الأستهبال ...فى مراحل التعليم ...

[spider girl]

والله يا سمارت انا كنت هاديه اوى فى الفصل فى الحصه الى بيكون فيها شغل
وشقيه بس مش مشاغبه فى الحصص الى المدرس بيخش بيفرد فيها عضلاته
علشان يثبت انه احسن من المدرس الى باخد معاه درس او حتى يشم خبر
ان الدرس ده اتشرح لنا قبل كده فلازم يعمل انه بارع ومحدش هيشرحه زيه
فكنا بنحاول نثبت ان مدرسنا احسن منه وكنا طول الوقت نرفع ادينا قبل ما يكمل السؤال
وديه حاجه كانت بتنرفزهم بس كنت بعمل كده مع الى بيفردوا عضلاتهم بس والله
بس الحمد لله كنت محبوبه من المدرسين وانا كمان كنت بحبهم جدا ومحبوبه من صحابى

اما وصلت ل3 ثانوى الصراحه كنت بهتم بحصص وحصص لأ
والحصص الى لأ كنت بقعد اكتب فيها اى حاجه سواء واجب الدرس
او اى حاجه تانيه سعات نتكلم انا واصحابى واحلى زكرى باه كانت حصص الزراعه
اشتركت فى الزراعه لانى كنت مبحبش مدرسات الاقتصاد المنزلى الى فى المدرسه
طول الحصه طلبات وبتاع وخياطه وحجات تغيظ اما الزراعه كنا بنتعامل مع الزرع وكنا بنعرف اسماء جديده

للنباتات وكنت بحب الحصه دى هههههههه لان الميس كانت بتسبنا نعمل الى عايزينه بعد ما نخلص الى مطلوب مننا

يا سلام اما يكون فى حصه احتياطى لان المدرس مجاش نلم صحابنا من الفصول التانيه ونقعد نعمل واجب الدرس مع بعض
ونسمع لبعض ونقعد نتكلم على الدرس والى بيحصل فيه ونضحك بجد كانت ايام جميله احلى ايام عمرى

[KAREEM]

انا الحمد لله كنت طالب متميز من ايام الابتدائى
وبدأ الانتباه ليا من مدرسة الموسيقى لما اكتشفت
موهبتى وصوتى وطلعتنى فى الاذاعة غنيت
جااااايز ظلاااام الليل ومن ساعتها بقيت مشهور بيها فى المدرسة
اما فى الجانب العلمى فكنت عادى لانى مكنتش باخد دروس
ومع ذلك كنت بشترك فى مسابقات اوائل الطلبة ومسابقات خفظ القران
ولما طلعت الاعدادى فى مدرسة ابن طولون اللى عند البورصه
فضلت محافظ على اخلاقى وكنت متفوق اكتر من الابتدائى
وطلعت الاول ع المدرسة فى الاعدادية ومع ذلك كنت واخد حريتى فى المدرسة
وكنت انا واصحابى كبارات المدرسة ومديرينها بمعنى اصح
اما فى الثانوى نقطة تحول وصديق السوء اللى فضل ملازمنى
3 سنييييين ثانوى فى نفس التخته وكل ما اخش فصل الاقيه
وكمان الاقيه يجى يقعد جنبى هربت منه فى اول صف برضووو
جيه قعد جنبى وهو غصب عنى للاسف أثر كتير فيا للاسوأ
ودا درس اتعلمته انى اختار اصدقائى ومحدش يجبرنى انى اصاحبه
بس فى الثانوى بقى كنت تقريبا فى مدرسه عاشور
والناظر كان فى وادى والمدير فى وادى والوكيل فى وداى تانى
طب مرة انا وواحد صاحبى مثلا كنا نشوف الناظر دا ونقول له يا اقرع
ونستخى ونطلع نجرى وميتيييين من الضحك هو عيب بس كنا بنحب نضحك على قرعته
اما الزوغان فالحمد لله عمرى عمرى عمرى ما زوغت من ع السور
ودا لان باب المدرسة كان مفتوح لنا 24 ساعة وكنا بنخرج وقت ما نحب ونرجع وقت ما نحب
وع الحصة التالتة دى بقى اهم حصة عارفة ليه يا مروى عشان بنروح نجيب
عيييييش وفلافل وكشرى ومخلل بقى وبنظظبببط الكلام
ومهظم الحصص كانت حصص زراعة بنحب نقعد فى الجنينه
فكنا بنخليها حصص زراعة ونتلم بالاكل دا فى الجنينه ولا كأننا فى رحلة

