المساعد الشخصي الرقمي

مشاهدة النسخة كاملة : أجرة القاهرة ... أجمل ما قرأت فى وصف المجتمع المصرى



Mohamed Hashem
06-29-2009, 07:44 AM
قرأت لكم كتاب "تاكسي .. حواديت المشاوير" للكاتب خالد الخميسي الناشر دار الشروق وبرغم أنني لا أعرف هذا الكاتب جيدا إلا أنني فوجئت بأن طبعة الكتاب الذي بين يدي تحمل الرقم 14 في دائرة حمراء زاهية دلالة على أنه كسر كل الأرقام القياسية في مبيعات الكتب التي بارت أسواقها هذا الزمان ..
المهم استعرت الكتاب من صاحبه وقضيت معه أوقات فراغي خلال ثلاثة أيام هي مدة عزلتي عن العالم الخارجي (انقطع فيهم الاتصال بالانترنت) وقبل أن أصل إلى منتصف الكتاب .. أيقنت انه سيكون لكم نصيب منه ..


وللأمانة.. أكثر ما شدني للكتاب .. بخلاف بساطة الأسلوب .. وواقعية الحوار والمضمون .. تطابق الزمان والمكان والأمور كثيرا .. بيني وبين الكاتب .. فالأحداث دارت في شوارع القاهرة .. وأحداثي المماثلة دارت في شوارع الإسكندرية ... والكاتب يسرد قصص من رواية سائقي التاكسي وأنا أجد لذة غريبة في التحدث إليهم بل و "نكش" السائق أي فتح اي موضوع والسلام وهم ثرثارون بطبيعتهم يميلون إلى التحدث قتلا للوقت أو للملل .. والكاتب يصف نفسه بأنه زبون "سقع" لسيارات التاكسي وأنا من كثرة إستخدامى لتلك المواصلة صادفني الحظ أن ركبت مع نفس السائق في نفس السيارة مرتين وكان ذلك قبل شراء سيارتي المتواضعة منذ ثلاثة أعوام
لن أطيل عليكم أكثر من ذلك .. ولنبدأ بالمقدمة فهي لا تقل إمتاعا عن محتوى الكتاب




http://www12.0zz0.com/2009/06/29/05/538177783.jpg




كلام لابد منه




منذ سنوات وأنا زبون "سقع" لسيارات التاكسي درت معها في شوارع وأزقة القاهرة بحيث أصبحت أعرف حواريها و مطباتها أكثر من أي سائق آخر



وأنا من هواة الحديث إلى سائقي التاكسي فهم بحق أحد ترمومترات الشارع المصري يضم هذا الكتاب بين دفتيه بعض القصص التي عشتها وبعض الحكايات التي جرت مع سائقين من ابريل 2005 إلى مارس 2006



حاولت أن انقل هذه القصص كما هي بلغة الشارع وهى لغة خاصة وفجة وحيه وصادقة تختلف تماما عن لغة الصالونات والندوات التي اعتدنا عليها



وسائقي التاكسي ينتمون في معظمهم إلى شريحة اجتماعية مطحونة اقتصاديا يعملون في مهنة مرهقة بدنيا فوضع الجلوس الدائم في سيارات متهالكة يدمر أعمدتهم الفقرية وحالة الصراخ الدائم الموجودة في شوارع القاهرة تدمر أجهزتهم العصبية وحالة الزحام المستمرة تنهكهم نفسيا والجري وراء الرزق بالمعنى الحرفي للجري يشد ضفائر الكهرباء في أجسادهم للمنتهى أضف إلى ذلك أن مردود التاكسي لو تم حسابه بشكل علمي أي واضعين في الاعتبار كافة العناصر من إهلاك للسيارة وأجرة السائق والضرائب وقيمة التجديد والمخالفات .. الخ سنجد انه مشروع خاسر مائة بالمائة وأصحابه يتصورون أن التاكسي يربح لأنهم لا يضعون في الحسبان العديد من المصروفات غير المنظورة ونتيجة لذلك فحالة التاكسي متهالكة وبائسة وقذرة وسائقيها يعملون عليها كالرقيق



وفى المحصلة العامة ستجد الآن سائقي التاكسي من كل التخصصات ومن كافة الشرائح العلمية بدءا من الأمي إلى حملة الماجستير لأني لم أقابل حتى الآن سائقي تاكسي حاصلين على الدكتوراه



ولدى أولئك السائقين خبرات واسعة بالمجتمع حيث أنهم يعيشون عمليا في الشارع ويلتقون بمزيج هائل من البشر بشكل يومي وتتجمع لديهم من خلال الحوارات التي يقيمونها وجهات نظر معبرة جدا عن شريحة الغلابة في المجتمع المصري



والحق يقال فأنني كثيرا ما أرى في التحليلي السياسي لبعض السائقين عمقا أكثر مم أجده لدى العديد من محللين سياسيين يملئون الدنيا صخبا فحضارة هذا الشعب تتجلى في بساطته فهذا الشعب المصري العظيم الرائع معلم بحق لكل من يريد أن يتعلم



انتهى كلام الكاتب والتقط طرف الخيط منه لأقول لكم كل يوم سنتناول قصة سائق مختلف لنتعلم منها بعضا من قيم و أخلاقيات ومثل عليا وحكم وعظات أيضا
فإلي الغد .. انتظرونا


http://www4.0zz0.com/2009/06/29/05/201338761.jpg

yousef
06-29-2009, 01:21 PM
الفكره جامده جدا وجديده
وفعلا الطبقه ديه زي ما حضرتك قولت عنهم بالظبط من كل الشرائح وكمان عندهم خبره في كتير من المجالات المختلفه من خلال خبرتهم وكلامهم مع الناس
فكره الموضوع هايله جدا وشدتني وبجد هستني اول حكايه وباذن الله اكون اول رد يشكرك علي الموضوع الهايل

وبجد الله ينور

ALY ELSAYED
06-29-2009, 04:07 PM
الله ينور يا بشمهندس محمد

فكره جميله جدا وفعلا الناس دول في منهم الامين والكويس جدا وفي منهم الصايع والحرامي

عايزين نعرف جميع القصص المفيده

جزاك الله كل خير

محمد الفرارجي
06-29-2009, 08:16 PM
عموما
الكبير كبير
ومش غريبة عليك الأفكار الجميلة دي

عجبني حاجتين

1- انك قلت قريت يعني نقلت التاكس ملاكي وبعت النمر.

2- انك أخذت من الكتاب المفيد ما قصيتش ولزقت وخلاص.

وبعدين فكرة انك تتكلم عن كتاب قريته

والله والله والله

ممكن تبقى فكرة ممتازة في القسم الثقافي بدل ما هو معتمد على النقل بصورة كبيرة كده
كل واحد قرا كتاب حتى لو من وجهة نظره تافه

يدخل يدينا ملخص ليه وباسلوبه والله الفكرة ممتازة

بس التطبيق

شكرا يا مصبرني

Mohamed Hashem
06-30-2009, 05:20 PM
الفكره جامده جدا وجديده
وفعلا الطبقه ديه زي ما حضرتك قولت عنهم بالظبط من كل الشرائح وكمان عندهم خبره في كتير من المجالات المختلفه من خلال خبرتهم وكلامهم مع الناس
فكره الموضوع هايله جدا وشدتني وبجد هستني اول حكايه وباذن الله اكون اول رد يشكرك علي الموضوع الهايل

وبجد الله ينور





الله ينور يا بشمهندس محمد


فكره جميله جدا وفعلا الناس دول في منهم الامين والكويس جدا وفي منهم الصايع والحرامي


عايزين نعرف جميع القصص المفيده


جزاك الله كل خير







عموما

الكبير كبير
ومش غريبة عليك الأفكار الجميلة دي


عجبني حاجتين


1- انك قلت قريت يعني نقلت التاكس ملاكي وبعت النمر.


2- انك أخذت من الكتاب المفيد ما قصيتش ولزقت وخلاص.


