لكل محبي الرعب والجن والعفاريت

انا حصلى الموقف دا كتير علي فكره

بشوف ناس كتير لاول مره واحس انى كنت اعرفهم من زمان
من غير ما نتكلم حتى مجرد ان عينى تيجى فى عينه

و الغريب فى الموضوع و الي بيخلينى اصدقه اكتر
ان الموضوع دا ما بيجيش من طرف واحد

من الطرفين
يعنى الاتنين بيحسوا نفس الحاجه لما بيشوفوا بعض اول مره

و الى بيأكد الكلام دا انه لما بتبصله و بتتمعن فيه لتكون تعرفه
بيعمل هو نفس الكلام و بيبصلك بتمعن
و عنيه بتسأل انا شوفتك فين قبل كده

و لدرجه انك لو قابلت حد فى الشارع ممكن ترفع ايدك تسلم عليه من بعيد
و هو حيردلك السلام مع انك متعرفهوش

شغل ارواح بقى

و الله يا جوووووووووودى انا لى حكايات مع الارواح و الجن والكلام ده
لكن انا كنت دايما بحلم بواحده و عمرى ما شوفتها و اول ما شوفتها هى اللى جت و قالت لى انا كنت بحلم بيك فعلا الارواح تتلاقى

يبقى انت أول حد مؤمن بالموضوع دا وان مش بالضروري تكونو اتكلمتو او اتقابلتو قبل كدا عشان تحسو بالألفة دي

بس يمكن تكون أرواحكم حست ببعضها ودا بردو ياخالد اللي بيخليك بردو

تشوف حد وتحش بالنفور منه بردو من غير ما يعملك حاجة

انا بردو مرة حصلي موقف اني كنت ماشية في الجامعة لوحدي وخارجة مروحة البيت وفي بنت كانت داخله رايحة كليتها

واحنا الاتنين شايفين بعض من بعيد هيا شايفاني وانا رايحة عليها وهيا شايفاني وانا جاية عليها وحسيت انها بصالي مع انها كانت بعيدة وهيا نفس الموضوع

بعدين بس عدت من جنبي حسيت بحاجة غريبة جدآ والله خليتني ارجع ابص عليها تاني ..والاقيها هيا كمان وقفت تبصلي

رجعت كملت طريقي وهيا كمان كملت طريقها وكأنها بتقولي متقلقيش هنتقابل تاني

---------------- الحكاية مخلصتش لحد هنا -----------------

والله العظيم اللي هقوله دا حصل وما يلفظ من قول الا لديه رقيب عتيد وربنا شاهد على كلامي

كنت مسافرة وركبت جنب بنت مخدتش بالي منها ولا هيا كمان وكنا في اول يوم في رمضان ومسافرين

فالسواق كان ماشي سريع جدآ جدآ ومن سرعته خبطنا ولد صغير عمره ميعديش الـ 7 سنين وفاكرة كويس اوي المنظر دا

حسيت بخبطة العربية في الولد الصغير وكنت مصدومة جدآ جدآ لان الولد من قوة الخبطة طار في الهوا لقدام والعربية اللي كنت راكباها داست عليه تاني

كان موقف بشع بشع بشع جدآ واحساس فزيع بس اللي حصل

ان لقيت البنت اللي جنبي ( اللي انا مش واخده بالي منها ) اتصدمت جامد من المنظر وراحت منزلة راسها في حضني وفضلت ماسكة فيا جامد

وانا بتلقائية بردو خبيت عنيها عشان متشوفش حاجة وحضنتها جامد اوي

وبعدين السواق من توتره وعصبيته نزلنا على الطريق السريع عشان ياخد سكة تانية ومحدش يعرف يجيبه وبقينا واقفين بنتين بس وسط رجالة في الشارع السريع

لما نزلت انا وهيا بصينا في وش بعض جامد وافتركنا بعض ..سبحااااان الله كأن في حاجة جامدة بتربط بيننا وخصوصآ الموقف الصعب اللي عشناه دا

