كلام بنانيتى جدا( ممنوع دخول اى شاب دى اسرار)

[الورده البيضاء]

ملحوظة انهردة
نيتدى بالغدا

اولا المطبخ لازم يكون نضيف ومتروق وانتى شغالة بتطبخى
والحوض يكون فاضى
نيجى عند الطبيخ
انا عملت بسلة ورز انهردة :D
وكانت معايا واحدة قريبتى اينعم كانت رغاية وكانت مطلعة عينى طول وقفتنا فى المطبخ
هى عملت الرز وانا عملت البسلة خلينا فى الرز اللى اتعجن :D
اولا اما تيجى تعملى الرز العادى المفلفل
1- متحطوش زيت قليل عشان كدة الرز هيشيط اثناء مابيتحمر
وكمان الزيت بيقلل من احتمال ان الرز يعجن
2-خلاص حمرنا شوية رز وحطينا عليها باقى كمية الرز
نقلبهم مع بعض كويس جدا قبل مانضيف عليهم المية او الشوربة
لو لقيتى كمية المية زيادة شوية ميهمكيش ولا تزعلى نفسك
اول ماتحسى ان مية الرز ابتدت تغلى وطى النار عالرز خالص
وسبية عالنار وبكدة متقلقيش علية لو كانت ميتة زادت
وطبعا فى حاجة مهمة جداااااااااااااااااااا
فى بنات بتقعد تقلب فى الرز طول ماهو عالنار ودا غلط جدا طبعا
سبية يستوى مع نفسة متقلبيهوش وتغطية طبعا بغطا الحلة من بداية عملة
متسبيش الحلة مكشوفة (بتحصل والله وبشوف ناس مش مغطية الحلة)
وطبعا لاتنسوا الملح ولو عيزاة احلى حطيلة حبة فلفل اسمر بس كمية بسيطة


ثانيا دى ملحوظة اى اكل بتعمليلة صلصة
طبعا بنحمر البصلة عالنار (زودى عليها حبة توم بجد بتاثر فى الطعم والريحة بطريقة واضحة جدا)
واما تعملى صلصة متستخدميش صلصة جاهزة عصير الطماطم افضل بكتير
واما تيجى تعصرى الطماطم فى الخلاط متزوديلهاش مية كتير
حطلها كمية مية قليلة يادوب تقدر تخلى بس الخلاط يشتغل ولو محطتيش مية دا غلط على الخلاط
وكل ماتزودى مية طعم الصلصة بيغير حتى لو مهما سبكتى فيها
ومتنسيش الفلفل الاسمر فاكلك والبهرات

انا عارفة ان فى بنات هتحس ان الحاجات اللى بقولها دى تافهة جدا
بس عايزة اقولكم ان فى بنات اكبر مننا بكتير ومش بتعرف تطبخ اصلا
ودى حاجات مش اى حد يعرفها غير اللى دخلت المطبخ كذا مرة
اسيبكم انا بقى تصبحو على خير ومعلش طولت عليكم

اشوفكم مع غدا بكرة