مشكلة صديق عزيز عليا

السلام عليكم - الموضوع ده _ كتب بأذن من صاحب الموضوع الاساسي _
ياريت تعرفولو حل
لدي صديق خريج من أداب مساحه يعني معاه ليسانس أداب جغرافيا شعبة مساحه
صديقى عندو قريبتو في كلية الطب بشري هيكون معاها بكالوريس طب بشري
هوو كان عاوز يخطبها بعد التخرج بس هناك مشكلة قد لايرها البعض أنها مشكله ولكنها مشكلة في
دماغ المجتمع الشرقى هوو أزي يكوون معاه ليسانس أداب وهي معاها بكالوريس طب هناك فرق في مستوى التدرجي العلمي يعني تقدر تقول مفيش تكافؤ في شهاده و العيله كلها أجمعت على
أزاي هوو مساح ودكتوراه مينفعش طبعا ومن هنا اللى ذات الوقت هوو مش عارف اصلا يروح يتقدملها أولا هوو واقعي شايف أن مفيش تكافؤ علمي وثانيا حتى لو حصل هيقلو راح يخطب دكتورا وانتو عارفين الكلالام بقى مش بيخلص ...(صديقى في حالة سيئه جدا بسبب الموضوع ده )


أولا عاوز اعرف لو في حل للموضوع ده؟
ثانيا سؤال للبنات تقبلي ترتبطي بواحد أقل من مستواكي التعليمي ( الشهاده )؟
ثالثا سؤال للشباب - تقبل ترتبط بوحده أعلى من مستواك العلمي ؟

يعنى فى الموضوع دا ...انا مش عارفة فين المشكلة
طبعا التكافؤ مطلوب..
وهنا هو موجود..لانه هما الاتنين شهادات عليا..يعنى الفرق فى التخصص؟؟
مافيش مشكلة المشكلة جواه.. هو خايف من تفكير الناس
والناس اللى هو عاملهم حساب قوى دول..احسن منه فى ايه عشان يعمل حساب لافكار ماتت
وبعدين ..اهم شئ التقارب الفكرى وبردو التكافؤ الاجتماعى
لكن انا شايفة انه مافيش مشكلة..
قول لصاحبك
لو شايف انها انسانة محترمة تصلح تكون ام لاولاده
وان فى تفاهم بينها وبينه..يتوكل على الله ..ولا يخشى فى الحق لومة لائم..

والاهم
انها تكون شايفة اللى هو شايف..مش تجى فى اول مشكله تقوله(انا دكتورة)
وتكون عندها عقدة نقص فى اى جانب من شخصيتها تطلعها من النقطة دى
معلش اصلى شفت تجربة زى دى..بس اللى قالت كدة دى عندها خلل نفسى
مع ان الحاجات دى ماتت من زمان

واحنا الشباب لازم نكون افكار جديدة ونجبر الناس على احترامها..طالما صح

يارب اكون قدرت اساعده

الله يكون في عونه بجد
هو لسة في حد بيفكر بالطريقة دية

انا عايزة اعرف حاجة هو بيشتغل؟
لو كان بيشتغل في مجال المساحة
معلش في الكلمة دية ( حيعيشها احسن من الدكتوراه بتعتها دية )
و خلية متمسك و ميهمهوش كلام الاهل
و يحاول بكل الطرق انه يثبت انه احسن من الدكتور

اما بالنسبة علي السؤال فطبعا لو كان معاة شهادة عالية
بكلريوس بئة ليسنس مش فرقة
طبعا معنديش مانع المهم يعرف يفهمني صح

و شكرا اوي لك علي احساسك الجميل اتجاه مشكلة صاحبك

الله ينور عليكي يا مها مفيش بعد كلامك كلام

ومع احترامي لصاحبك المشكله فيه هو تقريبا يعني ازاي مش فخور بنفسه مهو ممكن دكتور وفاشل يبقي ايه لزمته المهم ان الانسان يبقي ناجح في مجاله وكل مجال له اهميه في الحياه والمساحه مش اي حاجه طبعا دي شغلها ممتاز

وطبعا مفيش حد بيفكر كده دلوقتي

ربنا يوفقه للخير ويحققله مناه

وكله قسمه ونصيب

انا عايزه أسال صاحبك سؤال

لو هو كان متفوق وأصبح معيد في الكلية وراح اتقدم هيرفضوه ؟! طبعآ لاء ازاي يرفضو معيد

هيقولو دا استاذ في الجامعة وممكن بكره يبقى دكتور بس تعالى نساله تاني انت كمعيد او دكتور كان معاك في الاول خالص ايه؟

هيقولك ليسانس آداب جغرافيا شعبة مساحة !! يبقى انت نفس الشخص اللي ممكن يرفضوه ممكن بردو يقبلوه

انا مش بقصد بكلامي انه لازم يبقى معيد او دكتور عشان يبقى من قيمتها لاء ابدآ ..انا أقصد انه لو ناجح في مجال تخصصه هيقدر يثبت مكانته قدام كل الناس وكل الشهادات التانية
في دكاترة ومهندسين وصيادلة كتير فاشلين صدقني وعمر ما كان مجرد نوع الشهادة مقياس لمكانة الشخص ! ومعلش الاتنين في كل الاحوال شهادات جامعية مفيش اي شئ يعيبه ومفيش مستويات بين الشهادات في حالة انه كان ثابت نفسه

