الخطوات العملية للالتحاق المساح بسوق العمل

[محمد الفرارجي]

السلام عليكم


انا اشتركت بالموضوع ده في قسم تاني وحبيت احطه هنا عشان الفايدة

1- ما دمت لسه سيادتك في الكلية وما خلصتش انتهز الفرصة وروح اتدرب بدري بدري بس الله يكرمك تدريب يعني شغل مش هجايص مش تفرح انك رايح موقع وفي الآخر تاخد شهادة
لأ
انت تروح وتتنقع في الشمس لحد ما تتعلم

2- عليك بالتوتال استيشن والميزان لأن دول اكتر اجهزة مستخدمة وخليك في التوتال الأول طبعا وما يهمكش سواء كان قديم أو جديد كله بيمشي وما تقلقش

3- فضك من الدورات اللي هتضيع وقتك بمعنى اصح لما تشتغل شوف الشغل عايز ايه والشغل نفسه هيبعتك تتدرب زي ما حصل معايا ومع غير واتعلمنا على اجهزة في دورات
وكمان اتعلمنا لغات

4- ابوس ايدك ما يغركش المنظرة اللي ممكن تخدعك في القورسات والدورات ولو لازم يبقى تاخد اللي يفيدك في شغلك فلو سيادتك جي اي اس خد البرنامج اللي هيشغلك وبس يعني مثلا
أرك ماب وخلاص أو إيرداس مثلا وصدقني سكة القورصات طويلة ولو دخلت فيها هتنسى نفسك وهتاخد مش هتتديك فمن بدايتها حدد هدفك وشوف انت عايز تتدرب في ايه وايه اللي ماشي
في السوق واتدرب له.

5- لو سعادتك مساحة ابدأ زي ما قلت لك التوتال استيشن والميزان وكفاية وما تربكش نفسك.

6- سيادتك وانت بتتدرب اوعى وحسك عينك تبين للإلي بيدربك انك أعلى منه عالعكس مش عالعكس خالص يعني ما تظهرش بمظهر البله مثلا لأ اتعلم وسيبه يعلمك
والقط كل اللي تشوفه وحاول تدونه أو لبأول عشان تاخد بالك وتحفظة لأنك مش شغال على طول فلسه المعلومة مش هتثبت في دماغك فلازم تكتبها.

7- اللي بيدربك ممكن ما يكونش مهندس او مساح دا ممكن وده انا شفته خصوصا في هيئة مساحة كفر الشيخ اللي كنا بننزل نتدرب معاهم عمال مش فنيين كمان عمال

وكنا مصاحبينهم ونجيب لهم شاي وفطار ونهزر معاهم ومفيش مشكلة بس خلي بالك الموضوع حساس لأن الفني أو العامل بيبص لك ساعتها انك تلميذ وهوه بيفهم اكتر منك سيبه مش مشكلة وما تضايقش
وخلي احساسه ماليه وكل ما تدي له الاحساس ده هتستفيد منه اكتر وصدقني والله كلمة اتقالت لي وانا باجمع بيانات للماجستير اتقال لي لازم تحسس الموظف اللي عنده البيانات انه مهم
فصدقني حسسه بأهميته طبعا من غير ما تبان انك قليل يعني كل واحد حسب شخصيته ودي ترجع لك وطبعا لو فيها حاجة على حساب الكرامة مش مشكلة التدريب في الحته دي ويبقى ربنا
مخبي لك احسن ان شاء الله.

8- انت دلوقتي اتدربت باقي بقى انك تنزل الشغل "كل ده وانت لسه في الكلية طبعا" انت طبعا تتصاحب على حد شغال ازاي دي بقت سهلة جدا والحمد لله في المنتدى هيه بس عايزة تتظبط شوية
وان شاء الله يتعمل حاجة للفايدة من الخبرة للجداد وانا كان لي موضوع بكده في المساحة الأرضية بس للأسف محدش اهتك بيه.
المهم سعادتك تخلي بالك كويس جدا ان مش كل حاجة اتعلمتها في الكلية هتلاقيها في الموقع ههههههههههههههههههههههههههههه استحالة طبعا وأول كلمة هتسمعها انسى اللي اتعلمته في الكلية واتعلم في الموقع
طبعا كلام مش كله صح لأنك لازم تدمج اللي اتعلمته مع اللي هتتعلمه وإلا هتبقى فني مظبووووووووووووووووووط؟ فتنزل الشغل يعني تتعرف على حد يكون شغال ان شاء الله حتى تمسك له البريزم
وألا حتى القامة ما تنكسفش واعتبره شغلك والشغل ما فيهوش عيب العيب انك تتكبر وخصوصا وانت لسه في البداية.

9- انت دلوقتي بقيت تقدر تنزل وتفهم الشغل فكسرت اهم حاجة وهيه الرهبة من الموقع والتعامل مع العمال والفنيين وخلافه وفهمت ادارة مواقع صحيح ما انتش مهندس بس ممكن تبقى مدير موقع وربنا يكرمك
ان شاء الله فلازم تتعلم الاحتكاك بالمواقع من وانت في الكلية عشان تتعود عالجو وما تستقلش بالنقطة دي.

10- انت دلوقتي اتخرجت يا معلم وبقيت خلاص خريج وبقيت خريج دي معناه ان المصروف ما بقاش ينفع عشان ما عادشي ليه لازمة لأن سعادتك اتخرج وألا ايييييييييييييه!!!
مانت خلاص بقيت خريج وانضميت للالي اتخرجوا بس ان شاء الله مش هتقعد لأن فعلا المساحين مطلوبين تبدأ بقى بالصلى عالنبي تشوف موضوع الجيش فرضنا انك دخلت الجيش تمووووووووووووت
بأقولها لك اهوه اعمل اللي تقدر عليه عشان تدخل سلاح المهنددسين وساعتها ان شاء الله هتقعد فترة الجيش تشتغل بتخصصك ويبقى ده غاية المنى في الفترة دي لأنك هتاخد خبرة كبيرة.

11- طيب خلصت الجيش او حتى ما دخلتش من أصله تبدأ بقى تشوف البطاقة وتغيرها ولازم تبقى مساااااااااااااااح خلاص أو اخصائي مساحة وات ايفر مش هتفرق وبعد كده الباسبور هيطلع بنفس
بيانات البطاقة وكمان الشهادة بتاعة جنابك لازم تعتمدها من الخارجيةكده سعادتك خلصت ورقك ويا سلام بقى لو تطلع رخصة خاصة تبقى ميه ميه.

12- تبدأ تعمل سي في كويس وكويس يعني من غير نخع واخد بالك ما تنساش نفسك انت خريج جديد يعني ما تتفذلكش شوف شهادتك واكتبها وشوف الدورات والتدريبات اللي خدتها واكتبها
وكمان شوف العضوية اللي عندك سواء كانت في نقابات أو هيئات لأن النقابات دي بتدي تقل ولو معنوي بس مفيد ومعناه ان الراجل ده مقبول من نقابات وكمان تكتب ان معاك باسبور ومعاك رخصة
وما تقلقش انت خريج جديد ومعروف سنة تخرجك واللي هياخدك هياخدك عشان الحتة دي بالذات.

13- عملت السي في خلاص يا برنس تبعتها بقى على كل شركة مقاولات او حتى ليها علاقة بالمقاولات ويكون ليها لينك عالنت اوعى تيأس خد وقتك وبراحتك خالص وكمان ما تنساش تبعت
السي في لمكاتب السفريات ودي كفاية تكتب جملة "لإلحاق العمالة المصرية بالخارج" ودي هتجيب لك كل الشركات اللي ليها لينك عالشبكة وساعاتها راسلهم
وما تقلقش
مفيش سي في بتترمي
انسى ولو حد قال لك غير كده يبى قلة وما تبقاش شركات محترمة صدقني انا اشتغلت فترة في الاتش آر في شركة وعارف ان مفيش شركات بترمي السي في لأنهم حاطينه لحد ما يجي دوره
بس ما تعملش زي اللي راح يشتري من السوق وراح ما لاقاش اللي عاوزه رجع وقال السوق قافل
يا حبيبي السوق عمره ما بيقفل وان شاء الله ربنا هيرزقك يعني لح في بعت السيفيهات وما تتخضش من اسماء الشركات الكبيرة اشي امريكي والماني والكلام ده صدقني
انت كحديث التخرج مطلوب
لأنه هياخد سيادتك وبعد كده هيدك مرتب هيبقى مريح بالنسبة له ودي لازم تفهمها كويس جدا.

