قضية جادة : ترضى ان دينك يتعرض لهذا النوع من الاستغلال؟

http://sor.w2hm.com/files/image/e/9.gif

صباخ الخير ياجماعة .. عيد سعيد عليكم ان شاء الله

أحب في ظل الظروف اللي احنا فيها دي أطرح قضية حساسة شوية بس حابة نفتح فيها باب النقاش

هيا ملهاش علاقة بالعيد بس قصدت بالظروف ان شهر رمضان والعيد هو توقيت يخص المسلمين والعيون كلها بتكون علينا

ودا ممكن يلفت نظر الغريب للاسلام عشان يتعرف عليه بس للأسف في ناس مش مسلمين ممكن يبقو فاهمين الاسلام وبيستغلوه بشكل مهين لقيمته

أنا مش هطول في المقدمة دي أنا هدخل علطول في الموضوع

الموضوع ياجماعة هو اعتناق بعض المسيحيين للاسلام لاستخدام صلاحيات ميقدروش يحصلو عليها في دينهم او مذهبهم وبصراحة انا مش حابة كلمة اعتناق انا ببدلها بكلمه تحول

أكيد كلنا عارفين ان في ناس مسيحيين ومنهم المشهور كمان .. عشان يحصلو على حق الطلاق بيتحولو لدين الاسلام لمجرد نيل مطالبهم الاجتماعيه وحقوقهم وليس لانتمائهم لهذا الدين العظيم ..

مع اننا لو جينا نشوف المذاهب المسيحية هنلاقيها 3 مذاهب كاثوليكية وارثوذكس والتانية دي اغلب شعب مصر ماشي عليها والاخيرة هيا البروتستانت .. واحدة من المذاهب دي بتسمح للطلاق وممكن مثلا الارثوذكسي يتحول لبرتستانتي عشان يحصل على حق الطلاق

بس اتضح بعد كدا ان دا منافي للقانون وأنا هنقلكم بالضبط القانون اللي بتنص عليه المادة 113 من القانون الجديد

المادة 113 من القانون الموحد نجد أنه يجوز لأي من الزوجين طلب التطليق إذا ترك الزوج الآخر الدين المسيحي إلي الإلحاد أو إلي أي دين آخر أو مذهب لاتعترف به الكنائس المسيحية بمصر

طبعآ النص دا تقريبا قفل باب الرحمة بالنسبة للمسيحيين اللي عايزين يطلقو ويفضلو لسة على ديانتهم بس لما يضيق بيهم الحال يتحولو للاسلام بشكل صوري بس .. مين يرضى بالكلام دا ياجماعة دول حتى محصلوش مرتدين على الاقل المرتد بيكون اعتنق الاسلام عن قناعة بعدين ارتد

لكن دول مفيش قناعة من الاول دخلت قلبهم بل بالعكس هتلاقيهم كارهينو أكتر عشان هيبقو حاسين بالذنب انهم سابو دينهم لحق اجتماعي عارفين انهم مش هيقدرو يحصلو عليه الا في حالة واحدة وهي ثبوت الزنى على احد الزوجين

بصراحة انا عندي كلام كتير في الموضوع دا بس حبيت مرغيش كتير وهسيبلكم الفرصة عشان اسمع آرائكم وأنا آسفة جدآ لكل المسيحيين لكن دي قضية واقعية مش أكتر وانا مقصدش اي اهانة طبعا

والله يا ميمي الموضوع صعب جدا

بس طبعا بشكرك علي طرح هذه القضيه

وطبعا مفيش مسلم يرضي و الاسلام عموما

ميرداش ان اي حد يدخل الاسلام عشان يعرف يحصل علي حقوق اجتماعيه

بالشكل ده مسموش اسلام ابدا

لان النيه امر ضروري جدا في الاسلام

واتمني ان يكون في بعض التعاهدات علي من يريد الاسلام

واختبارات لمعرفه سبب دخول الشخص الاسلام من قبل الازهر الشريف

لانه هو الجهه المسئوله عن استخراج شهاده الاسلام

بجد مش عايز اطول اكتر من كده بس للموضوع بقيه

جزاكي الله كل خير

والله يا ميمي

موضوع في غيه الاهميه

بس ايه؟ الحل فيه

منقدرش نمنع الناس عن اعتناق الدين( الله اعلم بالنوايا)