وبعدين فكرة انك تتكلم عن كتاب قريته


والله والله والله


ممكن تبقى فكرة ممتازة في القسم الثقافي بدل ما هو معتمد على النقل بصورة كبيرة كده
كل واحد قرا كتاب حتى لو من وجهة نظره تافه


يدخل يدينا ملخص ليه وباسلوبه والله الفكرة ممتازة


بس التطبيق



شكرا يا مصبرني


شكرا جدا جدا جدا
وطالما عجبتكم حاكمل

Mohamed Hashem
06-30-2009, 05:22 PM
http://www10.0zz0.com/2009/06/30/10/891993268.jpg




( 1 )




يا إلهي .. كم عمر هذا السائق ؟ وكم عمر هذه السيارة ؟



لم أصدق عيني عندما جلست بجانبه .. فإن عدد تجاعيد وجهه بعدد نجوم السماء . تضغط كل تجعيده على الأخرى "بحنيه" وتصنع وجها مصريا نحته مختار (مثال مصرى 1891-1934) أما يداه اللتان تضغطان على المقود فإنهما تتمددان وتنكمشان عبر شرايينها البارزة وكأن شرايين النيل تغذى الأرض اليابسة مع رعشة خفيفة لا تحرك المقود يمينا أو يسارا فالسيارة تسير ثابتة إلى الأمام وتصدر من عينيه المغطتين بجفنين عملاقين حالة سلام داخلي تبعث في وفى الدنيا الطمأنينة



شعرت بمجرد الجلوس إلى جانبه بفعل مجال مغناطيسي يصدره أن الحياة بخير

أنا: حضرتك أكيد بتسوق من فترة طويلة
السائق: انا باسوق من 48 سنة
لم أتصور أنه يمارس مهنة قيادة السيارات الأجرة منذ قرابة خمسين عاما لم أجرؤ على سؤاله عن سنه ولكنى وجدت نفسي أسأله عن النتيجة
أنا: وإيه يا تري خلاصة خبرتك اللي ممكن تقولها لواحد زيي علشان أتعلم منها
السائق: نملة سوداء على صخره سوداء فى ليلة ضلمة يرزقها الله
أنا: قصدك ايه ؟
السائق: احكيلك حكاية حصلت الشهر اللى فات علشان تفهم قصدى
أنا: ارجوك
السائق: عييت عشر تيام عيا جامد اوى ماكنتش قادر اتحرك من السرير وبعد اسبوع ماكانش فى البيت مليم .. انا عارف ومراتى مخبية عليا وكل ما اقولها حنعمل ايه.. تقولى الخير كتير يا ابوحسن وهى عمالة تشحت اكل من الجيران القصد بعد عشر تيام قلت لها حانزل الشغل .. حلفت عليا وقعدت تصرخ وتقول انى لو نزلت ح اموت منها وبصراحه انا كنت تعبان جدا بس كدبت عليها كدبه بيضا قلت لها حاروح القهوة اقعد مع صحابى اتهوى شوية زهقت من السرير ونزلت دورت العربية وقلت يارب يارزاق
فضلت ماشى لغاية ما لقيت عربية 504 عطلانه والسواق بيشاور لى ولما وقفت جنبه قال لى خد الزبون اللى معايا المطار علشان عربيتى عطلت ووافقت
الزبون طلع من عمان .. سالنى حتاخد كام قلت له اللى تجيبه ..
وانا فى الطريق اكتشفت انه رايح قرية البضائع .. وافتكرت ان ليا واحد صاحبى شغال هناك فلما وصلنا ساعده صاحبى ده فى تخليص الحاجات بتاعته .. خد بالك كان ممكن اروح ماألاقيهوش
سالنى تانى .. عاوز كام يا حاج .. قلت له اللى تجيبه فراح مدينة خمسين جنيه وشكرته وسألنى راضى فرديت راضى
قال لى بص يا حاج الجمرك هنا كان حياخدوا 1400 جنيه وانا دفعت 600 جنيه والفرق طالع من ذمتى واجرة التاكسى 150 جنيه .. والخمسين اللى معاك دول حلاوتك .. آدى الف جنيه
شفت يا استاذ مشوار واحد جاب لى الف جنيه .. ممكن اشتغل شهر وما أجبهموش .. شوف ربنا نزلنى من البيت عيان .. وعطل العربية ال 504 البريمو وسبب الاسباب
علشان يرزقنى
اصل الرزق دا مش بتاعك والفلوس دى مش فلوسك .. كله بتاع ربنا .. دى الحاجه الوحيدة اللى اتعلمتها فى حياتى

انتهى كلام المؤلف .. والتقط الخيط – كالعادة – لأذكر نفسى واياكم ... كله ملك الله .. المال .. العلم .. الصحة .. شبابك .. قوتك ..
فأحسن التصرف فيما أستخلفك الله فيه
والى اللقاء

alaa eid
06-30-2009, 06:12 PM
جميييييييييييل جدا
تسلم ايدك يا بشمهندس

Mohamed Hashem
07-02-2009, 10:44 AM
تسلمى لولو

yousef
07-02-2009, 01:49 PM
سبحان الله
وطبعا الارزاق علي الله
واكيد مستنين الباقي بجد الله ينور

Mohamed Hashem
07-03-2009, 09:10 PM
( 2 )





كانت سيارات الأجرة لا تستطيع أن تتحرك من شدة الزحام فى شارع عباس العقاد بمدينة نصر الساعة التاسعة مساء واجهات المحلات تتلألأ بأنوار النيون حتى إنى أغمضت عينى من شدة لمعان الأضواء وتسلل إلى السيارة من أحد المقاهى أو المحال صوت كاظم الساهر يغنى قولى أحبك
مصمص السائق شفتيه وقال بحسره:
يا عينى يا عراق يا حسرة قلبى على العراق وأهلها
أنا : رحت العراق ؟
السائق: قضيت فيها أحلى سنين عمرى .. العراقيين دول أجدع ناس لغاية دلوقتى مش قادر أصدق اللى حصل للعراق مش ده اللى كنت متخيله خالص
أنا: ايه اللى كنت متخيله ؟
السائق: بصراحة كنت حاسس ان صدام حينتصر على الامريكان حتى لما شفت بعينى الدبابات الأمريكانى بيتمشوا فى شوارع بغداد قلت فى عقل بالى دى خطة من صدام عاملها علشان يدخلهم بغداد وبعدين يعملوا لهم مقلب ويقضى عليهم
مش قادر أصدق لغاية دلوقتى بس برضه رجاله مفيش يوم عدى إلا وقتلوا لهم كام واحد أمريكانى حيصفوهم واحد واحد إن شاء الله
أنا : من بقك لباب السما بس مش شايف إن صدام سبب كل البلاوى ؟
السائق: انا بحب صدام كان له مواقف جدعنه كتير اوى مع المصريين ما تنساش إنه درس فى القاهرة ... فى التمانينيات وأنا فى العراق كان فى شوية رخامة مع المصريين لقيت صدام طالع يقول خطبه وراح قايل إن أى عراقى حيتعرض لواحد مصرى حيأخد ست شهور حبس .. كده على طول خبط لزق بعدها كنا بنمشى فى بغداد مرفوعين الرأس .. هما عايزين البترول بتاعهم وضربوا كرسى فى الكلوب ودمروا العراق يا عينى
بس زى ما بأقولك كده .. أنا عارف العراقيين كويس ومعاشرهم فوق العشر سنين دول شعب رجاله وحيطلع عين الأمريكان .. كلها كام شهر وحيهربوا ولاد اللذين دول من هنالك وديلهم فى سنانهم قبل ما يحصلهم زى اللى حصل لهم فى فيتنام
أنا: وامتى عرفت ان دى مش حركة من صدام وان بغداد وقعت فعلا ؟
السائق: والله انا لما عرفت انهم قبضوا على صدام عيطت وحسيت اننا بنتفعص زى الحشرات .. وخفت وفكرت فى أصحابى هناك ياترى عايشين ولا ميتين بس انا بقولك لحضرتك وحتشوف فى الآخر العراق هو اللى حينتصر
سرت فى جسدى قشريرعه من أمل وتفاؤل
ونزلت من التاكسى تحت منزلى فوجدت أربعة من المراهقين الشباب أحدهم يدخن السجائر المارلبورو الأمريكية والآخر يلبس حذاء نايك الشهير والثالث يرتدى تى شيرت على صدره علم أمريكا
فتبخرت شحنة التفاؤل وصعدت منزلى مطأطأ الرأس


المرة دى مش لاقى حاجه تتقال بعد كلام الكاتب غير ... حسبنا الله ونعم الوكيل

yousef
07-04-2009, 12:00 AM
لالالالا انا بقي اقول
الشباب ديه غير اي شباب انا بقولها وعلي مسؤليتي
يوم ما يحصل حاجه ويطلب من الشباب دول يحموا وطنهم هتلاقي ناس تانيع وردود افعال لرجاله متلقيهاش غير في مصر
والكلام ده جد مش هزار او مجرد كلام احنا شعب عنده حميه وغيره علي كل شئ يخصه
ده بالنسبه لجرعه الامل
بالنسبه للموضوع انا مش قادر استني وعايز اتاكد من اسم الكتاب(تاكسي .......حواديت المشاوير)
بجد موضووع شدني جدا جدا
وانا بشكر حضرتك جدا جدا علي الموضوع الجميل ده

