الدعم الفنى للعاملين بالمساحة البحرية

[Mohamed Hashem]

الأخ العزيز حمدان .. يا مرحب بيك واحنا كلنا - ادارة ومشرفين واعضاء - تحت أمرك فى أى وقت فمفيش تعب ولاحاجه
بص اولا : صعب قوى نقول مين الاحسن .. مساحة ولا Gis كل تخصص له مميزاته اللى بتخلى الواحد يحبه ويبدع فيه
يعنى بمعنى آخر .. حب الشخص لتخصصه هو اللى بيجعل هذا التخصص جذاب .. فممكن تقرأ لفلان عن الـ Gis فتحبه وبعدين تقرأ لعلان عن المساحة الجوية فتحبها وهكذا .. لكن مفيش حاجه اسمها مين الاحسن .. دا غير طبعا ان اللى يناسب واحد مش بيناسب التانى
فمثلا فى ناس مش بتحب المساحة الارضية وتعشق العمل فى البحر .. وناس لو دفعت لهم مليون جنيه مش حيطلعوا بحر ابدا وهكذا

الـ Gis تشبه المساحة البحرية كتير فى تأثرها بتقدم علوم الإلكترونيات وفيزياء الإستشعار عن بعد وبرامج الحاسب الآلى .. ولذلك الجوانب الآخاذه فى المجالين كثيرة .. والإختلاف الوحيد فى السفر والترحال فى البحرية والعمل المكتبى فى الـ Gis ودى ليست عيوب ولا مميزات دى طبيعة ممارسة العمل .. مفهاش خلاف .. ولا أحبذ انها تكون نقطه مفاضلة .. يعنى بلاش نختار مجال عمل لمجرد انى حابقى قاعد فى التكييف .. أو أختار البحرية لأنها كلها سفر وبلاد جديدة وممكن تلف العالم فى اربع سنين .. شوف الأول انت ميال لمين أكتر .. لان الحاجات دى بتروح بهجتها بعد فترة طالت ام قصرت .. والعمل هو العمل ... التزام طول الوقت ..

ولو انت مهندس مساحة خريج شعبة المساحة ينفع تاخد كورس فى الـ Gis .. اعتقد نعم ينفع .. ولو تسأل حد متخصص فى الـ Gis اكتر منى يكون أحسن مثل دكاترة القسم الافاضل

اما مكان الكورسات فهى فكره ممتازة ولا يعيبها سوى غلو سعرها بالنسبة للأكاديمية

اتمنى انى اكون رديت على تساؤلاتك وياريت تنقل استفسارك ده لقسم المساحة البحرية .. علشان الاعضاء المهتمين بالفرع ده يستفيدوا كمان
وجزالك الله خيرا