مش عارفين نذاكر ليه؟

[حسام المصرى]

كنت فى قعدة مع زمايلى فى الكلية فبنقول لبعض يا جماعة مش ينفع كدا لازم نذاكر علشان الامتحانات ....فى الاخر اقنعنا بعض ان كلنا لازم نبدأ نذاكر خلاص الامتحان فاضله اسبوع


الحمد لله ربنا هداني وخدت قرار اني لازم اذاكر ، دخلت الاوضة وفتحت الكمبيوتر وعملت كولكشن أغاني جميل جداً عشان اسمعه وانا بذاكر (أغاني !!! اول القصيدة كـُفر) وسميته كولكشن المذاكرة وكانت مدته 6ساعات (قال يعني انا هذاكر 6ساعات)


المهم خلصت الكولكشن وجبت كتاب تاريخ علم النفس ولسه بفتحه .. وهب ببص فالساعة لئيتها بئت 6 ايه ده معاد برنامج الرياضة اليوم بتاع خالد الغندور طب مش مشكلة اروح اتفرج عليه واكمل مذاكرة (قال يعني الواد بدأ لما هيكمل) اتفرجت عليه وقولت عيب بقة اخلي عندي دم روحت عملت كوباية قهوة ورجعت الاوضة وجبت الكتاب .. فين القلم الرصاص ؟!


يووه القلم راح فين .. فين القلم راح .. هشام انت اخدت قلمي الرصاص الله يخرب بيتك لسه هدور عليه

أهه الحمد لله لئيته .. ايه ده الساعة 8 زمان فيلم محمد سعد شغال بتاع بوحة .........الله بحبه قوى طيب لما اقوم اتفرج عليه ولما يخلص ابقة اذاكر ...والمذاكرة مش هتطير يعنى

........................
الفيلم خلص ارجع بقة للمذاكرة تانى ......ايه دا فى دى جاى شغال تحت فى الشارع مش عارف فرح مين ..ببص فى البلوكنة لقيت فى تلاتة صحابى واقفين قلت لما انزل معاهم واهو العيال دول وحشونى مش بشوفهم بقالى كتير ....ازيك ياناصر ازيك يا اسلام وازيك يا محمد...ايه عامليين ايه فى الكلية (قال يعنى الصحوبية مقطعة بعضها)

قعدت شوية فى الفرح ووقفت مع اصحابى قلت لما اروح اذاكر احسن

...جبت الكتاب تانى وقعدت اقرى المقدمة وببص فى الساعة لقيتها 12 ..........اووووووووبز معاد انا والنجود وهواك على الاف ام اما اروح اسمع اسامة منير

وفجأة هوووووووووب عايز انام

اليوم اللى بعده اقابل صحابى فى الكلية ...ذاكرتوا ايه يا جدعان ......ولا حاجة
==============

فيه ايه احنا ليه بنهرب من المذاكرة وبنكرهها موت كده وبننكش بمية منكاش على الجري منها
هى فعلا المذاكرة بعبع مرعب للدرجة دي .. طب هو احنا ليه اصلا بنذاكر يعني اللي خدوا شهادات عملوا ايه بيها اساساً ؟!

ايه يا حسام السؤال الغبي ده اكيد بنذاكر عشان الواحد ميبئاش فرجة العيلة وراح الساقط جه الساقط والصيف يجي وكله يسافر يغير جو وانا الوحيد اللي اسمع جملة جرى ايه ياابو كحكة حمرا انت فاكر نفسك جاي معانا ولا ايه؟!!!


متهيألي معظمنا بيذاكر للهدف السامى دا
عمري فحياتي ماسألت حد السؤال ده وسمعته قال

عشان ابئى بني آدم // عشان الناس تحترمني // عشان مايبئوش اللي حواليا كلهم بيفهموا وانا وباب الشقة واحد

ده الواقع دلوقتي الواحد لما كان فى المدرسة بيروح المدرسة الصبح وهو متبرمج انو يحفظ عشان يدخل يدش في الامتحان ويخرج منه ناسي الورقة كان شكلها ايه (يااعمى فكك ماامتحناها خلاص)

بنفضل بالمنظر ده عمرنا كله لحد الجامعة وفى الجامعة لما نروح نلاقى حاجات كلها دش واعلى من مستوانا

انا بس عايز اعرف هى المشكلة دى مشكلتى انا ولا مشكلة ناس تانية معايا؟

ولو فى ناس تانية عندهم نفس المشكلة يبقة العيب فى مين؟
فينا احنا الجيل كله بقة متخلف؟
ولا فى المدرسين ولا فى المناهج ؟

يلا بقة ردو عليا وسلام دلوقتى علشان اروح اكمل مذاكرة

[محمد احمد89]