Mohamed Hashem
07-05-2009, 10:56 AM
لالالالا انا بقي اقول
الشباب ديه غير اي شباب انا بقولها وعلي مسؤليتي
يوم ما يحصل حاجه ويطلب من الشباب دول يحموا وطنهم هتلاقي ناس تانيع وردود افعال لرجاله متلقيهاش غير في مصر
والكلام ده جد مش هزار او مجرد كلام احنا شعب عنده حميه وغيره علي كل شئ يخصه
ده بالنسبه لجرعه الامل
بالنسبه للموضوع انا مش قادر استني وعايز اتاكد من اسم الكتاب(تاكسي .......حواديت المشاوير)
بجد موضووع شدني جدا جدا
وانا بشكر حضرتك جدا جدا علي الموضوع الجميل ده

شكرا ليك يا يوسف طبعا وميرسى على اهتمامك
وانا معاك برضه .. دى كانت وجهه نظر الكاتب ههههه مش أنا
بالنسبه للكتاب انا - زى ما قلت - بانقل فى أجزاءه بالطريقة المعتاده علشان كده بياخد منى وقت
لانه كتاب ورقى .. وكمان بانقح فى الفاظه لان الكاتب منزل الحوارات كلها على مسئوليته بنفس الفاظ العامة وما فيها من تجاوز احيانا .. لمجرد اضفاء جو الواقعية ودا اللى انا باشيله فمعلش على التاخير

eslam mamdouh
07-05-2009, 10:03 PM
بشمهند س



حضرتك مش مميز فقط فى المساحه والخبرات العلميه

بسم الله ما شاء الله

حضرتك متميز فى كل شى وخاصه فى انتقاء وكتابه المواضيع


كرا على الموضوع

اكيد فى غايه الروعه

Mohamed Hashem
07-06-2009, 06:22 AM
شكرا جزيلا على كلماتك الجميلة
كلك ذوق والله
بارك الله فيك

Wild_Angel
07-06-2009, 03:27 PM
بجد حضرتك عملت فيا خير كبيييييير أوى لأنى بحب القراءه جدا جدا
وخاصة الكتب اللى زى كتاب تاكسى حواديت المشاوير
ربنا يقدرك على إكمال الموضوع لأن موضوع الكتابه من كتاب ورقى متعبه شويه

بس حقيقى أنا سعيده جدا بفكرة الموضوع وأشارك الاستاذ محمد الفرارجى فى رأيه
أشكرك يا باشمهندس محمد هاشم

Mohamed Hashem
07-06-2009, 03:33 PM
والله يا وايلد انتى مرورك بس كان كفاية
وكمان كلماتك الجميلة دى
دا كتير عليا
وانا باذن الله تعالى حنكمله طالما عجبكم
وتحياتى الجليلة ليكى ولمحبه ولندا وكل القسم الاسلامى الرائع

Mohamed Hashem
07-11-2009, 04:55 PM
(3)


شارع الجيزة وكأنه يوم الحشر التاكسى لا يتحرك التلوث يتمدد مع الملل ويجعل الزمن فى حالة ثبات خانق كلية الزراعة على يسارى وحديقة الحيوان على يمينى وطابور سيارات بلا نهاية من أمامى ومن خلفى وقدرت أننى سوف أصل إلى مدينة السينما فى شارع الهرم بعد قرنين من الزمان

لم أتبادل مع السائق أى حوار فالصمت كان ضرورة حتمية لاستكمال دورة التلوث والملل ولكنى قررت فى النهاية كسر حاجز الصمت

انا: فيه واحد صاحبى .. قال لى إن حادثة خان الخليلى مش عاملها الإسلاميين ولا حاجه .. وان دى حركة عاملاها الحكومة عشان الناس تتعاطف معاها ضدهم قبل الانتخابات الجاية ولمعلوماتك فيه أكتر من واحد قال لى الحكاية دى انت ايه رأيك يا أستاذ فى الكلام ده ؟

السائق: هاهاها الحكومة ضعيفة .. ما تعرفش تعمل الحاجات دى .. لو كانوا بيخططوا ويتكتكوا كده ما كانش بقى دا حالنا .. انت علشان تعمل عمليات سياسية من النوع ده لازم يبقى عندك جرأة وشجاعة ويبقى فيه تخطيط سليم .. بس إحنا غلابة ما نعرفش نعملها عارف لو الحكومة الإسرائيلية كان ممكن تفكر لكن إحنا لآ .. مستحيل

أنا: يعنى تنفيذ عمليات قذرة ضد المواطنين فى رأيك قوة .. إيه اللى إنت بتقوله ده ؟

السائق: السياسة كده طول عمرها "----" ما إحنا كلنا عارفين إن الأمريكان هما اللى ضربوا البرج بتاعهم ولبسوها فينا السياسة شعارها اللى تكسب به العب به ... واحنا داخلين على انتخابات يعنى كله مسموح فى اللعبه .. والحكومه لازم تخلى صورة الاسلاميين زفت علشان تعلق خراب الاقتصاد على شماعتهم

أنا: انت بتقول ايه ؟ هو مفيش أخلاق.. مفيش دستور .. احنا مش فى غابة..

السائق: (مقاطعا) .. ليه وانت فاكرنا عايشين فين ... ؟ فى بلد ... دى غابه .. دا الغابة رحمه عن اللى احنا فيه .. أنت عارف عايش فين؟

أنا: فين ؟

السائق: فى جهنم

والتقط طرف الخيط من السائق هذه المرة وأقول وأجرى على الله .. هناك أمور كتير مش ماشية صح .. حاجات كتير عايزة تغيير وحاجات أكتر عايزة إصلاح وأولهم .... أنت .. وانا .... وانتى ... وهى ... وهو كمان
يارب أروح لولادى سليم

NOHA SHABAN
07-11-2009, 05:11 PM
موضوع ممتاز يا بشمهندس جزاك الله خيرا وفى أنتظار باقى الأجزاء أن شاء الله

Wild_Angel
07-11-2009, 05:46 PM
حلقه راااااائعه واللى عاجبنى طرف الخيط اللى حضرتك بتمسكه يا باشمهندس
ان شاء الله توصلّهم سليم
أحنا بلد ديموقراااطى:D

منتظره الحلقه الجايه ان شاء الله على خير

Mohamed Hashem
07-11-2009, 07:50 PM
موضوع ممتاز يا بشمهندس جزاك الله خيرا وفى أنتظار باقى الأجزاء أن شاء الله





حلقه راااااائعه واللى عاجبنى طرف الخيط اللى حضرتك بتمسكه يا باشمهندس


ان شاء الله توصلّهم سليم
أحنا بلد ديموقراااطى:D



منتظره الحلقه الجايه ان شاء الله على خير




شكرا جزيلا يا نهى
شكرا جزيلا يا وايلد
سعيد جدا بتعليقاتكم

spider girl
07-11-2009, 09:05 PM
بجد يا بشمهندس
حضرتك اضافه متميزة جدددددددددددددا للمنتدى

بجد فكرة جميله وموضوع رائع

والكاتب واسلوبه فى الحوار
وكلمات العاميه الى فى القصص بتحلى الموضوع
باين فعلا انه من جوه جوه الطبقه المطحونه


ربنا يبارك لحضرتك ويجازيك كل خير ان شاء الله
على متعه القراءه الى بنلاقيها فى الموضوع ده

Mohamed Hashem
07-12-2009, 06:32 PM
شكرا جزيلا سبايدر جيرل
مديحك كتير على والله
وجزاكى الله خيرا

Mohamed Hashem
07-12-2009, 07:01 PM
(4)



إكتشفت بمجرد ركوبى السيارة أنها أقرب لزريبة البهائم منها لسيارة تاكسى رائحتها نتنة والوسخ يحيط بى من كل جانب أما التراب فحدث ولا حرج وفوجئت بمجرد تحرك السيارة أن كل جزء منها يعمل بشكل مستقل تماما عن الأجزاء الأخرى وأن كل قطعة تطلق صريرا خاصا بها فى كونشرتو موسيقى بالغ الإزعاج