14- الانترفيو حسك عينك تتهز او تخاف في الانتر فيو ما تيأسش وخلي بالك ما تفتكرش انك هتقبل من اول مقابلة مالآخر عشان ما تتعقدش لما تعمل ولو ميت مقابلة ومفيش نتيجة
اصبر وان شاء الله وصدقني هتيجي بس بوقتها في الانتر فيو محظور عليك التطرف يعني ما تروحشي مثلا لابس بدلة بالشئ الفلاني حاول تتبسط وما تنساش انت راجل مدني وبتاع موقع
مالآخر فحت وردم مش معنى كده تروح مبهدل لأ روح معتدل. يا ريت ممنوع الفذلة بتاتا وجاوب اللي تعرفه وبس وهوه لو عايزك مش هيدق حديث تخرج وألا غيره.
15- افترضنا انك اشتغلت في شركة على قدها اوعى تزهق وتضايق اصبر وافهم الأول طبيعة الشغل وخليك فاكر ان مفيش حد بيعيش طول عمره لابس جزمة واحده كده كده بتغير
فإنت ان شاء الله هتسيب الشركة وتروح للأحسن ان شاء الله بس هيه البداية وإوعى تكون من بتوع المنظرة اللي بينكسفوا ويقولوا احنا بناخد تلت تلاف جنيه وانا خريج جديد إوعى
مش هتنجح في حياتك خليك عادي ومش مشكلة حتى لو بدأت بخمسميت جنيه وتكمل حتى بمصروفك من والدك بس اصبر ولو قعدت حتى ست شهور هتكتبها في الس في
والمرة دي هيبقى شغل مش تددريب ودي هتفرق فصدقني تاني شركة هتبقى بضعف المرتب ان شاء الله تقريبا.

16- افترضنا انك اتخنقت من طبيعة الشغل اوعى تزعل ولا تبين ولو بينت ما تبينش على انك الفليسوف واللي الوحيد اللي بيفهم صدقني "اربط الحمار مطرح ما يقولك صاحبه" هتريح وتستريح
وساعتها هتبقى محبوب من الكل وخصوصا مدراءك بس مش على حساب كرامتك خلي بالك انت تعتبر مهندس دلوقتي وليك تعامل مع العمال لو شخصيتك اتهزت صدقني هتكره نفسك وفي نفس الوقت
ما تبقاش متكبر طبعا وما تنساش نفسك انت لسه حديث التخرج اوك؟.

17- طيب بقى يا معلم لو مكتب سفريات بعت لك؟
روح وقابل الكفيل ولو حتى مين وما تتهزش ابداً أوك؟ وعلي نفسك في المرتب يعني لو بتاخد 1000 قل له باخد 1800 مثلا وهكذا ليه؟
لأن للأسف الجماعة دول بيفاصلوا قوي فلو بدأت معاهم قليل هترجع لورا .
طيب افترضنا ان ربنا كرمك واتقبلت نصيحة سافر وصدقني مش هتندم بس قبل ما تسافر اسأل عالمكتب أو الشركة اللي انت رايحها وصحيح كل المكاتب والحمد لله اللي عالنت ما فيهاش نصب
المكتب ما دام معتمد من الوزارة وواخد موافقة استحالة ينصب و طريقة الحصول على عناوين المكاتب انا سبق وشرحتها
لو قبلت تخلي بالك الإعاشة عليه يعني السكن عليه والمواصلات وتذاكر الطيارة رايح جاي وكمان المرتب لازم ما يقلش عن 2500 ريال ده للسعودية لأن السعودية طالبة مساحين كتير
اليومين دول خصوصا لأنهم عندهم أزمة وكمان بيعملوا احلال وتجديد لشبكات الصرف في المملكة وبالتالي انت مطلوب وما تقلقش رزقك هيجي لك بس انت اسعى.

والله يا شباب كنت كاتب حاجات كتير بس للأسف راحت لما اللابتوب فصل شحن
المهم يا ريت نكمل الموضوع وكل واحد يحط اللي عنده

وربنا يوفق الجميع ان شاء الله

[الورده البيضاء]

موضوع فى غاية الاهمية مشكور جدا حضرتك يابشمهندس على مجهودك
بس حديث حضرتك كلة مع المذكر
فى بنات غلابة بيدخلو مساحة
عايزين يعرفو نظام الشغل هيبقى عامل ازاى و لا هيبقى نفس المعلومات دى للشباب والبنات؟
الف شكر عالموضوع
جزاك الله كل خير

[محمد الفرارجي]

سلام عليكن
انا باعتذر آهوه واسف يا ايمي
وعموما يا ستو انا خدي الشوية دول
اولا بدل انت ياض خليها انتي يا؟؟؟؟؟؟؟؟
وبدل ما تروح الجيش تبقى تروحي الجيش
وبدل ما بتاخد المصروف بتاخدي المصروف

وهكظا يعني

انا باهزر والله


الخلاصة يا ايمي
في المساحة ساعات بنبات في المواقع هترضي تباتي في المواقع؟
وكمان ممكن لأ دا اكيد هتبقي السيرفيور الوحيد اللي بنت
دا غير انك ممكن بقى يا جميل تاخدوا مشروع جميل في حتة متطرفة وهوه ده شغل المساحة اصلا وطبعا هتاخدوا شقة مع بعض فينفع تقيمي في وضع زي كده؟
واجيبها لك من الآخر مفيش مقاول شغل سيرفيور بنت لحد دلوقتي او بمعنى ادق ما شوفتهاش


الخطوات العملية ليكي كبنت وعشان ما تقوليش اني باحبطك لأ ليكي دور مهم احنا ما بنقدرش عليه وهوه الأعمال المكتبية
بمعنى ان سيادتك دورك كالتالي
1- وانتي في الجامعة تدعبسي على المكاتب الاستشارية في المقام الأول وكمان شركات المقاولات وتدربي عندهم
بس مش عالأجهزة وخلي باللك ما يغركيش شكلك وانتي واقفة وبتاخدي لقطات عالجهاز لأ
هتضحكي على نفسك وخلاص وما تنسيش ما شفناش سيرفيور بنت لحد النهارده عالأقل في مصر
2- ابدأي اهتمي بالأتوكاد طبعا مع باقي برامج نظم المعلومات الجغرافية
بس نصيحة من اخوكي المجرب اكبر برنامج مستخدم فيكي يا مقاولات ومش بس في مصر بل في الخارج كمان هوه الأتوكاد. فكون انك تهتمي بالأتوكاد مش معناه تجيبي الفيديو التعليمي وتخلصي خطواته وشكرا لأ
وعشان كده قلت لك على موضوع التدريب في اي مكتب استشاري او شركة مقاولات
وطبعا الاستشاري افضل عشان سيادتك بنت وهوه محتاج الرسامين اكتر من المساحين
3- تاخدي قورصات في ادارة الاعمال والسكرتارية واللغة الانجليزية
وصدقيني والله مش كل واحدة بتتخرج ممكن تشتغل في مجالها بس لما هتاخدي القورصات دي عالأقل هتبقي مميزة عن غيرك من البنات
فتخيلي لو انا عايز رسامين عندي مثلا لو انا مسئول اتش ار في شركة مقاولات وسعادتك جاية وكويسة في الاتوكاد وكويسة في الانجليزي وكويسة في ادارة المكاتب ازاي اصلا ما اخودكيش

بس فيه نصيحة مهم


اياكي والتمادي في القورصات بدون فايدة هتاخد منك مش هتديكي القورصات كفاية قوي اتوكاد وانجليش وادارة مكاتب لحد ما تخلصي

ومالآخر كده وانتي بتدوري مفيش مانع من الوسايط
هههههههههههههههههههههههههههههههههههههههههههههههههه ههههههههههههههههههه

أصلي باحب الواقع شويتين

وربنا يوفقك يا باشمهندسة

[firehawek]

طيب يا بشمهندس لو انا عايزا اسافر دولة اوروبيه اعمل ايه انا لسة فى بدايه السلم انا محتار اعمل دبلومة مساحة ولا جى اى اس وهل فى عقود لدول اوروبية ولا لا ارجود الرد

[Mohamed Hashem]

الاخ محمد الفرارجى
شكرا جدا لاهتمامك بالشباب اللى بيتلمسوا طريقهم لو ناس كتير زيك كده... يلا ما علينا
احييك على روحك وطريقتك التى غطت كل النقاط الهامة والرئيسية
اسمح لى زميلى العزيز باقتباس فكرتك وتطبيقها على المساحة البحرية ... فالامور كما تعلم بخبرتك تختلف قليلا
وفى نفس الوقت وجدت موضوع لسلاموناتو - وهو عضو عزيز اليوم - فى منتدى المساحة البحرية يسأل عن نفس الامور
فاحببت تعميم الفكرة
ولكن وجبت موافقتك اولا ؟؟؟؟؟
ولك منى وافر التقدير