حسام بعيدا عن صلب الموضوع بس بجد
انت ظريف اوى واسلوبك جامد وسعيد انى قابلتك فى المنتدى
اما بقى بالنسبة للمشكلة فانا اللى طلعنى منها انى بقى فى حاجة عايزة اوصلها وحطيت المذاكرة طرق للوصول للحاجة دى

يعنى من الاخر ذاكر علشان توصل لشئ محدد محدد فى دماغك انت عايزه

[dero]

موضوع حلو اوى
فعلا المذكره بتسببلنا مشكله بس انا اعتقد العيب الاول هو فينا احنا

[حسام المصرى]

حسام بعيدا عن صلب الموضوع بس بجد
انت ظريف اوى واسلوبك جامد وسعيد انى قابلتك فى المنتدى
اما بقى بالنسبة للمشكلة فانا اللى طلعنى منها انى بقى فى حاجة عايزة اوصلها وحطيت المذاكرة طرق للوصول للحاجة دى
يعنى من الاخر ذاكر علشان توصل لشئ محدد محدد فى دماغك انت عايزه

يسلموا على مرورك يا محمد انا بس بطرح مشكلة 20 مليون طالب بس انت من المليون اللى بيذاكروا لهدف تانى مختلف
على فكره عينى وحشة وبحسد :alien:

موضوع حلو اوى
فعلا المذكره بتسببلنا مشكله بس انا اعتقد العيب الاول هو فينا احنا

لا العيب من البداية فى المدارس
المدرس بيقول ذاكروا ده ده اللى هيجى فى الامتحان وفاكر نفسه بيخدمنا

[Wild_Angel]

مممم
اولا بعيدا عن اننا نتكلم عن المناهج والمدرسين والتدريس
هل بدأت بأنك تحط هدف لحياتك؟؟؟
لو مبدأتش يبقى ابدأ من دلوقتى
وخلى نيتك لله
اقولك ازاى
خلى نيتك الاول انك بتذاكر عشان تنفع نفسك وتنفع تكون انسان مسلم ربنا يتباهى بيك
وتخلى فى نيتك انك عايز تنجح عشان والدتك ووالدك اللى من المؤكد انهم بيتعبوا عشان النجاح ده


دى شوية نقط مبدئيه
وعايزه اقولك حاجه
انت ممكن تلاقى نفسك سبحان الله بعد ما خلصت دراسه بقيت فى طريق لازم تذاكر تانى زى الدراسات العليا
ساعتها حتندم انك ضيعت حرف من كتاب ادام مستقبلك
عارفه انى طولت
بس أخر كلمه هى انك تستعين بالله وتقول أدعية المذاكره ولو عملت سيرش فى المنتدى او على النت حتلاقيها
واحسن وقت تقدر تذاكر فيه من بعد الفجر لحد 12 الظهر
وان شاء الله بالنجاح والتوفيق

[حسام المصرى]

مممم
اولا بعيدا عن اننا نتكلم عن المناهج والمدرسين والتدريس
هل بدأت بأنك تحط هدف لحياتك؟؟؟
لو مبدأتش يبقى ابدأ من دلوقتى
وخلى نيتك لله
اقولك ازاى
خلى نيتك الاول انك بتذاكر عشان تنفع نفسك وتنفع تكون انسان مسلم ربنا يتباهى بيك
وتخلى فى نيتك انك عايز تنجح عشان والدتك ووالدك اللى من المؤكد انهم بيتعبوا عشان النجاح ده


دى شوية نقط مبدئيه
وعايزه اقولك حاجه
انت ممكن تلاقى نفسك سبحان الله بعد ما خلصت دراسه بقيت فى طريق لازم تذاكر تانى زى الدراسات العليا
ساعتها حتندم انك ضيعت حرف من كتاب ادام مستقبلك
عارفه انى طولت
بس أخر كلمه هى انك تستعين بالله وتقول أدعية المذاكره ولو عملت سيرش فى المنتدى او على النت حتلاقيها
واحسن وقت تقدر تذاكر فيه من بعد الفجر لحد 12 الظهر
وان شاء الله بالنجاح والتوفيق

والله بجد كلامك روعة وخلى للموضوع قيمة
بس زى ما بيقولوا العلام فى الصغر كالنقش على الحجر
لكن لما تعلمى فى واحد كبير خلاااااااااص بيكون فات الاوان
علم فى المتبلم ههههههههههه يصبح مصرى
مع احترامى ان فى مصريين كتير كويسين
انا شايف ان العيب مش مننا احنا بس
العيب من المنظومة كلها
منظومة التعليم فى مصر فاشلة
سواء قبلتى رأيى او لا هتكونى موافقة معايا ان المناهج فى مصر غير مفيدة بالمرة
يعنى معلش ايه عم سلطان رجلا ذواقا على اساس ان عم حسين مش ذواقا
لكن لو كنا درسنا ليه عم سلطان ذواقا
السبب العلمى يعنى
كان هيبقى درس مفيد