نظرت الى السائق وجدت حاله ليس أفضل كثيرا من السيارة التى يركبها


أنا: ايه اللى انت راكبه ده ؟
السائق: اعمل ايه .. صاحبها مش عاوز يصلحها عنها ما اتصلحت حيفضل كده يشغلها لحد ما تبرك خالص
كان السائق يتكلم مقلدا طريقى اللمبى فى الكلام
السائق: وبعدين أنا لو جابولى كشك سجاير وتحته طارة حشغله تاكسى أنا سواق ما يهمنيش
أنا: طيب يا سيدى حتاخد كام لغاية المعادى
السائق: اللى تدفعه
أنا: لا نتفق انت لسه ما مشتش خطوتين اللى اوله شرط
السائق: يا سيدى مش حنختلف
أنا: طب وافرض اختلفنا حنتخانق فى الشارع ..لأ قول من دلوقتى حتاخد كام؟
السائق: أنا مش عايز أقطع الرزق .. ده رزق وجاى لى من عند ربنا وانت مجرد واسطة .. اقطع برزقى ليه بس
أنا: يا اسطى انا اللى حادفع لو مش حتقول عايز كام نزلنى
السائق: افرض انى قلت لك حاخد خمس قروش وانت ناوى تدفع لى اكتر ؟ دا رزق ياسيدنا الافندى
أنا: لما بتدخل أجزاخانه وتسأل على سعر دواء الصيدلى بيقول لك ستة جنيه وتمانين قرش ولا ولا بيقولك اللى تدفعه ؟ انت الوحيد اللى لازم تكون عارف المشوار ده حيتكلف كام
السائق: يعنى ايه.... انت مش عارف؟
أنا: لا عارف
السائق: طب يساوى كام؟
أنا: 15 جنيه
السائق: طب ما تجيب عشرين
أنا: صارخا نزلنى
السائق: لأ خلاص 15 حلوين ... رضا ... (قهقه ملء شدقيه)
طب تصدق بايه انا كنت حاقولك عشرة جنيه .. وانت قلت 15 جنية .. يعنى لو سمعت كلامك كنت حاقطع برزقى .. انا بقولك كده علشان تصدق ان الصح صح .. وان الواحد مفروض ما يقولش على سعر .. يسيبها كده على ربنا
أنا: ولو كنت قولت خمسة جنيه
السائق: لآ مش معقول وهو لامؤاخذه مشوار المعادى بخمسه برضه؟


واستمرت السيارة فى الحركة كل جزء منها يسير فى اتجاه واستمرت الآلات تعزف أسوأ سيمفونية فى التاريخ الإنسانى


أنا: وشفت فيلم اللمبى ؟
السائق: لا والله مشفتهوش .. بيقولوا عليه حلو


هنا فقط إكتشفت أنه لم يكن يقلد محمد سعد فى فيلم اللمبى وأن محمد سعد هو الذى يقلده .. !


أما طرف الخيط .. هل لاحظت ما قاله ذلك السائق البسيط "الواحد مفروض ما يقولش على سعر .. يسيبها كده على ربنا" ... توكلوا على الله عباد الله .. حق توكله ... يرزقكم من حيث لا تعلمون ...
وإلى لقاء إنتظرونا ...



الحلقة القادمة بإذن الله تعالى من أرض وطنى الحبيب مصر
دعواتكم ..

ميرا مار
07-12-2009, 07:43 PM
http://www10.0zz0.com/2009/06/30/10/891993268.jpg

انتهى كلام المؤلف .. والتقط الخيط – كالعادة – لأذكر نفسى واياكم ... كله ملك الله .. المال .. العلم .. الصحة .. شبابك .. قوتك ..
فأحسن التصرف فيما أستخلفك الله فيه
والى اللقاء



باحييك على الفكرة
باشكرك جدا على المجهود


واسمحلى يا بشمهندس
حضرتك ماتعرفش كلماتك اللى ختمت بها الحكاية دى

قد ايه هافضل احفظها وافتكرها طول عمرى.. لان احنا بننسى دا

بجد ربنا يجازيك كل الخير

ميرا مار
07-12-2009, 07:56 PM
(3)



أنا: فين ؟
:rolleyes:

السائق: فى جهنم
:eek:


والتقط طرف الخيط من السائق هذه المرة وأقول وأجرى على الله .. هناك أمور كتير مش ماشية صح .. حاجات كتير عايزة تغيير وحاجات أكتر عايزة إصلاح وأولهم .... أنت .. وانا .... وانتى ... وهى ... وهو كمان
ربنا يطلعنا منها على خير
يارب أروح لولادى سليم


يارب اللهم امين..:o:o

Wild_Angel
07-12-2009, 10:36 PM
حلقاتك فى غاية الروعه يا باشمهندس
ربنا يباركلك
منتظرينك ان شاء الله من ارض الوطن

بس أرجوووك عايزين الاسره تتبسط ونتمنالك أجازه سعيده
فحضرتك تاخد اجازه من الشغل والمنتدى وأحنا حنكون سعداء جدا مدام الاسره حتكون مبسوطه بأذن الله

spider girl
07-13-2009, 02:13 AM
حلوة اوى القصه الرابعه

فعلا ربنا بيرزقنا من حيث لا نحتسب

شكرا لحضرتك وجزاك الله كل خير

Mohamed Hashem
07-30-2009, 08:08 PM
ميرا
كنت منتظر مرورك على الموضوع لما أعرفه عنك من حس أدبى مرهف فى الانسانيات
اشكرك بشدة على تقديرك ..

وايلد ... حقيقى تشجيعك الدائم بيضيع تعب النقل والتنسيق ... جزاكى الله كل خير

سبايدر جريل ... دعائك جميل جدا ... اللهم آمين ولك مثله ياااااااارب

شكرا لكل من قيم الموضوع حقيقى سعيد جدا باعجابكم به
واتمنى اكون دايما عند حسن ظنكم

Mohamed Hashem
07-30-2009, 09:18 PM
(5)



نادرا ما ركبت مع سائق تاكسى لم يختبر تجربة الهجرة .. بعضهم سافر لمدة طويلة إلى أكثر من دولة
أما هذا السائق فتجربته فى مجال الهجرة بدأت منذ عام 1977 وحتى عام 2004 ومتقطعه على حد قوله .. وما إن يعود للوطن حتى يبدأ من جديد .. سافر إلى العراق والكويت والسعودية وليبيا ومر بالطبع على الأردن وسوريا .. تجربة حية مع أحد مصادر الدخل الرئيسية فى مصر وهى تحويلات المصريين المقيمين أو بمعنى أدق المضطرين للإقامة فى الخارج


انتقد السائق بعنف الأوضاع فى مصر وأكد لى أنه شبع شعارات جوفاء عن حب الوطن ولو لم أكن مصريا والكلام اللى لا بيودى ولا بيجيب .. وشرح لى انه عاد منذ عامين مضطرا لظروف قهرية ... وكل ذلك كلاسيكى إلى حد كبير وليس فيه جديد بل ومشترك لدى شريحة كبيرة من السائقين ولكنه حكى لى قصصا عن الغربة جديدة على أذنى التى سلمتها لهؤلاء الكادحين منذ قرابة الربع قرن
قال لى :
عارف الفرق ايه بين السادات ومبارك ؟
كنت بالطبع لم أفكر فى أى فرق بينهما مسبقا فلم أرد
السائق: الفرق يا سيدى أن السادات كان مهتم جدا بأولاده اللى خارج مصر .. كان الراجل حامينا بحق أما مبارك فالراجل سايب البلاد تاكل فينا زى ما تاكل طب احكى لك حكاية عشان تفهم الحركة دى ( لا داعى على الإطلاق لإستخدام كلمة حركة هنا ولكنه قالها هكذا )
فى السبعينات اليونان فتحت موضوع الهجرة للمصريين على البحرى .. وفى الآخر صوتوا من كتر المصريين اللى سافروا اليونان قاموا عملوا ايه ؟
أنا : إية؟
السائق: عرضوا فيلم أبى فوق الشجرة بتاع حلم فى سينما حى المصريين وطبعا كبسوا عليهم ولموا كل اللى دخل الفيلم وحطوهم فى مركب على الاسكندرية .. اصل معظمهم من اسكندرية
مين عرف بالموضوع ده؟ .. السادات .. عمل ايه ؟ كلم وزير الداخلية يلم ميت جريجى فورا ويطلعهم على أول طياره
رئيس الوزارة اليونانى عرف .. وكلم السادات .. قال له .. اللى تعمله فى ولادى أعمله فى ولادكم .. وهدده .. وقال له انت لسه مشفتش حاجه .. رئيس الوزارة اليونانى كلم المركب .. تلف وترجع تانى .. وراح مديهم كلهم اقامة .. أى والله اقامة
دى حكاية معروفة إزاى حضرتك متعرفهاش
أكدت له أننى لم أسمع بها قبلا فقال لى : طب اسمع دى أصل حكايات السادات كتير .. كان فى تتش بين مصر وبقية الدول العربية
من ساعة كامب ديفيد .. وأنا كنت ساعتها فى العراق صدام كان قالب الدنيا على مصر وبدأت تحصل غلاسات وكان فى ساعتها مناوشات كده بين العراق وايران .. وكانت الدنيا مولعة نار .. راح السادات مكلم صدام وقال له بص يا ابن الناس .. سياسة ونختلف ماشى لكن حد يلمس ولادى لأ .. وكان فى حى لبش عايش فيه المصريين اسمه المربعة فى بغداد .. فراح السادات قال له أنا يا صدام حسيب عليك ولادى فى المربعة المهم فهم صدام ومحدش لمس مصرى فى العراق
أما دلوقتى .. إحنا بنتلطش من كل الخلق .. النهاردة والنعمة الشريفة - وأخرج سندويتشا من درج السيارة وهزه بعنف أمام عينيه - إحنا بنتهان آخر إهانة ..
كنا قد وصلنا .. ولما توقف بالسيارة
ختمها ...
بس برضه أحسن ما نتهان فى بلدنا


