الى من يهمه الامر

[Wild_Angel]

اختى العزيزة أسماء
أنا كنت زيك أول ما تخرجت ومكنتش عارفة الدراسات العليا حتكون عاملة إزاي
بالنسبة لجامعة الاسكندرية قسم الجغرافيا في 10 مواد بتدرسيهم الاول قبل ما تختاري الموضوع الخاص بالرسالة
ومن خلال المواد دي وبالاطلاع والابحاث اللى بيكلفوكي بيها الدكاترة انتى بتكتسبي خبرة
ومن خلالها ممكن تلاقي في سكتك الموضوع اللى عايزة تعمليه
انا مش عارفه بصراحة هل في دراسة عندكم قبل اختيار موضوع الرسالة ولا لأ بس متهيقلي اكيد في

وعموماً هي بتكون معظمها مواد درستيها بس انتى بتعملي أبحاث فيها
بالاضافة ان بيكون عندك مادة بأسم منهج للبحث العلمي دي بتعرفك على معلومات مهمة لعمل بحث علمي ( رسالة ماجستير)

ومن القواعد الهامة طبعاً انك تكوني حاصلة على دورة لغة عربية
مش عارفة دي موجودة عندكم فى الجامعة ولا لا
بس بجد دورة مهارات اللغة العربية بتعرفك أخطاء كتير ممكن تقعي فيها في الرسالة
بالاضافة أنهم بيساعدوكي كتير في تحسين الكتابة ومعرفة قواعدها وتنظيم كتابة الرسالة

عموماً أنا حالياً لسة مخلصة من فترة قصيرة المواد ما قبل تسجيل رسالة الماجستير
وبحاول الفترة دي ازود اطلاعاتي عشان أقدر اختار موضوع يصلح لعمل رسالة الماجستير ويكون فيه إفادة للمجتمع ويعود بالنفع عليا وعلى الجميع

ممكن تحاولي تسألي في إدارة الدراسات العليا في جامعتك عشان تعرفي القوانين الخاصىى بالتقديم
وكمان حاولي تعرفي من المعيدين اللى موجودين في القسم الحكاية بتتم إزاي
وربنا يوفقك ويوفقنا جميعاً يارب
ولو في اى حاجة ربنا يقدرنا ونخدمك
اطلبي أحنا كلنا أخوات في المنتدى