السلام عليكم ورحمة الله وبركاته
جايبه النهارده كيك بالشيكولاته لاحلى اصحاب
مجرباها وبعمل الكيكة دى على طول يارب تجربوها تعجبكم انتوا كمان نبدأ بقى
المقادير
2كوب دقيق - باكوا بيكنج بودر - ملعقتين كبيرة سمنه وحبة زيت - كوب سكر - باكو فانيليا -
3 بيضات - كوب لبن - ملعقتين (ملعقة الارز ) كاكاو بودرة خام (من غير سكر) - ملعقتين صغيرين قرفه (ملعقة الشاى) واللى مش بيحب القرفه ممكن ملعقه واحده او شويه صغيرة تديها طعم مميز
تعالو بقى نشوف الطريقة :
بصوا فى الاول نشغل الفرن على اعلى درجه عشان يكون جاهز
1- ننخل الدقيق ونضع معه البيكنج بودر يتنخلوا مع بعض ونسيبهم دلوقتى
2- نضع السمنه والزيت والسكر فى اناء غو يط ويضرب جيدا بمضرب البيض
ونكون محضرين البيض بالفانيليا فى طبق صغير كده ونضربهم بالشوكه شويه وبعدين نضعهم مع الخليط
ويضربوا جيدا بالمضرب وبعدين نضع اللبن والكاكاو والقرفه ونضربهم كويس جدا بالمضرب
3- ناخذ من الخليط كوب منه ونسيبه لحين استخدامه
4- نضع مخلوط الدقيق والبيكنج بودر على الخليط السابق ونضربهم كويس جدا جدا
5- ندهن صينيه متوسطه او اصغر من متوسطه بحاجة بسيطه ندهنها بالسمن ونسخن الصينية شويه على النار
ونفرغ الخليط فى الصينيه ونضعها بالفرن وبعد ربع ساعه نطلعها ونتاكد انها استوت ازاى نعرف ناخد سكينة ونغرزها فيها ولما نطلعها لو مفيش حاجة فى السكينه يبقى كده خلاص استوت لو لسه تتحط تانى فى الفرن بس شويه صغيرة ونخلى بالنا منها واوعى تطفى الفرن خليه شغال عشان عايزينه
خلاص كده الكيك استوى اغرزى بقى السكينه فى كل مكان بالكيكه وممكن بالشوكة
فاكرين بقى الكوبايه اللى سيبناها نفرغها على الكيكه بس حبه حبه وبملعقه وتفريديها على الكيكه كلها
ونضعها بالفرن تانى لمدة 5 دقائق وممكن اقل لما تلاقى خلاص الشيكولاته جمدت بس ماتتعديش المده دى
ولما تبرد خالص توضع فى التلاجه لمده ساعه تقريبا وبالهنا والشفا
الكلام كتير بس عشان اوضح اكتر وكاتبه بالتفصيل الممل
ولو فيه اى ملاحظة ياريت تقولوها
وعايزة اشوف ارائكم
