مش كدة برده يا هدى؟
كلام على صح ميه الميه
عرض للطباعة
مش كدة برده يا هدى؟
كلام على صح ميه الميه
السلام عليكم ورحمة الله وبركاتة
مشكلتى انا بقى مش لقيالها حل
اتعرفت على شاب من عالشات
وبنتكلم لينا شهور طويلة
وبنتكلم فى التليفون وهو من بلد وانا من بلد
وكتير جدا حاولت ابعد عنة لكن مكنتش باعرف
حاسة انة خلاص بقى جزء من حياتى وهو كمان بيحبنى جدااااااا
وعايز يتقدملى
مش عارفة اوافق ولالا
طب لو وافقت اقول لاهلى عرفتة منين؟
مع انة اهلة ناس كويسين جداا ومحترمين
بس المشكلة انى مش هاعرف اواجة اهلى بية
اعمل اية انصحونى
جزاكم الله كل خير
ملحوظة
انة عمرة ماشافنى ولاشوفتة غير فى الصور فقط وهى كانت مرة واحدة
بس احنا تفكيرنا متشابة جدااااااااا
فكرة جميلة واللهم فك كرب كل مسلم
من وجهة نظرى
مافيش حاجة اسمها بحبه وبيحبنى من على الشات
لازم تكونى اتكلمتى معاه وجها لوجه .. جايز جدا يحسسك انه بيبكى وهو ميت من الضحك
وممكن يحسسك انه بيضحك وهو بيبكى
المقصود من كلامى انك عمرك ما تعرفى اذا كان اللى قدامك ده صادق ولا كاذب الا عن طريق حاجة واحدة بس وهى :
(تعبيرات وجهه)
اظن كدة الرسالة وصلت .. يعنى سيبك من الوهم الكبير اللى انتى عايشاه اللى اسمه الشات
والله الموفق
موضوع رائع يا راؤول
الله ينور عليك
كنت محتاجاه فعلا
بص هى مشكلة واحدة صاحبتى بس هى ما بتدخلشى على النت وكمان هى مش مساحة وانا نفسى افيدها فى المشكلة دى
عموما انا هاعرف هى وصلت لحد فين وهاخد رايكم
ميرسى جدا عالافكار المميزة دى
جزاك الله كل خير
اقتباس:
المشاركة الأصلية كتبت بواسطة مشكلتى انا
انا مع راى راؤول
بس بانصحك انا تعملى صلاة استخارة
ولو لقيتى نفسك مستريحة له ممكن تبدئى وتكلمى مامتك بينك وبينها وتستشيريها
ومادام هو عاوز ييجى يتقدملك يبقى نيته سليمة بس اوعى تقابليه برة البيت لان ده اللى هيثبتلك حسن نيته
وعموما ربنا معاكى
شكرا لمرورك يا اسراء
وبحييكى على ردك المعقول جدا
يا رب صاحبة المشكلة تكون لقت الحل
مشكلة صاحبتى انها بادئة من فترة صغيرة تشتغل
قابلت واحد طيب جدا كان بيساعدها ووقف معاها وعلمها حاجات كتير فى الشغل لدرجة انها مرة وقعت فى مشكلة وهو اللى لفت نظرها وحلها لها من غير ما حد من اللى معاهم يعرف
المهم فى يوم دخل واحد زميله يكلمه فدخلوها فى الكلام فسمعت كلام من صاحبه ما عجبهاش فاتلككت وخرجت من الاوضة وفضلت فترة مش بتكلمه ولما سالها ايه السبب فكرته بالموقف و قالت له كلام جامد شوية بس هو ما ردش عليها خالص وسكت
بعدها عرفت ان هو زعل من زميله بسبب الموضوع ده حاولت تصالحه قالها ما تتكلمشى فى الموضوع ده تانى ولحد دلوقتى هى شايفة فى عينيه نظرة زعل منها باينة اوى وهى حاسة انه قاصد يوريهالها
المشكلة انه قدام الناس بيعاملها احسن معاملة ولسه بيقف معاها وكأن مفيش حاجة خالص وان غابت يوم يسال عنها لكن بينه وبينها زعلان اوى
هى محتارة تسيب الشغل ده واللا لا لانها عمرها ما هتكمل بالشكل ده وفى نفس الوقت صعبان عليها تخسره
بالله عليكم يا جماعة عاوزة رايكم
مع العلم ان الشغل ده مش مهم خالص بالنسبة لها ومستعدة تسيبه لو ده افضل له
واسفة للاطالة
والله انا مش شايف اى سبب ان صاحبة المشكلة تسيب الشغل بتاعها يعنى
وموضوع زعل زميلها منها مسير الايام تتداويه
ربنا عطانا نعمة كبيرة اوى احنا مش عارفين قيمتها
(النسيــــــــــــــــــــــــــــــــــــــــان)
واى شىء فى الدنيا بيتولد صغير وبعد كدة يكبر
ما عدا حاجة واحدة (الحزن او الزعل يعنى)
بيتولد كبير وبعد كدة يصغر
ودى وجهة نظرى .. قابلة للقبول وقابلة للرفض
شكرا يا اسراء لمشاركتك
بسم الله الرحمن الرحيم
مشكلتى انا
انى بحب واحد جداااااااااا جداااااااااااااااا
واحيانا بحس انة بيحبنى زى مابحبة واحيان تانية لا
بحس انى مش فى دماغة
بنتكلم كتير عالميل وكان عندى مشكلة هو اول واحد وقف جنبى فيها وقربنى لية