ونلتقط طرف الخيط .. لأذكر نفسى وإياكم - ويارب يسمعونا ويفهموا بقى – كلكم راع وكلكم مسئول عن رعيته ..... فاهمنى ؟ ولا أكمل ....
وإلى لقاء

Wild_Angel
07-31-2009, 01:20 AM
يااااااااه يا باشمهندس جيت على جراح الغربه
للاسف مفيش بيت مصرى يخلو من أوجاع الغربه

ألتقاط الخيط المرادى كان مهم جدا جدا
جزاك الله خيراً
وياااااارب ينصلح حال البلد ان شاء الله

Mohamed Hashem
08-01-2009, 11:05 PM
اللهم آمين يصلح حال البلد الطيب واهلها الحلوين
وشكرا جزيلا على متابعتك القيمة للموضوع

Mohamed Hashem
08-07-2009, 02:39 AM
(6)

يختلف هذا الشاب كثيرا من حيث مظهره ونوع حذائه وماركة نظارته الطبية عن الشريحة العظمى من سائقى التاكسى وسيارته كذلك ماركتها مختلفة عن كل سيارات الأجرة التى ركبتها وكأن السيارة مختلفة كسائقها
أنا: ماركتها ايه العربية دى ؟
السائق: تويوتا كريسيدا
أنا: مش منتشرة قوى
السائق: لا لا فى الخليج بس أصلها غالية شوية .. دى الفين سى سى ولاتكييف والكاسيت أصلى شوف مكتوب عليه ايه .. تويوتا
أنا: عربية جميلة أهم حاجه فيها إنها واسعه .. وانت بتشتغل سواق من فترة ؟
السائق: بحده لا لا لا أنا مش سواق أنا خريج كلية التجارة وبأعمل الماجستير دلوقتى وباشتغل محاسب فى شركة أدوية بس بعد الضهر باخد التاكسى علشان أحسن دخلى
أنا: ليه متجوز ولا ايه ؟
السائق: اتجوزت بدرى .. الجواز برضه نصف الدين .. وزينة الحياة وخلفت بدرى برضه انت عارف طبعا بمرتبى مانقدرش نعيش
أنا: سورى يعنى فى السؤال بتاخد كام ؟
السائق: ربعمائة وخمسين فى الشهر وده مرتب كويس عندى زمايل بياخدوا تلتماية وخمسين .. لكن مستحيل يقضوا .. انا عملت شيت إكسيل على الكمبيوتر بالمصروفات المنزلية ومفيش فايدة معضلة ولا حتى بيل جيتس يقدر يحلها ... بعد الايجار 120 جنية والكهربا والغاز والميه والبواب يفضل حوالى 250 جنيه وعلشان الواحد يعيش بالعافية فى اسعار اليومين دول .. محتاج 30 جنيه فى اليوم .. طبعا لى ولمراتى وانا عندى عقبالك اسلام وسها .. المرتب بيخلص فى عشر تيام والادوية والمصايب بتطلع للواحد كل شهر متعرفش منين يعنى المرتب بيخلص فى عشر تيام مش عاوز اقولك بند اللبن بس بيعمل فى مرتبى ايه ؟ طبعا الطفلين لازم يشربوا لبن وامهم كمان طبعا
ومش اللبن بس والله كل حاجه بقت نار ده كيلو الفول وصل اربعة جنيه ولا الزيت 10 جنيه ومش حاقولك بقى على زيت الذرة ولا مش عارف ايه والحاجات دى ..
يعنى مستحيل على أى حد فى مصر يكتفى بمرتبه .. ماهى المرتبات اليومين دول ما بتعديش الستماية وايه الحل ؟ انا باشتغل من تمانيه الصبح لأربعه فى الشركة وعلى التاكسى من الساعه 5 للساعه واحده الصبح
والسكة من الشركة لصاحب التاكسى حوالى ساعه مواصلات وباروح الساعه 2 الصبح اتعشى وانام
والحمد لله مخلينى ما أمدش ايدى لحد أبدا وأهى ماشية كويس وكلها كام سنة ومرتبى حيزيد وبعد الماجستير حيبقى فى كلام تانى برضه الشباب فى الاول لازم يشقى وبعد كده كله حيستريح ان شاء الله

كان يتكلم عن أمله فى المستقبل بصورة يقينية جعلتنى أخاف عليه .. وأتمنى أن تحنو يد القدر .. فهذا الشخص جدير بها


ونلتقط طرف الخيط من الكاتب لأقول لكم : اوعى تستنى حد يساعدك .. طول ما عندك صحة فانت فى نعمه والإخلاص فى العمل .. من أسباب البركة فى مالك وفى أولادك وفى صحتك ... جرب ومش حتندم ... لأ دا انت ح تدعى لى كمان ...
اللهم وفق شبابنا
آمين
أمين
أمين

Wild_Angel
08-07-2009, 03:01 PM
ربنا يجزيك خير يا باشمهندس
متعرفش اد ايه القصه أثرت فيا المرادى
بجد الشباب ربنا يكون فى عونه

بس بجد اجدع حاجه فى الشاب ده ان عنده طموح كبير اوى وامل قوى فى ربنا

يااااارب اصلح حال شباب المسلمين ووسع رزقهم يارب

sweet girl
08-07-2009, 08:23 PM
بجد يا بشمهندس القصص رائعه جدا

بحيى حضرتك على الفكره الجميله ديه

اسلوب حضرتك فعلا رائع وجذاب جدا

وبيعجبنى جدا التقاط حضرتك لطرف الخيط فعلا بيحسسنى بالامل والتفاؤل

واد ايه القصه الاخيره ديه مؤثره جدا بالرغم من ظروف هذا الشاب الا انه عنده امل فبكره ........

جزاك الله كل خير يا بشمهندس وفى انتظار باقى الحلقات ان شاء الله

تقبل مرورى

Mohamed Hashem
08-08-2009, 10:05 AM
ربنا يجزيك خير يا باشمهندس


متعرفش اد ايه القصه أثرت فيا المرادى
بجد الشباب ربنا يكون فى عونه


بس بجد اجدع حاجه فى الشاب ده ان عنده طموح كبير اوى وامل قوى فى ربنا



يااااارب اصلح حال شباب المسلمين ووسع رزقهم يارب



بجد يا بشمهندس القصص رائعه جدا

بحيى حضرتك على الفكره الجميله ديه

اسلوب حضرتك فعلا رائع وجذاب جدا

وبيعجبنى جدا التقاط حضرتك لطرف الخيط فعلا بيحسسنى بالامل والتفاؤل

واد ايه القصه الاخيره ديه مؤثره جدا بالرغم من ظروف هذا الشاب الا انه عنده امل فبكره ........

