المساعد الشخصي الرقمي

مشاهدة النسخة كاملة : المصافى " فلتر حياتك عشان تقدر تعيش"



Horiaa Swedan
06-21-2009, 12:17 AM
المصافى

اهلا بيكم طبعا مستغربين العنوان اتقلوا بس وانتوا حتفهموا
اسمع الكلام ده ...

هو: ماحدش بيحبني خالص..!
هو: على فكرة "محمود" مش جدع..!
هي: بقالي أسبوعين مابانامش!

شايف المشاكل دي؟ عارف إيه حلها؟ تعال نقرا الموضوع وهتحلها إنت بنفسك بكل بساطة..

دلوقتي هنعرف النهارده حاجة مهمة قوي.. و هي:


المصفاة!!

عارف المصفاة؟؟
أيوه بالضبط.. اللي بتصفي بيها عصير الليمون

هنعمل بيها إيه دي؟؟ وإيه علاقتها بالموضوع؟؟

تعالوا نشوف مع بعض إيه الحكاية:

زي ما عرفنا, الواحد مننا بيجمع المعلومات من البيئة اللي حواليه عن طريق حواسه الخمسة وأنظمته التمثيلية (بصري، سمعي، شعوري،....) والمعلومات دي بتروح على المخ (الخريطة اللي بتحركنا).

بس السؤال هنا:

هل المعلومات دي بتروح مباشرة على المخ؟؟
الإجابة: للأسف لأ.. بتتصفى في مصفاة معينة قبل ما توصل!!.

والمصفاة دي هي موضوع حلقتنا النهارده..


المصفاة دي 3 أنواع:

مصفاة الحذف
مصفاة التعميم
مصفاة التحريف

1ـ مصفاة الحذف:
المصفاة دي بتاخد المعلومات اللي جت لها وتحذف منها شوية.. بتعدي حاجات وماتعديش حاجات..

اديك مثال على ده
إنت قاعد دلوقتي أمام جهاز الكمبيوتر بتقرا الموضوع ده ومركز فيه.. وفي نفس الوقت فيه مؤثرات كتيييرة جدا حواليك.. فيه أصوات كتير حواليك صح؟ ركز كده.. لكن إنت ماكنتش منتبه للأصوات دي ومركز في القراءة.. صح؟

أهي المصفاة دي دورها كده.. بتلغي شوية مؤثرات وتسيب غيرها.. المعلومات اللي رايحة في طريقها للمخ المصفاة مش بتسيبها تعدي في حالها.. بتلغي شوية حاجات..

2ـ مصفاة التعميم:

المصفاه دي بقى على العكس.. بتاخد شوية معلومات وتكبرها وتحسسك إن هي دي بس المعلومات الموجودة.. يعني عممت المعلومات دي على التجربة كلها.

اديك مثال
فكر في حد إنت مش بتحبه خالص أو مش بتستلطفه مطلقا.. فكرت فيه؟..
اكتب هنا أهم صفاته:

شفت؟ هو ده بقى التعميم.. كل بني آدم فيه ملايين الصفات الكويسة والوحشة.. لكن إنت عشان مش بتحب الشخص ده, وصفته بصفة سلبية.. رغم إن فيه صفات إيجابية كتير..
مصفاة التعميم خلت الصفة السلبية دي هي اللي تتعمم.. رغم إن أكيد فيه صفات كويسة كتير، المصفاة دي ما خلتهاش تعدي لمخك (الخريطة).

هي: " كل الرجال قاسيين .."
ده مثال تاني للتعميم.. صاحبة الجملة دي أكيد مرت بتجربة مع واحد قاسي, خلتها تعمم الموضوع على كل الرجال.. مع إن ده مش صحيح...


3ـ مصفاة التحريف:

المصفاة دي غير اللي فاتوا خالص.. لأنها ببساطة بتحرف المعلومات اللي رايحة المخ ..

تعالوا ناخد مثال
لي واحد صاحبي بيحب واحدة زميلتنا جدا, وهي مش في دماغها أصلا.. وفي يوم من الأيام كانت ماشية قدامنا وقالت: "صباح الخير!".. عادي يعني! صاحبنا ده قال إن ده دليل إنها بتحبه وإنها تعمدت تعدي قدامنا وتقول كده عشان تشوفه!! .. الغريب إنه كان مصدق كده تماما..
السبب في كده: مصفاة التحريف.. خلت الموقف العادي ده يتحرف ويبقى حاجة تانية خالص..

طيب.. أي نوع من دول عندنا؟؟
صح.. التلاتة طبعا.. كل مصفاة في وقتها بطريقة لا إرادية...