لكن معلش ممكن البنت تكون متفهمة وكلو تمام والمشكلة تيجي من أهلها !! ساعتها مفيش حاجة بايده ولا بايدها وخصوصآ انها قريبته وانا حكاية القرايب مش بحبذها لانها هتخلق مشاكل في العيلة ، عمومآ انا من رايي يتكلم مع البنت ويشوف مدى تقبلها ليه واذا كانت متقبلاه يتجرأ ويتقدم بعد استشارة والده ووالدته وربنا يوفقهم

ها؟؟مارديتش علينا طلعت بحاجة من كلامنا؟؟

وشكرا يا علا لان وجهه نظرى عجبتك..واثنيتى عليها ربنا يكرمك يا حبيبتى

أولا أحب أشكر كل من شارك بوجهة نظره فيي هذا الموضوع
ثانيا لكن الحياه لا تمنح كل الامنيات
قررت
أن أنفذ حكم ألاعدام على هذا الحب على هذه الاحلام منذ الطفوله الى الان
وان اتنحى عن مجرد التفكير في هذا الموضوع و أعيش حياة بلا حياه
حتى أستطيع ان انتزع هذا الحب
مع الامنيات لها بالسعاده بما يناسبها

صديق أخصائي مساحه

احلى حاجة عملتها

ليه يابني كدة
هو عشان كلام الناس حتسبها
بص انت معاك شهادة و هي كمان و سوري في الكلام ده
"اذا كانت هي دكتورة فانت مهندس مساحة"انت المفروض تعمل الي عليك
1-تشتغل بشهادتك و في تقدم دايما فانت حط هدف قدامك و باذن الله ربنا حيوفقك
2- اتمسك بيها فربنا قال"اسعي يا عبد و انا اسعي معاك"
3- صلي استخارة عليها و المفروض لما تكون محتار بين حاجة اه او لا صلي استخارة و ربنا حيسهلك الطريق الي فيه الخير و بعد كدة اتقدملها
وافقوا يبقي الحمد لله و لو موافقوش يبقي قدر الله و ما شاء فعل
يا ريت صحبك يعمل الحاجات ديه و مش حيندم صدقني

الموضوع اساسا مفهوش مشكله خااااااااااالص

والله هو يروح يتقدم ولو اترفض يبقى هيا متستهلوس

ولو لتقبل يبقى وفر على نفسه الندم

وكل شىء قسمه ونصيييييييب

انا عايزة اعرف هو مستقلل بنفسة لية هو يعتبر مهندس مساحة وربنا يوفقة ويشتغل فى مجالة وميروحش يتقدم الا لما يشتغل بشهادتة ويكون جاهز طلما هما بصين للمركز معتقدش انهم هيرفضوة اما هيلاقوة شغال بشهدتة ومهندس وجاهز ومحترم وربنا يوفقة بس هو يعمل اللى يقدر علية وهى تعمل اللى تقدر علية وكل شيء قسمة ونصيب وربنا يسهلهم الحال.

اولا : لو على كلام صاحب الموضوع ( مهندس المساحه ) يبقى شباب المعاهد وكليات القاع ( زي ما بيقولوا عليها ) مش هيتجوزوا غير اللي معاهم دبلومات وثانويه واعداديه والكلام ده مش صح خالص .

ثانيا : ممكن الواحد يبقى جايب مجموع كليه عاليه ويدخل كليه اقل منها بس هو بيحبها وحاسس انه هيقدر يمشي فيها .

أنا شايف ان القرار ده هو الاصح

انا اعتقد ان الموضوع ده لا بيرجعلنا و لا بيرجع لاي حد غير ليكم انتوا الاتنين

معتقدش انه ممكن تترفض للسبب الضعيف ده

متاكد ان دي كل الاسباب و لو مفيش اسباب تانيه توكل على ربنا و متوقفش حد في سكتك و ربنا يوفقك

اولا انا احب اصححلك معلومه

مين الى قالك ان بكالريوس طب احسن من ليسانس اداب؟؟؟

الاتنين مؤهل عالى
فرق التخصص


طب انا واحد مبحبش الطب
و دخلت اداب لانى بحب الجغرفيا مثلا
دا ميقللش منى
غير كده ان شغلك فى المساحه ممكن يعيشها احسن من مرتبها هى و الى حتتجوزه لو كان دكتور زيها

اعمل الي عليك و انقدم

لو كان ليك و ربنا كاتبهولك حيكون ليك
لو مش ليك ربنا عارف الخير فين و بيوجهك ليه غصب عنك

أناسف من اللي هقولوو
مجتمعنا بل علمنا ينظر الى طب بانه أول كليات الفمه و أن أداب عمري ما سمعت أنها كلية فمه
غير كدا لو أخذنا السلم التدرجي اللي بقول عليه هنلقيه صحيح
خلينا واقعين هناك فرق كبير جدا جدا بين أداب وطب
انا مثلا عمري ماتوقعت اني أدخل أداب كنت بحلم بهندسه كنت بالنسبه لي أداب كلية الفشلين أو التعبير الدقبق أنها تنضم للكليات الادنى زي مافي كليات قمه
بصوا من الاخر أنا أريد و أنت تريد والله يفعل ما يرد
وأذا علمتم مافي الغيب لخترتم الواقع
بصراحه هما دول الجملتين المصبريني في الكليه ديه
أسف على الاطاله

السلام عليكم
بالنسبة للموضوع ده انا شايفة ان احسن حاجة انه يصلي ويستخير ربنا قبل ما يتقدم ليها والي فيه الخير ربنا حيقدمه
وعسى ان تكرهوا شيئا وهو خير لكم وعسى ان تحبوا شيئا وهو شر لكم والله يعلم وانتم لا تعلمون