[Mohamed Hashem]

طيب يا بشمهندس لو انا عايزا اسافر دولة اوروبيه اعمل ايه انا لسة فى بدايه السلم انا محتار اعمل دبلومة مساحة ولا جى اى اس وهل فى عقود لدول اوروبية ولا لا ارجود الرد


عزيزى فاير
العقود للدول الاوروبية يشترط ان حضرتك تكون مواطن من الاتحاد الاوروربى او سبق ليك العمل قبل كده هناك ومش اى دول مثلا ايطاليا مش متشدده زى انجلترا وطبعا لازم تشوف وكيل لحضرتك يجيب لك شغل فى دولة اجنبية وساعتها حتلاقى شرطه الاول الخبرة والشهادات وسابقة الاعمال
الموضوع مختلف تماما عن عقود الدول الخليجية
وبالتوفيق

[الورده البيضاء]

الف شكر لحضرتك يابشمهندس محمد عالمعلومات المفيدة
وانا لسة سنة اولى وربنا يسمع منك على لقب بشمهندسة ياااااااااااااااااارب
وانشاء الله انا هابتدى كورسات انجليش من الصيف بعد الامتحانات وهادخل الدورة التدريبية اللى عاملاها الرابطة
وواسطتنا ربنا بقى هو اكبر من الكل ههههههههههههههههه
والله الموفق
وربنا يجازى حضرتك خير يارب
والف شكر لحضرتك يابشمهندس هاشم على افادة اخونا فاير

[محمد الفرارجي]

سلام عليكم تاني
اخي ام ام هشام ما تستأذنش في الفايدة العامة ابدا وربنا يعلم وانا في بداية الطريق كنت عايز اللي يوجهني وطبعا كان عندنا اماني كتير وطموحات معظم اللي جرينا وراه منه ضيع علينا حاجات كتير وربنا يبارك لك على ردك على فاير وبصراحة موضوع الدول الأوربية كبير قوي
يعني احنا لسه بنقول هنتدرب واحنا في الكلية وبعدين نشوف شغل معقول بس مش نشطح قوي كده

نصيحة من أخ أكبر وعادها لي استاذي الجليل الدكتور محمود عاشور لما كنت بادرس الدبلومة في عين شمس وشاف ان احلامي كتير ومشتتاني

قال لي ركز في حاجة واحدة وقال لي انه لو كان ركز في حاجة واحده يمكن كان بقى افضل من كده وده طبعا من تواضع العالم وربنا يبارك له يا رب

المهم أخي فاير ارجوك بلاش أحلام أحلامك كلها هتتحطم على صخرة الواقع وأرجوك ركز زي ما قلت لك في حاجة واحدة يا مساحة يا جي آي اس
زمايلي بتوع دبلومة نظم المعلومات في عين شمس ما شاء الله مرتباتهم دلوقتي كويسة جدا بس خلوا بالكوا مجال نظم المعلومات الجغرافية بصفة اساسية في القاهرة

أوك يعني هتتخصص فيه عليك وعلى آداب عين شمس هناك دبلومة محترمة جداااااااااااااااااااااااااااااا
وعلى فكرة بيشفلوا بعض هناك

يعني انت اصلا هتلاقي ناس شغالة اوريدي في الجي اي اس وهتلاقيهم زمايلك كان معانا عميد مهندس سابق في الجيش ومعانا طلبة دكتوراة وماجستير ومعانا موظفين عاديين ورسامين وخلافه

والشركات دي دايما بتطلب

وما تقلقش عارفه انك لسه مبنتدئ يعني معاك الأساسيات وبس وهمه هيعلموك طبعا المقابل المادي بيبقى قليل

اوك


وبأكرر للأخ ام ام هاشم براحتك ويا ريت يتعمم عشان الفايدة تعم

[ميرا مار]

باشكرك يا محمد على التوجيهات دى

يارب اكبر قدر من الناس تستفيد بها

وجزاك الله خيرا جزيلا

[محمد الفرارجي]

ربنا يخليكي يا ميرامار


انا والله نفسي في اكتر من كده

ليه ما يبقاش فيه قسم للتوجيه والتوظيف يكون حد مسئول عنه
وياخد عليه أجر


مش فاهم فكرة زي دي غايبة ليه؟
مع ان الموضوع من وجهة نظري هيبقى القسم ده عبارة عن وسيط
وممكن يكون مصدر دخل كويس جداا للرابطة\


الرابطة اكيد عارفة معظم الشركات اللي تقدر توظف التخصصات بتاعتها

طب ليه ما يبقاش فيه لينك بينهم وبين الراغبين في العمل

وكمان الرابطة تاخد نسبة من المرتب لمدة معيينة مثلا بس مش على طول

يعني تبقى سبب في التشغيل وتاخد نسبة
وبكده هتخدم الشركة والراغب في الوظيفة
لأنها هتحط الرجل المناسب في المكان المناسب ان شاء الله عشان سمعتها
لأن الوسايط لو دخلت يبقى شكرا ومع السلام

وكمان كان لي اقتراح تاني
بس بصراحة مش بالاقي مردود على الاقتراحات خالص لا من الاعضاء سوى القلة او حتى المشرفين عشان كده باكبر دماغي وخلاص

الاقتراح ده كان بخصوص
تبادل المشاريع يعني كل واحد نفذ او ساهم في تنفيذ مشروع يكتب الخطوات ومش شرط تفاصيل بس صدقوني الخبرة في الشغل وطرق الحل العملي في الموقع بتبقى غير الدراسة

فاللي هيقول ليعلى الأخطاء والمتاعب اللي مرت بيه اكيد مش هقع فيها

نفسي
نفسي
نفسي
نبدأ من حيث انتهى الآخرون
ويا رب افيد حد


وشكرا يا ميرا عالرمرور

[ميرا مار]

:):o:o


باشكرك جدا يا محمد

اما بخصوص الاقتراحين ..هما الحقيقة بناءين جدا

وان شاء الله يلقوا اعجاب لدى ادارة الرابطة..

بس ارجوك اى اقتراح اتمنى تقوله وتقترحه فى اى مكان

لان الغاية هى الارتقاء فى مجالنا..والكل يعمل على هذا

وربنا يجازيك كل خير

[Soma]

جزاك الله كل خير
جميل جدا انك تحس بغيرك وتحاول تساعده بكل الطرق
ربناك يكرمك ويقدرك على تنفيذ افكارك الروعه دى

[Marwa Mahmoud]

جزاك الله كل خير على الموضوع

وبشكرك على المجهود الجميل دة

[محمد الفرارجي]

شكرا شكرا شكرا

وبأوعد كل لكل مواطف الرابطة شاليه في الساحل الشمالي

وفيلا في الرحاب

وحصة من الطريق الصحراوي



انتوا اللي ربنا يخليكوا عالتشجيع الجميل

بس باعيد طلبي تاني يا ريت المشاركة ما تبقاش سلبية
جميل طبعا اننا نحمس ونشجع كاتب الموضوع


الأجمل اننا نشارك وندعم الموضوع بأفكار

وعلى فكرة اعتقد ان ده جزء من دور المنتدى

المنتدى سينسور بيحس بنبض الشباب اللي زيكوا

اللي طالب واللي متخرج

لازم نشارك عشان المشروع يكمل


بس المشاركة ان شاء الله تكون بناءة


وربنا يبارك فيكو

[مصطفي القاضي]

موضوعك اكتر من رائع يا بشمهندس محمد
ومستنين من حضرتك الكثير ودائما الي التقدم والرقي بنا وبمجتمعنا
جزاك الله خيرا

[محمد الفرارجي]

يا درش ربنا يخليك
انا اقل من كده

ربنا يخليك

وهمتك معانا وهمة كل الناس المحترمة اللي زيك


وربنا يبارك لك على الرد

[مصطفي القاضي]

يا درش ربنا يخليك
انا اقل من كده

ربنا يخليك

وهمتك معانا وهمة كل الناس المحترمة اللي زيك


وربنا يبارك لك على الرد


ربنا يخليك يا بشمهندس محمد علي ردك الجميل دة
وربنا يقدرنا كلنا ونكون اد المسئولية واننا نتقدم بالرابطة
جزاك الله خيرا

[ALEXBOY88]

يااستاذ محمد مشاركاتك وضحت لنا نقط كتتتتتتتيرة نررجو الافادة دائما وان تكون عونا لنا علي طريق التفوق والتميز

