراسه
انا شغال و انا بدرس من 6 سنين
و مجرب الاتنين عن ثقه

بس احب اقولكم حاجة و اسال مجرب
الشغل بس ممل لدرجه رهيبه
الدراسه رغم قرفها بس بتشوف اصحابك و بتسلى وقتك و بتعيش فيهم يومينك بجد
الشغل مفيهوش قرف
بس ممل
كل يوم زى الى قبله

نصيحه
عيش يومينك فى الدراسه
علشان لما حتتخرج
مش حتلاقى وقت زى دا تانى

Marwa Mahmoud
03-01-2009, 10:05 PM
أولا بشكرك يا سلمى على الموضوع بصف عامة
بجد فكرتة جميلة جداااااااااااااا

انا بعتبر فترة التعليم فترة مميزة بالنسبالى
لإنها الأساس اللى هبنى عليه أحلام كتير ليا
هتفدنى فى المستقبل فى عملى
وبالتالى بجتهد فى تحصيلى العلمى .
العمل إن شاء الله سيأتى
لكن العلم بحر واسع ليس له نهايه
فأن أتطلع دائما لكى أأخذ من هذا البحر ما أريد
فأنا أفضل العلم والدراسة فى معظم الأحيان

سلمي جمال
03-01-2009, 11:39 PM
بجد بشكر خالد و مرمورة مووووووووووت علي مشاركتهم معانا

و فعلا عندهم حق

مفيش اجمل من وقت الدراسة
بس قول للزمان ارجع يا زمان

samomran
03-01-2009, 11:43 PM
اولا طبعا انا بحييك يا سلمى على الموضوع الجميل ده

لكن فى دعاء احنا بنقوله دايما فى الصلاه و تقريبا ممكن يحل السؤال ده


(اللهم علمنا ما ينفعنا و انفعنا بما علمتنا )


اما انا عن نفسى انا احب انى اشتغل و انا بتعلم

لان الحياه مدرسه و حنفضل نتعلم لحد ما نموت


و موضوع جميل

سلمي جمال
03-01-2009, 11:46 PM
شكرا اوي يا اسلام علي المشاركة و الدعاء

و رأيك جميل

Youssef Mostafa
03-02-2009, 11:19 AM
يعني انت عايز تخلص و تشتغل

ولا حابب المرحلة الي انت فيها دية و مش عايزها تخلص

لاياسلمى انا عايز اخلص طبعا بس احنا دلؤتى مش بنتكلم عن ايام الدراسة جوها ايه طبعا ايام الكلية دى احلى ايام قضيتها فى حياتى بس انا عايز اشتغل وانا بدرس طبعا بس زى مقولت مش نااااااااااااااااافع

وكمان عايز اخلص واخلص بقى من الكلية بصراحة عشان الواحد زهق

محمود ابوالمجد
03-02-2009, 12:40 PM
والله يا سلمي هي دي ليها ميزات ودي ليها ميزات
يعني وانا طالب كل حاجة طبعا علي البيت وانا مش ورايا غير صحابي والمذاكرة وبجد كانت احلي ايام
بس برضه بعد ما بنتخرج ونشتغل بتحسي بكيان فلوس بتاعتك يعني بتعملي اكتفاء ذاتي جزئي مع تحمل مسئولية وكمان مخك بيكبر وتفكيرك طبعا بيختلف عن تفكير الي لسه في الدراسة
بس بجد هو حكاية الدراسة ليها مميزات وعيوب والشغل برضه ليه مميزات وعيوب بس الشغل احسن

Ahmed Hosny
03-02-2009, 01:09 PM
انا عايز اقولك رايى على الموضوع ده
اناطبعا احب اتعلم بس العمل بيعلم اشياء هامة جدا وهى كيفية التعامل مع الاخرين
واضا العلم فى حد زاته عمل

A.H.D
03-02-2009, 06:15 PM
ميرسى ليكى ياسلمى ع الموضوع الجميل دة
كل حاجة ليها مميزات وعيوب
الدراسة حلوة عشان بنتقابل مع اصحابنا ووحشة عشان المذاكرة
الشغل حلو عشان ببقى خلصت دراسة ووحش عشان مش بعرف اشوف اصحابى كل يوم

سلمي جمال
03-02-2009, 09:14 PM
مرسي لكم كلكم علي رأيكم

و يعني في اتفاق علي ان الاتنين حلوين

الشغل و الدراسة

بس انا عايزة اعرف تفضل مين

اختار واحد من الاتنين؟

Youssef Mostafa
03-02-2009, 10:23 PM
الدراسةو طبعا ياسلمى اللى حتنفع فى الاخر

سلمي جمال
03-03-2009, 11:23 AM
مرسي يا يوسف علي رأيك

spring sun
03-03-2009, 11:40 AM
العلم يا سلمي

بصي يا ستي افرضي ان واحد عنده شغل وبيجيب منه كتير اوي بس مش متعلم

هتحترميه

في نظري لا

العلم قيمه ومكانه وكيان

وبيكبر صاحبه في نظر الناس


ولو ان في ناس بتبقي معاها حظ وبيبقوا مش متعلمين ومع ذلك بيكبرو يوم بعد يوم بس بصي

عمل من غير علم ولا ليه اي لازمه

موضووووووووع تحفه اوي يا سلمي

شكرا يا قمر

سلمي جمال
03-03-2009, 04:30 PM
مرسي لكي اوي يا اميرة علي المشاركة
بس انا مختلفة معاكي في نقطة
و هي ان حتي الانسان الي مش متعلم ححترمة بردو

و لكن الشخص المتعلم بتعرفي تتفهمي معاه اكتر
و لكن الاحترام للجميع

ميرا مار
03-03-2009, 08:15 PM
معلش يا سلمى
اسفة ع التاخير المواصلات بقى

بس الموضوع جميل جدا بجد بدون مجاملة

عايزة اقولك انا باحب الاتنين جدا
بس لو اختار حاجة واحدة الشغل ..العمل عبادة
وانا باحب الشغل جدا ومش بالاقى نفسى غير فى الشغل
لكن على شرط واحد بس
انى اشتغل حاجة باحبها..عشان اقدر ادى فيها

ميرسى لك يا سلمى

سلمي جمال
03-03-2009, 09:03 PM
مرسي لكي كتيييييييير يا ميرا
و رأي حلو فعلا
لكن كانت فترة الكلية اوحش من الشغل
ولا مين احلي؟

Youssef Mostafa
03-03-2009, 09:16 PM
بس فى الاخر بردو حيكون العلم اهم
لانك لو اشتغلتى فى شركة مثلا من غير شهادتك لسة مش حيبقى ليكى مركز او وضع فى الشركة

سلمي جمال
03-03-2009, 11:45 PM
انا يا يوسف بتكلم علي كل شخصية
يعني ميرا معاها شهادة و بتشتغل
فهي شيفة انها في الشغل احسن

لكن مش بفترض شخصيات
وضحت الفكرة؟

Zooma
03-05-2009, 01:35 AM
موضوع حلو جدا
والله يا عم شكشك انا شايف ان الاتنين مع بعض العلم
او الدراسه وفى الاجازة الشغل وخضوصا لو كانت فى فترة الكليه
عشان بيكون فيها وقت اكتر للشغل بجانب العلم لان الفترة هى ايلى بتحدد
مستقبل الواحد بين واحد لسه هشوف شغل وواحد تانى اخد فكرة عن شغل تانى
وبالتالى بقى معاه حاجتين شهاده ودى يستنى عليها بقى شويه لما يشتغل بيها
وتانى حاجه الخبرة ايلى اكتسبها لما كان بيشتغل فى الاجازة والخبرة دى
هى ايلى هيشتغل بيها فى الفترة ايلى مستنى
الشغل بالشهاده بتعته................
نكمل تحت عشان ماتزهقوش :D

Zooma
03-05-2009, 01:38 AM
تانى حاجه لو عملنا مقارنه بين ايلى بيشاغل ويدرس وبين ايلى بيدرس بس من الناحيه الماديه
هنلاقى انا الواحد وهو فترة الدراسه بياخد مصروف وفى نفس الوقت
بيشتغل ويكسب بالتالى هيشيل الفلوس ايلى شغال بيها ويصرف من المصروف
ولما يخلص دراسه على الاقل هيكون معاه مبلغ يبدا بيه
ده فى الحاله الاولى اما فى الحاله التانيه ان لو الواحد بيدرس بس بيصرف من مصروفه
ولما يخلص دراسه مش هيلاقى معاه جنيه عشان يبدا بيه مشروع صغير حتى.

