المساعد الشخصي الرقمي

مشاهدة النسخة كاملة : شوبيكوا لوبيكوا احنا هننصب عليكوا



zoro313
10-02-2008, 10:25 PM
شوبيكوا لوبيكوا احنا هننصب عليكوا

حاسس إنك لوحدك؟ حزين ومكتئب وجواك شعور بإن الحياة لونها إسود مخطط بكحلي متلون برمادي؟

بتسمع كتير أغنية "عيد ميلاد جرحي أنا"؟ بتشتري شمع ملون وتولعه يوم عيد ميلاد جرحك إنت وبعدين تقف تغني -مع الديابة الوحدانية- "الأيام الحلوة بتعدي في ثواني" ؟

عرفت "سوسن" وقالت لك إنها بتموت فيك وبعدين شفتها بعينيك -اللي أكلهم الدود- وهي خارجة حاطّة إيدها في جيب "سيد" صاحبك من جنينة الأورمان الساعة 6 بالليل رغم إنها بتقفل الساعة 5 -"الأورمان" مش "سوسن"

والدك بيبص لك بصة بتحسسك بإنك "هريدي" ولد عمه اللي في الصعيد اللي هيطخه عيارين عشان ياخد بتاره؟.. والدتك دايما بتحط "ورك الفرخة" لأخوك الصغير رغم إنها عارفة إنك مش بتاكل حاجة في الفرخة إلا وركها؟

نفسك تركب أسانسير في بيتكم -اللي هو دورين بس- عشان تركبه مرة فيحصل فيه عطل فيقع بيك فتيجي لك كسور مضاعفة وتروح المستشفى فترتاح من كل الناس الوحشة دول؟


ماتترددش.. اتصل بينا على خط "الفضفض فون "على رقم "000000000"
هنسمعك وهندلعك وهنشخلعك وهنحميك وهنلبسك وهنكسيك وهنطلعك زي الفل كأنك جوزين حمام بالفريك..

اتصل دلوقتي وفضفض معانا هتلاقينا كلنا بنسمعك.. اتصل بينا
على "........" نقول كمان الرقم
"........." نعيد كمان الرقم ".......... .." نزيد كمان الرقم "........." ممكن تسمع لنا الرقم "......." !




"لو كنت بتدوري على أقصر الطرق إلى شباب الجامعة، ونفسك تعرفي أسهل الطرق لقلب "هاني" و"تامر" و"لؤي" و"ياسر" و"رامي" و"حاتم" عشان "تأنتمي" مع كل واحد فيهم يوم في الأسبوع وتاخدي يوم الجمعة أجازة!
0000000000-اتصلي بينا على

لو كنت بتشعري بالحقد والغل والحسد تجاه صاحبتك "نورا" الجميلة الأمورة الحلوة ونفسك تعرفي طريقة تخليكِ زي القمر وأحلى منها مية مرة
0000000 اتصلي بينا علىلو شفتِ نفسك في المراية فحسيتِ بإنك بتتفرجي على فيلم رعب، ولو مشيتِ في شارع جامعة الدول العربية، فمافيش أي عربية وقفت لك، ولو ركبتِ أتوبيس زحمة فمافيش أي بني آدم طلع عنده ذوق قام وقعدك مكانه،
00000000 اتصلي بينا على





لو جربتِ كل أنواع الشامبو المستورد والمحلي، واستخدمتِ كل أنواع الزيوت من أول زيت "شل" لغاية زيت "التعاون" وفضل شعرك زي ما هو أنشف من الليفة وهي على الشجر وأخشن من الحجر وهو لسه على الجبل، اتصلي بينا على "........" خط "ياختي فون"
للماكياج والجمال والموضة..

"ياختي فون".. هيروشك وهيأيفك وهيخليكِ أحلى بنات الكون وأرق من كل الكائنات البرمائية والزاحفة.. اتصلي الآن..

"مع ياختي فون.. هتخلي كل الشباب مجنون" !


