لماذا خريجى اداب جغرافيا شعبة مساحة وخرائط مهندسين مساحة وليس أخصائيين او مساحين

لماذا خريجى اداب جغرافيا شعبة مساحة وخرائط مهندسين مساحة وليس أخصائيين او مساحين
1- لان المفروض القسم بتاعنا اللى هو الجغرافيا ميكونش تبع كلية الاداب لان احنا كلية علمية وعملية وليست كلية نظرية فا المفروض نكون تبع كلية علوم او تكون كلية لوحدها وتبقى شهادتها بكالوريوس علوم جغرافية .
2- احنا بندرس مساحة ارضية ومساحة بحرية ومساحة جوية ومفيش مهندس بيدرس كل دول فى كلية الهندسة .
3-الدول العربية دلوقتى بقى خريج المساحة فيها مهندس مساحة واشهرهم السعودية وقرارات وزارة العمل السعودية موجودة على النت.
4-لما تروح تشتغل فى موقع اومكان ومعاك عمال ومهندسين هيندوك فى الموقع بلقب اية (هيقولك يا استاذ ( دا غير كدة يبقى مهندس متخرج بعديك بكام سنة ويجى مش فاهم حاجة وينديك باسمك يا فلان وانت اكبر منه سننا وعلما.
5-لما تيجى تسافر يتكتبلك اية فى الباسبور مع العلم ان التخصص او اللقب بيتحدد علية المرتب .
فانا من رأى ان احنا ننضم لنقابة المهندسين او نعمل نقابة مهندسين المساحة والخرائط ونظم المعلومات الجغرافية وياريت اعرف رأيكم ولو سمحتوم تبحثوا على النت عشان تتاكدوا من كلامى وشكرا

ياااااه من زمان ما كتبتش مشاركات.

بص يا باشمهندس "تعليقا لا تحقيقا" يعني مجاملة إن شاء الله.
أخوك محمد الفرارجي شغال في شركة مالتي ناشيونال والحمد لله لفيت شويتين صحيح كل اللف في أفريقيا من موزمبيق لسويزي لاند لجنوب افريقيا لكينيا لرواندا واثيوبيا وحاليا غانا. مش هطول عليك اختطلت بناس كتير وجنسيات كتير وفهمت وعرفت يعني ايه تخصصنا. تخصصنا " لاهوه مساح". ولا هوه "مهندس مساحة". عشان ما تتعبش نفسك
عارف أمين الشرطة. أهوه إحنا بقى أمين شرطه إسم الله. فمتتعبش نفسك كتير وتوهم نفسك (معلش يشرفني اني اكون زي أخوك الكبير طبعا) أنا كده صريح شويتين وصراحتي بتزعل مني ناس كتير. معلش استحملني عشان الموضوع ده بيخنق ناس كتير خصوصا حديثي التخرج. أرجوكوا اعرفوا كويس اننا أخصائيي مساحة وخرايط (الشركات العالمية المحترمة)-ودي مش موجوده لا في مصر ولا في الدول العربية- الشركات دي بس هيه اللي بتقدر أخصائي المساحة والخرايط وبتميزه عن المساح وبتخليه يبقى مشرف على العمل المساحي بحكم إنه أكثر خبره وأكثر علما ودراسه. ودي مش هتلاقيها غير في الشركات الكبيرة زي إكسون موبيل وشيل وهيتاشي وغيرها.

أعيد كلامي تاني للتذكير احنابنتعامل في الشغل كمساحيين فقط لا غير " أمناء شرطة من الآخر". لا انت عسكري ولا انت ظابط. وموضوع اننا مهندسين أنا مختلف معاك فيه قلبا وقالبا للتالي:-
1- لااحنا درسنا مناهج هندسة عشان نبقى مهندسين ولا بنفكر كمهندسين.
2- معظمنا ادبي وما بعرفش يجمع غير بالآلة الحاسبة وتفكيرة على أده دا يبقى مهندس ازاي؟!.
3- لو احنا مهندسين ؟! هيبقى ليه؟ عشان بندرس خرايط؟ مش شرط. انت دراستك للخرايط بتؤهلك تكون أخصائي خرايط لكن هتشتغل مسااااااااح مش أخصائي.

يبقى نناضل ونتعب عشان نبقى أخصائيين مش مهندسين " رحم الله امرء عرف قدر نفسه".

آسف للإطاله
أخوك محمد

انا بحترم جدا راى الاستاذ محمد الفرجانى ولاكنى ليا تعقيب صغير هو انك لو اتعاملت على ان معلوماتك محدودة اقل من غيرك اى واحد مهما كان هتقل كتير من نفسك ولو اتعاملت على انك بشخصيتك ومعلوماتك اكثر من غيرك هترتاح وتعليقا على حتت الحساب فدى مش مسؤلية تخصصك لا دى مسؤلينا احنا وعدم تطوير النفس والذات . وانا ليا نظرة تانية غير النظرة بتاعتك فى ان اخصائى المساحة والخرائط مش امين شرطة ولا حاجة ولا عسكرى لا دى خبير يستعان به فى كافة الاعمال المنفذة وفى اوقات كتير ياخذ منه استشارات مساحية ولو واخد دورة فى مجال تخصص شركتك مثلا مجال المقاولات هتبقى ليك الاسبقية عن اى مهندس فى المزايا لشركتك ومدى استفادتها منك ومن خبراتك فى المجال الى بيميزك عن غيرك

. وليا اقتراح ممكن تاخد دورة هندسية زى دبلومة مثلا ويبقى ليك الاحقية انك تكون مهنس مثلا
. ممكن تنمى قدراتك فى شركتك الى انتا فيها وترقى نفسك لحد ماتوصل لمرتبة فى الوظائف العليا
وفى نهاية كلامى احب اختم بكلام يريح القلب بسم الله الرحمن الرحيم (وما دابة فى الارض الى وعلى الله رزقها ) صدق الله العظيم وقال الله تعلى اياضا يبسط الرزق لمن يشاء ويقدر صدق الله العظيم