يعنى من الاخر انا بحب الاتين مع بعض ولما اخلص الكليه من الاخر يعنى
مش هدور انى اتعلم تانى لكن لو الشغل محتاج انى ادرس عشانه اه فى الحاله دى
اه ادرس بس عشان اشتغل يعنى ممكن نقول
العلم بالنسبالى 45% والشغل 55%
معلش لو كنت طولت عليكم

Youssef Mostafa
03-05-2009, 05:41 PM
انا يا يوسف بتكلم علي كل شخصية
يعني ميرا معاها شهادة و بتشتغل
فهي شيفة انها في الشغل احسن

لكن مش بفترض شخصيات
وضحت الفكرة؟

يعنى ايه على كل شخصية وكمان ميرا خلاص خلصت دراسة وانا معرفش هل هى مثلا بتشتغل بشهادتها ؟؟؟؟

سلمي جمال
03-05-2009, 05:59 PM
رأيك جميل و مقنع اوي يا بوجي

مرسي لك كتييييييييييييير

سلمي جمال
03-05-2009, 06:00 PM
يعني انا بتكلم علي ان الشغل ام العلم بالنسبالك انت احسن
مش بتكلم عن العموم بتاع الناس

فهمني يا يوسف

Youssef Mostafa
03-05-2009, 06:15 PM
العلم بالنسبالى احسن لان احنا مش ضامنين يعملوا ايه فى اللى معهمش شهادات فى المستقبل

سلمي جمال
03-05-2009, 10:21 PM
مرسي لك يا يوسف كتيييييييييييير

سلمي جمال
03-07-2009, 08:10 PM
موضوع هذا الاسبوع هو تخيلك لحياتك بعد الكلية

يعني تتخيل حياتك حتمشي ازاي بعد اخر يوم لك في الكلية

هل حتعيش في البلد ؟

هل حتعمل في مجال دراستك؟

هل تتزوج بدري ام تفضل ان تتاخر لتعيش حياتك؟

هل ستهتم باشياء اخري في حياتك غير العمل و الزواج و تكوين عائلة؟

ممكن تتخيل نفسك بعد 5 سنوات بعد التخرج ماذا ستكون حياتك؟
ارجو الوصف في اخر سؤال

Youssef Mostafa
03-07-2009, 08:19 PM
والله ياسلمى متهيالى الواحد مش عايز يخلص كلية اصلا لان انا كل ما اتخيل 3 سنين الثانوية العامة وهم بيعدوا بسرعة كدة بزعل بس حنعمل ايه هى دى سنة الحياة اما بقى بعد الكلية الواحد مش عارف حيحصله ايه بعد معظم الاصحاب يختفوا طبعا خارج عن ارادتهم اللى حيسافر واللى حينمدج فى اسرته اللى حيكونها وشغله كمان بالنسبة لسؤالك الاخير بصراحة مش عارف اللى ربنا كاتبه حيحصل ان شاء الله بس طبعا احنا كمان لازم نجتهد ونعمل بجد عشان ربنا يدينا على قد اللى بنعمله معلش طولت عليكى ياسلمى وكالعادة مناقشة رائعة طبعا

سلمي جمال
03-07-2009, 08:39 PM
مرسي لك يا يوسف بس انا عايزاك تشرح تخيلك لحياتك شكلها اية

Youssef Mostafa
03-07-2009, 08:47 PM
تخيل يعنى ها !!!!

ان شاء الله حسافر ع الخليج عدل خاصة قطر يعنى بس طبعا لو حصل نصيب فى الامارات حروح جرى اصلا بس لو فعلا فى هنا شغل حلو يفتح بيت ويوفر لى اللى انا عايزه عمرى محفكر فى السفر
المهم نكمل بقى بعد مسافر ان شاء الله اشتغل فى شركة حلوة كدة واجتهد فى الشغل واتعب شوية لحد ميبقى ليا مركز فى الشركة وليا وضع وامن مستقبلى بقى لما ربنا يكرم ان شاء الله ابقى انزل مصر وابتدى بمشروع مساحى صغير كدة وطبعا مش حنسى صحابى اصحاب الكلية بس انتى ياسلمى شايفة ان كل دة يتحقق فى 5 سنين

ميرا مار
03-07-2009, 09:31 PM
الموضـــــــــــوع اتثبت لاهميته ونجاحة

الله ينور يا سلمى

سلمي جمال
03-08-2009, 08:15 PM
شكرا لكي كتير يا ميرا

خالد أبوسعده
03-08-2009, 08:32 PM
موضوع هذا الاسبوع هو تخيلك لحياتك بعد الكلية
انت ليه بتفكرينا
يعني تتخيل حياتك حتمشي ازاي بعد اخر يوم لك في الكلية
متخيلها انى حستنى الشهادة المؤقته و فى الوقت دا حعمل التربيه العسكريه و حروح اتدرب فى اى شركه بجانب لو اخدت شويه كورسات كده علي الماشى دا كله ان شاء الله يعنى
هل حتعيش في البلد ؟
ان شاء الله حستنى فيها لحد ما تجيلى فرصه كويسه بس غالبا مش حستنى كتير
هل حتعمل في مجال دراستك؟
ان شاء الله اه
امال انا طالع عينى ليه علشان فى الاخر اروح افتح بتاع عصير قصب يعنى
هل تتزوج بدري ام تفضل ان تتاخر لتعيش حياتك؟
و الله انا شايف انها مش بدرى اوى ولا متأخر اوى يعنى بعد 3 سنين علي الاكثر من التخرج..دا طبعا لو بنت الحلال معايا
هل ستهتم باشياء اخري في حياتك غير العمل و الزواج و تكوين عائلة؟
و الله مش عارف
انا حاليا بفكر فى دول بس
بس اكيد حتظهر حاجات تانيه لان الكلام بيكون سهل و لما بنطحط فى الموقف بيبقى فى كلام تانى
مش بالضروره ان النظرى و العملى يبقوا واحد

ممكن تتخيل نفسك بعد 5 سنوات بعد التخرج ماذا ستكون حياتك؟
ارجو الوصف في اخر سؤال
ان شاء الله يعنى اكون شغال بره مصر و متجوز و اخد مراتى تعيش معايا بره
و ممكن يكون ليا فرصه شغل هنا احسن من الشغل بره
و فى الحالتين ان شاء الله اكون شغال و ليا وضعى فى الشغل و متجوز واحده و ابدأ ادور علي التانيه ههههههههههههههههه ربنا يباركلى فى الى حتجوزها و يقدرنى انى اسعدها علي اد ما اقدر



دا كله فى علم الغيب و بمشيئه الله طبعا

سلمي جمال
03-08-2009, 08:48 PM
تدور علي التانية

اية دة يا خالد
انا فكرتي اتغيرت خالص عنك

سلمي جمال
03-11-2009, 10:20 PM
الحلقة الرابعة

هل تختار الصديق ام الحبيب

اذ حدث خلاف حاد بين اعز اصدقائك و حبيب
و كان لابد ان تترك احد منهم
من ستختار؟
و من ستترك؟

