برنامج اللي بالي بالك ... الحلقة الثانية ( الانسان الفرفور ) صفحة 10

**Hassan Mohamed** · 10-20-2009, 09:57 PM

الحلقة هتبدا ان شاء الله بعد لحظات

تاااابعونا

**dolly** · 10-20-2009, 10:08 PM

حرام عليك نزل الحلقة عندنا محاضرات الصبح اادددددددددددده

**Hassan Mohamed** · 10-20-2009, 10:11 PM

حاضر يا فندم الصبر حلو الحلقة يعني بنشطب فيها وهتنزل علطول ان شاء الله

**Mimi** · 10-20-2009, 10:17 PM

وبعد النجاح الباهر.. النجاح المستفز.. النجاح العظيم اللي حققته أول حلقة عن أول سلبية في الانسان المصري أحب وبعد اذن حسن وبعد اذن الجميع اني اتكلم عن سلبية تانية في الانسان المصري الذي تتعدد فيه السلبيات

وعنوان هذه الحلقة سيكون عن "الفرافير"

ودا مصطلح ظهر في الآونة الاخيرة والنوعية دي فعلا بقت منتشرة وغالبا في المدن أكتر

خلونا بأه طالما الموضوع ديموقراطي زي ما قال حسن فنتكلم باستفاضة شوية وناخد راحتنا بأه في الكلام عشان بجد عندي كلام كتير مش عارفه هلحق أقوله كله ولا لاء

الفرفور هو عدو الولد البيئة وتاني وصف دا عايزله موضوع تاني اسيبه لحد تاني بأه

نبدأ كدا بفيديو صغير يدوب عشرين ثانية نشوف فيه عينة من الفرافير

ودلوقتي هعرفكم على الواد الفرفور من وجهة نظري

الفرفور هو الفافي اللي لحد ما يبقى عنده 20 سنة يقول دادي ومامي وفي تصرفاته تحس ان البنت الرقيقة قوية عنه

يعني زحمة يتخنق منها مينفعش يخرج في زحمة لانه ممكن يدوخ ويقع من طوله ولو اتزنق مثلا وقولتله يركب مواصلات يبقى تقوله انتحر احسنلك

الميكروباص والتاكسي حتى بالنسباله عربية كارو مستحيل يفكر حتى انه يركبهم

تبقى بتتكلم معاه في موضوع وهو مش قادر يستوعب عشان بتكلمه عربي لاء لازم تكلمه انجليزي وممكن يسمحلك تتدخل العربي في كلامك تواضعا منه

الفرفور هو بتاع الهاي والباي مش صباح الفل ومساء الورد ونادرا عموما تلاقي الفئة دي في النهار عشان طبعا الشمس حامية موت

وعلى رأي توتي القرنقوطي المغني الفرفور اللي كان بيعرفنا بنفسه وقال التالي

أنا اسمي توتي القرنقوطي وساكن في المعادي

في معهد كمبيوتر وعضو في كل نادي

بابي مسؤول كبير ومرشح يبقى وزير

وقريب اوي هيموت ويسبلي فلوس كتير

ياسلام لو تسمعو الشخص دا وهو بيغني

اعرف 3 لغات وبدوس في الديسكوهات

وتملي رقصي يهبل كل صحابي البنات

ولما تتهمه انه فرفور وفافي يقولك

ياي من كلام الناس ياي

بيقولو عليا فافي عشان حساس ومرهف

مع اني بمشي حافي في البيت من غير بقرف

واقدر كمان اعوم والشمس حامية موت

وكمان بقدر أصوم ومبيجيليش هبوط

وبعطف ع الفقير واديله فلوس كتير

والمفاجأة اني بقدر .. اكل مش وفطير

وبعد كل دا بيقولو عليا عيل

مع اني كبير وراجل ومش نونا وبريل

ودا تعليقه الاخير لما تصمم انه فرفور

والله خلاص حرام زهقت من الكلام انا مقتنع بنفسي يلا باي بأه

انا طبعا اختصرت كلام كتير من كلام توتي واللي عايز يسمعه بنفسه يدور عليه بأه

نيجي بأه لجزئية تانية من موضوعنا

احنا سمعنا كلام توتي طب ياترى حد فينا قدر يتخيل شكله عامل ازاي ؟؟؟؟؟

توتي شاب نايتي فرفور شعره متكهرب وبنطلونه زي الصابونة دايمآ يتزحلق منه وفي رقبته سلسلة وفي ايده انسيال واكيد الهاند فري مش بيفارقه عشان ميزهقش ويسلي وقته ومستحيل يمشي بدون اللبان اصله رياضي ويحب يمرن عضلات فكه وممكن تلاقيه جايب معاه الجيتار وعااايش عليك ويقولك دا مبيفارقنيش حتى لما بنام وتلاقيه في الاخر يدوب بيعرف المفاتيح الاساسية بس زي دو ري مي فا صوليا ولما يتعب من العزف الجبار تلاقيه بأه مطلع مناديل ( معطرة أو مبللة ) مش ناشفة اكيد لانها قاسية عليه ... هاا نكمل وصف توتي ؟؟؟؟ ولا نكتفي بهذا القدر

