يا جماعة نعمل اية فى مادة افريقيا بليز اااادخلوا ؟!؟

انا بجد مش عارف اعمل اية فى مادة جغرافية افريقيا ؟؟؟
الدكتور النهاردة فى المحاضرة كان بيقول عناوين رئيسية بدون شرح
وكان بيتكلم معانا فى مواضيع عامة وكان الكلام جميل وظريف
وكمان كان فى توزيع بسكويت والطلبة قاعدة فرحانة وبتضحك لحد ...
ما جت اخر المحاضرة والدكتور قال كدا خلصنا الفصل الخامس ...
وقال فاضل 3 محاضرات حناخد فيهم ال 3 فصول اللى بقيين !!!
والمحاضرة اللى فاتت قال الفصل التالت ذاكروة من الكتاب ومشرحش منة حاجة ..
ودخل على الفصل الرابع وهوا اصلا مرتبط بالفصل اللى قبلة ...


ارجو مكنش طولت عليكم بس واللة انا مش فاهم حاجة فى المادة دى ولما بفتح الكتاب بنسى اللى فاهمة فياريت اللى عندة اى معلومة عن المادة دى يدخل ويقولها او يسيب اى محاضرة
........... مستنى ردودكم ............

بص افريقيا مش بتتذاكر غير من الكتاب
افتح الكتاب واعمل ملخص بسيط وصدقنى الامتحان مش هيطلع منه انا مكنتش بحضر اى محاضره لإافريقيا ومع ذلك ذكرت من الكتاب وجبت تقدير
على فكره الامتحان فى اغلب الاحيان مش بيجى مقال وكده اسهل وبيلم درجات

وربنا معاك ومتخفش كده هى فى البدايه بس

سلام عليكم بص يا أخ أليكس.

الموضوع بسيط إن شاء الله.

أولا: تشوف الكتاب إللي بيشرح منه الدكتور. وبعد كده تمسك الفهرس المقرر عليك وتحفطه كويس جدا.

ثانيا: تمسك المواضيع الرئيسية . يعني مثلا أفريقيا بتدرسها جغرافية إقليمية يعني بتدرس فيها بنية وتضاريس وطبيعي وبشري.

يبقى تشوف المكون الأول في الفهرس وليكن مثلا البنية الطبيعية للقارة. وتشوف من الكتاب العناوين الرئيسية إللي في الفصل ده وتحفظها زي الفهرس تمام.

ثالثا: بعد ما تحفظ العناوين الرئيسية في كل فصل تدخل على العناوين الفرعية وبرضه تحفظها كويس وتسمع كل إللي حفظته بالترتيب الشجري يعني مثلا:

الفصل الأول البنية والتضاريس:

1- أهم العوامل المؤثرة في البنية.
- حركة تكوين القشرة الأرضية.
- حركة تكوين بحر تيثوس.
2- أهم العوامل المؤثرة في التضاريس.
- البراكين القديمة.
- حركة النحر السطحي للقشرة الأرضية بواسطة المياه.
3- تأثير الزمن الرابع على القارة.

وهكذا وبكده تقدر يبقى عندك عمود فقري للمادة كلها مكون من أهم العناصر للكتاب لو حفظته كويس هتفهم التسلسل بعد كده إن شاء الله
وهتبقى القراءة المتأنية كافية إنها تملا الفراغ إللي بين العناصر الأساسية.

رابعا: الخرايط لازم تحفظ خرايط لكل فصل عشان تقدر تبين إجابتك بخريطة واحرص على إن اجابة كل سؤال تبقى بخريطة عالأقل.

خامسا: مراجعة الامتحانات السابقة مع التركيز على الأسئلة المكررة.

آسف والله أنا بس معلوماتي قديمة شوية لأني درست المادة دي تقريبا سنة 1998. وكان كتاب دكتور أبوعيانة.