الغريبة اني خدت رقمها وهيا خدت رقمي بس مشوفتهاش تاني خالص :(

مبسوطة على فكرة انك بتاخد وتدي معايا في الموضوع دا

ياريت ياسامو تحكيلنا الموضوع بالتفصيل :)

انا اقول لك
من زمااااااااااان كنت بحلم انى على شاطىء بحر و فى واحده واقفه على الشاطىء و بتنادى على باسمى و كل ما احاول انى اوصل لها تختفى و فى يوم من الايام و انا بحلم بيها شوفها و شوفت وشها و كلمتها و قالت لى انا اسمى شاهنده و صحيت من النوم
و فى يوم من الايام كنت فى سان استيفانو مول و كنت فى توكيل نايك بشترى حاجه من هناك و فجاه لقيتها فى وشى عينى جت فى عينها فجاه و احنا الاتنين فى نفس الوقت قولنا لبعض انا حلمت بيك فى نفس الوقت و نفس اللحظه فى نفس النفس
و بعد كده بقينا اصحاب مقربيـــــــــــــــــــن جدا جدا جدا لدرجه لا يمكن تصورها
لكن شاء القدر الا تدوم القصه و تتوفى شاهنده فى حادثه و فضلت معتزل الناس لمده اسبوعين حزنا عليها و مازلت حزينا عليها و عمر ما حد يقدر ياخد مكانتها
و لحد دلوقتى الخاتم اللى كان فى ايدها يوم الحدثه معاى و معلقه حلو رقبتى عشان تفضل فى ذهنى على طول الزمان
رحم الله امرأه كانت من اقرب الناس الى

موقف غرررريب جدآ جدآ سامو بجد

وربنا يرحمها انا بمجرد كلمات بسيطة منك عنها اتأثرت بيها وكان نفسي أعرفك ياشاهندا

دي لحظات مكنتش أحب اني افكرك بيها ياسامو لازم اقدملك اكتر من اعتذار لان فراق شخص بالشكل دا مؤثر جدآ

فبجد انا آسفة جدآ بس خليك متخيل دايمآ ان روحها معاك وممكن تكون ملازماك في كل مكان ومبسوطة منك

قدر الله و ما شاء فعل
انا عايز اقول ان فراق شاهندا كان صعب اوى اوى على
لدرجه انى اعتزلت الناس لفتره
لدرجه انى لو خلفت بنت حسميها شاهندا
و مافيش داعى انك تتاسفى يا جودى
انا عمرىما حنسى شاهندا

جميل اوى الكلام ده بس على فكره لو اتكلمنا عن سبب وجودهم هو هو سبب وجودنا ( وما خلقنا الجن والأنس الا ليعبدون ) صدق الله العظيم .

يعنى هما كمان اتخلقوا قبلنا بكتير وفى اعتقادى الشخصى ان الأنسان ممكن يكون جن بس مجسد والله اعلم بس ياريت بجد ياجماعه الى يتكلم فى

الموضوع ده ميستهزأش بيه عشان ميلاقيش عواقب هو ولا غيره ادها يعنى محدش يعمل فيها 7 رجاله فى بعض ليتعب .

احنا مش بنستهزأ بيه يامحرو ولسه شوية قدام هنتكلم بالتفصيل عن الجن

بس انا بنتكلم دلوقتي عن الارواح بس ...الارواح غير مخلوقات الجن

بنشوف هل ممكن الارواح تتقابل او لما بتروح فين وهل فعلا قصص الارواح اللي بنقراها بتكون منها شئ من الواقعية

زي مثلا صورة البن اللي اسمها جين وقصتها الغريبة

لكن بالنسبة للجن دا شئ مسلم بيه انها مخلوقات زيهم زينا مع فروقات بسيطة وهنتكلم عنها بعدين

اه فهمتك بس احظرى الخلط فى الأمور عشان ده موضوع حساس ممكن ناس تتخبط عندها الأفكار