المسابقة (عصابة الحرق والنار)
(عصابة الحرق والنار)
احنا عصابة الحرق والنار
احنا السلع غالية الاسعار
أنا الزيت أبو شكل جميل
سعرى يعلى جيل ورا جيل
أكبر وتكون ليا شهرة
وأساوى الورقة ام عشرة
وأنا السمنة الكيماوى
ورا لونى وريحتى بلاوى
تيجى غصب تشترينى
والبلدى منى نسينى
تروح زعلان عند البقال
تجيبنى عشان أكل العيال
وأنا الفول ملك العيلة
الشعب يجرى ورايا ليلة ورا ليلة
عمره ما يستغنى عنى
والطبلية تقول
من اوعى تحرمنى
بعد ما كنت بربع بقيت بنص
أتفرج تعالى وبص
تعالى وأتفرج عليا
وصلت للأسعار العالمية
ويا سلام عالسوس
جوى منى مدسوس
وأنت يا غلبان
تاكل ويستر الرحمن
ويتكلم زميلى العيش
هيصنعونى فى مخابز الجيش
وترجع ليا قيمتى
بعد ما اتهانت كرمتى
شوفتم
لسه هنوريكم
وعالنار هنشويكم
احنا عصابة الحرق والنار
احنا السلع غالية الاسعار
كتب : محمد صلاح الدين