[Voodoo Doll]

السلام عليكم ورحمة الله وبركاته
بجد جزاك الله كل خير وشكرا جدا لحضرتك يا بشمهندس على الموضوع دا
بصراحة فادني كتير من الاول وانا لسه فسنة أولى
أنا باذن الله الصيف دا هبدأ الكورسات والتدريب في الرابطة على الميزان
بس بالنسبة للتدريب في المكاتب والشركات هما بيدربوا سنة تالتة ورابعة بس؟
وحتى بالنسبة للتدريب بيبقى على اي اساس؟
انا بالنسبة لاني سنة أولى مش عارفة حتى لو ينفع ليا تدريب ولا لأ وهتدرب على ايه لاننا نعتبر اخدنا اساسيات بسيطة
و مثلا هروح للمكتب او الشركة واقولهم انا عايزة اتدرب كده وخلاص؟
أنا سألت والدي قالي ان الشركة عندهم بتحتاج جواب من الكلية بيفيد ان اللي هيتدرب دا في الكلية والقسم دا فعلا
ولازم تكون بشكل رسمي
يعني ياريت لو حضرتك تفهمني الموضوع بالنسبة للتدريب لو مش هتقل عليك

[MOHAMAD ELSAADANY]

الله ينور يا استاذ محمد
بجد ربنا يكرمك ويزيدك
بصراحة انت كده عملت اللى عليك وزياده
مستحيل كان حد هيقدر يوضح الامور بالصوره الجميلة دى
يا ريت متنسنيش انا خلاص هتخرج كمان اسبوع
ههههههههههههه
ماشى؟
وخصوصا اننا بلديات
حبيبى ولله

[Youssef Mostafa]

يابشمهندس انت كلمة بشمهندس دى قليلة عليك والله

انت استاااذ ورئيس قسم

استفدت كتييييييييييييييييييييييييييييييييييير

وحاسس انها حاجات حتفيدنى اوى ان شاء الله

[محمد الفرارجي]

ربنا يبارك في كل اللي علق
والله طموحي في فايدتكوا أكبر من الكلام ده بكتير قوي

بس بجد اللي شايف في نفسه الدعاء المستجاب يدعي لي عشان أقدر أوصل لصيغة علمية وعملية وتكون مرضية لادارة الرابطة عشان مشروع توظيف الخريجين يتم ان شاء الله.

والله نفسي الموضوع يتم على خير ان شاء الله

ونفسي كل واحد يتخرج يشتغل وما يعانيش
عالأقل يلاقي حد يوجهه للطريق
شكرا جدا لأليكس بوي على المجاملة دي
وشكرا اخويا مصطفى القاضي
وبلدياتي حبيب قلبي محمد السعدني
وروح قلبي فاكهة المنتدى كله اخويا الصغير اللي صحيح ما شوفتوش بس دخل قلبي بسرعة

بجد والله أخجلتم تواضعنا

وادعوا لنا يا رب نكمل مشروع التوظيف

[MOHAMAD ELSAADANY]

ربنا يكرمك
والله انت متعرفش انا حبيتك اد ايه وده من غير ما اشوفك
بس ان شاء الله ربنا يجمعنا عن قريب
ومتقلقش انشاء الله الموضوع هيتم
وزى مقلتلك لو احتجت اى حاجه هنكون معاك
محنا فضينا بقى
ههههههههه

[محمد الفرارجي]

ما تقلقش يا حماده ان شاء الله مع بعض
بس نحاول نبدأ وأعتقد إن شاء الله ممكن نعمل حاجة

يا رب وفقنا من قلبي والله

وربنا اللي يعلم انا بأعمل كده ليه

[Voodoo Doll]

يا بشمهندس محمد حضرتك تجاهلتني تماما
لا لا لا كده مش ينفع انا هعمل وقفة احتجاجية
ولا أقول لحضرتك انا هناديك بصوت عالي ممكن تكون مش سمعتني
ياااااااا بشمهنددددددددددس


ههههههههههههههههههههههههههههههههه





بس بجد لو حاضرتك مش عايز تجاوب على سؤالي خلاص مش مشكلة ولا يهمك
انا عارفة ان حضرتك مشغول جدا خصوصا في مشروع الخريجيين ربنا يوفقك

[محمد الفرارجي]

حبيب قلبي فودو انا والله العظيم غلطان والله فعلا
آآآآآآآآآآآآآآآآآآآآسف والله جدا

وعموما انا كنت رادد على ايمي قبل كده وادي يا روح قلبي انا الرد تاني
بس خلي بالك شغل الموقع مش مناسب للبنات وخدي الكام سبب دول.

في المساحة ساعات بنبات في المواقع هترضي تباتي في المواقع؟
وكمان ممكن لأ دا اكيد هتبقي السيرفيور الوحيد اللي بنت
دا غير انك ممكن بقى يا جميل تاخدوا مشروع غبي في حتة متطرفة وهوه ده شغل المساحة اصلا وطبعا هتاخدوا شقة مع بعض فينفع تقيمي في وضع زي كده؟
واجيبها لك من الآخر مفيش مقاول شغل سيرفيور بنت لحد دلوقتي او بمعنى ادق ما شوفتهاش


الخطوات العملية ليكي كبنت وعشان ما تقوليش اني باحبطك لأ ليكي دور مهم احنا ما بنقدرش عليه وهوه الأعمال المكتبية
بمعنى ان سيادتك دورك كالتالي:-

1- وانتي في الجامعة تدعبسي على المكاتب الاستشارية في المقام الأول وكمان شركات المقاولات وتدربي عندهم
بس مش عالأجهزة وخلي باللك ما يغركيش شكلك وانتي واقفة وبتاخدي لقطات عالجهاز لأ
هتضحكي على نفسك وخلاص وما تنسيش ما شفناش سيرفيور بنت لحد النهارده عالأقل في مصر.

2- ابدأي اهتمي بالأتوكاد طبعا مع باقي برامج نظم المعلومات الجغرافية
بس نصيحة من اخوكي المجرب اكبر برنامج مستخدم فيكي يا مقاولات ومش بس في مصر بل في الخارج كمان هوه الأتوكاد. فكون انك تهتمي بالأتوكاد مش معناه تجيبي الفيديو التعليمي وتخلصي خطواته وشكرا لأ
وعشان كده قلت لك على موضوع التدريب في اي مكتب استشاري او شركة مقاولات
وطبعا الاستشاري افضل عشان سيادتك بنت وهوه محتاج الرسامين اكتر من المساحين.

3- تاخدي قورصات في ادارة الاعمال والسكرتارية واللغة الانجليزية
وصدقيني والله مش كل واحدة بتتخرج ممكن تشتغل في مجالها بس لما هتاخدي القورصات دي عالأقل هتبقي مميزة عن غيرك من البنات
فتخيلي لو انا عايز رسامين عندي مثلا لو انا مسئول اتش ار في شركة مقاولات وسعادتك جاية وكويسة في الاتوكاد وكويسة في الانجليزي وكويسة في ادارة المكاتب ازاي اصلا ما اخودكيش

بس فيه نصيحة مهم


اياكي والتمادي في القورصات بدون فايدة هتاخد منك مش هتديكي القورصات كفاية قوي اتوكاد وانجليش وادارة مكاتب لحد ما تخلصي

ومالآخر كده وانتي بتدوري مفيش مانع من الوسايط
هههههههههههههههههههههههههههههههههههههههههههههههههه ههههههههههههههههههه

أصلي باحب الواقع شويتين

وربنا يوفقك يا باشمهندسة


ده كان رد لي على ايمي لما سألتني نفس سؤال تقريبا.

