الدعم الفنى للعاملين بالمساحة البحرية

[Mohamed Hashem]

سلاموا عليكم عم الباش مهندسين كلهم محمد باشا هاشم ازي الصحه يا بيه وازي احوالك اظن انا وحشتك مش كدا بردوة ههههههه وحشني جدا جدا جدا والله انا عراف انك ما بتقراش ليا اي كتابه هنا الا لما ابقا عاوز منك حاجه بس نعمل ايه بقا مالناش حد بعد ربنا غير سعادتك ادخل في الموضوع علطول كنت بقول لحضرتك انا كلمت رئيس القسم عندي عشان انزل تدريب وهوة كلم واحد مهندس شغال في شركه subوالراجل قال ليه يجيب لي ورقه يوجي بس ولما روح ت لهقعد يعقدني مالمساحه البحريه وهاتتعقد نفسيا والليله دي يعني ولقيت منه مفيش قبول للتدريب وكمان قال لي ان كل الشغل سفر ومفيش حد بيسافر علي المركب غير اللي شغالين بس فا مش هانزل البحر يعني ولا هشوف حياه عمليه الا بعد الشل الرسمي وقال لي لازم اتدرب ارضيه الاول واكون متفوق في الارضيه وان الكورس اللي هوة بتاع الاكاديمية مالوش لازمة فا انا مش عارف اتصرف ازاي فا عاوز راي حضرتك اروح لرئيس القسم تاني ولا ايه ولو روحت انا علي الشركة علطول من غير حد ممكن يقبلوا تدريبي ولا لاء المهندس دا ال لي انه هايدربني نظري علي الالب توب علي البرامج وكدا يعني وانا مش عندي برامج فا اسمح لي لو تجيب لي برامج تستخدم في المساحه البرحية اخليه يدربني عليه مستني رد حضرتك ومتاسف علي الاطالة تسلمي لي يارب يا باش مهندس

وعليكم السلام أخ حمدان
اهلا بيك فى اى وقت .. انت طبعا بتوحشنا.. وشكرا لسؤالك عنى .. اليك ردى على اسئلتك:
لما روحت عقدنى فى المساحة البحرية: بص صديقى .. من غير تعقيد .. ومن غير تبسيط .. نصيحة أخوية: مفيش شغل فى العالم مفهوش تعقيدات .. وصعوبات سواء فى المعلومات أو الممارسه فبلاش تتخض زى ما اتفقنا .. استعن بالله وشمر وخد نفس عميق وتوكل على الله واللى يقول لك صعب .. قول فى نفسك باذن الله سهلا
بالنسبة لصعوبة المساحة البحرية ..أكيد الراجل كان يقصد أن العمل فى البحر صعب وشاق ليس إلا.. وليست المساحة نفسها .. وفعلا هو عنده حق وحاقول لك ليه (اذا عرف السبب بطل العجب) العيشة فى سفينة متأرجحه ليل نهار .. الكبائن صغيرة ومشتركة (اقل كابينة فردين ووصلت مرة لستة أفراد) .. الحياة المشتركة بمعنى ان اى حاجه تستخدمها .. بعد ما تخلص لازم ترجعها مكانها (اغلبنا مش متعود على كده) .. موارد السفينة محدودة بالنسبة للعدد عليها بمعنى ان فى ورديتين صباحية ومسائية وميس (صالة) الطعام مثلا تستوعب وردية واحده فقط .. فلو صحيت بالليل وحبيت "تنقنق" حاجه .. ممكن تلاقى الصالة مكتملة وقت الوجبه ولازم تنتظر قليلا .. الحمامات مشتركة (بس النظاقه والمطهرات متوفرة) دا مش معناه ان مفيش طاقم خدمة ونظافة وطباخين .. لأ طبعا كل ده متوفر .. بس المبدأ عندنا .. اترك المكان نظيفا كما وجدته نظيفا ..كمان الانعزال ممكن تغيب عن البيت فترات طويلة .. ممكن وسائل الترفيه تكون بسيطة (تليفزيون - دش -ترابيزة بنج بالدور طبعا - تليفون دولى بالقمر العربى الثريا بتكلفه دولار امريكى للدقيقة ) .. كمان الوجبات بميعاد فطار من 5-7 ص غذاء من 11-1 م عشاء من 6-8 م .. ممكن مواعيد وجباتك مختلفة .. ممكن طعم الاكل مش قد كده .. بس الكميات والتنوع متوفر ة وهكذا .. فى كمان نقطة مهمة جدا وهى تعليمات السلامة والأمن على السفن التعليمات دى بتاخد فيها كورسات اجبارية لان ممنوع الصعود على ظهر سفن الخدمة بدون اجتياز الدورات دى واسمها شهادة الحتميات (ثلاثة انواع : مكافحة حريق - اسعافات اولية - الحفاظ على سلامة الارواح ) .. تعليمات السلامة دى كتير ومش مجالها هنا وحنفرد ليها مقالة باذن الله تعالى .. المهم انك لابد من معرفتها ومعرفة مكان جاكيت النجاه بتاعك ومكان قارب الهروب ورقمه وتعمل ايه لو سمعت جرس انذار الحريق ... واى تحرك فى السفينة بحساب كى لا تأذى نفسك أو تتسبب فى أذية الآخرين .. وهكذا .. المهم ان اى صعوبة ليس لها علاقة بالمساحة .. الصعوبات كلها من هذا القبيل ..اظن مش مشكلة ولا ايه؟ ههههه بص كله بالتعلم والتعود يهون ولو فى رغبه وتصميم .. حتشعر بالسعاده مش بالضيق

