حسام فى طابور العيش

[حسام المصرى]

احنا متعودين فى البيت عندنا فى ناس بتجيبلنا العيش كل يوم وفى يوم كان عندى اجازة من الكلية وماما قالتلى حسام عايزين عيش بكرة علشان الناس اللى بتجبلنا مش موجودين بكرة
طبعا كلام ماما نزل عليا زى الدش البارد فى الشتاء القارص الساعة جت 11 قلت ادخل انام علشان بكرة عندى عميلة كبيرة وهى ازاى هجيب العيش
نايم على السرير ومغمض عينى بس دماغى هتضرب من التفكير وسامع دقات الساعة تيك تيك تيك هموت خلاص مش قادر
صحيت ووقفت على السرير وقلت لازم انام اخدت برشام منوم وحطيت على دماغى بطاطين البيت كله واخيرا نمت ويا ريتنى ما نمت
جالى كابوس فظيع شوفت جرنال الاخبار ومكتوب خبر رئيسى شاب فى العشريين يقتل فى طابور العيش وصورتى جنب الخبر
صحيت وقررت انى مش هنام لحد اصبح
وسمعت صوت صلاه الفجر فقلت ياه دى اول مره اسهر لحد الفجر كويس علشان انزل اصلى فى المسجد
دخلت اصلى ودى كانت اول مره اصلى الفجر فى المسجد فى غير رمضان من سنين
لقيت المسجد مليان على اخره
قولتلهم هو انهاردة 27 رمضان ولا الشيخ حاتم جاى هنا فى صلاه الفجر
فواحد قالى انت مش معاك حاجة ليه
قولتله حاجة ايه وببص فى المسجد ورا لقيت شنط واكياس اللى بيحطوا فيها العيش
صليت وروحت البيت مع التعب نمت صحيت الساعة 10
قلت كويس اوى اروح اجيب العيش بقى
وبالفعل حصل اللى كنت خايف منه وطلع الكلام اللى كنت بسمع فى البرامج التلفزيونية صح
وفوجئت بطابور كبير من المنتزة لحد المنشية
واقف ناس كبار واطفال ونساء وشباب
اخدت دورى ووقفت
لقيت راجل سنه كبير وقالى انت اول مره اشوفك هنا انت غريب
قولتله لا انا ساكن هنا
والراجل اعتبر الكلمة دى موافقة منى انى اسمع قصة حياته
وقالى
انا عندى 84 سنه كنت بشتغل فى شركة غزل وكنت بقبض 450 جنيه وطلعت على المعاش وقلت اخيرا هرتاح
الحكومة طلعتلى معاش 50 جنيه فى الشهر وانا عندى 3 بنات جوزت واحده ومش معايا فلوس اجوز التانية
ومش كفاية كل ده
لا الحكومة بتذلنا فى لقمة العيش كمان وانا راجل كبير مش قادر اقف على رجلى
معرفتش ارد بس صعب عليا
شوية ولقيت راجل عنده حوالى 40 سنه
واضح عليه انه تعبان جدا وبيشتغل شغلانه قاسية جدا
شوية ولقيته بيتكلم فى التليفون
بيقول الو ازيك يا استاذ عملت ايه فى قضيتى
وبعدها قاله
يعنى خدمة فى الشركة 30 سنه وفى الاخر هطلع من غير مكافأة ولا معاش
حسبى الله ونعم الوكيل حسبى اللى ونعم الوكيل
شوية ولقيت واحد انا عارفة
بس ناسى هو مين بس شوفته وعارفه
اها ده استاذ محمد مدرس اللغة العربية اللى كان بيرفض يدى دروس
كان بيشرح بجد فى الفصل
مش مصدق نفسى
روحت سلمت عليه
ازيك يا مستر عامل ايه
قالى الحمد لله بس بطريقة غريبة جدا لدرجة انى مفهمتش كلامه اتحرجت وسيبته
ورجعت وانا زعلان وقلت بصوت عالى بطريقة لا ارادية
ايه اللى حصله
فرد واحد وقالى مستر محمد عربية خبطته وهو ماشى
وسببتله مشكلة فى الحبل الشوكى
ومكنش معاه فلوس علشان يتعالج ومع الاهمال الطبى فى المستشفيات الحكومية
بقى بالشكل ده
واطرد من المدرسة بعدها لانه تغيب عن العمل
قولتله واللى خبطه
قالى ده مستشار وسكت وبان عليه الحسره
قولتله يعنى ايه مستشار
قالى يعنى ربنا يعوض على مستر محمد
وفجأة
لقيت واحد واضح عليه انه صايع
فجاة دخل فى اول الطابور
بسأل واحد
قالى اه واقف قولتله يا عم ده لسه جاى
لقيت واحد بيخبط على كتفى
وقالى ده صايع ومحدش بيقدر يكلمه
ساعتها بس اتمنيت انى ابقى صايع
وعرفت ان علشان انزل الفرن محتاجة خطة من بتوع مانويل جوزيه
وفجاة حصلت حاجة غريبة اوى
لقيت صاحب الفرن بينادى عليا
قولتله انا
افتكرت اعلان لينك بتاع انت يا لينك ياللى ورا

قولتله نعم
قالى مش انت حسام بتاع منتدى مساحة
قولتله اه
قالى عايز بكام
قولتله بجنيه
قالى اتفضل
شوفت فى عيون الناس كراهية ناحيتى
وفى عيون الناس كلام بيقول انت مش مننا
بس اتعلمت فى اليوم ده حاجات كتيره حلوه

رقم 1
قيمة منتدى مساحة فى حياتنا
رقم 2
الاحترام والشغل بجد اخرته زى مستر محمد او زى الراجل اللى اضحك عليه فى الشركة
رقم 3
الصياعة مطلوبة فى بعض الاحيان
رقم 4
اننا شعب جبان والكل خاف من الواد الصايع
رقم 5
معاك وسطة تبقى ملك
معاكش وسطة تركن على جنب احسن

هذه القصة مستوحاة من خيالى ولا تمس للواقع بصلة نهائيا
احنا مش ناقصين والنبى انا لسه فى مقتبل حياتى