فى الانتظار ياريس
واعذرنى انى مجوبتش
على الموقف التالت
ودا لانه فعلا صعب جدا
وصعب انى اكمل فى حالة زى دى
بس اللى انا اعرفه حاجة واحدة بس
ان الواحد لما بيتقى ربنا قبل جوازه
ربنا بيرزقه بواحدة برضو كانت متقية ربنا
ولو هو معملش اى علباقة اكيد
ربنا حيرزقه بواحدة ملهاش علاقة
قبل كدا (( الطيبات للطيبين الطيبون للطيبات ))
وشكر ليك ع الموضوع الجامد جدا دا
الموقف "4"
واقف قدام المرايا تصفر لحن قديم لـ " أم كلثوم " و انت بتعدل تسريحه شعرك للمره الـ 18 تقريبا ... و بعد ما اتاكدت ان مش هينفع يتعدل اكتر من كده خلاص ابتديت تراجع باقي حاجاتك و تشوف الفلوس في المحفظه ... من باب الاحتياط برضه نحط جزء منهم في حته تانيه لحسن تتسرق ولا حاجه يبقي منظرك ايه قدام خطيبتك بس
بعدين اخدت بالك ان كده هتفضل تطلع الفلوس من كذا حته و انت بتحاسب و هيبقي شكلك زي اللي سالف تمن العزومه .. لا يا عم خليهم في حته واحده ارحم ..
رشه برفان علي الماشي ... صحيح انت لسه مستحمي و زي الفل بس ميضرش ...
النهارده ناوي تكلمها في موضوع مهم و حيوي بالنسبه لك ... اغلب الظن هي مش هتعارض ... اكيد مش هتعارض ... ليه يعني تعارض ... انزل يا راجل و انت مطمن ال تعارض ال
قاعدين في الكافيه اخر انسجام و الجو هادي و درجه الحراره مناسبه لكافه عمليات الصيد و الملاحه
قلت مفيش بقي انسب من ده وقت .. سالتها بلهجة اللي بيتكلم في موضوع روتيني " هو انتي قدمتي استقالتك ولا هتستني لحد قبل الجواز "
البنت اتلغبطت شويه و بعدين قالت لنفسها غالبا هو دخل مواضيع في بعضها فحاولت تفهم منك " أستقاله ايه ؟؟"
" استقالتك من الشغل طبعا ... "
" و مين قال اني هستقيل من الشغل "
"و ليه لا ؟؟ ... احنا مش محتاجين شغلك في حاجه انتي عارفه ان مرتبي كبير الحمد لله و يكفي اننا نعيش في مستوي مرتاح .."
" مش موضوع فلوس .. انت عارف اني قطعت شوط كبير في شغلي .. انت عارف اني مرشحه امسك نائب فرع الشركه هنا .. عارف المركز ده في سني ده يعني ايه .. عارف كمان 3 او 5 سنين بس ممكن اكون وصلت لايه ؟"
" مهما كان اللي هتوصليله ... المفروض ان البيت و الاولاد و الزوج هما اهم حاجه عندك و بعدهم كل حاجه"
" و مين قال اني حاطه اي حاجه قبلهم ... انت مش المهم ترجع من شغلك تلاقي كل حاجه مزبوطه و الاكل جاهز و كل في التمام"
" لو الجواز اني ارجع الاقي الاكل جاهز و البيت مترتب يبقي افضل في بيت امي و هي افضل واحده بتقوم بالدور ده"
" يعني انت عايزيني اقعد بين 4 حيطان مش اقل من 10 ساعات يوميا لحد ما ترجعلي من الشغل شايل كيس الفاكهة اخدوا منك و انا بشخط في العيال ... انت عارف احنا في سنه كام"
" افهم من كده انك مصممه متسبيش شغلك" http://www.mesa7a.com/forum/images/e...es/eh_s(5).gif
" مش هسيب كل مجهودي ده خصوصا و انا اقدر اوفق بين البيت و الشغل "
المره دي مش هستني لما الامور تتعقد زي كل مشكله و يوصولوا لمرحله قلع الدبل
انا عايزك يا بطل تقولي ... لو دي خطيبتك .. ووصلت لمركز جيد في عملها .. بس برضوا انتوا مش محتاجين عملها ماديا ... هتصمم علي انها تسيب الشغل .. طب لو هي رفضت ممكن الموضوع يوصل لحد فين .. هل ممكن تسيبها مثلا لسبب زي ده
وحضرتك ... لو انتي مكان بطلة مشكلتنا ... ممكن تسيبي شغلك بعد ما وصلتي للمرحله دي لمجرد ان خطيبك مرتاح ماديا ... و لو هترفضي .. ممكن رفضك ده يوصل لدرجه انك تفضي الجوازه اذا هو صمم علي رايه
يلا شباب عايز لوكلوك في المشكله دي
عايز اعرف رأيكم ....