و لماذا اخترت ؟


هل تعتقد ان الحب ابقي ام الصداقة؟
هل مررت بهذا الموقف من قبل؟
و ما كان اختيارك؟

Hassan Mohamed
03-11-2009, 10:28 PM
بصي يا سلمي

انا هختصر كل الاسئلة دي في اجابة واحدة فقط

صاحب راجل تعيش راجل تموت راجل ... صاحب ست تخسر كل يوم راجل
اكيد عرفتي انا بختار مين فيهم

احيكي علي الموضوع الجميل ده

Sara Gamal
03-11-2009, 10:43 PM
اولا بحييكى بجد ياسلمى على الموضوع الهايل ده ياسلمى

بس سؤالك صعب أوى والاختيار صعب جدا وان كنت الحمد لله لسه متحطتش فيه ويارب ما يحكم عليا

بس انا مره كنت الصديق اللى وقع الاختيار بينه وبين الحبيب وطبعا انا اللى تم الاستغناء عنى وكنت زى ما بيقولوا كبش الفدا ..وبعد فتره الحبيب باع وجيت على نفسى ورجعت لصحبتى تانى رغم اللى عملته

بس اتعلمت شئ مهم اوى اللى يبيع غدر لازم فى يوم يتباع غدر

كما تدين تدان

وانا لو ربنا قدر واتحطيت فى الموقف ده بجد هختار اللى يستحق مهما كان الاختيار ده هيجرحنى انا شخصيا بس الحق أحق ان يتبع

اما بخصوص مين ابقا الحب ولا الصداقة فلاسف فى الايام دى الصداقه ابقا فى معظم الاحيان وان كان الاتنين بقوا بيضيعوا ويفلتوا من بين ايدينا

سلمي جمال
03-11-2009, 11:45 PM
مرسي لحسن و سارة اوي علي رأيكم

بس انا عندي اعتراض علي كلامك يا حسن
ممكن الانسان يتلسع من اقرب الناس اليه حتي لو كان صاحبه من الطفولة
مش دايما الصداقة حقيقية في زمنا هذا

و بجد بشكركم اوي علي رايك في الموضوع و اتمني ان تتقبل رأي

ميرا مار
03-12-2009, 07:34 PM
هاى سلمى موضوع الاسبوع دا تحفة

رائع جدا

وانا مع سارة فى رايها

لكن.. عارفة فعلا هاختار اللى يستحق الاختيار

لكن افرضى انهم الاتنين يستحقوا الاختيار؟؟

والاتنين مخلصين فى الحب والصداقة....

ساعتها هاختار الحب بدون تفكير شرط انى اكون
واثقه انه حب حقيقى يصمد مع الايام ويستمر ..ويعوض عن الدنيا كلها
ومش كل يوم هنقابل حب حقيقى

وساعتها بدو انا مش عارفة باختار ليه ..بس اكيد صديقتى هتفهم واكيد هتتمنى لى السعادة

سلمي جمال
03-12-2009, 07:39 PM
عندك حق يا ميرا
و الصديقة الحقيقية هي الي حتخاف علي صديقتها و تحبلها الخير و بالتالي حتحب ان صديقتها متضيعش حبيبها

و مرسي ليكي اوي يا ميرا و رأيك يهمني فعلا

heba
03-12-2009, 09:23 PM
بشكرك ا سلمى على الموضوع الجميل
والحقيقة هو اختيار صعب لازم نحكم فيه قلبنا وعقلنا
بس انا لواتحطيت فى الموقف ده حاختار الصديق

سلمي جمال
03-12-2009, 10:25 PM
شكرا اوي يا هبه لاجابتك

سلمي جمال
03-15-2009, 07:26 PM
هل تشعر ان الرجل مظلوم من السيدة في هذا الزمن؟

ميرا مار
03-15-2009, 08:21 PM
لالالالالالالالالالالالالالالالالالالالا

مين قال الكلام دا يا سلمى

اطلاقا والله..المراة مقهورة جداااااااا من الرجل فى هذا الزمن

ولو فى العكس تبقى نسبه قليييييييييييلة لا تحسب

وياريت بس من الرجل
لا
دى المراة مقهورة حتى من المراة ومن كل المجتمع
يابنتى احنا فى مجتمع ظاالم جدا بافرادة

وسؤال جمييييل يا سلمى ميرسى لك يا قمر

Youssef Mostafa
03-15-2009, 09:03 PM
ايه التعصب دة ياميرا انا اسف يعنى كلامك مبين انك متعصبة جدااااااا
بصى ياسلمى هو الرجل مظلوم اه بس مش كله
يعنى مثلا مش كل الاجيال ممكن جيلنا يكون مظلوم اه
بس فى اجيال تانية ظالمة المراة اوى

خالد أبوسعده
03-15-2009, 09:10 PM
انا واحد اهه من الناس
مظلوووووووووووووووووووووووووم و الله العظيم من المرأه
بس الحق يقال مش معنى انى مظلوم
ان كل الناس مظاليم
لالالالا انا حاله شاذه
المرأه فعلا مظلومه فى مجتمعنا دا
كل الاجيال
بس فى ساعات ظلم مبيبقاش مقصود
يعنى لما اب مثلا يمنع بناته من رحله مثلا و يسمح للولاد
دا ظلم
بس هو فى تخيله انه كده بيحافظ عليهم
دا علي سبيل المثال لا الحصر

لكن فى ظلم تانى مقصود جدا و دا غالبا الى بيبقى من الراجل لمراته
و برضه مش كلهم النسبه الاكبر
لكن فى لوقات كتير المرأه هى الى بتظلم الراجل كتييير

المهم و خلاصه الكلام ان دى طبيعه الحياه فى مجتمعنا و مهما حاولنا نصلح
و مهما المراه حاولت تاخد حقوقها
فى الاول و فى الاخر الموضوع حيرجع للراجل الى هى اختارته علشان بكمل معاها حياتها
او لو كان اب فدا نصيبها و ربنا بيقدر و كله بحسابه عند الله

tiger
03-15-2009, 11:08 PM
موضوع جميل يا سلمى وسؤال جميل طبعا رد ميراااا فى حبة عنصريه ضد الراجل شويه وبشترك فى كده مع يوسف والبنت دلوقتى أو المرأه اشمل خدت حقوق كتير كانت غايبه عنها من زمان وده واضح فى العمل
ومش بس كده ده فى شغل مكنش قصولا أن الست متشتغلوش بس لو الراجل أتكلم حيكون متعصب حتى لو بالحجج والبراهين
وأنا واحد من الناس الى بعترف بالمرأه فى العمل وربنا معاهم ويوفقهم

سلمي جمال
03-15-2009, 11:17 PM
مرسي لرايكم كلكم

و ميرا مش متحيزة للمراة لان فعلا في مجتمعنا المراة مظلومة في حاجات كتير اوي

بس يا جماعة انا عايزة اعرف هل الراجل شايف نفسة مظلوم

و ارجو تغير العنوان الحقلة الخامسة هل الرجل مظلوم
و شكرا

ميرا مار
03-16-2009, 02:43 PM
ميرسى يا سلمى..........

