ياباشا المتهم مات ... ارمية فى صفيحة الزبالة مع زمايلة

[mo_medya]

خالد سعيد
مجرد شاب مصرى
ممكن كلنا من صورته نعرفه لو ما كناش نعرفه؟
كفاية إنه إنسان
عند كتابتى لهذا الموضوع تذكرت الفيلم الجديد لأحمد حلمى وهو فيلم عسل أسود
وتحديدا عندما قال أنا مصرى وليه حقوق مصرية؟
كان نفسى أشوفه قودامى وأقوله حقوق إيه يا أبوحقوق؟
ده أنت فى مصر ... يعنى كل حاجة تحصلك طبيعية
تتهزىء طبيعى تضرب طبيعى تتبهدل طبيعى
كل ده عااااااااااااااااادى ده أنت فى مصر
ولكن أن تصل المسأله إلى هذه الدرجة العالية من القساد المؤسسى والادارى فى الحكومة
فى قطاع مهم من أهم قطاعات الدولة
أن يكون اللى المفروض إنهم حاميها بقوا هم أكتر من الارهابيين؟
نعم فإرهاب رجل الشرطة أرهاب قوى لأنه يحمل فى باطنة سلطة
وخصوصا فى ظل تطبيق قانون الطوارىء
القانون اللى ذلنا
واللى ما وافقشى عليه إلا المستفيدين منه
اللى هما قاعدين على كراسيهم ومش عايزين يسيبوها
خالد ده اتقتل علشان كان معاه فيديو الظابط وهو بيوزع تقسيمة الحشيش والفلوس على رجال الشرطة المخلصين لأنفسهم عفوا للبلد وقانون الطوارىء
خالد ده شاب عادى
وعلى فكرة خالد ده لو بتاع حشيش وإلا تاجر مخدرات كانوا خافوا يقربوا ناحيته علشان الصيع ما بيسبوش حق حد
لكن علشان هو كويس ومسالم العملية كانت سهلة
وعلشان أهله طيبين والحكومة حتعرف تخوفهم وتخليهم يسكتوا غصب عنهم وعن اللى جابوهم
قامت قواتنا وشرطتنا الباسلة بسحل وجه هذا الشاب والتنكيل به
علشان هو معاه فيديو يأذيهم
وسايبين المخدرات والحشيش والبودرة فى انحاء محافظة إسكندرية
الواحد من دول واقصد الحشاشين بيدخل القسم ومعاه الحشيش وبيطلع براءة
وبيتعامل أحسن معاملة
ما هو بيقول يا باشا ويا بيه وبيرش رشه على المخبرين والعساكر
إنما الغلبان فى البلد دى بيأخد على دماغه
اللى حصل لخالد سعيد حيتكرر مرة واتنين و3 ....
لو استمر الصمت
الدول المتقدمة اللى بنتكلم عليها
يقدر عسكرى يمد إيده على مواطن هناك
لقد هانت علينا أنفسنا
إيه كله خايف على لقمة العيش؟
طوز فى لقمة العيش اللى متغمسة بذل

خالد سعيد هى حالة مصرية متكررة
ومأساة يعيشها شعب كامل
فما كفاهم ما فعلوه
لكنهم باتوا بتشويه سمعته
من الآخر
حتى لو هو قاتل
ومسكوه بأداة الجريمة
يعملوا فيه كده

يجب محاكمة كل من اشترك فى جريمة القتل هذه؟
وخصوصا المسئوليين؟
يجب على الشرفاء التدخل لايقاف هذه المهزلة
مهزلة شاب مصرى حدثت بالفعل
وستحدث غدا إن لم هناك وقفة حقيقية

يا سيادة الرئيس
أوجه نداء خاص جدا لك
وأثق تمام الثقة
أن كلامى وصوتى سيصل

هل برنامجك الانتخابى الجديد سيضمن لى أن ما حدث لخالد لن يحدث لى أو لأى أحد من أقاربى؟
وإن كانت الاجابة نعم
فلم حدث ذلك فى الماضى وحاليا رغم توليك رئاسة مصر

يا سيادة الرئيس
أطلب من فخامتكم التدخل
لإنقاذنا من براثن الارهاب الحكومى الذى يتمتع بسلطة القانون

إنى أتكلم من منطلق حرص مواطن مصرى
ألم تقسم أنك ستحترم القانون والدستور

فبإسم القانون والدستور
أطالب بإقالة وزير الداخلية
وأطالب بتطبيق القانون والدستور

فمصر اليوم ليست فى حاجة إلا للإمان من الداخل
أهدى لقطة الفيديو التنالية لكل مواطن شريف فى مصر
ولا تنسوا
إن الله يمهل ولا يهمل