اما عن المواقف فكتييييير فمش عارف احكى ايه ولا ايه
انا مرة كنت حرفع قضية على مدير المدرسة وكانو اصحابى
مسمينى سعد زغلول عشان كنت بطالب بمطالبهم فى اولى ثانوى
ومكناش لاقيين تخت وكنا حوالى 50 طاااالب فى فصل واحد
والله العظيم مببالغ لدرجة انى كرهت الدنيا فى السنة دى
وكنت بفكر اسيب التعليم بس انا عملت مفاوضات كتييير مع المدير
وكنت محضر ديسكات وورق فيه شكوى والمدير فضل يهاودنى
عشان مبعتش الشكوى وفى الاخر المشكلة اتحلت ودى

موقف تانى استاذة التاريخ كانت لدغة فى الررراء
فتخيلو بقى لما كنت قاعد فى اول تخته وبتيجى تتكلم
وتروح متفتفه على دماغى انا رحت حاطط الكتاب على دماغى
اخر ما زهقت فراحت بصة لى كدا فخدت بالها من نفسها
قالت لى حاطط الكتاب على دماغك ليه
قلت لها عشان بتنقط بس
رحات ميييته من الضحك على نفسها
وتخيلوها بقى لما كانت بتقول
فرعون الحضارة المصرية القديمة

اما مدرسة الجغرافيا لما كانت بتيجى تصحح الكراسات
وكانت لدغة فى الراء برضو بس دى كانت بتقول
الراء غييييين فتخيلو لما كانت تيجى تقولى كدا
كراااااستك اكررررريييييم

وبنفس الطريقة كدا بالشد دا

مرة بقى ابلة تانية حاولت تضربنى بالعصاية
عشان كنت بتشاقى وكدا وانا مكنتش بحب اضرب
فصممت انى مش حضرب وهى صممت قلت لها
طيب ورحت فاتح ايدى ومع اول عصاية نازلة على ايدى
مرجعتش علقتها فى ايدى ورحت ساحبها منها وواخدها
راميها لها من الشباك ع الشارع العمومى برا المدرسة خاااالص
وكانت يعينى حتتجن مكنش معاها غيرها وكانت العصيان شاحه
المهم انى اتكتبت غياب فى الحصة دى وكانت حتدوينى للمدير
بس زوغت منها وعدت على خير الحمد لله

هو فى مواقف تانية كتيييييير
انا اخترت بعض المواقف ومش عايز اكتر عليكو


حبقى اجيلكو تانى
الموضوع فكرته حلوة اووووى

[MUHAMED SAMY]

هههههههههههههههههههههه
ايشمعنى الحصه ال الثاله اللى بتزوغوا فيها



طب ف سؤال بجد عايزة اساله للشباب
بدال انتم بتزوغوا من المدرسه بدرى كدا ليه بتروحوها اصلا
يعنى كنتم تزوغوا من اول اليوم

هو التزويغ ليه
متعته
لكن اليوم من اوله الواحد يلحق يعمل كذا اجة

[momo_lovely599]

انا مكنتش بحب ازوغ الا لما احضر حصتين ثانيا لانى مرت زوغت من اول اليوم ووالدى عرف لان واحد زميله شافنى اما لما يشوفونا فى وقت تانى نقول دروس .

فاشلين بقى

[MUHAMED SAMY]

انا
بصراحة لولا امى و اختى تقريبا يعنى
كان زمانى فـــاشل من زمان
مدرستى فى ابتدائى
اسمها د.النبوى المهندس
بجد كانت ايام جـــامده جدا
خصوصا اخر سنتين
صحابى بقو يجولى ونلعب كورة وكده
اول 3 سنين كانو رتم واحد تقريبا
بعد كده كان فى تغيير
(مكنتش بزوغ ولا اى حاجة)
اول امتحان حساب
جبت فيـــه
صــــــــــــــــــفــر
(نبغه من يومى فى الرياضة)
ولسه الحمد لله عندى حوالى 4 صحاب من ابتدائى

اعدادى بقى
طارق بن زياد
يعنــــى
الرجولة ادب
شفـــــــــــت اللى عمرى ما كنت شفته
المدرسة دى اتخرج منها
دكاتره
مهندسين تعدين_مدنى_كهرباء
اداب تجارة السن
سواقين تكاتك وكرتات
(بياعين فى شتى التجارات اى كانت)
بـــــــــجد اثرت فيا بنسبة كبيرة
بس حظى حلو مع مدرسين العربى
(كان بيلعب عندنا كورة)
اكــــــتر موقف ضحكنى
ان مدرس الرياضيات
إدوار
اتكعبل فى العيال ووقع فى الفصل
سووووو مسخرة
اصلنا ساعات كنا بنقعد ع الارض
ولما يبقى ملناش مزاج للحصص
كنا نهتف ونقول
استاذ بدوى يا ابُه ايه العظمة دى كلها
يقولنا يالا يا ولاد النهارده يوم رياضى (المدرسين تلعب كورة واحنا نتفرج)
او نص يوم ونروح
وكان فى مدرس دماغ يجرى بالعربية بتاعته
ورا العيال المزوعة
وامريكانى وحبشتكنات بالعربية تحس انه ظابط
بقيت فـــاشل بنسبة حلوة
مزوغتش الا مرتين تلاته فى 3 سنين