يا رب تكوني استفادتي

وآسف جدا لعدم الرد بسرعة

وارجو تقبل الأسف

سلام عليكم

[Voodoo Doll]

ولا يهم حضرتك يا بشمهندس
ومليووووووووووووون شكر على ردك بجد فادني
وابقى عاملة حسابي من سنة أولى كده
بجد ربنا يوفقك ويساعدك ويجعل كل اللي بتعمله في ميزان حسناتك
ولو فيه أي حاجة ممكن اساعد بيها انا في الخدمة

[m_ahmed0]

سلام الله عليكم جميعا و رحمته و بركاته
انا محمد مهران من مصر
خريج معهد المساحه دفعت هذا العام
و بالصدفه عرفت عن الموقع و الرابطه
و ارجو من الله ان يتم قبولى كعضو فعال و نشط فى هذه الرابطه
و عندى ليكم الف مليون سؤال و استفسار محتاج اى حد يرد عليا فيه و على فكره الموضوع ده تستاهل عليه شهاده الدوله التقديريه و الف جائزه نوبل
و لكم منى كل الحب والتقدير
محمد مهران

[alkhazmari]

انا ابحث عن مساحين بحريين مؤهلين


انا متواجد في مصر اليومين دي لاعمل تعاقدات للحكومه ياريت من يرى في نفسه الكفاءه يتواصل معي على
د. احمد الزهراني

[ALY ELSAYED]

الله ينور يا بشمهندس محمد

والله الواحد مش عارف يشكؤك ازاي

وكل يوم بتعلم منك حاجات كتير

ودي نصايح غاليه وكبيره ميقلهاش فعلا غير واحد

خايف علي مصلحه اخواته واولاد بلده

ربنا يقدرك علي فعل الخير دايما

وربنا يجزيك كل خير ويجعله في ميزان حسناتك

[محمد الفرارجي]

الله ينور يا بشمهندس محمد

والله الواحد مش عارف يشكؤك ازاي

وكل يوم بتعلم منك حاجات كتير

ودي نصايح غاليه وكبيره ميقلهاش فعلا غير واحد

خايف علي مصلحه اخواته واولاد بلده

ربنا يقدرك علي فعل الخير دايما

وربنا يجزيك كل خير ويجعله في ميزان حسناتك



ربنا يخليك يا علوه عالمجاملة الجميلة دي

شكرايا علي

[خالد أبوسعده]

السلام عليكم و رحمه الله و بركاته

انا مش عارف ابدا منين بس هو ممكن اكون انا فهمتك غلط فى الاول

و انا بعتذرلك عن دا و اسف جدا على كلامى الى كنت قولته قبل كدا

بجد الموضوع دا انا شخصيا استفدت منه جدااااااااااااا

الله يباركلك و جزاك الله كل خير

و اتمنى انك متكونش زعلان منى

[محمد الفرارجي]

السلام عليكم و رحمه الله و بركاته

انا مش عارف ابدا منين بس هو ممكن اكون انا فهمتك غلط فى الاول

و انا بعتذرلك عن دا و اسف جدا على كلامى الى كنت قولته قبل كدا

بجد الموضوع دا انا شخصيا استفدت منه جدااااااااااااا

الله يباركلك و جزاك الله كل خير

و اتمنى انك متكونش زعلان منى


عيب يا خالد
ما ينفعش الكلام ده

اعتذار ايه بس وكلام من ده

انت أخويا وحبيبي كمان
مش بس خالد أبو سعده لوحده

كل اللي في المنتدى من أكبرهم لأصغرهم ولازم أكبر لهم وأحبهم فوق الوصف

وربنا يديم الحب والاحترام يا خالد

ربنا يبارك فيك حبيبي

[sofy]

انا اداب دمنهور فرع اسكندريه
جغرافيا شعبه عامه
اخدت دورة التوتل استيشن فى هيئه المساحه وعرفت طبعا بعد مااخدتها
انها مش مفيده ليا والمفروض انى اوجه اتجاهاتى للشغل المكتبى
ونويت اخد الاتوكاد بس لما اخده اتخصص فى الشغل بتاع المساحه بس ولا الموضوع بشكل عام يعنى كل تخصصات الاتوكاد من تصميم وغيره
وكمان حضرتك قلت يا بشمهندس فرارجى انى احنا كبنات ناخد الاتوكاد والادارة والانجليش
طب بالنسبه لبرنامج السيرفى بتاع الحفر والردم مهم وكمان لو خدت المستوى الاول فى الجى ااى اس حيفدنى ولا حبقى خدته على الفاضى



ارجو الرد

[محمد الفرارجي]

انا اداب دمنهور فرع اسكندريه
جغرافيا شعبه عامه
اخدت دورة التوتل استيشن فى هيئه المساحه وعرفت طبعا بعد مااخدتها
انها مش مفيده ليا والمفروض انى اوجه اتجاهاتى للشغل المكتبى
ونويت اخد الاتوكاد بس لما اخده اتخصص فى الشغل بتاع المساحه بس ولا الموضوع بشكل عام يعنى كل تخصصات الاتوكاد من تصميم وغيره
وكمان حضرتك قلت يا بشمهندس فرارجى انى احنا كبنات ناخد الاتوكاد والادارة والانجليش
طب بالنسبه لبرنامج السيرفى بتاع الحفر والردم مهم وكمان لو خدت المستوى الاول فى الجى ااى اس حيفدنى ولا حبقى خدته على الفاضى



ارجو الرد



أهلا بيكي في وسطنا وفي أي وقت وتحت أمرك دايما
بصي حضرتك:

- أول مبدأ تهتمي بيه لما تيجي تبدأي حياتك العملية هوه (الواقعية) يعني تعرفي قدراتك ايه وبناءا عليه تحددي انتي هتشتغلي في ايه. لأن أحيانا بعض الناس بيفتكر انع عشان خريج خرايط يبقى هيشل ويتخطف في السوق هيبدا بـ3000جنيه. عشان كده نصيحتي ليكي.

أولاً: ركزي في العمل المكتبي زي ما تفضلتي وقلتي قبل كده .
ثانيا: موضوع البرامج مفتوح وأنا لما قلت لبعض زميلاتنا على الأتوكاد دا مش معناه إنه الأتوكاد لوحده مادام فيه امكايات لكده.
ثالثا: موضوع الجي آي إس موضوع جبار وكبير جدا ويا ريت تشتغلي فيه . بس.. المشكلة مكان الشغل فين؟
إللي أقدر أجزم بيه إن أكتر من 95% من شغل الجي آي إس في مصر موجود في القاهرة فلو إنتي قاهرية يبقى تبدأي تتعلمي الجي آي إس فورا لأنه أفضل في شغله كناحية علمية وتفكيريه خصوصا منظوة جمع الخريطة بالسوفتوير وبالداتابيز وهي في حد ذاتها عبقرية طبعا.

كن الكلام العملي إلي أنصح بيه.

ركزي عالأتوكاد لأنه من أسع البامج استخداما في كل مجالات الرسم والتصميم والتنفيذ أيضا تقريبا ي كل المجالات محل شغل المساحة طبعا أنا بأتلكم عن الشائع والمعمول بيه في السوق المصري .

عني خدي أتوكاد واحترفيه كويس جدا ولما تخلصي الأتوكاد دوري على شغل بالأتوكاد بس ما تربكيش نفسك وتشتتي انتباهك.

أرجوكي ركزي في اجة واحده بس تميزك فيها ده يعني نك هتشتغلي بسرعه ودي بداية الطريق
وإن شاء الله لما تبدأي الشغل نظرتك هتختلف مش بس للرامج والدورات لأ. دا كمان هتختلف لطبيعة اشغل نفسه.

فيا ريت حضرتك تركزي عالأتوكاد ولما تخلصيه وتشتغلي بيه إن شاء الله طبيعة شلك هتفرض عليكي حاجات تانية ممكن ما تبقاش في حساباتك

شكرا جدا ليكي

[sofy]

مرسى جدا للرد واهتمامك
طيب انا لسه بدرس اخده دلوقتى ولا استنى لما اخلص
سوال تانى انا رحت لمتب تصميم والمهندسه الى هناك قالتى انها بتدى تدريب بس فى الاتوكاد وكمان الفوتوشوب وكمان برنامجين بس مش فاكره الاسامى متهيقلى انهم بتوع التصميم الهندسى بس مش عارفه ده حيفيدنى لا حبقى رحت مكان غلط وقالت ان التدريب بياخد 6 شهور
فانا انشاء الله كنت ناويه اخد الاتوكاد واروحلها بس هى مهندسه مدنى وبتاعت تصميموالى بتدربهم مهندسين تقريبا

[محمد الفرارجي]

مرسى جدا للرد واهتمامك
طيب انا لسه بدرس اخده دلوقتى ولا استنى لما اخلص
سوال تانى انا رحت لمتب تصميم والمهندسه الى هناك قالتى انها بتدى تدريب بس فى الاتوكاد وكمان الفوتوشوب وكمان برنامجين بس مش فاكره الاسامى متهيقلى انهم بتوع التصميم الهندسى بس مش عارفه ده حيفيدنى لا حبقى رحت مكان غلط وقالت ان التدريب بياخد 6 شهور
فانا انشاء الله كنت ناويه اخد الاتوكاد واروحلها بس هى مهندسه مدنى وبتاعت تصميموالى بتدربهم مهندسين تقريبا

تحت أمرك وفي أي وقت.

بصي حضرتك كون انك تاخدي دورات في الدراسة وكونك بنت مهم طبعا بس الأهم إنتي في سنة كام؟

فالأفضل تاخدي الدورات في آر سنة عشان المعلومة تكون لسه حاضره في ذهنك.