سلمي جمال
03-16-2009, 10:05 PM
العفو يا ميرا


يا جماعة فين الناس
كل الرجالة شيفة نفسها مش مظلومة

lolaa fahmy
03-16-2009, 10:27 PM
مظلوم ليه يعني ماله؟؟:confused::confused::confused::confused:

هو يمكن فيه رجاله بتفكر انها مظلومه نتيجه للحياه الماديه وضغوطها الكبيره بس ده علي الاتنين الراجل والمراه ماهيا شريكه معاه

وبعدين لا الراجل مظلوم ولا المراه انا شايفه ان المراه حققت تقدم كبير جداا في الحياه العمليه والعلميه عايزه ايه تاني اكتر من كده

وبعدين انا بعترض مع خالد لما قال ان هوف الاب علي بناته ظلم لا يا خالد مهو كمان التسيب والحريه اللي زايده عن حدها هتودي المجتمع في كه مش مظبوطه لازم كل واحد يخاف علي بناته قوي وبعدين ايوه الولد يطلع رحله والبنت لوحدها لا عشان البنت غير الولد؟؟:confused::confused:

اما الراجل مش مظلوم طبعا ولا حاجه ولو كان فيه ظلم فده نادر جدا;) ويرجع لاسباب شخصيه ؟؟مش قاعده يعني

اسفه للاطاله

Hassan Mohamed
03-17-2009, 01:45 AM
انا شايف ان الراجل بينظلم من الزمن اللي بيحملوا الكتير والكتير وبالتالي المرأة عاوزة تتوفرلها كل متطلباتها وبكده فالراجل فعلا مظلوم

Youssef Mostafa
03-17-2009, 01:54 AM
فعلا كلام حسن تمااااااااااااااااام
المراء دلؤتى لو الراجل معملهاش اللى هى عايزاة يبقى ظالم

Zooma
03-17-2009, 01:56 AM
هل تشعر ان الرجل مظلوم من السيدة في هذا الزمن؟

ويكون مظلوم ليه يعنى انا شايفه عادى ولا مظلوم ولا حاجه
بس عايز اعرف يا سلمى مظلوم منها من من ناحيه ايه ؟؟؟

Hassan Mohamed
03-17-2009, 01:57 AM
اه والله يا يوسف الموضوع بقا شائك وصعب والدنيا بقت ظروف المعيشة فيها صعبة قوي


2 سحلب يا ابني والحساب عندي

واخد بالك يا يوسف علي حسابي ماشي ههههههه

سلمي جمال
03-17-2009, 02:10 AM
انا قصدي منها يا حازم
و مرسي لكم كلكم

Zooma
03-17-2009, 02:20 AM
لو هنمشى بكلام حسن يبقى فيه كذا راى
لو فعلا الست بتقول ع الراجل انو ظالم عشان مابيجبش ايلى هى عايزاه
وهى عارفه ظروفه انها ماتسمحش تبقى هى ايلى مفتريه ولو بتقول كده
وهى فعلا معاه او بإيده يجبلها الحاجات دى ومجبهاش يبقى بارد وحيوان وفعلا ظالم
اما بقى لو نمشى بالعنوان الراجل مظلوم ولا الاجابه ع السؤال ده
(((( على قد لحافك مد رجليك ))))) الراجل لو عارف نفسه مش هيعرف
يفتح بيت يبقى مايتجوز الا لما يظبط حاله ويشوف اموره ايه اومال اسمه
راجل ليه ويتحمل المسؤليه ازاى يعنى من الاخر انا شايف ان الراجل مش مظلوم

Hassan Mohamed
03-17-2009, 02:23 AM
يا عم حازم كده مضيعة للوقت

احنا فعلا مظاليم

خالد أبوسعده
03-17-2009, 02:28 AM
هههههههه
و الله انت طيب و علي نياتك يا حازم

سلمي جمال
03-17-2009, 02:00 PM
انا شيفة ان كلام حازم صح اوي

بس انا اقصد المراة بشكل عام مش ضروري تكون زوجته يعني ممكن تكون معاه في الشغل زميلتة في الكلية او اخته
كدة يعني

سلمي جمال
03-20-2009, 01:37 PM
هل توافق علي وجود يوم لتقدير الام
ام من المفروض ان يكون للاب كمان

و هل تعتقد بة ام لا؟

و لو كنت تعتقد جبت اية لست الحبايب؟

heba
03-20-2009, 02:34 PM
انا شايفة والله يا سلمى ان المفروض يعملوا يوم للأب زي ما فى يوم للأم
واذا كانت الأم هيا عمود البيت يبقى الأب هو سقف البيت
وده مش معناه اننا نفتكر الأم فى اليوم ده وطول السنة نسينها ومش مقدرنها

سلمي جمال
03-20-2009, 02:38 PM
رأيك جميل اوي يا هبه

بس حتجيبي حاجة لمامتك ولا لاء؟

heba
03-20-2009, 10:30 PM
طبعا ان شاء الله حجبلها حاجة يوم عيد ميلادها علشان قريب من عيد الأم
وشكرا ليكي يا سلمى

Zooma
03-21-2009, 01:10 PM
هل توافق علي وجود يوم لتقدير الام :
وليه لا اوافق طبعا

ام من المفروض ان يكون للاب كمان:
انا بالنسبالى بيكون اليوم ده للاتنين مش هتفرق مابينهم
زى ما الام مابتتعب وتربى الاب برضه بيسهر ويتعب طول عمره
عشان يوفر احتياجات البيت

و هل تعتقد بة ام لا؟
اه اعتقد بس المفروض يعنى منعا للاقاويل
اننا نغير اسمه من عيد الى يوم الام لان اصلا فى الاساس
اسمه mother's day زى valentine's day واحنا بنقول عليه عيد الحب

و لو كنت تعتقد جبت اية لست الحبايب؟
والله لسه بس على ما اعتقد يا سلمى انها مش عايز حاجه مننا
غير كلمه كل سنه وانتى طيبه يا امى

واحد سحلب بقى :D

سلمي جمال
03-21-2009, 01:16 PM
مرسي لك يا حازم اويييييييييييييييييييي

Soma
03-21-2009, 08:45 PM
هاى ياسلمى الفكرة رائعه بجد
هل توافق علي وجود يوم لتقدير الام
نعم اوافق نفسى يبقى كل يوم يكون تقدير للام مش واحد بس عشان الام تستاهل كل خير
ام من المفروض ان يكون للاب كمان
من رايى هو عيد الاسرة بنحتفلوا بيه للام والاب
و هل تعتقد بة ام لا؟
يعنى اصل مش حنعمل حفلة يعنى وكده مجرد بنجيب هدية واعمل حاجة حلوة كده وبس
لكن عيد الام عندى بيبقى كل يوم مش يوم واحد بس المهم رضا الام عنا
وهديتها تكون اطاعتنا ليها كل يوم وبحب احتفل بعيد ميلادها
و لو كنت تعتقد جبت اية لست الحبايب؟
جبتلها طرحه حلوة اوى وكتب دينية

ميرا مار
03-22-2009, 12:29 AM
هل توافق علي وجود يوم لتقدير الام
بصى بقى
ادينى المايك بقى
وسيبونى اتكلللللللللللللللللللللم

طاااااااااابعا مواااااااااااااااااااافق موااااااااااااااااافق مواااااافق
يا ساعت البيه
وكيل النيابة
ام من المفروض ان يكون للاب كمان
لاااا هو بس ذوقيا نجيب له هدية ونقوله كلمتين حلوين
لكن الام
الام حاجة تانية قليل عليها مان يبقالها يوم لوحدها

و هل تعتقد بة ام لا؟
:confused::confused::confused:

اعتقد بايه؟؟ بيوم الام طبعا.. بس بلاش عيد دى على راى زوما

و لو كنت تعتقد جبت اية لست الحبايب؟
والله يا سلمى انا جيبتلها.. بس مافيش داعى للتسييح بقى
ههههههههههههه




موضوع رائع للمناقشة كالعادة

انا بقى عايزة فانتا تفاح اخضر..واللا مافيش؟؟
خلاص اشرب من اللى عندك
:D:D:D

سلمي جمال
03-22-2009, 12:34 AM
ردكم بجد جامد اوي

و مرسي كتيييييييييييييييييييييييييييييير اويييييييييييييييييييييييييييييي
مووووووووووووووووووووووة


