مجرد نقاش "مؤيدين ...معارضين"
انا هنتكلم عن وجهة نظرى ومش بفرضها على أى حد
*دلوقتى فى ناس مؤيدة لبقاء مبارك حتى انتهاء فترة رئاستة ..
*وفى ناس تانية وانا من ضمنهم معارضين بقاء مبارك ولابد ان يرحل اليوم وليس غد
*وفى ناس تالتة شايفة ان مبارك هو الحل ( زى بالظبط الاسلام هو الحل ) بمعنى انة يبقى ويظل فالحكم ليس فقط فترة رئاستة ولكن الى أمد الامدين واعتقد انهم اقلية الحمدلله
الاشخاص الاخيرة اللى بيقولوا ان مبارك هو الحل عندهم وجهات نظر تحترم وشايفين ان مبارك يصلح كرئيس فكل الازمنة وبكل الاوضاع وانا مش هقدر اعرف اوى اية وجهات نظرهم ولكن هما رائيهم كان ثابت من الاول متغيرش انة شخص كويس
أما الاشخاص اللى كانوا مع 25 يناير وبعد خطاب الرئيس الاخير اعدلوا عن رائيهم وقالوا ننتظر حتى انتهاء فترة رئاستة ثم يرحل لاء وفى منهم رجع فتفكيرة خالص وانضم الى من يهتف نعم لمبارك ...انا هتكلم عن اللى فهمتة عن وجهة نظرهم وبرضو حد يصححلى
هما شايفين ان لو مبارك رحل دلوقتى هتحصل فوضى وفى ناس هتحتلنا و قوى اجنبية هتدخل وان مبارك الأمن والامان والسلام ومن ضمن الكلام اللى شوفتة برضو ان البلد دلوقتى بتخسر المليارات والناس مش عارفة تعيش ولا عارفة تشوف اشغالها .....
المعارضين بقة لبقاء مبارك ليوم واحد ودى وجهة نظرى
اولا كرد على من اعدل عن تفكيرة بالنسبة للفوضى فأنا هتكلم بالادلة ان فى عز الازمة .لاء بلاش عز .. ان فى شدة الازمة و مكنش فى شرطى واحد يوحد ربنا والبلطجية منتشرة فكل مكان كنا منظمين لابعد الحدود وعملنا حاجة اسمها لجان شعبية وقدرنا نحمى بيوتنا ومناطقنا ودة خالنا مسئولين اكتر من الاول
وهنفضل لاخر وقت مسئولين ومحدش هيقدر يرهبنا او يفككنا
و بالنسبة أن فى قوى اجنبية ممكن تحتلنا فدة برضو عايزة ارد علية واقول ان مظاهراتنا وثابتنا واستمرانا على موقفنا واعدادانا الكبيرة اللى زلزلت الارض كفيلين جدااااااااااااااااا ان يخوفوا أى حد بيحاول بس مجرد محاولة التفكير ان يقرب لبلدنا لاننا زى مابنقول كدة بالعربى وسورى فالكلمة هنقطعة
تونس اعقدت شهر عشان اصلاحات لبلدها احنا اسبوع واحد عملنا اللى مقدرش حد يعملة لمدة 30 سنة
واعتقد ان مفيش حد هيختلف معايا انة ممكن يحارب ويعيش بكرامتة ولا انة يعيش فى سلام مذلول ومتهان ومش عارف يتنفس فى بلدة ,
مش مبارك هو اللى هيحمينا ..وكمعلومة دة بشر على فكرة زينا وهيجى وقت ويموت ويتوفاة الله واحنا برضو اللى هنكمل .
اخر حاجة لرأى اللى بيقول ان الدولة خسرت كتير والناس مش عارفة تشوف اشغالها ابسط حاجة بس هقولها عشان الرأى دة فى مليون حاجة ممكن الواحد يقولها ...احنا بقالنا 30 سنة خسرانين وميتين ومنتحرين و شباب غرقانين فالبحر وأُسر ماتوا من الفقر والامراض وانهم مش عارفين يعالجوا اولادهم وكرامتنا متهانة دة كان الواحد لو خرج برة بلادة كان بيتكسف يقول انة مصرى ..الاقتصاد والبورصة والكلام دة.. الشعب (وانا بتكلم عن الشعب الموجود فالشارع مش اللى فالجرايد والتليفزيون اللى هما ال 80 مليون ) ميعرفوش عنهم حاجة ... منعرفش غير ان المعاشات 50 جنية و60 جنية ومرتبات العاملين 120 فى شهر واللحمة بيعدوى عليها مرة فالشهر و المواصلات وعدم الاحساس بالادمية و......................
متحملين 30 سنة فابجملت بقة كام يوم الناس اللى هما تبع الاقتصاد والبورصة يتحملوا شوية وحتى لو احنا تأثرنا نستحمل عشان حريتنا وحياة افضل
اما عن مبارك ولية يرحل دلوقتى مش بكرة ولا لانتهاء فترة رئاستة
1-
لا يمكن إئتمانه، ولا على أي كلمة مما يقولها. بدون خلاف لهو تاريخ إجرامي من 30 عاماً يشهدون عليه .
والى اخر وقت وهو يستخف بنا واكبر دليل الحكومة والتى ذكر انها ستقيل ولم يتم غير مجرد تعديل وزارى لها ووزيرة القوى العاملة "عائشة عبد الهادى" والتى لابد ان تتحاكم فى ميدان عام لانها السبب فى البطالة مازلت فى مكانها ..ووزير البترول ووزير الاعلام و...........
2-
كل يوم يستمر فيه هو ونظامه، الذئاب الموجودة حوله تستمر في سرقة كل بوصة وأونصة من هذه البلاد، كما أننا نمد النظام الحاكم بفرصة لجمع شتات نفسه
3-
ستشهد البلاد أسوأ 8 شهور في تاريخها من القمع والإعتقالات والتعذيب من الآن وحتى سبتمبر -وربما لبعد ذلك-. فلنكن عقلانيين
تصريحات مبارك لم يضمن من خلالها لنا بأي شكل أو صورة أن الأمور ستتحسن، ولا حتى بتغير قانون الطواريء.
4-
لو توقفت التظاهرات الآن، لن تبدأ أبداً.. ليس بهذا الزخم والأعداد، وبالتالي يختفي الضغط عن الحكومة/السلطة الحاكمة وقد يقال انها كانت مجرد ذوبعة فنجان ليس أكتر ويبقى الوضع على ماهو علية
5-
الاهم ان أكثر من 500 شهيد ضحوا بحياتهم من أجل أن نحصل نحن على بعض الوعود الرخيصة وبدون أي ضمانات ولا تاريخ لمصداقية. ونحن نخاطر الآن بأن يذهب كل هذا سدىً، الـ500 شهيد أرادوا من مبارك الرحيل، أقل ما نفعله لتكريم وصيتهم هو أن نستمر لحين رحيله ببقية نظامه... ليس بعد تسعة أشهر بل اليوم
وفى حالة االقول انة رجل كبير وبالغ من العمر 62 عاما ففى سؤال جاء فى ذهنى اذا دخل احد بيتك وقتل ابيك او امك او حاول اغتصاب حقك و بيتك وهو امانك وملجأك وكان رجلاً كبير ستتركة وتقل "حرام دة راجل كبير فالسن خلية " ...ولا هتسلمة ؟؟؟
النقاش مفتوح لأبداء كل الأراء
وستظل مصر حرة