وبالنسبة لموضوع البرامج يا ريت تركزي على الأتوكاد في الفترة الحالية والاتوكاد برنامج ضخم جدا وآخره بعيد على المبتدئين يعني ما تفتكريش إنك هتقدري تخلصيه في سنة مثلا


فحضرتك ركزي عالأتوكاد ويكون في السنة النهائية ليكي في الدراسة إن شاء الله ده من ناحية من ناحية تانية.
موضوع إللي بيحضروا مهندسين دي مش مشكلة أصلا ن إللي هيجمعكوا في التدريب هوه إللي هيجمعكا في الشغل وهوه التخصص محل الدراسة وهوه الأتوكاد.

بالنسبة للفوتو شوب استخدامه بيكون معماري أكتر منه مدني عشان كده ركزي عالأتوكاد.

كمان كونك آداب ومعاكي هندسة ده ما يقللش من قدرك بالعكس أنا أفتكر كان معاا ناس مهندسين كتير في دبلومة عين شمس وإللي طلعوا الأوائل الناس بتوع آداب يعني إنتي واجتهادك واستيعابك للأمور

شكرا جد وتحت أمرك ف أي وقت

[دفع الله حمدان هجو]

الاخ محمد
باراك الله فيك
ومواضيعك كلها جميلة ومفيد
كنت اتمني ان اضيف بعض الملاحظات المهمة والمفيدة للموضوع
لكن .............
هذا الايام لدي مشكلة في جهاز الحاسوب والنت لكن اعدك بان تكون لي مداخله في الايام

الموضوع يستحق التقيم والتثبت
تقبل تحياتي

[محمد الفرارجي]

الاخ محمد
باراك الله فيك
ومواضيعك كلها جميلة ومفيد
كنت اتمني ان اضيف بعض الملاحظات المهمة والمفيدة للموضوع
لكن .............
هذا الايام لدي مشكلة في جهاز الحاسوب والنت لكن اعدك بان تكون لي مداخله في الايام

الموضوع يستحق التقيم والتثبت
تقبل تحياتي

يا هندسة هوه انت محتاج استئذان؟

دوس واعمل اللي عايزه ولو تلاحظ حضرتك إني قلت في نهاية الموضوع إنه مفتوح للكل وإللي عايز يضيف يتفضل طبعا
فتخيل بقى لما يبقى حضرتك

وربنا يقويك علانت والكمبيوتر ويهديهم لك إن شاء الله

[zoro313]

السلام عليكم يا بشمهندس
الموضوع جميل ومفيد جدا بجد جزاك الله خيرا
انا كان ليه شويه اسأله كدا وارجو الرد
انا دلوقتى رايح رابعة مساحة اتدربت فى شكرة المقاولين العرب فى الصيف وان شاء الله نازل تدريب برضو فى شركة طلعت مصطفى كمان يومين
وشغال فى دورة اتوكاد دلوقتى وقربت اخلصها
حضرتك شايف ايه كمان ممكن اخده علشان يفدنى حتى فى السى فى بتاعى؟
وهل احنا لازم بعد التخرج ندرب تانى فى شركات ولا كفايه اننا اتدربنا ومعانا شهدات واحنا فى سنة تالته ؟
معلش سؤال مادى كده ههههه هو ايه متوسط المرتبات فى اول الشغل اصل احنا بنسمع ان المرتبات كبيره وبنسمع انهى برضو صغيرة اوى ؟
وهل اللغة مفيده هنا فى مصر علشان انا اللى بسأله بيقولى لو هتسافر مفيده بس انا مش هينفع اسافر فهى حاجه اساسية يعنى فى مصر ولا ايه؟

ارجو الرد وشكرا لحضرتك على الموضوع الجميل والمفيد دا

[محمد الفرارجي]

السلام عليكم يا بشمهندس
الموضوع جميل ومفيد جدا بجد جزاك الله خيرا
انا كان ليه شويه اسأله كدا وارجو الرد
انا دلوقتى رايح رابعة مساحة اتدربت فى شكرة المقاولين العرب فى الصيف وان شاء الله نازل تدريب برضو فى شركة طلعت مصطفى كمان يومين
وشغال فى دورة اتوكاد دلوقتى وقربت اخلصها
حضرتك شايف ايه كمان ممكن اخده علشان يفدنى حتى فى السى فى بتاعى؟
وهل احنا لازم بعد التخرج ندرب تانى فى شركات ولا كفايه اننا اتدربنا ومعانا شهدات واحنا فى سنة تالته ؟
معلش سؤال مادى كده ههههه هو ايه متوسط المرتبات فى اول الشغل اصل احنا بنسمع ان المرتبات كبيره وبنسمع انهى برضو صغيرة اوى ؟
وهل اللغة مفيده هنا فى مصر علشان انا اللى بسأله بيقولى لو هتسافر مفيده بس انا مش هينفع اسافر فهى حاجه اساسية يعنى فى مصر ولا ايه؟

ارجو الرد وشكرا لحضرتك على الموضوع الجميل والمفيد دا


أولا: ألف مبروك عالنجاح وإن شاء الله يبقى الليسانس السنة الجاية.

ثانيا: موضوع التدريب لازم يبقى له نهاية يعني (بدأت وانت رايح سنة رابعة يبقى آخرك في التدريب سنة رابعة إن شاء الله وإلا هتقضي الوقت كله تدرب).
موقعك وانت بتتدرب موقع الخالي من المسئولية في الشغل لأنك يدوب بتروح متشيك عالآخر وتقف في الموقع تاخد إللي تقدر عليه لكن لو لا قدر الله حصل مشكلة أو عطله أو... أو.... كل ده إنت ما لكش دعوة بيه. عشان كده لما تستلم الشغل ان شاء الله هيبقى نظرتك للأمور غير لما كنت بتتدرب فيا ريت النظرة دي تدأ بدري.


ثانيا : موضوع البرامج الهندسية.

الاتوكاد من أهم البرامج في الرسم والتصميم والتنفيذ كمان, س لو تقدر مع الأتوكاد (ما دمت خلصته) يبقى مفيش مانع من برنامج تاني زي السيرفر وبالتالي يبقى معاك 2 برنامج بالاضافة إلى كونك في الأساس مساح.

ثالثا: موضوع المرتبات.
بص محدش بيبدأ كبير أبدا , عشان كده ومالآخر لو جالك شغل بعد التخرج ولو بـ500 جنيه اقبله عشان تقدر تدخل في سوق العمل عالأقل وبالتالي تلاقي نفسك السنة إللي بعدها وصل مرتبك لمرحلة أكبر بكتير من الـ500 جنيه دا لو أصلا انت استمريت في نفس الشغل.

رابعا: متوسط المرتبات.

هوه متفاوت . فمثلا حديث التخرج بيب مرتبه من 500 جنيه لحد ما يوصل لـ700 جنيه ده لو شركة محترمة أو داخل شغله بواسطة كبيرة ومظبطاه في شغله.
أما لو بدأ حديث التخرج في السعودية فبرضه متفاوت (فبيبدأ من 1800 ريال ويوصل لـ200 ريال) وبأركز ن ده حديث التخرج.

المرتبات ما بتعلاش غير بعد خمس سنين خبره يعني لو واحد اتخرج فمش هيقعد في شركة اتعين فيها لمدة الخمس سنين مثلا وده لو حصل يبقى أكيد المرتب هيزيد ويتضاعف.

يعني ممكن المرتب يوصل بعد حوالي 8 سنين تخرج إلى حوالي ثماني أضعاف يعني لو بدأت بـ500 دلوقتي بعد كده ممكن يوصل لـ4000 وخمس آلاف عشان موقعك بيبقى أكبر ومسئولياتك أكتر وخبراتك أكتر.

خامسا: موضوع اللغة.

السؤال ده من المعلوم بالضرورة في أي شغل مساحة أو غيره. مالآخر لو تقدر تتعلم لغة قل ما تتخرج يبقى أفضل عشان ده أفضل وقت للقرصات لأنك مش وراك مسئولية وبالتالي ركز على الدورات المفيده وانت قلت قربت تخلص الأتوكاد ونصحتك بالسيرفر بعد ما تخلص وطبعا اللغة إوعى تفرط فيها ما تضمنش ظروفك .

دا غير إنها هيه إللي هتعليك إن شاء الله في شغلك بجانك خبراتك طبعا.