واحدة لميرا و واحدة لسوما
ههههههههههههههههههه

سلمي جمال
03-28-2009, 06:15 PM
موضوع هذا الحلقة عن قصة اتبعتتلي

و هي عبارة عن

واحد مرتبط بواحدة معاة في الشغل و تطلب منها ان تسافر هي و حد زملائها في الشغل لمدة اسبوع للخارج و حاول هذا الشخص ان يسافر معها بدل الزميل ولكن لا ينفع

و تركهم يسافرو و كان يكلمها باستمرار ولكن لاحظ اختلاف طريقتها في الحديث
و بعد رجوعها قالتله انهم لابد ان ينفصلو و تعجب جدا و سئلها عن السبب ولكنها اعطت مبررات غير مقنعة
و تركو بعضهم حسب رغبتها علي العلم حبة الشديد لها
و اكتشف بعد ذلك ان زميلهم حيتقدم لها و حيخطبها

و استنتج انها تركته من اجل الاخر
و المشكلة ان هذا الزميل اقرب صديق للضحية

ربنا معاك

ما رايكم في هذا هل يستمر بصداقة هذا الشخص ؟
هل يصارحهما عما فعلوا به؟

ارجو تغير العنوان الي
خيانة صديق و حبيب

Soma
03-28-2009, 07:37 PM
الموضوع فظيع جدا وعلى فكرة هى مكانتش بتحبه عشان لو حبته بجد استحالة
تحب اى شخص تانى مهما كان وتقريبا هى متعرفش الحب والصديق التانى اللى اتقدملها
انا متاكده بمجرد انها ممكن تتعرف على شخصية تالتة ممكن تسيبه برضه وهكذا
رائى لا طبعا ميستمرش هو نفسه مش حيقدر يتعامل معاه كصديق بعد كده
ازاى صد يق يعمل كده فى صاحبه
ويعتبرهم اصلا انهم مكانوش موجودين فى حياته من الاول
عشان ده مش سهل ابدا اكيد اتجرح جدا منهم حبيبته وصاحبه حاجة فعلا صعبة جدا

Youssef Mostafa
03-28-2009, 08:00 PM
طبعا ياسلمى دةموضوع حلو جدااااا لان فى كلام كتير لازم يتقال

اولا الشخص اللى اتخدع دة غلطان لانه معرفش يختار من البداية كان لازم يتاكد من حبها ليه بس زى مبيقولو الحب اعمى

نيجى بقى للفتاة الكذابة اللى ضحكت عليه طبعا هى مش بتحبه ولا حبته من البداية اصلا هى شكلها كانت عايزة واحد غنى
يعيشها حياتها او عايزة واحد تتحكم فيه براحتها

اما عن الصديق الخائن فدة بصراحة فى كلام مش حقدر اقوله هنا النوع دة حلال فيه القنل والله

سلمي جمال
03-28-2009, 08:23 PM
مرسي اوي لرايكم
و عندكم حق والله

بس الصديق الخاين مش غني
مستواه عادي زي صاحبة
بس من الواضح انها فعلا بتحب تغير مش اكتر و لو حد جلها احسن حترمي تاني علي طول

alaa eid
03-28-2009, 08:40 PM
جميللللللللللل جدا تسلمي يا سلمي ومن رأيي انه احسن انه عرف البنت علي حقيقتها لان لو كانت بتحبه بجد عمرها ما تفكر تبص لواحد تاني مهما كان التاني احسن من الاول لان اللي بيحب حد بيشوفه احسن واحد في الدنيا مهما كان اما البنت بصراحة خسارة فيها حب اللي كان بيحبها اما صاحبه بقي اللي خانه فدا يبقي عقابه كبييييييييييير من صاحبه
وشكرررررررا ليكي خالص

اسامه البنا
03-29-2009, 09:43 AM
والله يا سلمي كويس انها بانت من دلوقتي

قبل ما يتعلق بيها اكتر من كده

والمفروض الشخص ده ما يزعلش دي ميتزعلش منها دي يتزعل عليها لانها في يوم هيتردلها اللي عملته في الناس

لانه كما تدين تدان

موضوع جامد اخر حاجه يا سلمي باشا

الله ينور عليكي

toleban
03-29-2009, 11:38 AM
تسلمى ياسلمى على الموضوع الجااااامد ده

بس هى اصلا ماحبتهوش لانها ماتعرفش يعنى ايه حب

بالنسب لصديقه الخائن انه ميكلمهوش تانى

سلمي جمال
03-29-2009, 08:14 PM
مرسي لرايكم خالص

و الحمد لله كلنا متفقين علي نفس الحاجة
انه ميكلمش صديقة تاني
و الحمد لله ان حبيبته بعدت عنه

مستنيا راي الناس يمكن حد يخختلف عنا

جنات
03-29-2009, 09:41 PM
موضوع جميل يا loomy بشكرك عليه انا شايفه ان الشاب الضحيه ربنا بيحبه عشان مكملش مع واحده خاينه والمفروض اصلا ينسى ان ليه صاحب وميفتحش الموضوع معاهم ابدااااااا لانهم ميستهلوش حتى الكلام وهيا اكيد واحده ميتزعلش منها ولا يتزعل عليها

خالد أبوسعده
03-29-2009, 09:54 PM
و الله انا لو مكانه مزعلش

كلبين وراحوا

انه يكتشف كدا لازم يقول الحمد لله ان الموضوع متطورش لجواز و بعدها خانته لان الى زى دى ممكن تعمل اى حاجه

عارفه لو كانت جت قالتله انا مبحبكش و بحب كذا و هو بيحبنى

كان يتفهم الوضع

و كان حيتمنالهم الخير من قلبه

بس انها تيجى بالطريقه دى
اتنين خاينين
و لو زعل عليهم للحظه يبقى 100% غلطان
ربنا مبيضيعش حق حد

سلمي جمال
03-29-2009, 10:37 PM
رايكم حلو اوي يا جنات اني و خالد

مرسي لكم كتيييييييييير

اسامه البنا
03-30-2009, 04:13 PM
سلمي انا بقول ان القهوه ديه اكتر برنامج ناجح

والواد يقدر يقول رايه في بصراحه

سلمي جمال
03-30-2009, 07:12 PM
ربنا يخليك يا اسامة

دة لسة في مواضيع جاية اكتر تشويق

spring sun
04-01-2009, 11:27 AM
وانا مستنياها يا سلمي اويييييييييييييييييييييييييييييييي

سلمي جمال
04-01-2009, 10:03 PM
ماشي يا اميرة

و لو عندك مواضيع قوليلي

spring sun
04-02-2009, 11:58 AM
لا ده الموضوع عندك انتي؟؟؟؟

Ahmed Mohamed
04-02-2009, 12:26 PM
الصراحة انا صعبان عليا اوي الشاب ده الله يكون في عونه
انا لومكانه اخد مسدس كاتم للصوت واروح اديها رصاصتين هي وصاحبه
واخلص منهم ههههههههههه :D:D

لا بجد المفروض انه يحمد ربنا انه اكتشف حقيقتها قبل ما الفاس تقع في الراس ويتجوزها
اما بالنسبة لصاحبه ده بقي فاكتر حاجة بجد توجع هي خيانة الصديق مش خيانة الحبيب

ربنا يصبره

سلمي جمال
04-02-2009, 12:53 PM
ماشي يا اميرة

استعدي بئة للحلقة القادمة

مرسي لك كتير يا روميو و انت عندك حق فعلا
بس في زمنا دة ممكن تتوقع الخيانة من اي حد

