نائر: أنا عاوز اكلمك يا نئير في موضوع من مواضيع النقد الذاتي
نئير: أزاي يعني؟؟
نائر: أنا شايف اننا اتفه جيل جه البلد دي
نئير: ايه يا عم ؟؟ براحة علينا احنا ملنا يعني ما أحنا شباب زي الفل؟
نائر: لا انا حاسس ان الشباب اليومين دول تافه جداً
نئير: لا دي مشكلة الشباب على مر العصور من حاجة خاصة بالجيل ده يعني و بعدين بطل تردد كلام الأجيال اللي قبلينا دول بيقولوا كده عشان كان اللي اكبر منهم بيقولوا كده عليهم معقدين يعني ،نفض يا عم
نائر: خلينا نتكلم بموضوعية الشباب دلوقتي ثقافته محدودة جداً و ده في منهم في الجامعة و مبيعرفوش يكتبوا عربي كويس
نئير: بالعكس بقى الجيل ده أحسن من اللى قبله دلوقتي في مصر حوالى 12 مليون مستخدم انترنت معظمهم شباب يعني مستوى الثقافة في ارتفاع
نائر: انته بتشتغل نفسك ، اغلب الشباب بيدخلوا على النت عشان الشات و الفيس بوك و بيحملوا أغاني و افلام أو حتى بيدخلوا مواقع ملهاش لازمة ده اللي اغلب الشباب بيعملوا ، ده ممكن يكون النت سبب تخلف الجيل ده
نئير: يا بني ده حال الشباب في اي وقت ، لما كنا صغيرين كان كل الشباب مثلاً بيلبس تشيريت اسود عليه صورة واحد أجنبي كنيش كده مش عارف اسمه ايه
نائر: يخرب بيت الجهل اللي انته فيه ، قصدك جيفارا؟!!
نئير: الله ينور عليك ، انا عاوز اقولك ان معظم الشباب اللى كانوا عاملينه البب بتاعهم مكنوش يعرفوا هوه مين
نائر: مع التحفظ ان يكون قدوة الشباب اي شخص مش نابع من تاريخنا و حضارتنا و اسلامنا ، بس لما يبقي جيفارا قدوتك انته متعرفش هوه مين بالظبط و عمل ايه لشعبه ، احسن بكتير لما يبقي قدوتك واحد زي نجم الجيل اللي انته عارف كويس هوه مين و ايه التفاهه اللي هوه فيها و انه هربان من التجنيد
نئير: انته بتتكلم بسواد زي بتاع جرايد المعارضة، مش عيب ان الشباب يكون له اهتمامات كتير زي الفن و الرياضة ، قعد مع اي شاب و شوفه فاهم ازاي في الحاجات اللي بيحبها
نائر: المشكلة ان الشباب مبقاش بيتابع غير الكورة و اللي انته بتقول عليه فن ده فن هابط أو مش فن أصلاً الشباب حالته في الضياع
نئير: مفيش فايدة فيك مش ناوي تقلع النضارة السودة ابداً