شكرا ليك عالسؤال وتحت أمرك في أي وق ويا رب أكون قدرت أفيدك

[eslam mamdouh]

موضوع فى غايه الجمال والموضوعيه يا بشمهندس

لكن افضل ما فيه هو اسلوب حضرتك البسيط المميز واجابات حضرتك على كل الاسئله والاستفسارات جعل الله ذلك كله فى ميزان حسناتك وزادك الله من فضله

[محمد الفرارجي]

هههههههههههههههههههه

يا اسلام تعرف اني بأتحرج منك جدا

يمكن لأسلوبك وذوقك في الرد دايما دا غير إني أصلا والله بأستفيد منك جدا
فمش عارف مين إللي يشكر التاني

[Mohamed Hashem]

هههههههههههههههههههه

يا اسلام تعرف اني بأتحرج منك جدا

يمكن لأسلوبك وذوقك في الرد دايما دا غير إني أصلا والله بأستفيد منك جدا
فمش عارف مين إللي يشكر التاني



منور يا ستار
كلامك زين

[محمد الفرارجي]

ههههههههههههههههههههههههههههههههههههههههه

وكمان محمر لي كلامك؟

واحشني جدا

وشكرا انت ليك على مشاركتك يا كبير

[zoro313]

الف شكر يا بشمهندس وجزاك الله خيرا

[ابورفعت]

تسلم ياهندسه على النصايح
يابخت الشباب اللى قراها وهما لسه فى الدراسه
تعرف لو الموضوع ده كنت قريته من خمس سنين كده كان نفعنى كتير
بس الحمد لله الخبره فى الدنيا والسفر بيعلم افضل
انا لما اتخرجت اخدت دورة فى توتال ستيشن سوكيا سيت 3
واخدت دورة اوتوكاد
واشتغلت فى مصر بعديها سنه كده نسيت طبعا اللى اتعلمته
بعديها سافرت قطر فى شركة مقاولات محترمه ... ههههههههه .... مشاريعها فى مجال شبكات الصرف الصحى والطرق والابراج الاداريه ( بضحك لانهم بيطحنوننا فى الشغل ومش بناخد حقنا كامل)
لكن اتخصصت هنا فى مجال شبكات الصرف الصحى والانشاءات لان شغل الطرق هنا هلاك هلاك بمعنى الكلمه خاصه فى الصيف
بالنسبه للتوتال الشغل هنا كله على النيكون والايكا والتبكون بس التبكون مش كتير ...
بس اللى نفعنى هو شغل الاوتوكاد خاصه فى الجزء الخاص بالمساحه

تسلم ياباشا على الموضوع الجميل

[محمد الفرارجي]

تسلم ياهندسه على النصايح
يابخت الشباب اللى قراها وهما لسه فى الدراسه
تعرف لو الموضوع ده كنت قريته من خمس سنين كده كان نفعنى كتير
بس الحمد لله الخبره فى الدنيا والسفر بيعلم افضل
انا لما اتخرجت اخدت دورة فى توتال ستيشن سوكيا سيت 3
واخدت دورة اوتوكاد
واشتغلت فى مصر بعديها سنه كده نسيت طبعا اللى اتعلمته
بعديها سافرت قطر فى شركة مقاولات محترمه ... ههههههههه .... مشاريعها فى مجال شبكات الصرف الصحى والطرق والابراج الاداريه ( بضحك لانهم بيطحنوننا فى الشغل ومش بناخد حقنا كامل)
لكن اتخصصت هنا فى مجال شبكات الصرف الصحى والانشاءات لان شغل الطرق هنا هلاك هلاك بمعنى الكلمه خاصه فى الصيف
بالنسبه للتوتال الشغل هنا كله على النيكون والايكا والتبكون بس التبكون مش كتير ...
بس اللى نفعنى هو شغل الاوتوكاد خاصه فى الجزء الخاص بالمساحه

تسلم ياباشا على الموضوع الجميل

يا حبيب قلبي انت إللي ألف شكر عالمجاملة الجميلة منك.

بصراحة شكلي هرزل عليك قريب عشان للأسف المنتدى ما فيهش مواضيع عن الصرف فسعادتك شيل بقى
ههههههههههههههههههههههههه
خواتك إللي ما عندهمشي خبرتك يا باشمهندس

شكرا جدا عالمشاركة
يا ريت تساعد ا

[ابورفعت]

كلنا هنا لمساعده بعض
ربما اجد عندك ما افتقده من معلومات
وربما تجد انت ايضا عندى ما تفتقده من معلومات
رزالتك ياباشا هتكون سكر مكرر
ههههههههههههه

[Zooma]

بشكرك كتير بشمهندس محمد
ع النصائح الجميله دى بس ف سؤال
دلوقتى لو انا رايح رابعه شعبه gis ان شاء الله
وكنت هندخل مساحه بس الحمد لله نصيب
دلوقتى ف الشغل بيدققوا ان لازم يكون خريج مساحه
ولا عادى خريج gis بس واخد دورات واجهزة وبرامج ؟؟؟؟؟

[مروة عادل عبد الغنى]

على فكرة انا اشتركت فى الموقع علشان عندى انترفيو بكره ان شاء الله ادعو لى يا جماعة
وانا كنت بدور على معلومات او حاجة تفكرنى بالمساحة احسن انا حاسة انى نسية كل حاجة

[محمد الفرارجي]

بشكرك كتير بشمهندس محمد
ع النصائح الجميله دى بس ف سؤال
دلوقتى لو انا رايح رابعه شعبه gis ان شاء الله
وكنت هندخل مساحه بس الحمد لله نصيب
دلوقتى ف الشغل بيدققوا ان لازم يكون خريج مساحه
ولا عادى خريج gis بس واخد دورات واجهزة وبرامج ؟؟؟؟؟

سلام عليكم أخونا العزيز بيبرس

بص يا سيدي

كتيييييييييييير قوي من زمايلنا المساحين خريجي شعبة عامة وكتير منهم وخصوصا الناس القديمة خريجي معهد مساحة إنت خريج شعبة نظم يعني إن شاء الله دارس أكتر منهم في حاجات تانية.


بس إنت ليه مصمم عالمساحة على فكرة مجال نظم المعلومات مفتوح جدا في دول الخليج دا غير إنه أصلا مفتوح جدا في القاهرة فيا ريت تستمر في نظم المعلومات لأنه وباخص في دول الخليج المرتب ممكن يبقى ضعف المساح

شكرا يا بيبرس وربنا يوفقك

[محمد الفرارجي]

على فكرة انا اشتركت فى الموقع علشان عندى انترفيو بكره ان شاء الله ادعو لى يا جماعة
وانا كنت بدور على معلومات او حاجة تفكرنى بالمساحة احسن انا حاسة انى نسية كل حاجة

يا مروة إحنا تحت أمرك في اي وقت ويا رب الموضوع يكون فادك ولو حاسة إنك ما استفدتيش يا ريت تقولي لنا عشان نقيم الخطأ وأعدل في التصور بتاعنا

ربنا يوفقك في الانترفيو ويا ريت تراجعي الكلام الخاص بالانترفيو

[Green_Eyes]

السلام عليكم ورحمة الله
والله انا عجبنى الموضوع بتاعك اوى يا باشمهندس
وبجد استفدت منه كتير واكيد ناس كتير استفادوا كمان
وبدعى ربنا انه يوفقك ويساعدك على خدمة اعضاء المنتدى

[محمد الفرارجي]

السلام عليكم ورحمة الله
والله انا عجبنى الموضوع بتاعك اوى يا باشمهندس
وبجد استفدت منه كتير واكيد ناس كتير استفادوا كمان
وبدعى ربنا انه يوفقك ويساعدك على خدمة اعضاء المنتدى

اخ الفاضل جرين آي لك مني ومن كل أعضاء المنتدى كل الحب والاحترام وأهلا بيك وسطنا ويا رب نقدر نفيد الناس إللي عايزة تبتدي
وادعواربنا يوفقنا في مشروع تشغيل الخريجين

[Green_Eyes]

ربنا يوفقك يا مروة ان شاء الله

[ESRAA...F]

موضوع قيم جدا يا بشمهندس

جزاك الله كل خير وجعله فى ميزان حسناتك

[مزن محمود]

يسلموا و مشكور على هذه النصائح القيمة
جزاك الله الف خير

[محمد الفرارجي]

موضوع قيم جدا يا بشمهندس

جزاك الله كل خير وجعله فى ميزان حسناتك

ربنا يبارك فيكي ي إسراء وشكا جدا عالمتابعة

[محمد الفرارجي]

يسلموا و مشكور على هذه النصائح القيمة
جزاك الله الف خير

ربنا يبارك فيك يا رب ودايما منورنا ونقدر نفيدك إن شاء الله

[حمو الزمالكاوي]