سلمي جمال
04-07-2009, 11:47 PM
حلقة هذا الاسبوع هي

فراق الحبيب

هي بتحكي ان كانت بنت في اولا جامعة , تعرف عليها شاب اكبر منها ب 7 سنين ولكن لاذال في الجامعة حتي هذا السن و تعلقوا بعضهم بسرعة شديدة و اعترفلها بحبة و هكذا هي و قام بمقابلة ابو البنت حتي يتكلم عليها زي ما بيقولو و لما ينتهي من درسة يروح يتقدم لها و شاء القدر ان يجعل اخو الشاب يتزوج من اخت البنت و قبل الزواج توفي والد البنت و انتهت الدراسة بالنسبة للشاب و البنت ولم ياتي ليخطبها رسمي و فجئة بعد عنها و قال لها لا يمكن ان يستمروا ولابد ان ينفصلو نهائي عن بعض و بعدت عنه و حاول الاخ و الاخت الاصلاح ولا يمكن ولكنها لا تزال تحبه و تحاول ان تسمع صوته فقط و متعلقة بة رغم ان الموضوع لا ينفع ان يرجع من تاني

رايكم هل تحاول معة لترجعة ام تتركة و تترك المشاكل بين العائلتين ام ..............؟

Soma
04-08-2009, 03:32 AM
تسيبه طبعا ومتحاولش تفكر فيه لانه شخص ندل
وسورى يعنى تبقى غبية لو رجعتله تانى ويبقى معندهاش كرامه
اكيد اكيد ماكنش بيحبها كانت مجرد تسليه بالنسباله
اللى يفرط فى حبه بالسهولة دى يبقى ميستحقش حبها ليه
وتحاول تنساه مش عارفه ازاى بتحبه بعد اللى عمله معاها
مجرد انها تفكر فى ندالته معاها استحالة تفضل تحبه
اكيد بيبقى صعب على اللى بيحب ينسى حبه بسهولة بس لازم تحاول
ومتفرتش فى كرامتها وتشوف حياتها تفكر فى اى حاجة تانية تشغلها عنه
مجالات الحياة قدامها كتيرة تفكر فى مستقبلها وحياتها حتبقى ازاى بعد كده وان شاء الله
ربنا يعوضها بشخص يقدر حبها

Youssef Mostafa
04-08-2009, 09:14 PM
تحاول تعرف هو ليه عمل كدة وهو المفروض يديها سبب هو ليه يعمل كدة


مش يمكن حد بلغه كلام عنها مش صحيح وهو من غير عقل صدق الكلام دة

ولو معطهاش سبب واتضح انه كذاب فى حبها تسيبه بالجذمة سورى يعنى

وفى وقتها تشوف فتى احلامها التانى ومتحسسهوش بجرحها خالص ولا يفرق معاها اصلا

وموضووووع جامد جدا طبعا ياسلمى بس ياريت العنوان يتغير

pretty angel
04-08-2009, 11:03 PM
اولا الموضوع كله جااااااااامد موووووووت يا سلمى والله

الله ينور عليك يا باشا

اما بالنسبه لحلقة النهارده

فبجد المفروض انها ما تفكرش فيه تانى ولا تحاول تسال عن سبب الانفصال لان لو حبها بجد كان اول حاجه فكر يعملها انه يرتبط بيها اول ما الفرصه توفرت بس هو كان سهل عنده ان يبعد عنها ويسيبها

بس هو بنى ادم مايستاهلس التفكير فيه ولا فى لحظه من اللى عدت معاه
تقفل على الفتره ديه من حياتها بشكل نهائى وماتحاولش تفتحها لاى سبب من الاسباب ولا تسمح لحد بالتدخل حفاظا على كرامتها

اكيد طبعا حتحكم عليها ظروف العائله بالتجمع معاه فى اى مناسبه او تجمع عائلى لازم تاهل نفسها للوضع ده كويس وما تحسسش اى حد وبالذات هو ان اللى حصل لسه جواها او ساب اثر جواها

خليكى قويه وجامده وحاولى تتغلبى على المشكله ديه واكيد اللى جاى احسن الف مره وان شاء الله تقابلى الانسان اللى يقدرك ويعرف قيمتك بجد ومايقدرش يستغنى عنك

لان اللى يحب بجد عمره مايفرط فى حبه مهما كانت الاسباب والظروف

سلمي جمال
04-09-2009, 11:43 PM
مرسي جدا لرايكم

والله كلامكم قلتة كتير بس مين يسمع بئة

اسامه البنا
04-26-2009, 03:39 PM
ايه يا سلمي فين الحلقه الجديده انتي قفلتي القهوه ليه كده

سلمي جمال
05-02-2009, 12:10 AM
محدش بيتكلم
كلة بيشرب و يمشي

حتة الحساب مش بيحسبوا اعمل اية بئة
و ناس اخدت 100 جنية في جبها و مشيت

Soma
05-02-2009, 02:05 AM
ليه بس ياسلمى
قولى الموضوع الجديد واحنا حنتكلم على طول :p

سلمي جمال
05-02-2009, 11:56 AM
موضوع هذه الحلقة

بنت و 4 رجال

يوجد كثير من البنات تحب ان تضمن ان يظل معها رجل ممن يحبونا
يعني البنت بتعشم كل الرجال المعجبون بها بانها تحبهم حتي از تركها واحد تجد الثاني حتي ولو كانت لا تحبهم


ما رايكم في نوع البنات دة؟

Youssef Mostafa
05-02-2009, 09:08 PM
طبعا دى بنات تافهة وبتتسلى والرجالة اللى متاخدش بالها من كدة بتبقى رجالة تافهة شبههم

وموضوع حلو اوى ياسلمى للمناقشة


سلمى ممكن اسالك سؤال؟ هل فى حياتك قابلتى حالات زى دى او هى موجودة بالفعل يعنى؟

Soma
05-03-2009, 12:17 AM
دى تبقى بنت غريبة او مريضة
مفيش تفسير غير كده
وتسلمى ياسلمى على الموضوع الرائع ده

pretty angel
05-03-2009, 01:53 AM
اولا.....حمدلله على السلامه يا سلمى

ثانيا... نوع البنات ده اكيد مريض لانى اللى هى بتعمله ده اكيد نتيجه عقدة نقص عندها

ولازم تتخلص منها وإلا ممكن تقع فى مشاكل كتير

شكراااااااا سلمى على الموضوع

وياريت مش تقفلى القهوة تانى

ميرا مار
05-03-2009, 07:50 PM
فين يا سلمى الموضوع الجديد؟؟؟

فى الانتظار يا قمر

spring sun
05-03-2009, 09:29 PM
دي بنت مخها مش معاها

دي لو اتكشفت هيبقي شكلها وحش

واكيد ربنا هيوقعها في شر اعمالها

سلمي جمال
05-05-2009, 12:52 AM
مرسي لردودكم كلكم بجد

وللاسف يا يوسف دية قصص حقيقية و متكررة يعني شفتها في اكثر من شخص

ميرا الموضوع مكتوب يا باشا و مستنين رايك

اسامه البنا
05-07-2009, 06:22 PM
الله ينور يا سلمي

موضوع هايل بس النوع ده من البنات الله يخرب بيتهم ههههههه

يعني بيبقي قله احترام لذاتها قبل ما يكون لحد

هي شايفه نفسها زي التاكسي علشان الي جاهز

بس وهفكر في وصف للنوع ده وابقي ارد عليكي

سلمي جمال
05-07-2009, 06:24 PM
مستنيين ردك يا اسامة و شكرا علي المشاركة

اسامه البنا
05-07-2009, 06:30 PM
سلمي بس انتي عرضتي الموضوع بس احنا عاوزين نعرف رايك برضه

