اقتباس:
المشاركة الأصلية كتبت بواسطة المهندس ايمن جمال
عدنا يا جودي
جاهزة؟
جاهزة يامون بس انت هتعود كم مرة : d
السؤال بيقول:
امته جودي بتحب تكون لوحدها؟
والله يابني علطول بكون لوحدي ، كنت بحب الوحدة اوي لغاية ما اتخنقت منها واتقلبت ضدي بدل ما كانت صديقتي بقت بتقتلني دلوقتي .
اكيد فيه موقف مر عليكي في حياتك و نفسك ان الموقف ده يعود من تاني ,ممكن تحكيهولنا؟
امممم اسئلتك يامون عايزه تفكير استنى باه اشغّل الذاكرة .. بص هجاوب الباقي وارجع على دا ،، خلاص رجعت اهو احلى موقف مر عليا يوم بطولة السباحة في الكويت سنة 2004 دي كانت آخر سنة ليا في الكويت وجاية بعدها على مصر فـ في اليوم دا خدت المركز الاول على مستوى كل الاندية وصوري نزلت في الجرايد وحسيت باهتمام فزيع من كل اللي حوليا غير فرحة بابا وماما بيا كانت لا توصف ، فدا كان اول احساس باني انجزت حاجة بجد كانت فرحة لا توصف لان مكنتش متوقعة اجيب العاشر حتى من البنات اللي شوفتهم معايا ههههههههههههههه فانا نفسي يرجع تاني عشان اشوف الفرحة الكبيرة دي في ماما وبابا
قدوتك في الحياة؟
بابا اكيد وكتير والله بيقلولي انتي نسخة طبق الاصل منه في التصرفات والشخصية وهكذا
ايه هيه الحاله اللي ممكن تكرهي فيها حد بجد؟
بجد بجد يبقى لما حد يغلط في ابويا او امي او اخويا مش بكرهه كمان ببقى عايزه اقتله 15 مرة
ممكن تقوليلي الفرق بين جودي من خمس سنين و جودي النهاردة ,اكيد فيه حاجه اتغيرت فيكي
ياااااه يامووون دا انت محدد المدة اللي فعلآ اتغيرت فيها 180 درجة ، بجد سؤال حلو ، بص في حاجات اتغيرت وفي حاجات لسه موجودة ، يعني مثلا من خمس سنين كنت معرفش اتصرف في اي حاجة ودايمآ خايفة دلوقتي الحمد لله معتمدة على نفسي تمامآ ومعدتش بخاف من حاجة بردو من 5 سنين كنت مش حاسة بقيمة اهلي وعلاقتنا ببعض مش قد كدا لكن دلوقتي علاقتنا ببعض زادت مليون مرة عن الاول وعرفت قيمتهم بجد بردو من 5 سنين كنت عصبية اوي لدرجة تكسير اي حاجة تقابلني دلوقتي اعصابي هادية جدآ وصعب اوي اتعصب ،، لكن الحاجات اللي فضلت باه الانطوائية وعدم الثقة في الآخرين والخجل نوعآ ما والحاجات دي باه يعني في حاجات كويسة وفي مش كويس
هل بتؤمني بالمثل اللي بيقول (عشان تكون انسان سعيد لازم تكون طفل سعيد)
بصراحة اول مرة اقراه ههههههههه بس انا شوية متفقة معاه وشوية لاء ، لان الطفل بيكون معلهوش اي مسؤولية والمفروض انت انسان كبير بتتحمل مسؤولياتك وكل ما التزمت بيها هتكون حياتك منضبطة اكتر وبالتالي هتكون سعيد في حياتك ومش حاسس باي ضغوط لكن لو هتفق معاه فدا عشان الطفل ملاك مش ممكن يحقد او يكره حد وممكن لو حد زعله يتسامح علطول وينساله الموقف اللي زعله .
امته ممكن تقولي انا اتخنقت منك يا (فلان) وياريت لو سمحت متكلمنيش تاني ابدا
والله يامون اضطريت اقولها لناس كتير لأن ساعات بتيجي عليا اوقات بكون فيها مضغوطة جامد وفي دماغي مليون حاجة عارف لما تحس ان المسؤولية كلها عليك مفيش حد هيشيلها معاك ؟ وبعدين ييجي حد يدلع عليك او يتقمص او يزعل منك على حاجات تافهة فبقوله الكلمة دي .. وممكن كمان اقولها للناس الرغايين اوي لدرجة تخنق ، بجد قابلني ناس قمة التجاهل متنفعش معاهم مهما عملت بقهم في ودانك ليل نهار فبتخنق اوي منهم وبيطلع مني الكلام دا غصب عني .
ممكن تحكيلنا عن اجمل قصة مرت في حياتك؟
اممممممم بردو دا عايز تشغيل ذاكرة طيب انا هطلع اجاوب السؤال اللي فوق وبعدين انزل لدا باه هههههههه ، خلاص جاوبت السؤال التاني وجيت على دا حاسة اني بلخبطكم هههههههههه المهم اجمل قصة مرت عليا هيا حصلت ع النت عمومآ وكانت من 3 سنين كدا ، كنت بدخل شات على الرومات بتاعة الياهو وبعدين اتعرفت على شاب هندي كان نفس عمري انا هتكلم بصراحة باه ماشي ، كان اسمه جولدي وبعدين الشاب دا بصراحة كنت برتاحله اوي اوي وبحسه زي المصريين كدا دمه خفيف ومحترم جدآ بس للاسف كان بوذي ، بعدين والله انا ما كنت بكلمه عن اي حاجة في الدين ، لقيته في يوم بيسألني عن ديني واتكلمنا اليوم دا كتير في الجانب دا بس وكان بصراحة بيستفزني اوي بكلامه عشان كل مفاهيمه عن الاسلام غلط في غلط بعدين الواد اختفى مدة كبيرة اوي وبعد فترة بفتح لقيته فاتح فرحنا اوي اننا اتكلمنا بعد كل المدة دي بعدين ( معلش انا بطول عشان بجد الحكاية حلوة ) المهم بعدين يامون ايه باه ، سألته كنت فين دا كله ؟ والله يامون اجابته كانت زي اللي هقولهالك دي .. قالي : كنت بدور عليه ، فسألته : بتدور على مين ؟ ، فقالي : على الاهك .. فاتنرفزت افتكرته بيتريق على اخر كلام بيننا .. فقلتله : طيب لقيته ؟ ، قالي : اه وجيت عشان اشكرك .. فمفهمتش زي ما تقول اتخيلت انه اسلم بس خايفة اسأله وميطلعش كدا ، بعيدن لقيته بيقولي انه أسلم وانه بيروح لجنة اسلامية عشان يتعلم اكتر عن الاسلام وانه لما بيصلي بيحس بخشوع رهيب بين ايدين ربنا ، كلامه هزني بصراحة ايدي وقفت عن الكتابة ، مكنتش متخيله حوار عادي هيخلي شخص زي دا يدور كدا ويسأل وربنا يهديه في الآخر . بجد ياموون دي من احلى المواقف اللي حصلتلي بجد بدون قصد ،ودلوقتي كلامنا منقطع من سنة ونص كدا لاني غيرت الايميل وكدا بس بسأل ربنا يثبته ويهديه أكتر
كفايه كدة ولا اكمل
لا كمل ياموون براحتك انت أسألتك بترجعني بذاكرتي لحاجات حلوة اوي بجد
لنا عودة
ان شاء الله