جزاك الله كل خير يا بشمهندس وفى انتظار باقى الحلقات ان شاء الله

تقبل مرورى


شكرا جزيلا للمتابعة .. وسعيد لاستمتاعكم بالحلقات

Mohamed Hashem
08-08-2009, 10:28 AM
(7)

ركبت مع سائق تاكسى من شارع جامعة الدول العربية أمام سور نادى الزمالك وكان وجهه فى حالة احتقان وكأنه على وشك الإنفجار شعرت حقيقة وكأن شرايينه يسكنها حنش يتمدد ويتقلص من فرط الغضب أو أنه سيصاب بجلطة دماغية فورا..
أنا: ولا يهمك كله بيعدى .. !!
السائق: أفندم .. فى حاجه يا بيه ؟
أنا: شكلك متضايق قلت أقولك ولا يهمك ..
السائق: انا مش متضايق أنا حاموت من الغيظ
أنا: فى ايه بس .. مفيش حاجه تستاهل فى الدنيا
السائق: فيه ايه ..؟؟؟ طالع بوزى علشان آآكل العيال ييجى واحد ما يستاهلش ابن لذين يأخدهم منى .. وتقوللى مفيش حاجه تستاهل .. ما أنا طافح الكوتة وسعادتك على قلبك مراوح
أنا: ايه يا عم انت حتطلع زعلك عليا .. ايه بس اللى حصل ؟
السائق: ركب معايا واحد من مدينة نصر وقاللى المهندسين .. السكة زحمة والكوبرى كان واقف خالص .. جيبنا نزلنا كورنيش العجوزة قال لى ادخل على ميدان سفنكس .. دخلت .. قال لى لف من أول لفة واركن هنا بعد عمر أفندى علشان حنعمل كمين ..؟؟
كمين .. قلت فى نفسى يا نهار اسود .. المهم طلع أمين شرطة لابس مدنى .. طبعا مش حيدفع حاجه .. وقفت من هنا لقيتى بيقول لى رخصك .. ؟؟
قلت له ليه ؟؟ يا باشا انا معملتش حاجه ؟ .. المهم طلعت له خمسه جنيه .. رماهم فى وشى..
أنا: ايه ما رضاش ياخد فلوس ؟
السائق: هاهاهاها .. لأ طبعا قال لى ما ينفعوش ... وما سابنيش الا لما أخد عشرين جنيه .. ونزل ابن الـ .... والله كان هاين عليا اطبق فى زمارة رقبته .. العشرين جنيه دول كانوا كل اللى اشتغلت بيهم طول النهار بعد ما حطيت البنزين .. بس فكرت فى عيالى والولية
بس أنا حمار .. انا دلوقتى حاموت من الغيظ .. كنت موته وأهى موته بموته

أنا: هى البلطجة كده عينى عينك
السائق: بلطجة ... دا مفيش حد منهم مش كده (نصحنى البعض بأن أكتب معظمهم وليس ما قاله السائق لكنى لم آخذ بالنصيحة )
الله يخرب بيوتهم زى ما خاربين بيتنا يوماتى


من أهم الموضوعات المحببة لدى سائقى التاكسى السب والدعاء على وزارة الداخلية واحترامها وتبجيلها فى نفس الوقت فالسائقون وادارة المرور فى الداخلية .. موجودان دائما فى الشارع .. والقصص فى هذا الموضوع عن تلك المواجهات كثيرة .. ولكن تلك القصة صفعتنى على وجهى بعنف

وقد سمعت كثيرا عن أمين الشرطة الذى كان حلما جميلا فى أوائل السبعينيات .. أمينا على الشوارع فى بدلته الجميلة .. يسير بها متأنقا ويا أرض اتهدى .. ومن منا لايتذكر كلمات صلاح جاهين فى فيلم خلى بالك من زوزو (انتاج 1972) وهو يقارن أمين الشرطة بالديبلوماسى .. اسم الله .....

كيف تحول هذا الحلو إلى كابوس على قلب الشارع المصرى خلال الثلاثين عاما الأخيرة ؟


بصراحه .. ولأننى شخصيا صادفت تلك النوعية من المرتشين علنا فى كمائن المرور .. عافت نفسى ألتقاط طرف خيط الحديث هذه المرة
وكلنا عارفين .. ان ديننا الحنيف يلعن المرتشى ...
اللهم أصلح حالنا وحال أهل هذا البلد .. آمين

احمد عبد الحليم
08-10-2009, 02:08 AM
الله يا باشمهندس ايه الموضوع الرائع دة بجد الوان من الحياة ممكن نقابلها كل يوم

ولو تأملنا المواقف دي هنخرج منها بعظات كتيييييييير

بجد انا بشكرك علي الموضوع الراقي دة يا باشمهندس محمد

ميرا مار
08-11-2009, 06:30 PM
شكرا لك يا بشمهندس

القصة فعلا بتتكرر فى كل يوم .. والناس بتستنى الرشوة عادى كدا

لدرجة ساعات الواحد بيتكسف من نفسه من كتر ماهم يحسسوك انه هو دا الصح

ولما تخاف من ربنا وماترضاش تدى.. تلاقيهم بيبصولك بصة غريبة
بجد حسبى الله ونعم الوكيل فى اى انسان خرب المجتمع دا..

Mohamed Hashem
08-11-2009, 09:30 PM
الله يا باشمهندس ايه الموضوع الرائع دة بجد الوان من الحياة ممكن نقابلها كل يوم



ولو تأملنا المواقف دي هنخرج منها بعظات كتيييييييير


بجد انا بشكرك علي الموضوع الراقي دة يا باشمهندس محمد





شكرا لك يا بشمهندس


القصة فعلا بتتكرر فى كل يوم .. والناس بتستنى الرشوة عادى كدا


لدرجة ساعات الواحد بيتكسف من نفسه من كتر ماهم يحسسوك انه هو دا الصح


ولما تخاف من ربنا وماترضاش تدى.. تلاقيهم بيبصولك بصة غريبة

بجد حسبى الله ونعم الوكيل فى اى انسان خرب المجتمع دا..



شكرا جزيلا لكم

Mohamed Hashem
08-11-2009, 09:42 PM
(8)

السائق : وبيسألوا الاقتصاد بايظ من ايه ؟
بايظ من الناس .. تصدق بلد زى مصر .. شعبها بيدفع أكتر من عشرين مليار جنيه فى السنة على التليفونات .. عشرين مليار جنيه ؟ يعنى لو ما اتكلمناش سنتين تلاته .. مصر حتختلف؟
شعب مهووس والله .. مش لاقى يأكل وكل واحد ماشى معاه محمول وفى بقه سيجارة
رجاله المفروض عندها مخاخ وبتدفع كل فلوسها على المصيبتين دول التليفونات والسجاير ، وفى الآخر يقولوا أصل البلد حالتها مش ولابد
كل فلوس الناس بتروح فى جيب أربع شركات .. الاتصالات وموبينيل وفودافون والشرقية للدخان

والاعلانات الله يخرب بيتها عماله تضغط على الناس اشتركوا فى موبينيل .. لا اشتركوا فى فودافون .. عالم مجنون
الاعلانات دى لازم تتمنع .. عالم أكاذيب ومفتوح علينا طول النهار وطول الليل .. ماشى فى الشارع شايف إعلانات .. تفتح الراديو إعلانات
تروح البيت تلاقى إعلانات فى التليفزيون ... وكلها كذب فى كذب
والناس عامله زى المواشى ماشية وراء إعلانات وعماله تكع فلوس وفى الآخر يقولوا لنا البلد مفيهاش فلوس
إزاى يعنى ؟ أمال المليارات اللى بتتصرف على كلام فى الهوا جايه منين ؟

مش الفلوس دى أول تروح على الأكل وعلى السكن وعلى التعليم وعلى الصحة .. بس تقولوا لمين .. اذا كان رئيس الوزارة بتاعنا هو رئيس التليفونات .. يعنى بتاع كلام فى الهوا

بس بصراحه المشكلة مش فى الحكومة المصيبة فى عبط الناس اللى عماله تفرتك فلوسها على الهواء والدخان
أنا لو مسكونى البلد دى يوم واحد لأ دقيقة واحدة
القرار الوحيد اللى ح أطلعه هو منع الاعلانات

زمان على أيامنا كانت الاعلانات لخدمة المجتمع همه كام اعلان وكان الله بالسر عليم
انما دلوقتى الاعلانات لخراب المجتمع وحتخربها وتقعد على تلها
وابقى قول ابو اسماعيل قال لى

ونلتقط طرف حديث السائق لأقول لكم ... ثانية واحده
معايا موبايل
الو .....

