***عشان أنت مصرى (( لشاعر أحمد فؤاد ))***
مع الإعتذار لكل الأخوه المصريين
**********
عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى
**********
عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك
**********
ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله
**********
بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق
**********
هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت
**********
عشان انت مصرى وده للاسف
فلازم تاسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف
مش انت اللى مصرى؟؟؟ جتك القرف
:D:D:D
السلام عليكم ورحمة الله وبركاته
مع الاعتذار ليك ياإلدو
ومع أعتذارى لأحمد فؤاد نجم شخصيا
القصيدة نوع من انواع الاحباط المغلف والياس المجمل اللى بيحاول ناس كتير يزرعوه جوه كل مصرى
فعفوا احمد فؤاد نجم ...قصيدتك لا تخص بها المصريين ولكن إن شئت خص بها نفسك
وعشان إنت مصرى ارفع راسك لفوق
ارفع راسك لفوق
ارفع راسك لفوق
والكلمات دى تحت عنوان...
تعرفها هى مين؟
كلمات بسيطة موجودة على المنتدى أتمنى من حضرتك تقرأها..وياريت يقرأها كل مصرى
واتمنى تكون كافية
السلام عليكم ورحمة الله وبركاته
اقتباس:
المشاركة الأصلية كتبت بواسطة ياسمين
والله يا سارة هو بيقول واقع ملموس حاليا
حاليا هو بينقد وضع مصر الحالى
وهذا هو الوجه الاخر لمصر
واقع فينا إحنا مصر ملهاش ذنب فيه
(إن الله لا يغير ما بقوم حتى يغيروا ما بأنفسهم)
اقتباس:
المشاركة الأصلية كتبت بواسطة محب للرحمة
والله دى حقيقة ملموسة وواقع صحيح نعيش فيه
إحنا اللى معيشين نفسنا بيه
اقتباس:
المشاركة الأصلية كتبت بواسطة elodo
يا سارة هو هنا احمد فؤاد بيقول واقع احنا عايشينه مش بيقول كلام من دماغه ولا يقصد كمان يزرع الاحباط جوه الناس زى ما بتقولى
مناقشة الواقه ياإلدو عشان فعلا يبقا إنسان منصف يقدم حل وينقد بالحق
مش كلام فى الهوا وأهو شويه كلام يزهق الناس فى عيشيتها وخلاص
وبردو ميحملش البلد كل حاجة