انا طبعا مش هكمل وصفه لانه مستفز جدآ في شكله ودا نوع آخر من الاستفزاز مش لازم يكون الاستفزاز في التعامل ممكن يبقى استفزاز بصري بحت زي توتي بس دلوقتي خلينا نتكلم جد الظاهرة دي بجد بتلاقوها فعلا ولا كلامي مبالغ فيه ؟ انا عن نفسي شفت شعب من توتي ومش بعتبر انه فئة قليلة اوي في البلد

طب نعالج ازاي التوتي بيبول... أصدي الفرافير ؟ هل شايفين السخرية والتريقة اللي بنقدمها تعتبر حل ؟ هل تتجه للنصيحة بدون تجريح ؟ ممكن في الاخر ميفرقش معاهم الطريقتين لانك مش عارف دماغهم ماشية ازاي ومنين

انا بجد مش بعترض على كل واحد بيحب ستايل معين ومعظم الشباب بيحطو جيل في سعرهم انا اخويا مش بيستغنى عنه وكتير بيحبو يلبسو سلاسل بس انا بتكلم على ناس مبالغ فيهم في الحاجات دي مش عيب تحط جيل ولا عيب تحط سلسلة اذا مش دهب بس العيب انك تسقط البنطلون وانك تبالغ في تصرفاتك بدرجة تلفت النظر انا متهيألي توتي واللي زيه مستحيل يشيلو حتى مسدس لعبه هيبقى تقيل عليهم يعني البلد لو دخلها عدو يبقى عليه العوض ومنه العوض

طبعا توتي كان عينة او مثال حي لموضوعنا النهاردة كفاية عليا الرغي الكتير دا مع ان كان عندي كلام اكتر من كدا والله بس عشان متزهقوش مني احب اسمع كلامكم عشان يحلى ويكتمل الموضوع ودا طبعا هيكون بعد الفقرة التانية اللي هقدملكم فيها الضيف اللي هيفاجأنا كلنا ان شاء الله ....

فااااااااصل ونوااااااااااصل

**Mohamed Hashem** · 10-20-2009, 10:26 PM

معاكم
ومبروك مقدما على نجاح الحلقة
فى الجوووووووووووووووووووووووون

**Hassan Mohamed** · 10-20-2009, 10:29 PM

جامده جدا جدا يا ميمي

انا هستني بقية فقرات الحلقة وبعدين نتناقش في ظاهرة الفرفور

**Mimi** · 10-20-2009, 10:31 PM

قبل ما نبتدي مع الضيف ياجماعة حصلت مفاجأة وهما جايين الاستديو عندنا اتكعبلو في بعض

ودا الحوار اللي حصل لما الضيف اتكعبل في توتي ((( هناك كلمات لتوتي حذفت للرقابة )))

توتي : هااي بليز ممكن سؤال أصلي تايه

الضيف : بليزك معاك يا ... ، اسم الكريم ايه ؟

توتي : انا اسمي توتي الئرنئوتي وهطلع في الـ TV النهاردة وانتي اسمك ايه ؟

الضيف: لا ملكش دعوة باسمى بس السؤال اللى ميحرنى ده اسم بنت ولا ولد اصلى متلخبطة الشكل مدى على الاتنين اما الاسم مدى على بنت خالص يا ريت يا خويا توضحلى

توتي : انا هطلع في الـ TV النهردة

الضيف : ااااااااااااااااه الـ TV الله يرحم

توتي : الله يرحم مين في حد مات ؟

الضيف : لا ياحبيبي ولا ياحبيبتي مش باينلك نوع يابني ولا يابنتي مفيش حد مات .. هااا ايه نوعك ؟

توتي : هو انتي بتكلميني على اني اتنين ليه انا توتي واحد بس مش اتنين ارجوكي بلاش تجرحيني كلامك بيوجع اوي

الضيف : بيوجعك لا الف سلامة تعالى نروح لدكتور اصل من غير زعل اصلى اللى فى قلبى على لسانى وده اللى مودينى فى داهية ، انت ولا انتى مش باينلك نوع الصوت بناتى والطريقة بناتى واللبس مش باينو اصل اليومين دول اللبس بقى مخلط

توتي : أنا توتي في معهد كمبيوتر في المعادي ..ليسي مالو انا لبسي كووول وكل صوحابي البنات بيئولو كدا