موضوع فى غاية الاهمية مشكور

[محمد الفرارجي]

موضوع فى غاية الاهمية مشكور

تسلم يا حمو
بس لسه زملكاوي؟!!
عموما ربنا يعينكويصبرك

[mrae]

اهلا بيكم متشكرين يا برنس على الافادة وربنا يوفقك ويوفقنا وبخاصة موضوع المقابلة لانى خايف مووووووووووووووووووووووووووووت منة

[محمد الفرارجي]

اهلا بيكم متشكرين يا برنس على الافادة وربنا يوفقك ويوفقنا وبخاصة موضوع المقابلة لانى خايف مووووووووووووووووووووووووووووت منة

يا جميل بيتك ومطرحك

شرفتني والله

[Hend Elhabet]

والله مش عارفة ارد اقول ايه بس بعد الردود دى كلها
يعنى حتى الاستفسارات اللى جت ف بالى اتقالت هنا
وردود حضراتكم على الاستفسارات بجد هايلة جدا
وفى طبعا كلام جديد اول مرة اسمعه وكلام سمعته قبل كده
من اساتذة كبار ف قسم الجغرافيا ومن ناس اشتغلت قبل كده
وبكون مبسوطة اوى ان متاح لينا النصايح دي كلها دلوقتى
وده من فضل ربنا علينا طبعا
وبشكركم طبعا مهندس محمد الفرارجى ومهندس محمد هاشم
ولو ان الشكر حاجة قليلة اوى على النصائح الهامة جدا دى

[محمد الفرارجي]

والله مش عارفة ارد اقول ايه بس بعد الردود دى كلها
يعنى حتى الاستفسارات اللى جت ف بالى اتقالت هنا
وردود حضراتكم على الاستفسارات بجد هايلة جدا
وفى طبعا كلام جديد اول مرة اسمعه وكلام سمعته قبل كده
من اساتذة كبار ف قسم الجغرافيا ومن ناس اشتغلت قبل كده
وبكون مبسوطة اوى ان متاح لينا النصايح دي كلها دلوقتى
وده من فضل ربنا علينا طبعا
وبشكركم طبعا مهندس محمد الفرارجى ومهندس محمد هاشم
ولو ان الشكر حاجة قليلة اوى على النصائح الهامة جدا دى

شكرا ليكي يا هند على ذوقك وربنا يبارك فيكي ويا رب الكلام يفيدك

[محمد الفرارجي]

الشكر للجميع وأرجو إن المقالة تكون فعالة إن شاء الله

[mohamed ali]

الف شكررررررررررررررر على الموضوع القيم

[ali364]

تسلم يا اخى

[rame kapo]

انا بدرس فى كلية هندسة شبرا قسم مساحة واحب اعرب الكورسات الازمة لاكون مساح متمكن و يا رب يباركلوكو

[محمد الفرارجي]

كل الاحترام والشكر للجميع وأرجو التوفيق والأخذ بالنصائح قدر المستطاع إن شاء الله

[محمد الفرارجي]

انا بدرس فى كلية هندسة شبرا قسم مساحة واحب اعرب الكورسات الازمة لاكون مساح متمكن و يا رب يباركلوكو

مش عارف يا رامي بس أنا رديت عليك فعلا بس للأسف الرد ما ظهرش

المهم
بص يا سيدي

قدامك سكتين سفر:-

الأولى بحرية.
التانية برية قصدي أرضية.

حدد انت عايز تتخصص في ايه؟

لو بحرية يبقى قدامك الأكاديمية البحرية في اسكندرية قورص 6 شهور بحوالي 6000جنيه.

لو هتتخصص أرضيه يبقى عليك وعلى هيئة المساحة بالدقي قصاد مديرية أمن الجيزة وما تتوهش. الدور التاني قسم التدريب دورة ثلاثية على التوتال والميزان الوجي بي اس بحوالي 400 جنيه لمدة شهر ونص.

المقاولين العرب نركز التدريب وده تسأل في المقر الرئيسي في وسط البلد جنب الرواس للسيارات.

طبعا بالنسبةللأجهزة :
1- توتال استيشن.
2- ميزان.
3- جي بي اس.

البرامج:

1- الأتوكاد وده كفاية في المرحلة دي وطبعا أفضل مركز للتدريب في القاهرة هوه مركز أكت وده سهل تدخل على السايت بتاعه عالنت.

2- الجي أي اس دي بقى بتبقى صعبة شوية وانت طالب لأن إللي أعرفه هوه معهد تكنولوجيا المعلومات في شارع الهرم وده بيقبل الخريجين بس والدورة دي بقت للمهندسين بس.

فيه طبعا وحدة نظم المعلومات الجغرافية بآداب عين شمس ودي سهل توصل لها بالمترو اتجاه المرج وتنزل محطة منشية الصدر وتركب عربية لحد باب الكلية وتطلع الدور الرابع وتسأل هناك.

بس الأفضل طبعا لو تنزل تدريب وانت لسه في الكلية رؤيتك هتختلف تمااااما

ربنا يعينك

[die_hunter]

متشكر جدا جدا جدا

[yougen]

انا باشكرك جدااااا جداااا على الموضوع ده فيه معلومات كتيرجدا كويسة ، مع انى خريجة نظم معلومات جغرافية و دلوقتى باخد دورة مساحة ودخلتها لانى حبيت المادة دى لما اخذتها فى الجامعة ، بس بجد شغل المساحة متعب جدا بس والله حلو جدااا بس انا اتمنى انى اشتغل فى مجال المساحة واتمنى انى اكون اول سيرفيور بنت مع انى اعرف اتوكاد كويس واخذت فية دورات بس حبيت شغل الموقع عن شغل المكتب . ربنا يوفقكم

[eng_hydrographic]

يعنى مينفعش نطلع البطاقة باسم مهندس مساحة مش مساح ولا اخصائى
ولو طلعطها بمهندس مساحة دة غير قانونى
:a20::a20::a20::a20::a20::a20::a20::a20::a20::a20: :a20:

[mostafa hassan]

جزاك الله خير يا بشمهندس محمد علي هذه المعلومات القيمة والمهمة

[heba]

جزاك الله خيرا
موضوع مهم جداااااااااااا
ربنا يجعله في ميزان حسناتك

[مصطفى محمد]

موضوع أكثر من رائع
وان شاء الله أكبر عدد من اعضاء المنتدى يقروه ويستفادوا منه
وان شاء الله يجعله في ميزان حسناتك

[محمد الفرارجي]

كل الاحترام والتقدير لمن قاموا بالمشاركة والرد وبالنسبة للأخ السائل عن المسمى الوظيفي في البطاقة الشخصية.
أخي الكريم احتراما لتخصصنا فنحن نحترم تخصص الآخرين وبالنسبة للمسمى الوظيفي فأنت أخصائي مساحة وخرائط ولست مهندسا لأنك ببساطة تحمل ما يؤهلك لهذا المسمى الوظيفي فأنت لو خريج كلية الهندسة فيسهل عليك الانضمام لنقابة المهندسين وتنتهي قضية التعريف أو المسمى الوظيفي.
ومثالنا هنا أخصائيي العلاج الطبيعي فهم لا يقال عنهم أطباء ولكن أخصائيين وبالتالي فإن كانوا أطباء فيسهل عليهم أيضا الذهاب لنقابة الأطباء وتنتهي المشكلة.

وفي النهاية دعك من هذا الجدال فالعبرة بما تحمله من خبرات عملية وعلمية وحياتية تؤهلك لما تريده إن شاء الله "في حدود المسموح به داخل كيانك الاداري"

وفي النهاية أشكر كل المشاركين في الموضوع وجزاكم الله خيرا

[MOHAMAD ELSAADANY]

ربنا يباركلك يا استاذ محمد ويجعل مجهودك ده فى ميزان حسناتك وكل عام وانت بالف خير وعلى فكره انت واحشنى جدا

[محمد الفرارجي]

ياااااااااااه محمد السعدني؟
حبيبي والله يا حماده
شكرا ليك يا حبيبي وربنا يعينك يا رب ويوفقك

[على فهمى]

باشا محمد الفرارجى ليك شكر واجب
الموضوع يعيش للزمن ، طول ما فى ناس لسة بتتعلم وبتتخرج
أحسن حاجة أن تتعلم وتعلم غيرك ، ودى سنة الحياة
كفاية إن إللى بيستفاد ( والعدادة شغالة ) بيتمنولك الخير فانت والدهم التانى

[محمد الفرارجي]

هههههههههههههههههههه تسلم ربنا يبارك لك يا رب