انا طولت
فلازم احط نقطة واقولك بجد رأيك رائع بس مش دلوقتى
احنا سنه 2010 يعنى الدنيا خربت خلاااااااااص والاصلاح لازم يكون شامل ومن الصفر لان اساس بايظ

[alaa eid]

جميييييييل اوي كلامك يا وايلد وفعلا عندك حق
جزاكي الله كل خير

[وعجلت اليك ربى لترضى]

هى مشكلتنا كلنا انا من اجازة العيد نفسى اذاكر ولحد دلوقتى مش عارفه
لانى انا فى شعبة مساحة والمواد كتير وصعبة فى المذاكرة وبجد محتاجة وقت كتير فى المذاكرة
وكل لم اقعد علشان اذاكر القى المنهج كبير والدكاترة لسه شغلين محاضرات اتعقد واقفل الكتاب وانام
لكن هو العيب فينا احنا
Wild_Angel بجد كلامك صح احسن وقت بعد الفجر انا كنت بذاكر السنة اللى فاتت كده وكان ربنا مبارك ليه فى الوقت والمذاكرة ونفسى اضبط مواعيد النوم تانى على الفجر

[KAREEM]

كلام جميل فى صراحة مع نفسك
بيوضح مشاكل كتير من الشباب
دلوقتى مش انت لوحدك
( باسلوب ظريف ) أحييك عليه

بس زى ما وايلد قالت لازم يكون عندك هدف
ولو حتى هدف صغير حطه أودام عينك
وجدد نيتك دايما لله وهو هيسر لك كل حاجة
باذن الله ومتنساش تقرأ ورد من القران
قبل كل جلسة مذاكرة وربنا هيكرمك
اما حكاية كوكتيل الأغانى دى
فمش داخلة دماغى بصراحة
بس لو متعود تسمع حاجة وانت بتذاكر
ممكن تشغل فناة العفاسى او اى حاجة دينية
حتى تبعد الشياطين وتخلى ااملايكة تساعدك
فى المذاكرة بجو من الهدوء والسكينة فى المكان

طولت عليك معلش
تمنى لك النجاح والتوفيق

[حسام المصرى]

جميييييييل اوي كلامك يا وايلد وفعلا عندك حق
جزاكي الله كل خير

يعنى وايلد جزاها الله خير وكلامها حلو وانا معاكى صاحب الموضوع ملوش كلمة حتى ترفع من روحة المعنوية ليكى يوم يا الاء هدخل اشكر فى الناس اللى بترد فى مواضيعك ههههههههههههههههه :gathering:

هى مشكلتنا كلنا انا من اجازة العيد نفسى اذاكر ولحد دلوقتى مش عارفه
لانى انا فى شعبة مساحة والمواد كتير وصعبة فى المذاكرة وبجد محتاجة وقت كتير فى المذاكرة
وكل لم اقعد علشان اذاكر القى المنهج كبير والدكاترة لسه شغلين محاضرات اتعقد واقفل الكتاب وانام
لكن هو العيب فينا احنا
Wild_Angel بجد كلامك صح احسن وقت بعد الفجر انا كنت بذاكر السنة اللى فاتت كده وكان ربنا مبارك ليه فى الوقت والمذاكرة ونفسى اضبط مواعيد النوم تانى على الفجر

عارفة ليه بعد الفجر افضل وقت للمذاكره
لان الرسول صلى الله عليه وسلم قال
افضل علاج للكسل هو النوم بعد العشاء وانك تصحى من الفجر

كلام جميل فى صراحة مع نفسك
بيوضح مشاكل كتير من الشباب
دلوقتى مش انت لوحدك
( باسلوب ظريف ) أحييك عليه

بس زى ما وايلد قالت لازم يكون عندك هدف
ولو حتى هدف صغير حطه أودام عينك
وجدد نيتك دايما لله وهو هيسر لك كل حاجة
باذن الله ومتنساش تقرأ ورد من القران
قبل كل جلسة مذاكرة وربنا هيكرمك
اما حكاية كوكتيل الأغانى دى
فمش داخلة دماغى بصراحة
بس لو متعود تسمع حاجة وانت بتذاكر
ممكن تشغل فناة العفاسى او اى حاجة دينية
حتى تبعد الشياطين وتخلى ااملايكة تساعدك
فى المذاكرة بجو من الهدوء والسكينة فى المكان

طولت عليك معلش
تمنى لك النجاح والتوفيق

يسلموا يا كيمو على المرور
ويسلموا على رأيك فى اسلوب الكلام اقل حاجة عندى على فكره هههههههه
ووالله كلام وايلد صح
بس والله اول ما تخرج من الموضوع هتنسا كل كلام وايلد
لاننا من صغرنا بدانا غلط
احنا لازم نصلح مع الاجيال الجديدة
مش حبه نحط سته وحبه نشيل سته
وكل ده علشان نموت دفعة متتخرجش