اكيد رايك مهم بالنسبه لمناقشه الموضوع

سلمي جمال
05-07-2009, 06:57 PM
اكيد يا اسامة الموضوع مش عاجبني خالص

المشكلة ان في مشاكل من النوع دة كتير
و المشكلة الاكبر ان البنات مش بتعترف بكدة
و في ولاد بتستغل دة في صالحه

spider girl
05-08-2009, 06:12 PM
صراحه يا سلمى
لما قريت موضوع الحلقه احترت ارد ازاى
لان البنت دى لو شفتها ادامى مش عارفه هتصرف ازاى
ايه يعنى هيه بتستخدم واحد والتانى استبن يعنى ولا ايه؟
بجد تبقى عندها نقص سورى يعنى

بس كده تقبلى مرورى يا سلومتى

اسامه البنا
05-08-2009, 06:14 PM
والله يا ساره مش هي ديه المشكله

تعرفي ان سعات البنات من النوعيه ديه مش بيبان عليها خالص

وهي ديه المشكله ان الشباب بيتخدعوا فيها

farida
05-08-2009, 07:17 PM
موضوع جميل يا سوسو مش غريب عليكي

بس ايه البنت ديه



ده مينفعش اتنين حتة

وزي ماقالت سارة هي واخدة الباقي استبن

وعلي الرجالة المفروض يعروا ويقطعوا معاها من الاول


و ميرسي يا قمر

esraa
05-08-2009, 07:31 PM
بسى يا سلمى انا من رأيى ...




ان النوع دا من البنات بيعتبروا بنات مصلحة

يعنى اللى معاه اكتر هو اللى اخده


بمعنى آخر و بلغة اليوم " اللى معاه و جاهز ارفضه ليه ؟؟؟؟؟ "




للأسف يا سلمى كتيير من البنات اليومين دول بيفكروا بالاسلوب ده

و بيعتبروا ان الجواز مصلحة مشتركة بين الزوجين تحت شعار " انها تعيش فى نفس المستوى اللى هى عايشه فيه او احسن ، ميهمهاش بقى انهم يكونوا متكافئيين فى حاجات تانيه و لا لأ ....





[CENTER]و دا رايى .... يا رب يعجبكم ...[/CENTER

AYMAN GAMAL
05-08-2009, 08:35 PM
فيه مثل ينطبق تماما على البنت دي

من رايي بتبقى زي القرد (مبتسبش فرع الشجرة الا لما تكون ماسكه في الفرع التاني)

انا متاكد انها عمرها ما هتحب و معتقدش انها هتتحب او هتتعاشر حتى هتبقى مكروهه

و الجزاء من جنس العمل فيمكن في يوم هيه هتحب و هيتعمل فيها نفس الشئ وارد ليه لاه

خالد أبوسعده
05-08-2009, 09:06 PM
غريب اوى الموضوع دا

مع انه بيحصل فعلا فى الحقيقه

البنت الى تعمل كدا دى بيقبى عتدها زى حته نقص فى ان محدش بيكمل معاها
فبتضمن انها تفضل تتحب علطول
و عمرها ما حتكون بتحب الرجاله دول
هى ساعتها حتكون بتحب المشى معاهم مش بتحبهم هم

و للاسف النوع دا من البنات بتفضل تخسر واحد ورا التانى لحد ما ماتلاقيش حد منهم معاها
و ساعتها ربنا حيرزقها بالى يطلع عليها الى عملته فى الناس

الحياه كما تدين تدان

فى الاخر بجد حتندم علي اول واحد بيحبها ضيعته من اديها
و ساعتها مش حتلاقيه لو بكت بدل الدموع دم
حتفضل عايشه حياه هى مش بتحبها و حتكرها و حتكره نفسها

كما تدين تدان

ميرا مار
05-08-2009, 09:20 PM
سلمى..

هو فى كدا فعلا؟؟؟؟؟؟؟؟


ماعتقدش

انا عمرى ماقابلت حالة زى دى


البنت بطبعها بتنشد الاستقرار..يعنى اكيد تحب تستقر فى حب واحد

اسامه البنا
05-08-2009, 09:22 PM
تعرفوا بقي يا جماعه
البنت ديه ممكن تكسب بس حتي لو كسبت هتبقي خسرت نفسها

خالد أبوسعده
05-08-2009, 09:22 PM
مش كل البنات يا ميرا

فى ناس عندها الموضوع دا لعبه

و من كتر الى بيحبوها بتتغر و مبيهمهاش تخسر حد او متخسرهوش

عامله حساب ان فى غيره

Rania Ismail
05-08-2009, 09:58 PM
بجد الفكره حلوه موووووووووووووت بتاعت الموضوع
بجد تسلمى يا سلمى على افكارك

اما بالنسبة للرد على الموضوع
بصراحه النوع ده من البنات انا مش بحترمهم ايا كان هى ترضى انه اى حد منهم يعمل كده معاها
وبعدين ديه تبقى اخلاقها مش كويسه
لا لا النوع ده من البنات ينرفز بصراحه

سلمي جمال
05-08-2009, 10:28 PM
بجد انا بشكر كل الي شارك في الموضوع و رايكم كلكم حلو اوي و حلو النقاش في الموضوع بالطريقة دية

بس للاسف في بنات كتييييييييييير اوي كدة و في حياتنا و احنا مش عارفين كدة والله

و هي بردو بدور علي الاستقرار زي مانتي بتقولي يا ميرا ولكن مع الي يلحق يعني شيفة واحد بيحبها اوك و مالة بس لسة متقدمش يبئة مسدش الطريق و واحد تاني معجب مفيش مشكلة بردو
المهم مين الي حيجي لبابا
هو دة اهم حاجة


و هو دة تفكرها للاسف

شكرا لكم كلكم

سلمي جمال
05-08-2009, 10:28 PM
انا سعيدة اوي ان الموضوع عجبيك يا رانيا باشا

سلمي جمال
05-09-2009, 02:32 PM
حلقة هذا الاسبوع مختلفة شوية عن باقي الحلقات و احتمال وجود اراء متضاربة مع الاخري

لان حلقة هذا الاسبوع فيها نوع من الناحية المادية

و اسم هذه الحلقة

حتشتري الساعة


دة موقف شخصي الصراحة

و هو اني كنت رايحة اتفرج علي ساعات يد عشان اشتري واحدة و كان في اعتقادي اني ممكن اجد ساعة في حوالي من 400 ل 700 و يكون مستوي معقول لساعة كويسة

و عند السؤال علي احد الساعات الي شدت انتباهي وجدت ثمنها 3200 جنية


مش حقولكم علي رد فعلي عشان متضحكوش عليا
لكن السؤال بئة

ممكن تشتري ساعة بالثمن دة و انت لسة متخرج من سنة و مرتبك علي الاد اويييييييي؟

الصراحة انا لما بيبئة نفسي في حاجة بحوش لحد مشتريها لكن مش للدرجة في ساعة
ممكن ادفعهم في جهاز او شئ ممكن احس بقيمة الفلوس دية فيه
مش لدرجة ان واحدة في سني و عملي تشترية

في منكم ممكن يقول عليا بخيلة او مدية
و منكم حيقول اني مصرفة او بتمنظر

لكن والله دية فعلا الحقيقة

انتم بئة لو في مكاني تحوشوا و تشتروها ولا تدوروا علي حاجة في المستوي المعقول؟

يا ريت كل واحد يقول الي ممكن يعملوة بجد

Soma
05-09-2009, 05:23 PM
حلقة مختلفة بس جميلة
اكيد مش حقول عليكى بخيلة ولا حاجة اصل دى حاجة بالعقل الساعات بيجى عليها وقت وبتبوظ ومش بيبقى ليها قيمة
ممكن المبلغ ده لو فى الذهب اوك او حاجة مهمة جدا وخصوصا فى سننا ده محتاجين لحاجات تانية كتيرة فمش معقول يعنى احط مبلغ زى ده فى ساعه فطبعا رد فعلى حسيبه وامشى استحالة احط مبلغ مش فى موضعه وبس كده
ميرسى ياجميلة على الحلقات العسل دى

