بالعند فى الخنازير .. نجحنا بجموع كبير

[حسام المصرى]

كمان مرة بالله عليكم زغردوا ...

البنت نجحت فى التيرم الاول بالشهادة الإبتدائية

رغم الدراسة النصف كم .. أقصد النصف وقت .. أنا فرحان .. كنت الصبح فرحان

دلوقتى بقى إتشقلب حالى

أنا سرحان , قلقان , حيران .. إيه ده ,و عدينا كده رغم دور المدارس الضئيل ,, بسهوله إلى حد ما ؟؟ طيب مستغرب ليه الدروس لهفت من المرتب شئ وشويات وصحيح البنت تعبت ولكل مجتهد نصيب

وصحيح كانوا مدرسين أكفاء

بس يا ترى بيشتغلوا فى مدارسهم بنفس الكفاءة ؟

ولما المدرسين بيشتغلوا بكفاءة كده ,, العيال بياخدوا دروس ليه ؟

وفيه دروس من أصله ليه ؟ .. دى هيه الحكايه كلها ساعتين أسبوعياً لكل مادة ,, يعنى وقت مناسب للمدرس فى المدرسة يقوم بمهامه مع الطلبة على أكمل وجه

فى الشارع مدرسة حكومية عليها زحام .. النتيجه ظهرت ,, الواد مبسوط ,, إقتربت ,, ثم سألت .. نجحت ؟.؟ ايوه والتقدير كويس ,, مبروك يا حبيبى ,, المدرسين عندك كويسين ؟ .. طوح الواد إيده فى الهواء محاولاً الإنفلات من يدى ,, إيه يا عم؟؟ مدرسين المدرسة ما أعرفهمش ,, دول الخصوصى همه اللى كويسين

أقول لكم أوعوا تزعلوا معايا ,, ولا يهمكوا ,, انا بقى اللى أشغل نفسى ,, و أطق كمان

ساكتين ليه ,, زغردوا ... لولولولولولى
بس قولوا

رأيكم فى النتائج السنادى هل فعلا قرار حكومى بنجاح الطلبة كلهم ولا انا متهيألى

ورأيك ف الدروس الخصوصية و الشرح فى المدرسة يا ترى زى الدروس ولا الطلبة نفسهم مش عايزين