spider girl
08-21-2009, 01:18 AM
(5) جميله اوى
بس يا بشمهندس هوه فعلا حكايه المركب الى لفت ورجعت اليونان تانى دى؟
(6) القصه مؤثرة جدا و فيها رسائل كتيرة
بس الى يحسها والله الشاب ده لو اتوزع الامل الى عنده على
شبابنا كانوا بئو حاجه تانيه ربنا يهديهم جميعا
(7) القصه دى باه انا بشوفها بعينى كل يوم
ربنا يصلح حالهم فعلا
(8)ههههههههه طيب اتكلم بالليل علشان الدقيقه ارخص ههههه
فعلا والله زمنا اتقل بركته ربنا يستر على الى جى



شكرا ليك يا بشمهندس بتمتعنا والله بالقصص الجميله دى

Mohamed Hashem
08-21-2009, 01:30 AM
(9)

كنت مدعوا أنا وولدى التوأم بهاء وبدر إلى الغذاء عند صديقتنا سحر كنا نحن الثلاثة فى منتهى البهجة والانتشاء أنا لأن سحر طباخة محصلتش وبهاء وبدر لشوقهم للقاء أبنائها وركبنا تاكسى وانطلقنا

تفحصنى السائق مليا ثم نظر لولدى الجالسين فى الخلف فتفحصته أنا الآخر .. كان رجلا ضخما .. جذع شجرة جميز جالس بجانبى ، رأسه يكاد يلامس سقف السيارة والمقود بين يديه لعبه أطفال صغيرة .. أما وجهه فكأنما قد من صخر

السائق: ولاد سعادتك طبعا؟
أنا: أيوه ولادى
السائق: ربنا يخللى .. نعمة من عند ربنا ..
أنا: ربنا يخليك
السائق: الله يحفظهم لك
أنا: الله يحفظك
السائق: وعندهم كام سنة ؟
أنا: عشرة
السائق: ربنا يديهم طولة العمر
لم أرد لأننى كنت قد مللت هذه الاسطوانة المشروخة التى كان يمكن ألا تنتهى .. ولكن بعد فترة صمت قصيرة واصل السائق
السائق: أنا برضه مخلف ولد
أنا: ربنا يبارك لك فيه
السائق: الحمد لله الحمد لله كان نعمه من عند ربنا أنا اصلى بعد ما اتجوزت اكتشفنا ان فيه مشكله فى الخلفة قعدنا نجرى هنا وهنا لغاية ما ربنا كرمنا بعد سبع سنين وخلفنا حسين
ولكن آه ويطلق أهه مشروخه من القلب بعد ما تم أربع سنين اكتشفنا ان عنده سرطان .. وهو راقد دلوقتى فى معهد الأورام سعادتك ماتتخيلش حجم المصاريف اللى اتصرفت عليه .. شحت من المسجد وكتر خيرهم إدولى فلوس .. ولكن ما قضتش ولاد الحلال قالوا لى روح الكنيسة قلت لهم بس أنا مسلم قالوا لى روح برضه .. رحت واديتهم التقارير وراحوا كتر خيرهم مدينى فلوس برضه .. عمال اشحت من كل اللى حواليا بس مفيش فايده .. الصرف على العلاج أكثر
أمه ما ستحملتش .. جالها القلب .. وهى قاعدة فى معهد القلب برضه
أنا: إيه ده .. صحيح المؤمن منصاب
السائق: الحمد لله على كل شئ .. ربنا يخلى لك ولادك
أنا: ياسيدى متشكر وحالة ابنك ومراتك عامله ايه دلوقتى ؟
السائق: ربنا يتولانا جميعا .. أنا (ويطلق أهه من القلب) لما بدخل عليه فى المعهد .. وألاقيه بيزقطط ويصرخ ويقول أبويل جه .. أبويا جه .. قلبى بينخلع من ضلوعى .. ولما أحضنه وأخده فى صدرى بأقول يارب يكنب له النجاة .. قال هذه الجملة بنرة باكية .. وأمه مش عارف أعمل لها إيه؟ لازم تعمل عملية قلب .. يلا الحمد لله على كل شئ
ثم ينظر لأبنائى
السائق: ربنا يحفظهم لك
ثم ينظر إلى فى توسل وحنان
ورغم إعتيادى على هذا النوع من السائقين الذين يعملون جاهدين على استدرار العطف كى تعطيهم مزيدا من المال لكن هذا الرجل أثر فى تأثيرا كبيرا رغم يقينى أنه على الأغلب يكذب
وأن تلك القصة ملفقة تماما من أولها للحصول على نفحة نقدية سخيه فى نهاية المشوار ومع ذلك فقد تأثرت .. لا أعلم لماذا تأثرت ؟ محتمل نتيجة أداؤه البارع أو بسبب حجمه المقارب لشجرة الجميز ومحتمل أن هاجسا داخليا جعلنى أقول إن هناك إحتمالا ولو قليلا لمعهد السرطان ومعهد القلب وأى معهد آخر فى مخيلته

وعندما حركت أرنبه أنفى وأنا جالس فى منزل سحر ... استنشقت الدخان المحمل بروائح اللحم والبصل والقرفة فشعرت بحالة أرتياح وسلام وحكيت لسحر قصتى مع السائق .. والمدهش أنها لم تندهش:

سحر: دى حكاية متكررة جدا .. دى حصلت معايا ييجى ميت مرة ما احنا بقينا شعب شحاتين .. انت ما سمعتش دى
أنا: لأ
سحر: اللى ما اتسجنش فى فترة عبد الناصر مش حيتسجن أبدا واللى ما اتغناش فى فترة السادات مش حيتغنى ابدا واللى ما شحتش فى فترة مبارك مش حيشحت ابدا

قلت لها : اعتبرينى شحات وهاتى أى حاجه آكلها أنا واقع من الجوع


رمضان كريم .. كل سنة وانتو طيبين ..

Mohamed Hashem
08-21-2009, 01:37 AM
(5) جميله اوى


بس يا بشمهندس هوه فعلا حكايه المركب الى لفت ورجعت اليونان تانى دى؟
(6) القصه مؤثرة جدا و فيها رسائل كتيرة
بس الى يحسها والله الشاب ده لو اتوزع الامل الى عنده على
شبابنا كانوا بئو حاجه تانيه ربنا يهديهم جميعا
(7) القصه دى باه انا بشوفها بعينى كل يوم
ربنا يصلح حالهم فعلا
(8)ههههههههه طيب اتكلم بالليل علشان الدقيقه ارخص ههههه
فعلا والله زمنا اتقل بركته ربنا يستر على الى جى




شكرا ليك يا بشمهندس بتمتعنا والله بالقصص الجميله دى




شكرا جزيلا يا اسبايدر جريل
مرورك دايما مشرفنى
نورتى الموضوع

spider girl
08-21-2009, 01:47 AM
(9)

كنت مدعوا أنا وولدى التوأم بهاء وبدر إلى الغذاء عند صديقتنا سحر كنا نحن الثلاثة فى منتهى البهجة والانتشاء أنا لأن سحر طباخة محصلتش وبهاء وبدر لشوقهم للقاء أبنائها وركبنا تاكسى وانطلقنا

تفحصنى السائق مليا ثم نظر لولدى الجالسين فى الخلف فتفحصته أنا الآخر .. كان رجلا ضخما .. جذع شجرة جميز جالس بجانبى ، رأسه يكاد يلامس سقف السيارة والمقود بين يديه لعبه أطفال صغيرة .. أما وجهه فكأنما قد من صخر