ربنا يوفقكوا

اقتباس:

---

المشاركة الأصلية كتبت بواسطة bata_batot

بص افريقيا مش بتتذاكر غير من الكتاب
افتح الكتاب واعمل ملخص بسيط وصدقنى الامتحان مش هيطلع منه انا مكنتش بحضر اى محاضره لإافريقيا ومع ذلك ذكرت من الكتاب وجبت تقدير
على فكره الامتحان فى اغلب الاحيان مش بيجى مقال وكده اسهل وبيلم درجات

وربنا معاك ومتخفش كده هى فى البدايه بس

---

مرسى يا Bata على النصيحة وعلى ردك الجميل .....

بشكرك يا بش مهندس محمد على مرورك
وانشاء اللة اعمل بالنصيحة وخلاص .....
مقدميش الا انى اذاكر من الكتاب وامرى للة ....

بعد ازنكم يا شباب اى حد يعرف طيب المقرر علينا فى جغرافيا افريقيا فصل كام وفصل كام مثلا او الى درسناة يقولى
والكشوف الجغرافية بردو صفحة كام او فصل كام لفصل كام فى الكتاب يقولى ويبقى مشكور جدا

مادة افريقيا انتوا كدة اخدتوا الفصل الاول ( الصفات العامة للقارات ) والتانية ( البنية والتركيب الجيولوجى ) والتالت ( التضاريس ) والرابع ( المناخ ) والخامس ( النبات ) وطبعا اخدتوا دولة اثيوبيا مع استاذ جابر وطبعا دية بالذات مفهاش كلهما هتتذاكر بالنص من السكشن مع اضافت شوية خرايط كدة
اما افريقيا صراحة شرح الدكتور مش وافى فى المادة لانه بيشرح المادة طبيعيا وليس اقليميا والكتاب بجد واحش اوى انا شفتة وصراح ربنا معاكم ولو حد عايز اى مسعدة يكلمنى على الخاص وانا تحت امرة


اما بالنسبة للكشوف فى مش هتتذاكر غير من المحاضرات بس لان الكتاب مفهوش اى حاجة من اللى انتوا خدتوا الا حاجات بسيطة جداوبس وربنا معاكم بجد فى المادتين دول

انا بشكر كل اللى اضافوا للموضوع ولى بصفة شخصية رغم انهم مش معانا فى سنة اولى ؟؟؟
لكن انا بلوم على سنه اولى اللى خايفين يقولوا اى حاجة عشان الدكتور قال محدش يدى محاضرات لحد وهدد الطلبة
اصلى احنا فى تانية اعدادى واللى حيدى محاضرة لحد حيضرب 10 عصيان وحيتزنب على السبورة كمان ...
بليز جماعة بس اعتبروا الموضوع لاغى ..

بص يا حبيبى ماده افريقيا دراسه اقليميه يعنى تحاول شوف اهم حاجه ايه اللى ممكن تعرفه عن الاقليم ده او المنطقه دى

من حيث تضاريسها وبنيتها الصخريه

مناخها

نباتها الطبيعى وتربتها

سكانها

وبعدين بيديك دوله او اتنين تطبق عليهم الدراسه دى

اهم حاجه الكتاب خصوصا لو بيدرسلكم الماده دكتور بكير الكتاب بيكون اساس

ومش شرط تلاقى اللى فى المحاضره مطابق للكتاب لا لانه الدكتور مجرد بيفتح النقاش وبيوضح الحاجات الل شايف ان صعب عليكم فهمها

انتوا طلبه جامعين يعنى خلاص نظام المدرس بيشربكم الدرس بمعلقه اتلغى دلوقتى انت طالب بتعتمد على نفسك بتاخد خبرت الدكتور تضافها الى الكتاب الى البحث فى المكتبه او على النت لو فى حاجه صعبه عليك

اهم شئ الخرائط اتعلموا رسم الخرائط كويس والرسومات ودعموا مذكرتكم بالمصطلحات الانجليزيه

اشكرك على مرورك يا حوريه
بس انا مش بطلب من الدكتور يشرح كل حاجة بس بنصحى الساعة 7
ويقول لينا الفصل اتشرح كان سبنا كملنا نوم ؟؟؟

