أنا وانتى قتلنا الحب
الآم الدنيا مليانى
ومش قادر على الكتمان
أدارى إزاى وأتحمل
وجرحى مايعرف النسيان
أخاف لما يطول ليلى
واخاف لما النهار بيبان
واصاحب كل يوم نجمه
وليلى ينام وانا سهران
وأقول إيه الى كان بينا؟
مشاعر ولا كان دخان!
لو الحب جمعنا فيوم
خسارة اليوم ده شمسه تبان
غرامنا حبيبتى مش لاقى
ولا صحرا ولا بستان
ولا جنه هنا يعيشها
ولا فى النار يلاقى مكان
هيتمشى مع الحيرة
مع الغيرة مع الاحزان
ضعيف عايش على ذكرى
بلا صاحب ولا خلان
قتلته معاكى وبأيدنا
أخدنا عزانا مالدخان
أخدنا لينا كام صورة
وكان الغدر بالألوان
ولا تلومى ولا ألومك
فيه سجن يلوم على السجان!
أنا وانتى وأشواقنا
بلا مركب ولا شطاّن
ومش باقيلنا غير صورة
بتنزف دمع عالجدران
وكام كلمه بأوراقنا
وكام وردة على العيدان
خديهم واحزنى وحدك
أنا راحل بلا عنوان
منتصر فتحى