محمد حليم

ahmedko
10-02-2008, 11:23 PM
اية يا عم حليم كم الاحباط اللى انت فية دة
اية ياعم الدنيا اوحش من كدة اه
بس احنا احسن من كدة بكتير
متبصش لتلت تربع الكباية الفاضى و بص للبق اللى فى الاخر

Rania Ismail
10-03-2008, 01:42 AM
يا بنى هى العمليه مش ناقصه غم ونكد الله يخيلك الواحد فيه اللى مكفيه

Rania Ismail
10-03-2008, 01:48 AM
المفروض ميتحطش فى قسم الفرفشه والضحك المفروض يكون فى الكئابه والغم والنكد يا صديقى

sarah
10-03-2008, 03:42 AM
والله زى العسل شكلهم مقروش للاخر.
انا برضو اتخضيت من الاول. كمل يا محمد دمك خفيف و فيك مواهب كتيرة..

witch evil
10-03-2008, 04:10 AM
هههههههههههههههههههههههههههههههههههههههههههههههههه ههههههههههههههههههههههههههه

دانت ممكن تبيع الهوا فى ازايز
تنفع مندوب مبيعات على فكره

zoro313
10-03-2008, 05:15 PM
احنا اي حاجه في اي حته يعني ههههههههه

Rania Ismail
10-03-2008, 09:26 PM
على فكره يا حليم مجهوداتك كبيره فى قسم الضحك والفرفشه استمر

zoro313
10-03-2008, 09:28 PM
ربنا يخليكى واحنى فى الخدمه

samomran
10-03-2008, 11:41 PM
حليم يا بنى انا خايف عليك من البنات انا حكلم الشله كلها عشان تحميك البنات دول مستاذبين جداااا و ممكن يغتالوك فى اى لحظه
لازم رجالتنا يحموك منهم دول شر الارض و ما انجبت

mohamed-gohar
10-06-2008, 11:45 AM
برافووووو يا حليم

احمد حسن
10-06-2008, 04:15 PM
هههههههههههههههههههه
ربنا عاظالم

Rania Ismail
10-07-2008, 09:01 AM
حليم يا بنى انا خايف عليك من البنات انا حكلم الشله كلها عشان تحميك البنات دول مستاذبين جداااا و ممكن يغتالوك فى اى لحظه
لازم رجالتنا يحموك منهم دول شر الارض و ما انجبت

احب اقولك انك اول واحد حنغتالو على فكره وعلى ايدى ان شاء الله

samomran
10-07-2008, 12:30 PM
انتى بتههدينى يا رانيا انتى اولا وشم عارفه شكلى و انت حتغتالينى ازاى ده انا اللى يقرب منى اجيب عئله عمران من الصعيد لحد هنا طابور عشان ياخدوا بطارى و على العموم انا مستنى الرصاص اللى حينزل على زى المطر ما تخلنيش انى احط البنات فى دماغى ده انا اشخم من حليم فى الحكايه دى على فكره

Rania Ismail
10-08-2008, 02:26 AM
انتى بتههدينى يا رانيا انتى اولا وشم عارفه شكلى و انت حتغتالينى ازاى ده انا اللى يقرب منى اجيب عئله عمران من الصعيد لحد هنا طابور عشان ياخدوا بطارى و على العموم انا مستنى الرصاص اللى حينزل على زى المطر ما تخلنيش انى احط البنات فى دماغى ده انا اشخم من حليم فى الحكايه دى على فكره

مش وانا موجوده ومش فى القسم بتاعى على فكره وبعدين مش انت مرشح نفسك فى الجمعيه الجغرافيه يعنى حعرفك يعنى حعرفك اما بالنسبه للصعايده فانا عندى اضعاف اضعاف اللى حتجيبهم وضرب النار للصبح

usama
10-08-2008, 02:30 AM
مش اولتالك يابني والله انت طلعت مشكله

samomran
10-08-2008, 04:52 PM
ياااااااااااااااااااه انا نسيت انى حشوفك فى الانتخابات و لو حتنكر و لما اسمع النتيجه حطلع اجرى و على فكره عائله عمران دى مشكله دى ممكن تحتل مصر و تحكمها هى

الشبح
10-08-2008, 06:27 PM
هههههههههههه


البنات دول فاكرين نفسهم ايه

خلاص بقى الكفار خلصم من زماااااااااااان

A@E
11-11-2008, 12:35 AM
هى الدقيقة بكام عشان ابقى عارف لو احتجتك

zoro313
11-11-2008, 12:45 AM
بس انت اتصل متخفش ببلاش
ههههههههههه

الشبح
11-11-2008, 05:35 AM
هى الدقيقة بكام عشان ابقى عارف لو احتجتك

حلوه ياض يا عمووووور

مش هتفرق يا عمر مانت فاتوره

bosy
11-11-2008, 09:12 PM
هههههههههههههههههههههههه
جاااااااامد على فكره يا زورو
بس كل ما اتصل يدينى مشغول ينفع كده يعنى
ايه يا عم الخدمه الوحشه دى

zoro313
11-11-2008, 11:55 PM
معلش اكيد الشبكه مشغوله
الطلب كتير ههههههههه