سلمي جمال
05-09-2009, 05:24 PM
مرسي لكي يا سوما اوييييييييييييييي

بداية تطمن الحمد لله
في ناس بتفكر زي

اسامه البنا
05-10-2009, 03:32 PM
بصي يا سلمي كل واحد وليه مستواه

يعني انتي مثلا مستواكي 400 الي 700 ماشي ايه؟ المشكله

وكمان الساه الي بي 3200 ليها مستواها

وليه انا احط المبلغ ده كله في ساعه

انا بقي ممكن اجيب ساعه ب 50ج بس مش حتي 400

وكمان لو معايا المبلغ العالي ده

ممكن اجيب حاجه تانيه زي اني اكمل عليه واجيب عربيه نص عمر كده ب10000

مش ساعه

ولما احس اني لازم اشتري الساعه الغاليه ديه

يبقي لازم تكون كل مستلزماتي في نفس المستوي

يعني عربيه ب 150 الف كده

يعني من الاخر كل واحد وعلي حسب مستواه

ولازم يكون مستوايا كله متساوي

يعني مش اشتري ساعه ب3000ج

وانا مش معايا زيهم تاني

دي تبقي انعره فارغه

pretty angel
05-10-2009, 05:32 PM
والله يا سلمى اكيد حيكون من الصعب انى اشترى ساعه بالتمن ده

بالرغم من انى معروف عنى انى مصرفه جداااا بس مش لدرجة انى اشترى ساعه ب 3200

لانى الاكيد ان فيه احتياجات تانيه كتير اولى انى اصرف فيها

سلمي جمال
05-10-2009, 05:45 PM
احمدك يا رب
مش معقول الناس بتفكر زي

الحمد لله بجد
و شكرا اوي علي ردودكم

Youssef Mostafa
05-10-2009, 06:56 PM
ساعة بكااااااام؟؟ :eek::eek::eek:

نوووووووو طبعا ساعة ايه الى اشتريها ب 3200 جنيه دى .. حتى لو معايا الفلوس واكتر مش حشتريها ياشترى واحدة بسعر معقول ياما اشترى حاجة فيها القيمة وحتعيش معايا
عروسة مثلا :p

بس انا ممكن اتفرج عليها وامشى او اتصور جنبها حتى :D

spring sun
05-10-2009, 07:01 PM
والله يا بنتي حتي لو بابض خمسه الاف من الجنيهات

عمري ما هجيب ساعه الا من خالاد بن الوليد

اصل حرام الساعه في الاول وفي الاخر كماليه مش اساسيه

يبقي ليه التبذير

اطمني يا سلمي كلنا زيك

ههههههههههههه

خالد أبوسعده
05-10-2009, 09:56 PM
3200 جنيه
لييييييييييييييييييييييييه
بتمديلها ايدك يعنى و هى تنط تتلبس لوحدها؟؟؟
و لا الساعه موفره و بتشارك فى الاثاث ولا ايه بالظبط؟؟

دا انا لو معايا ال3200 دول كنت اتجوزت و خلفت و جيبت فيلا و عربيه

ههههههههههههههههههههههههههه

لا طبعا صعب

فى اولويات فى الاول لازم الواحد يعمل حسابه عليها

ولا نشترى الساعه و نقعد نشحت بقيت الشهر؟؟

هى حلوه الاولانيه فى الوقت الحالى

spider girl
05-10-2009, 10:00 PM
ايييييييييييييييه؟؟؟؟

ليه ان شاء الله خير يعنى

انا لو مكانك كنت قلتله

خليها ممكن تفقس عقارب صغيرة

هههههههههههههههههههه

سلمي جمال
05-10-2009, 10:38 PM
ههههههههههههههههههههههههههههههههههههههههههههههههه
ردكم جميل اوي

مرسي لكم كتيييييييييييييير

ميرا مار
05-13-2009, 11:14 AM
:Dههههههههههههههههههههههههه

كل دا عشان الساعة؟؟؟


انا هاشتريهاااااااااااااااااااااااااااااا


























































لا طبعا ..اوعوا تصدقوا.. بس الحقيقة يا سلمى دا موضوع نسبى
يعنى حاليا مش هاشتريها طبعا لانى عندى حاجات اهم احط فيها فلوسى

لكن لو فى يوم بقى مثلا معايا ملايين
مش هتفرق ساعتها
واكون طبعا جيبت العربية خلاص
مانا مش عايزة حاجة تانية
العربية
وبعدها الساعة على طول

:D

سلمي جمال
05-13-2009, 04:34 PM
مرسي يا ميرا علي رايك و ان شاء الله تجيبي العربية

white_heart
05-14-2009, 10:53 AM
الموضوع دة عاجبنى اوى


بس اتخضيت اول ما دخلت الاقى ساعة ب 3200 جنية

ليهههههههههههههههههههههههههههههههههههههه ؟؟؟؟؟؟؟؟؟؟؟؟؟؟؟؟؟؟؟؟


دا انا لا يمكن احطهم فى هدوم حتة واحدة كدة


مش ساعة كل شهر عاوزة حجر جديد


وبعدين مالة الموبايل ما هو فية ساعة وبيرن وبيمسج




شكرا يا سلمى على الموضوع الراقى دة

سلمي جمال
05-14-2009, 02:35 PM
ههههههههههههههههههههههههههههههه

مرسي كتير ليكي يا وايلد علي المشاركة

سلمي جمال
05-14-2009, 07:43 PM
اية يا جدعان فين ردكم علي الموضوع


الموضوع المرة دية مهم بالنسبة لي اويييييييييييييييييي

الورده البيضاء
07-06-2009, 01:24 AM
موضوع مهم جدا ياسولى وفكرة الموضوع تحفة بجد
اما بالنسبة لموضوع الساعة دة لايمكن طبعا انة يحصل
لية يعنى هو احنا لاقيين الفلوس فى الشارع؟
تسلم ايدك ياقمر
ومنتظرين الفكرة الجديدة

ALY ELSAYED
07-06-2009, 02:14 AM
انتي عارفه يا سلمي انا سمعت عن موبيل وساعه في نفس الوقت

وسعره اقل من 3000 جنيه وطبعا مشترتوش

ليه ساعه ب3000 جنيه والصين ومنتجاتها راحت فين هي هي وب 20 جنيه بس

ربنا يخللنا الصين

هههههههههههههههههه

جزاكي الله كل خير

ميرا مار
07-07-2009, 08:56 PM
سلمى

انتى فين يا قمر

WAITTING FOR YA

spring sun
07-12-2009, 08:11 PM
سلمي انتي قفلتي القهوه ليه

ده حتي اخنا في الصيف وده الموسم

يلا بقي فين الموضوع الجديد

yousef
07-23-2009, 07:52 PM
اعتقد ان ديه مسأله اولويات و اذواق يعني في واحد اعرفه يحب يجيب احذيه كوره (استرزات) ممكن ميلبسهاش بس سعرها بيكون عالي جدا جدا هوه بيحب وبيفرح بكده
يعني لو في واحد غاوي ساعات ممكن يعمل اي حاجه ويجبها
انا عن نفسي لا طبعا
لاني مش بحب الساعات
علي فكره انا اول مره اشارك ولما تابعت وشوفت الموضوع من الاول زعلت لان كان في حاجات كتير نفسي اشارك فيها
بجد موضوع هايل