انا مش عارف اشكركم ازاى على متابعة المواقف ازاى
والردود الجميله دى
شكرا ليكم جميعا
ودلوقتى الموقف الرابع فى الاعلى
ياريت اعرف يه رئيكم
هو بصراحة موقف بيحصل كتير الايام ديه
بس هي حاجة من دول
لو الدخل قليل يبقي اكيد هشتغل و هو مش هيمانع
بس لو دخله كبير وعايزني اسيب الشغل
هحاول كتيرجداااااااا وازن اني اقنعه باني اقدر اوفق بين الشغل و البيت
بس لو مصمم و معاه طبعا ادلة مقنعة مش لا و خلاص
يبقي حسيبه بس متهيالي لو هو بيحبها بجد يسيبها تشتغل
ميرسي ليك يا محمود
الصراحه انا مش عاجبنى اسلوب الحوار دا
لانهم لو فعلا بيحبوا بعض عمر الحوار ما حيتطور بالشكل دا
بس ابسط حاجة لو اموضوع وصل لكدا
حيبقى كلمتين
خليكى فى شعلك
بس اى تاثير فى البيت فى تاديه واجبها مع الولاد و مع جوزها
حتسيبيه
و يبقى اتفاق من الاول مهما كان مركزها ساعتها
و تمام اوى كدا
اولا انت مشكور علي
المواقف الرائعه و الصعبه في نفس الوقت
الموقف ده صعب بس انا مش مع ان المراه تشتغل ده مش علشان اي سبب معين
و لكن لو انا مهيئ لها كل حاجه
و هي مش محتاجه حاجه يبقي مفسش داعي للشغل
لكن لو هي هتعرف تنظم نفسها بحيث اني ما احسش انها بتشتغل يعني شايفه شغل البيت كويس
و اسيبها شغاله لحد ما تزهق
لكن انا برضه مش مع ان المراه تشتغل
و انت مشكور مره تانيه
و نطلب منك المزيد من المواقف المحرجه و الصعبه دي
:1:
بصراحة انا لو اتحطيت فى الموقف دا
للأسف حبقى متشدد أوى لانى مش مأيد
ان مراتى تشتغل حتى لو كانت وزيرة
ايه اللى يخلينى ابهدل مراتى فى مواصلات وقرف
غير التحرش والحاجات الالى بسمع عنها
غير ان أصلا ربنا خلق الست ليها وظيفة سامية
أوى وهى تربية الاولاد ميقدرش عليها أى راجل
ومهما كان عمر ما الست حتوفق بين شغلها
وبيتها حتى لو بتشتغل 4 ساعات
بس لو خطيبتى فى احلة دى قالت لى سبب واحد مقنع
انها تشتغل غير انها تحقق ذاتها والكام دا كله لان رأيى الشخصى
ان كيان المرأة الحقيقى يبان فى البيت فى نجاحها فى المحافظة
على بيتها ونظافته وزوجها وعيالها فى المستقبل ان شاء الله
يعنى مثلا ممكن أوافق فى حالة واحدة بس انها تشتغل
انها بمجرد ما ربنا يرزقنا بالاولاد تسيب شغلها
وتكون مقتنعة بكدا بارادتها انها تتفرغ لعيالها
لانى أظن سعادة اى بنت انهات تلاقى عيالها أحسن منها
وانجح منها حتى عشان يحققوا اللى هى كانت عايزة تحققه وهو دا نجاحها الحقيقى
بس المبأ من أوله أنا رافضه وغالبا انا لما اخطب واكون مقتدر ان شاء الله
أكييييييييييد حيكون شرطى الأساسى وأنا بقرأ الفاتحة انها متشتغلش او تسيب الشغل
بمجرد الجواز والدخول فى الجد وهو دا موقفى ياباشا يابرنس ياملك المواقف الجامدة فعلا
جزاك الله خير على المواقف الحية من واقعنا اليوم فعلا واللى اكيد حنتعرض لها
لالالالالالا
