الدعم الفنى للعاملين بالمساحة البحرية

[Mohamed Hashem]

نورت فى اى حته تروحها حبيبى .. وربنا يجعلنا اسباب فى الخير دايما قول آمين
وان شاء الله حتكون أحسن منى كمان ..
ممكن تبدأ بثلاث طرق : تاخد فكره عامة بس شاملة مع المنتدى هنا فى قسم المساحة البحرية وعندك فرصة لطرح الاسئلة بالطبع مع طلب كتب واجيب لك اللى تحتاجه باذنه تعالى
رقم 2 ممكن مع كورسات الرابطة فى المساحة البحرية
رقم 3 كورسات الاكاديمية العربية ودى بصراحة ترقى لمستوى الاحتراف غير قيمة الشهادة كجامعه معترف بها دوليا ولها ثقلها العربى والدولى
رقم 4 فى مدارس مساحة بحرية على مستويات دولية كتير ... مش مجالها هنا لاسعارها طبعا ولكن وجب التنوية عنها .. يمكن فى واحد ميسور عنده استعداد من حيث المادة والانجليزى
المواد اللى تقرأ فيها ... اولا ما تبطلش قراءة ... عارف دودة الورق ؟ اللى بتاكل الكتب ؟ هههههه وبالمناسبة دا المصطلح اللى الاجانب بيستخدموه على الناس اللى بتقرأ كتير يقولك عليه bookworm
تانى حاجه الانجليزى ... لو الانجليزى مش قد كده .... كل سنة وانت طيب ... عارف .. دخل عليا مهندس زميل اكبر منى واكثر خبره (وكنت لسه راجع من انجلترا ومعايا كتب وورق الكورس) ووجدنى قاعد اترجم فيهم للعربى فقال ما فائدة اللى بتعمله اذا كان كل شئ حتتعامل فيه بالانجليزى برضه تانى) قلت له اديهم للزملا الضعاف فى الانجليزى قال لى كلمة اعتبرها حكمه .. قال لى: يبقى برضه لم تقدم مساعده له .. او على الاقل قدمتها بالطريقة الخطأ ... تصور .. مش حاقول لك بعد كده على اهمية الانجليزى ... يكفى ان المعلومة موجوده فعلا قدامك بس مش عارف استفيد بيها بسبب انها بلغة أجنبية
المواد اللى تقرأ فيها
الفيزياء : فيزياء الصوت وفيزياء الكهرباء والمغناطيسية وياريت الكترونيات كمان ونقى الكتب اللى تفهم من عناوينها انها تمهيدية زى : introduction in - handbook on وهكذا
الرياضيات بكل انواعها حساب مثلثات وتفاضل وتكامل و إحصاء وغيره
علوم البحار والمحيطات : مد وجذر – تيارات بحرية – امواج ... الخ
الاستشعار عن بعد والاقمار الصناعية وتحديد الموقع

التدريب الصيفى مفيد طبعا
بالنسبة للتوصيات (انا معلش حذفت المصطلح اللى استخدمته انت) : طبعا الاسلوب ده موجود فى مجتمعنا بس خلى بالك التوصية تدخلك الشركة .. انما حتكمل بمجهودك .. فاهمنى طبعا ؟
بس برضه انا متحفظ على الطريقة دى لانها – وبصراحه كده – تعدى سافر على حقوق واحد تانى .. فطالما الأختيار ليس للأفضل .. يبقى ده مش مظبوط
ومفيش اى مشكله فى الاسئلة يا حمدان .. بس ياريت اعرف عنك معلومة صغيرة انت طالب ؟ وبتدرس ايه ؟ بس كده
ومرحبا بيك فى كل وقت ............... انت منوووووووووووور