اما بيفتح ميلة اول مايبقى اون لاين ضربات قلبى بتزيد جدا
وايديا بتسق وباترعش جامد
وببقى ملهوفة علية اوى اوى
لكن باحس انة بيتقل عليا جامد اوى
مش عارفة اعمل معاة اية
انا لغاية دلوقتى مش مستقرة معاة على بر اذا كان بيحبنى ولالا
وفى حاجة كمان
انة عايز يقابلنى فى الكلية
انا لغاية دلوقتى رافضة
مش عارفة اوافق ولا لا
هو بيلمحلى انة عايز يتقدملى
بس مقلهاش مباشرة
انا مش عارفة اعمل اية
ومش قادرة ابعد عنة
حتى لو بعدت عنة ومنعت نفسى عنة بيفضل دايما فى بالى وتفكيرى
ياريت تفيدونى
السلام عليكم ورحمة الله وبركاته
يا صاحبة المشكلة مافيش مشكلة
انتى بتحبيه .. وهو بيلمحلك انه عايز يتقدملك
يبقى اكيد نيته خير واذا كان عايز يقابلك ده برده معقول
جايز جدا يصارحك بمشاعره نحيتك
من رأيى انك تقابليه وتسمعى منه
وده طبعا حيبين انه عايزك بجد ولا بيتسلى وخلاص
يا رب اكون قدرت اقدم جزء من المساعدة وتابعى الموضوع واكيد اخواتك هنا حيفيدوكى بأذن الله
هههههههههههههههههههههههههههههههاقتباس:
المشاركة الأصلية كتبت بواسطة مشكلتى انا
انتي شربات خالص
يعني انتي عاملة اشتراك مخصوص بانك عندك مشكلة
بصي يا ستي ومن أخ أكبر منك وبما يرضي الله.
موضوع الارتباط عن طريق وسائل التعارف المختلفة دي ما بينزليش من زور.
بيلمح لك؟
يعني لسه ما صرحش؟
طب ليه؟
وبعدين انتي متلهفة عليه ليه كده؟
ما ينفعش أصلا انتي لازم تكوني غالية قوي عشان يحافظ عليكي ده لو كان فيه ارتباط من أصله. مش تندلقي كده عليه ويا عالم هيرتبط بيكي وألا لأ.
وبعدين لو اتعلقتي بيه وطلع ولد مش متربي يبقى عليه العوض فيكي.
استعيني بالله كده وفكك من الكلام ده نسبة النجاح في الجواز بالطريقة دي ضعيفة جدا وما بتعمرش كل واحد في الطرفين بيتصدم بالطرف التاني لأنهم شافوا بعض بالكلام مش بالمواقف
وصدقيني لو شافك سهلة هترخصي عنده قوي.
بصي يا بنت الناس فيه حاجة اسمها جواز ومسئولية وبيت بتفتح ومصاريف لو لسه طالب يبقى صدقيني إلغي الموضوع من دماغك
هتعشمي نفسك وخلاص لأنه من الآخر مش هينفع لا أهلك هيوافقوا ولا أهله هيوافقوا.
لو الراجل شغال ويقدر يتحمل مسئولية ويفتح بيت يبقى خلاص الباب مفتوح ويتقدم وفيه حاجة اسمها خطوبة تعرفوا بعض زي ما انتوا عايزين.
إنما عايز يقابلك والكلام ده ما يصحش أصلا.
يخطب وخلاص حصل نصيب يبقى كملتوا على نور وما استمرتوش في الغلط.
ما حصلش نصيب يبقى عالأقل اكتسب قدر من الاحترام بإنه دخل رسمي
تحياتي ليكي ويا رب يوفقك ويحفظك
كدة يبقى عندك حلين
مستنين باقى الحلول علشان نساعد صاحبة المشكلة
والله الموفق
ولو ليكى نصيب فيه اكيد ربنا حيكرمك
السلام عليكم ورحمة الله وبركاتة
حبيبة قلبى انتى تاعبة نفسك اوى كدة لية
انا مع البشمهندس محمد الفرارجى فكل كلمة قالها
ولو نيتة خير مكانش يسمح لنفسة انة اصلا يفكر يقابلك من ورا اهلك
انتى حترخسى نفسك اووووووووى لو عملتى كدة
ومش حيحترمك بعد كدة حيقولك زى ماقابلتينى ممكن تقابلى غيرى وانتى فغنى عن دا كلة
لو انسان محترم حيدخل البيت من بابة
وربنا يوفقك ويحمينا جميعا
ايه يا جماعه ده كل المشاكل عاطفيه كده طب للاسف انا مليش فيها ومش باعرف احلها
يلا حصل خير ان شاء الله يبقى فى مشكله اعرف احلها معاكم
عندك حق والله كل المشاكل اللى جت عاطفية
مافيش ولا مشكلة مش عاطفية غير مشكلة واحدة او اتنين بالكتير
وربنا ما يجيب مشاكل
شكرا للمرور
بالنسبة للمشكلة الأخيرة أنا مع الرأي التاني وصدقيني أكيد اللي بينصحوكي دول هيكونوا هم اللي صح لأننا بنفكر في الموضوع من نظرة أبعد يعني تقدري تقولي بنفكر من برا الصندوق مش جواه
يعني أنت حاولي تفكري في الموضوع كأن واحده صاحبتك هي اللي في المشكلة دي أكيد هيكون ردك زيينا حاولي تفكري بعقلك شوية
وربنا يرزقك الزوج الصالح ويريح بالك وبالنا جميعا