يارب مكونش اتاخرت في الرد علي الموقف ده
لانه مهم جداااااااااا
اكيد طبعا لو خطيبي قالي الكلام بالطريقه دي
انا حضحك لسبب
انه تناسي شخصيتي خالص
لدرجه انه بيسالني علي حاجه تخصني
هو قررها من نفسه
اما بقي حعمل ايه فاكيد اني ححاول اقنعه بكل وسائل الاقناع المتاحه
و مش عشان اني احقق ذاتي بس
(مع انها حاجه مهمه)
عشان غالبا للاسف الست اللي بتعد في البيت بعد الزواج
بيحصل لها نوع من الاكتئاب البسيط
الشغل مش عشان انها تساعد في البيت
او عشان تثبت ذاتها
ده عامل مهم اوي في حياه اي حد راجل او ست
انه يحس ان في سبب يخليه ينزل و يشوف الدنيا كل يوم
ميبقاش محبوس و يحس بضغط نفسي
كمان الست اللي بتنزل كل يوم
من وجهه نظري انه بيجدد دايما روح الحياه بين الراجل و زوجته
لان للاسف بعد فتره بيحصل نوع من الملل في حياتهم
لكن لما ينزلوا همه الاتنين كل يوم
و يشوفوا ناس كتير
بيخليهم يجددوا الوجوه الي بشوفوها كل يوم
لان حتي لما بيجيبوا في الافلام راجل زهقان من البيت
بيجيبوا للاسف ان زوجته اعده في البيت
مشغوله بمشاكل العيال و البيت و الاكل
و هو غالبا يلفت نظره واحده تانيه تكون عامله زيه
الست قويه جدا و تقدر انها تلبي مسئوليات اكتر من حاجه
و انا ساعتها ححاول اني اقنعه بكل الكلام اللي وجعتلكوا دماغكوا بيه ده
:D:D:D:D
و حخليه يسيبني اجرب حتي سنه واحده بعد الزواج
عشان نكون بمراحل كتير في حياتنا
لو لقاني اني قصرت في حاجه
يبقي من حقه اني اسيبه و مش حعترض ساعتها
اسسسسسسسسسسسسسفه
بطول اوي
بس حبيت ابينلكوا محاسن عمل المراه
:):):)
بص انا اتحطيت في الموقف ده بس مع اختلاف في التفاصيل
ان انا اتخطبت وانا في اخر سنه يعني كنت لسه ما شتغلتش
وهو الحمد الله مش محتاج اني اساعده ولاني مش محبذا الشغل
اوي ولسه مالقتش شغل اصلا وافقت علي طلبه
بس لو انا بشتغل من الاول ووصلت لمكانه كويسه واتعودت علي الشغل وبقي
جزء مهم من حياتي صعب جدا ابطل شغل عشان هو عايز كده
اما لو بعد الجواز مقدرتش اوفق بين الابيت والشغل يبقي هو عنده حق
وكمان انا هعيش في بلد تانيه غير بلدي فكده كده ما فيش شغل
وبشكرررررررررررك
موقف محير فعلا
بس اعتقد لا لو مكانتي عاليا في شغلي مقدرش اضحي باللي وصلته عشان اي حد
وبعدين هو يهمه ايه غير اني ابقي محافظه علي كرامته وكل احتياجات بيته لو في يوم حصل خلل بسبب الشغل ده
يبقي اكيد هسيبه فورا واتحمل مسؤلية الخطاء
وبعدين كل الكلام ده نظري يعني انا مش متاكده اني لو عيشت الموقف فعلا وظروفي ساعتها هتوجهني ازاي يعني ممكن اوافق اني اسيب الشغل اصل اللي بيتفرج علي الموقف غير اللي عايش فيه؟؟؟
وطبعا اكيد شخصية اللي قدامي وثقافة واسلوبه في التعامل هتساعدني علي اتخاذ الرأي المناسب
موقف صعب جدا علي فكره
شكرا واسفه للاطاله