السائق: ولاد سعادتك طبعا؟
أنا: أيوه ولادى
السائق: ربنا يخللى .. نعمة من عند ربنا ..
أنا: ربنا يخليك
السائق: الله يحفظهم لك
أنا: الله يحفظك
السائق: وعندهم كام سنة ؟
أنا: عشرة
السائق: ربنا يديهم طولة العمر
لم أرد لأننى كنت قد مللت هذه الاسطوانة المشروخة التى كان يمكن ألا تنتهى .. ولكن بعد فترة صمت قصيرة واصل السائق
السائق: أنا برضه مخلف ولد
أنا: ربنا يبارك لك فيه
السائق: الحمد لله الحمد لله كان نعمه من عند ربنا أنا اصلى بعد ما اتجوزت اكتشفنا ان فيه مشكله فى الخلفة قعدنا نجرى هنا وهنا لغاية ما ربنا كرمنا بعد سبع سنين وخلفنا حسين
ولكن آه ويطلق أهه مشروخه من القلب بعد ما تم أربع سنين اكتشفنا ان عنده سرطان .. وهو راقد دلوقتى فى معهد الأورام سعادتك ماتتخيلش حجم المصاريف اللى اتصرفت عليه .. شحت من المسجد وكتر خيرهم إدولى فلوس .. ولكن ما قضتش ولاد الحلال قالوا لى روح الكنيسة قلت لهم بس أنا مسلم قالوا لى روح برضه .. رحت واديتهم التقارير وراحوا كتر خيرهم مدينى فلوس برضه .. عمال اشحت من كل اللى حواليا بس مفيش فايده .. الصرف على العلاج أكثر
أمه ما ستحملتش .. جالها القلب .. وهى قاعدة فى معهد القلب برضه
أنا: إيه ده .. صحيح المؤمن منصاب
السائق: الحمد لله على كل شئ .. ربنا يخلى لك ولادك
أنا: ياسيدى متشكر وحالة ابنك ومراتك عامله ايه دلوقتى ؟
السائق: ربنا يتولانا جميعا .. أنا (ويطلق أهه من القلب) لما بدخل عليه فى المعهد .. وألاقيه بيزقطط ويصرخ ويقول أبويل جه .. أبويا جه .. قلبى بينخلع من ضلوعى .. ولما أحضنه وأخده فى صدرى بأقول يارب يكنب له النجاة .. قال هذه الجملة بنرة باكية .. وأمه مش عارف أعمل لها إيه؟ لازم تعمل عملية قلب .. يلا الحمد لله على كل شئ
ثم ينظر لأبنائى
السائق: ربنا يحفظهم لك
ثم ينظر إلى فى توسل وحنان
ورغم إعتيادى على هذا النوع من السائقين الذين يعملون جاهدين على استدرار العطف كى تعطيهم مزيدا من المال لكن هذا الرجل أثر فى تأثيرا كبيرا رغم يقينى أنه على الأغلب يكذب
وأن تلك القصة ملفقة تماما من أولها للحصول على نفحة نقدية سخيه فى نهاية المشوار ومع ذلك فقد تأثرت .. لا أعلم لماذا تأثرت ؟ محتمل نتيجة أداؤه البارع أو بسبب حجمه المقارب لشجرة الجميز ومحتمل أن هاجسا داخليا جعلنى أقول إن هناك إحتمالا ولو قليلا لمعهد السرطان ومعهد القلب وأى معهد آخر فى مخيلته

وعندما حركت أرنبه أنفى وأنا جالس فى منزل سحر ... استنشقت الدخان المحمل بروائح اللحم والبصل والقرفة فشعرت بحالة أرتياح وسلام وحكيت لسحر قصتى مع السائق .. والمدهش أنها لم تندهش:

سحر: دى حكاية متكررة جدا .. دى حصلت معايا ييجى ميت مرة ما احنا بقينا شعب شحاتين .. انت ما سمعتش دى
أنا: لأ
سحر: اللى ما اتسجنش فى فترة عبد الناصر مش حيتسجن أبدا واللى ما اتغناش فى فترة السادات مش حيتغنى ابدا واللى ما شحتش فى فترة مبارك مش حيشحت ابدا

قلت لها : اعتبرينى شحات وهاتى أى حاجه آكلها أنا واقع من الجوع


رمضان كريم .. كل سنة وانتو طيبين ..


هههههههههههههه
ههههههههههههههههه وحضرتك طيب
فعلا الى مشحتش دلوقتى مش هيعرف يشحت بعد كده

برجل
08-21-2009, 05:39 AM
موضوع ممتاز يا بشمهندس جزاك الله خيرا وفى أنتظار باقى الأجزاء أن شاء الله

Wild_Angel
08-22-2009, 08:58 PM
(7)كل شئ متوقع من الحكومه ومن الشرطه :(!!

(8) اشتركوا فى موبينيل .. لا اشتركوا فى فودافون .. عالم مجنون ---> فعلاً عالم بالاعلانات مجنون

(9) شر البلية ما يضحك

كل عام وانت بخير يا باشمهندس
منتظرين القادم بأذن الله

Mohamed Hashem
08-29-2009, 09:43 PM
شكرا جزيلا للجميع على تعليقاتهم الجميله
ونواصل تقديم الحلقات بعد الشهر المبارك
ان شاء الله
شكرا للمشرفين على تثبيت الموضوع

spider girl
09-05-2009, 12:55 AM
منتظرين الحلقات القادمه بعد رمضان ان شاءا لله

Wild_Angel
09-25-2009, 04:28 AM
منتظرين الحلقات الجديده يا باشمهندس

Soma
09-25-2009, 05:39 AM
الله ينور عليك يااستاذ محمد
الفكرة ممتازة جدا والموضوع جمييييييييييييل جدا جدا
جزاك الله كل خير

KAREEM
10-16-2009, 02:32 PM
ياباشمهندس انت بتجيب مواضيع من الاخر والله
لسه امبارح كانوا مستضافين أشرف عبد الباقى
واتكلم عن الكتاب دا وانا قررت انى أقراه
بعد ما عرفت فكرته
وان شاء الله حكمل قرايته
جزاك الله خير ياهندسة

KAREEM
10-16-2009, 02:37 PM
ههههههههههههههههه
حوة اوى دى
اللى ما اتسجنش فى فترة عبد الناصر مش حيتسجن أبدا واللى ما اتغناش فى فترة السادات مش حيتغنى ابدا واللى ما شحتش فى فترة مبارك مش حيشحت ابدا

Mohamed Hashem
10-17-2009, 03:00 AM
السلام عليكم ورحمه الله وبركاته
انا سعيد جدا يا شباب بتفاعلكم مع الموضوع
واشكركم على ذلك
بارك الله فيكم جميعا
وبعد جهد ليس بقليل وبمساعدة زميل عمل يعشق القراءة
وجدت نسخه الكتاب pdf فرفعته لكم لكى يتسنى للجميع قراءته كله
برغم ان ذلك يحرمنى من طلتكم الجميله عليا ومروركم الكريم وكلماتكم الرائعه
التى تشنف آذانى .. ولكنى أعتقد أن ذلك قد يشبع نهم من ينتظر الحلقة تلو الاخرى
المهم .. بدو ن إنزعاج .. أعتذر عن بعض الألفاظ التى قد تقرؤونها فى النص الأصلى
فالكاتب نقل الحوارات بين السائقين كما هى بلا أى تجميل أو إستعارة
كما أجازت له الرقابه ذلك .. فالنص الذى بين أيديكم هو النص المجاز من الرقابه وليس نصا مهربا أو ماشابه
مرة أخرى تحياتى .. وتمنياتى بقراءة ممتعه


الكتاب من هنا
http://www.2shared.com/file/8481716/fe6d9d03/_online.html

Wild_Angel
10-17-2009, 09:36 AM
يا خساره يا باشمهندس
:( :( :(

طب مين اللى حيلتقط الخيط؟
عموماً انا بشكر حضرتك جداً
واحنا عارفين حضرتك اد ايه مشغول

جزاك الله خيراً

spider girl
10-17-2009, 01:14 PM
جزاك الله كل خير
بس احنا كان بيعجبنا التقاط الخيط
وتعليق حضرتك وعلى العموم الف شكر طبعا
وربنا يوفق حضرتك احنا عارفين مشغولياتك

وجزاك الله كل خير مرة تانيه

Mohamed Hashem
10-18-2009, 10:57 PM
يا خساره يا باشمهندس

:( :( :(


طب مين اللى حيلتقط الخيط؟
عموماً انا بشكر حضرتك جداً
واحنا عارفين حضرتك اد ايه مشغول


جزاك الله خيراً





جزاك الله كل خير


بس احنا كان بيعجبنا التقاط الخيط
وتعليق حضرتك وعلى العموم الف شكر طبعا
وربنا يوفق حضرتك احنا عارفين مشغولياتك



وجزاك الله كل خير مرة تانيه



ياااه يا شباب مكنتش متصور انها عجبتكم قوى كده
على العموم معلش على موضوع الخيط ده
انا لما لقيت الملف .. قلت ارفعه من باب الاستمتاع بالوجبه كامله على بعض
على العموم انا طبعا متشكر جدا جدا على شعوركم النبيل وكلماتكم الرقيقة دى والف شكر ليكم

هبه ابراهيم
02-22-2010, 02:05 AM
كتاب هايل جدا
فعلا ممتع
مشكور

mohamed ali
02-25-2010, 03:05 PM
موضوع جميل تسلم ايديكى

Mohamed Hashem
04-01-2010, 03:47 PM
موضوع جميل تسلم ايديكى


تسلم يا محمد
انا اخوك فى الله محمد هاشم