مفيش سفر ولا حياة عملية : فعلا .. زى الراجل ما قال .. التدريب نظرى بالمكتب لحين ما تتعين فعليا .. لأن ببساطه زى ما قولت لك .. علشان تطلع بحر لازم تكون أخدت دورات الحتميات والجواز الاسود .. فلأن الراجل لسه مش عارف الأمور حتمشى معاك ازاى .. حتقعد تتدرب فى المكتب نظرى لحين ما تخلص اوراقك وتتعين فعليا .. اضف الى هذه نقطة هامة بالنسبة للمؤسسات (نقطة فى مصلحتك) وهى التأمين على حياة حضرتك .. مناطق العمل اللى بنشتغل فيها على حفارات ومنصات بترول وفى عرض البحر مصنفة مناطق عالية المخاطر لذا لا يسمح لمتدربين بالسفر .. إلا بعد التعيين وساعتها حتبقى بتتدرب برضه بس بشكل رسمى .. فهمتنى ؟ لكن هذا لا يقلل من التدريب فى المكتب لأن ببساطه حتتدرب على الأجهزة نفسها مش على ورق او صور او اشكال توضيحة او افلام فيديو او مجرد مانيوال

بالنسبة للمساحة الأرضية : اللى يقصده الراجل - زى ما قلت لك من قبل - الجيوديسية ونظام الاحداثيات فى مصر (هلمرت 1906 ) مساقط الخرائط (ميركاتور) وانظمة تحديد الموقع DGPS .. الأتوكاد .. EXCEL .. surfer .. مش الحاجات دى برضه بتستخدم فى المساحة الارضية ؟ ..... هو دا قصده لكن دماغك ما تروحش للتوتال والميزان .. وان كان لازم تكون عندك خلفيتهم طبعا بحكم الدراسة

كورس الاكاديمية مالهوش لزمه : بص يا أخى العزيز .. من أسئلتك المرة دة .. واضح أنك أخدت رأيه فيما قرأته هنا معنا .. فالراجل أعطاك رأيه .. ودلوقتى منتظر ردى أنا على كلامه ...وردى: لا تعليق

التدريب على برامج المساحة على اللاب جميع شركات مصر باستثناء فوجرو بتستخدم برنامج الـ NaviPAC وهو برنامج قوى ومشهور فى العالم .. واى برنامج مساحة - علشان هو جديد عليك - حيبقى شكله صعب .. شكله فقط وبمجرد ابحارك فيه حتلاقيه برنامج سهل والتعامل معه منطقى زى ما بتتعامل مع ويندوز او الاتوكاد.. كل امكانيات الويندوز متوفره فيه .. نوافذ .. ازرار .. قوائم منسدلة ..وهكذا .. اظن فهمتنى ؟
بالنسبة للـ نافى باك .. من مميزات البرنامج ان حضرتك ممكن تعمل له setup على جهازك الشخصى (Windows XP or vista only ) فى طور المحاكاة وتقعد تجرب حاجات كتير وتتعلم .. مش كده وبس ملفات التعليمات المرافقة للبرنامج فعلا تحفة .. حتفيدك كتير بجانب شرح الأخ الفاضل من subsea
وفى المشاركة القادمة سوف أضع لك كل البرامج والمواضيع اللى تفيدك - هدية لحضرتك - ربنا يوفقك

سبحانك اللهم وبحمدك نشهد ان لا اله الا انت نستغفرك اللهم ونتوب اليك