وفي نفس الوقت الناس ديه عارف علي الدين المسيحي والاسلامي كمان

شكرا ليكي يا ميمي موضوع جميل

شكرآ على تعليقك ياكارمو ومشاركتك

وهيا كلمة انت قلتها وهي النية .. الله أعلم بالنوايا ولكل امرئ ما نوى

أكيد ربنا هيحاسبنا على أعمالنا والأعمال بالنيات

شكرآ ليك ياأسامه على اهتمامك ومشاركتك

وأكيد مش هنقدر نمنعهم جايز يكون في نيتهم حاجة بعدين لما يعتنقو الاسلام

ربنا يهديهم الله أعلم وربنا يهدي الجميع

انتى عدك حق فى اللى انتى قلتية
ودى اوجه الفشل فى نظامنا
اى فى تشريع القوانين
وانا مش عايز اخوض فى الدين المسيحى
علشان ميبقاش فى بعض اللغط والمشكلات
ولكن برده ده واقع وهما اللى ارتضوا بيه
ثالثا
احنا مش هنقدر نمنع حد من اعتناق الدين الاسلامى لاى سبب
ولكن عندنا الحكم على المرتدين من الدين الاسلامى
اللى القانون والشرع بيجرم كده
ومادام هو اعتنق الاسلام او هى علشان يطلق او ياخد حق مش من حقوقه
اكيد عارف انه القانون مش هيسمحله بالرجوع مره اخرى اعتناق المسيحية
فكل دى حاجات بتبقى محسوبة
وانتى كمان قلتى حاجه
ان احد مذاهب المسيحين بتتيح الطلاق
ليه هو ميحولش ليها
واعتقد ان مفيش حقوق الدوله بتديها لمسلم وبتمنعها لغير مسلم
ولو فيه ارجو انك توضيحيها

بعد كل ده اعتقد اناى واحد مسيحى عايز يخطو خطوه زى دى بيبقى عارف عواقبه واللى ممكن تنتهى بقتله من خلال اهله
وعلىفكره هما عندهم فى الدين وممكن حد مسيحى يقول لنا
انهم عندهم فى دينهم الهجره اى رجل هجر زوجته
وعلية بتقديم ما يراه بانه ستحق الهجره
زى دعوه الطلاق كده فى المحكمة

يعنى مش عارف
بس ده نقاش
وحبيت اقو رائى

وبجد موضوع هام جدا
شكرا ليكى جدا
على المواضيع الهامة دى
وارجو فتح باب النقاش بين باقى الاعضاء

الصراحه موضوع نقاش فعلا يستحق الف شكر ياميمى
طبعا اللى بيعمل كدة بيستغل الدين غلط لانه مش داخل بأقتناع يعنى داخل عشان مصلحه واللى يعمل كدة اعتقد انه ملهوش دين ولا شخصيه ولا كرامه يعنى ميستحقش لقب بنى آدم
فاللى عمل كدة خلااص هو كان محتاج الدين لامر من امور الدنيا والدين لايحتاج مثل هؤلاءلان الدين للدنيا والاخرة

شكرآ جدآ يابشمهندس محمود على رائيك الجميل دا وهو فعلا عندهم مذهب بيسمح بكدا بس القانون الظاهر مسيطر على الأحكام الدينية !! دي تبقى كارثة لو طلعلنا قانون منافي لحكم شرعي أو بيحلل حاجة حرام أو بيجيز حاجة مكروهة .. ربنا يستر من الحكومات وقرارت السياسية اللي تخلي الناس تعمل كدا وتغير ملتها عشان حق !! ميرسي ليك مرة تانية ونورتني بارائك الجادة

شكرآ ليك ياأحمد على مشاركتك وزي ما قلت الدين عندنا للدنيا وللآخرة وهما طلبوه للدنيا بس .. مش هقدر أحكم على صحة دينهم وهسيب طبعا الحكم لربنا .. وربنا يهدينا جميعآ شكرآ لمشاركتك الجميلة ونورتني