التحكم في المصافي:

دلوقتي بعد ما فهمنا أنواع المصافي دي وازاي بتشتغل, نقدر بكل بساطة نتحكم فيها عشان نعيش حياة أسعد..
تعال نشوف المشاكل دي كده:


مشكلة 1:

هو: مراتي بتتكلم كتير قوي.. مش قادر أستحمل


مشكلة 2:

هي: جوزي عمره ما يحط حاجة في مكانها خالص!!
خدت بالك من المشاكل دي؟؟

فكر كده في الفلاتر اللي استخدمت في كل حالة

المشكلة 1:

الزوج استخدم مصفاة ( التعميم والإلغاء)

ركز في مشكــلة الكلام الكتير لزوجته (تعميم) وتــجاهل حاجات كتــير قـــوي ممكن تكون كويسة فيها (إلغاء).

عارفين الحل إيه؟

يستخدم الإلغاء في موضوع الكلام الكتير ويعمم في أي صفة حلوة عندها..
يركز في إن مراته منظمة مثلا.. في إنها بتحبه.. في إنها بتربي عياله كويس وبتخلي بالها من بيته.. كده يعني..
كل ماتتكلم كتير قدامه يركز كم هي حنونة وجميلة وتحملت معي الكثير.. وبكده هيعدي الموضوع!


المشكلة 2:

الزوجة استخدمت مصفاة (التعميم والإلغاء والتحريف).

مصفاة التحريف: يعني معقول عمره ما حط حاجة في مكانها؟؟ ليه يعني؟؟ دايما بيحط الأكل في الدولاب والقمصان في التلاجة مثلا؟؟ عمره ما حط دماغه على المخدة يعني ولا بيحطها على الكومودينو دايما؟؟ أكيد منظم إلى حد ما في بعض الأشياء..

لو شغلت مصفاة (التعميم) في المواقف اللي كان فيها منظم.. هتلاقي إنه مش بشع إلى هذا الحد!!
وبكده على الأقل هتقدّر حجم المشكلة بالضبط وتقدر تتفاهم معاه وتعلمه النظام في الحاجات القليلة اللي هو غير منظم فيها..

ودلوقتي وبعد ما حلينا المشكلتين دول.. ارجع للمشاكل اللي في أول الموضوع هتلاقي نفسك حليتها لوحدك..

جرب كده وابعت لنا الحلول

بتحكمك في المصافي بتاعتك هتقدر تحب (شريك حياتك- عملك- أهلك أكتر وأكتر) (بتعميم) صفاته الكويسة و(إلغاء) صفاته اللي مش عاجباك.. و(حرّف) زي ما إنت عايز.. بس وإنت بتستخدم المصافي دي اعرف إن الهدف الأساسي هو: إنك تعيش حياة أسعد, بعيدة عن الضغوط...
ورحلة حياة سعيدة..

هو ده بقى موضوع المصافي (علميا اسمها: الفلاتر).

بعد ما المعلومات بتعدي من المصافي دي, بتروح على المخ.. اللي هو الخريطة..

إيه هي الخريطة دي؟؟

هو ده اللي هنتكلم عنه في المره الجاية..
فإلى اللقاء


بقلم/شريف عرفه

eslam mamdouh
06-22-2009, 10:12 PM
شكرا ليكى جدا على موضوعك

وفى انتظار المزيد

Wild_Angel
06-22-2009, 11:42 PM
راااااااائع يا ريموندا حقيقى الموضوع ممتاز
جزاكِ الله خيراً

NOHA SHABAN
06-23-2009, 12:11 AM
موضوع جميييييييييييل جدا جزاكى الله كل خير يا ريموندا

Marwa Magdy
06-23-2009, 12:32 AM
شكرا يا ريموندا على الموضوع الجميل ده جزاكى الله ما خير

ALY ELSAYED
06-23-2009, 12:42 AM
شكرا ليكي جدا يا ريموند
وموضوع جميل جدا وطريقه شرح هايله هههههههه
بجد الله ينور عليكي وعايزين مندا تاني
جزاكي الله كل خير

alaa eid
06-23-2009, 07:59 PM
موضوع جمييل جدا
تسلم ايدك

محمد زيدان
06-23-2009, 08:05 PM
موضوع جميل جدا
وننتظر كل ما هو جديد من ريموندا

Horiaa Swedan
06-23-2009, 09:01 PM
اشكركم حقا على مروركم الكريم واسال الله ان يكون الموضوع قد افادكم كما افادنى

لقد اصابتنى خيبت الامل بعد مرور وقت على وضع الموضوع ولم يقرائه احد والان قد اسعدنى مروركم وكلاماتكم حقا وانتظرو المزيد ان شاء الرحمن

هدى على
06-24-2009, 09:31 AM
اية الموضوع الحلو دة الله ينور عليكى

Wild_Angel
06-28-2009, 12:12 PM
منتظرين الجديد ان شاء الله يا ريموندا

Horiaa Swedan
07-01-2009, 02:59 AM
اشكرك اختى فى الله هدى على مرورك الكريم

وان شاء رب العباد اضع المزيد اختى ويلد