بص ان هقولك تجربتى
عشان مشتتكش بس
انا كنت فى سنة اولى مبذاكرش
وافريقيا دى محضرتش فيها ولا محاضرة
وجيبت مقبول من الكتاب وذاكرته ليلتها بس
كقراية كدا عموما متقلقش ومتخليش كلامى دا
يخليك تكسل
واسمع كلام حورية اللى قالت لك عليه صح
اهتم بيه
- (ملامح عامة زى المساحة والموقع وكدا ...)
- الجغرافية الطبيعية ( جبال هضاب سهول......
- المناخ
- السكان
و1اكر الدولة التطبيقية او الدولتين
اللى قال لكم عليهم

أرجو أكون أفدتك ومتقلقش
أهم حاجة تكون هادى ومركز
وان شاء الله بالتوفيق

اولا : استعين بالله وابدأ انت وحط العبء الاكتر عليك مش على الدكتور لان

الدكتور بيشرح الاطار العام للمادة والتفاصيل متروكة ليك انك تفهمها



ثانيا : ممكن تلخص المادة لنفسك واعمل لكل فصل عناوين رئيسية وفرعية للفصل وتحفظهم وافهم كويس جدا المعلومات اللى تحت العناوين
ودى طريقة مجربة



يارب اكون اقدرت افيدك

ربنا معاكو ويوفقكوا

ربنا يخليكوا كلكم وبشكرك ياكريم و يا ندى وانا بجد استفدت من الاضافات دى كلها
وجارى التنفيذ .....

اقتباس:

---

المشاركة الأصلية كتبت بواسطة alex

بس انا مش بطلب من الدكتور يشرح كل حاجة بس بنصحى الساعة 7
ويقول لينا الفصل اتشرح كان سبنا كملنا نوم ؟؟؟

---

متنكرش يااليكس ان اللى حصل استفذ اللدكتور
وهو كمان مش صاحى من 7 الصبح عشان يقول الفصل اتشرح
هو صاحى ونازل من بيتة عشان يشرحلك
لكن اما يبقى فى استهزاء فى المحاضرة دا يستفذة
عالعموم حصل خير وركز فى الفصل اللى اتشرح على خريطة النبات وخريطة المناخ وحاول ترسمها وتوريها للدكتور وهو عمرة ماحيقولك لا مشوفهاش لو انت اجتهدت حتلاقى نتيجة لجهدك وربنا يوفقنا جميعا
والف شكر لمن وضع نصيحة لنا فى الموضوع
وعى فكرة مينفعش انك تسيب المادة لاخر يوم وتذاكرها من الكتاب
لازم كتاب ومحاضرات عشان هو دا اللى يفرق مابينك وبين اللى مش بيحضر محاضرات
ربنا يوفقنا جميعا واسفة للاطالة

دكتور محمد راشد عصبي جدا ... هو في طلبة عندنا في القسم استفذوه في كذا محاضرة اغلبهم بقصد و اقليه من غير قصد
ف بالتالي السيئه تعم ... و العصبيه دي كلها طلعت على الدفعه كلها

بص ... طول ما انت بتذاكر من المحاضرة و الكتاب و بتحل اسئله امتحانات ما تخافش من حاجه
اقعد اعمل ملخصات لنفسك و ذاكرها كويس و هتلاقي نفسك بتحل في الامتحان
صراحه ما اقدرش ازود حاجه بعد الكلام اللي اخواتنا في المنتدى قالوة
جزاكم الله كل خير

اقتباس:

---

المشاركة الأصلية كتبت بواسطة Queen of sorrow

وعلى فكرة مينفعش انك تسيب المادة لاخر يوم وتذاكرها من الكتاب
لازم كتاب ومحاضرات عشان هو دا اللى يفرق مابينك وبين اللى مش بيحضر محاضرات
ربنا يوفقنا جميعا واسفة للاطالة

---

بشكرك على مرورك وربنا يوفقنا كلنا

اقتباس:

---

المشاركة الأصلية كتبت بواسطة bondoq

بص ... طول ما انت بتذاكر من المحاضرة و الكتاب و بتحل اسئله امتحانات ما تخافش من حاجه
اقعد اعمل ملخصات لنفسك و ذاكرها كويس و هتلاقي نفسك بتحل في الامتحان
صراحه ما اقدرش ازود حاجه بعد الكلام اللي اخواتنا في المنتدى قالوة
جزاكم الله كل خير

---

بشكرك على مرورك يا بندق