الضيف: ايوه توتى ده جنسو ايه

توتي : انا شاب لطيف وحنين

الضيف : اااااااااااااااااااااه لا مهو اضح الحنية عليك وهما صحابك بقى لابسين نضارات اكيد ؟

توتي : لا صحابي بيحطو لينسز عشان النضارة تقيلة على ودانهم

الضيف : اااااااااااااااااااااااااه تقيلة مممممممممممم لا ياحبيبي دية حاجة تانية اللي تقيلة

توتي : ايه دا ايه بجد ايه هيا ؟

الضيف : خيبتك يابني اللي تقيلة وبنطلونك ياحوستي

توتي : لا انا توتي مش حوسني

الضيف : ايه اللى فيه انت حاطط فيه حديد يا بنى لو حاطط فيه حديد تبقى خفف الحمل الا هو مش مستحمل فضلو زلطة ويطلع بره خالص

توتي : منا لابس ( ...حذف للرقابة... ) ياسمك ايه امال هبينو ازاي ؟

الضيف : يابنى الحجات ديه مينفش تبان تقرفنا ليه انت يابنى حد قالك اننا عاوزين نشوفه

توتي : مبينوش ليه دا حتى لونه واو خالص ياتنت

الضيف : حلو يحلى يامك يا بعيد الاهى تقع من فوق عمارة 100 دور تنزل على دماغك اللي عاوزة تتعدل دى .

توتي : يااااي انتي قاسية أوي كدا ليه بليز متجرحنيش

الضيف : وايه يا ولا السمنة اللى انت حاطتها فو ق راسك ديه

توتي : اووووه دا جيل السمنة دي اللي بتعملي مامي بيها تشيكن فليه

الضيف : مااااامي !! الله يرحم يابني .. جيل ده غير الجيلى اللى مامى بتعملهولك فى البيت يا روح مامى

توتي : لالا خالص انا بحب الجيلي بالتفاح مامي بتعملهولي علطول انتي بتحبيه ؟ 

الضيف : حبك برص وعشرة خرص .. لا ياروح مامي كفاية انك بتحبه هيبقى انا وانت

توتي : تب انتي بتفتري ايه الصبح في البريك فاست ؟ انا بحب الكورن فليكس وبحط عليه لبن ساقع عشان السخن بيلسع لساني

الضيف : كورن فليكس؟؟ ليه اتسخت الاهى تتسخت قرد مسلسل وتبقى السلسلة فى ايدى علشان اربيك من اول وجديد ... الله يرحممم.. ياعيني ع الرجالة راحت ايامك يا فول وراحت ايامك يا فلافل

توتي : ياي من كلامك واللهي حرام خلاص كفاية باه انا رجلي تعبت من الوئفة .. احنا مش ممكن نبئى فريندز ونتقابل في النادي ؟

الضيف : اه ومالو فرندز طيب انا راضية زمتك انا لما امشى معاك فى الشارع لو حصلت مشكلة مين اللى حيقف لمين يا بنى انت ممكن تتعاكس منى وانا ماشية وانا اللى اضطر اتعارك علشان احميك ههههههههههههههههههههههههه روح يابنى ابعد عن وشى الله لا يسياك وتبقى استحمى

توتي : نتعارك ايه دا ليه هو انا بوبي عشان امشي واتعارك

الضيف : ده غير بوبى ومامى ؟؟؟؟؟

توتي : وبعدين انا بستحمى كل يوم بالشاور جيل برائحة الستروبري و انتي قاسية اوي وانا مش عايز اكلمك تاني انا مخاصمك

الضيف : الحمد لله جت من عندك روح يلا اجرى العب فى حتة ناشفة بعيد عنى روح الله يحرقك ركبتى ذنوب والله خسارة فيك

توتي : اوووه ماى جاااد انا نسيت المعاد انتي وحشة والله خليتيني اتاخر ياوحشة يامتوحشة

الضيف : روووووووووح يلا بدل ما ادور فيك الضرب والله ما حخلى حتة فى هدومك سليمة

وتوتي سمع الكلمة من هنا وركب السكوتر بتاعه وطار صاروخ من قدام الضيف

ســـــــؤال الحلــــــــقة

مين هو الضيــــــــف من وجهــــــــة نظــــــرك وقولنا الاسباب اللي خلتك تتوقعه

يلا الفقرة الجاية هنعلن عن الضيف وهنعلن عن الفايز طبعا

**KAREEM** · 10-20-2009, 10:35 PM

الحمد لله انى لحقت الحلقة من أولها
لان الموضوع جاااااااامد مووووووووووووووت
الله ينور يا ميمى كلام جميل جدا
كملى وكل الفرافير معاكى ......
ههههههههههههه