تحت الشجر
فى ليل طويل تحت الشجر
بين الفروع قاعد وحيد
اعد حبات المطر
و احب و اعشق من بعيد
سهران على ضى القمر
ادام عيونى الف بيت
لكن مفيش على البصر
غير بيت صغير بيت بسيط
ساكنة فيه احلى صبيه فالوجود
حسنها .. عدى الحقايق و الحدود
قلبى غفلنى و من ورايا عشقها موت
ولا شافش منها غير سكوت
و الوقت طال
و قلبى قد ما حبها .. قلبها ابدا ما مال
و انا اسأل هو حبها ليا شىء من المحال ؟
و جوة منى ميت سؤال
من غير جواب
جوايا نار قايدة و عذاب
من الاشتياق انا قلبى داب
و غصب عنى غيابه طاب
و النار تزيد
و اسكت و اقول المهم انه سعيد
و ايام تفوت و الامل لساه بعيد
و حبها طلبى الوحيد
و سنين سنين تفوت تفوت
و قلبها ما حاسينى
و اقطف فى اوراق الورود
و اسال و اقول بتحبينى ؟
يرد الورد باوراقه يقولى لا
الاقى دمعى يسبقنى بقول الاه
و جرحى جوة يألمنى يقولى انساه
و قلبى يقولى لحد امتى هستناه
طب حد يقولى ازاى حبيبتى تحبينى
فين الطريق قولولى حد يديلينى
كل اما احس بالامل .. تيجى الحقيقة تهدنى
و انا فالدنيا والله ما حاجة تهمنى
غير حبها
ارجوك يا شوق حن عليا و رحلها
و احكلها عنى من البداية و قولها
عن حبيب قضى عمره يحبها
دون البشر
و ادينى مستنى المعاد المنتظر
بين الفروع فليل طويل تحت الشجر
قاعد وحيد اعد حبات المطر