الثانوى
يعنى حسنى مبارك
(يعنى ليه تزوغ من نص اليوم مادام تقدر تزوغ من اوله)
فى سنة اولى كنا اللى من طارق بن زياد صحاب
فى صف واحد تقريبا
كنت بروح المدرسة بالقطر(المواصلات زحمة)
شفنا حوادث وبلاوى وغيره
كنا بنحب نروح المدرسة متأخر
فى مدرسين بقت تضربنا بالعصاية والحوارات دى
وكنا مخنوقين من مدرس الفيزياء
فاخدنا يوم الخميس
نزوغه من اوله وكنا نطلع ع بحر العصافرة كانو لسه بيعملو اللسان جديد
ونقابل صحبا الى مزوغين من جمال عبد الناصر
الترم التانى التزويــــغ زاد
نلعب بلاى ستيشن كورة
فى تانيةوتالته الحال واحد
عددنا كان 28 طالب عشان كنا واخدين علم نفس2
كنت بدخل المدرسة قليل
بس كنت ع الكافيتريا اللى جنبها يوميا ده فى تانية
تالته اللى انا فاكره
دخلتها قليل جداااا منهم مرة لعبت كورة اول حصة ونطيت من على سور
الاكـــــاديمــية
مكنتش بحب اطلع من الباب
انط من ع السور لملعب التنس
وللشارع عدل
لدرجة ان مدرس العربى بتاع سنة اولى
شافنى مرة
قالى ازيك يابنى مبتجيش ليه؟؟ كنت رايح اعمل البطاقة سعتها
موش هدخل فى تفاصيل

وبالنسبة للدروس بقى ابقى اعمللنا ليها موضوع؟؟

I MISS U MY FRIENDS

[mohamed ali]

ياكريم انتا قولت انا الفصل كان اكتر من 50 طالب

انا على مدار 3 سنين الثانوى وبدون مبالغه اكبر عدد ممكن يحضر 20 طالب بالكتير اوى

انا فاكر ان مره الفصل بتاعى كان فيه 7 طلاب وكبيرُه اوى 10 طلاب و وكان مفيش مدرس يقدر يقولك حاجة

عشان كده كان النوم عندى هواية .

[alaa eid]

هههههههههههههههههه
كانت والله احلي ايام بالذات 3 ثانوي انا كنت بقي منضبطة جدااااااا لان بابا كان المدير وكنت قدوة البناااااااات في المدرسة فماكنش ينفع ولا ازوغ من حصص ولا حاجة بس كنت مجننة المدرسين شوية ف الفصل بس كان الحمد لله المدرسين كلهم عسل وكنت رغااااااااية اوي وكنت بقعد ورا بس كنت شاطرة علي فكرة مش مقياس اللي يقعد ورا يكون فاشل ورا اروق بكتير من اودااااااام وكانت ايام زي العسل ياريت ترجع تاني
ميرسي يا قمراية ع الموضوع

[smart girl]

سعادة غاااااااامرة والله ياجماعة بمشاركتكم دى فالازم ارد على كل واحد

[smart girl]

انا عن نفسي كنت بحب المدرسة جدا
وفى ولاد بيحبوا المدرسة جدااااا وبيروحواا عشان اصحابهم ويتفقوا هيلعبوا كورة امتى
وكنت بحب اصحابي
اما الكورة ديه شئ اساسي في حياتي كل يوم بعد المدرسة نلعب كورة
كانت حياتنا الكورة
موضوع جميل يا سمارت فكرتني بايام زمان كانت اجمل ايام حياتي

واضح يامصطفى انك بتحب الكورة اوى... دايما كدة ايامك تكون حلوة وفيها اوقات سعيدة نورت الموضوع بجد

[smart girl]

هههههههههههههههههههههههههههههههه
موضوع جميل اوى يا سمارت
فكرتينى ب ايام ثانوى
بس انا الحمد لله طول عمرى كنت ملتزمه كنت بروح المدرسه بدرى و اقف ف الطابور و كنت بعد ادام
و اكتب ورا المدرسين كل كلمه يقولوها و كرساتى تكون كامله و ادواتى كلها معايا
لدرجه ان اصحابى كانو بيألسو عليا من الالتزام اللى كنت فيه
و ف سنه ثانيه اعدادى كنت الطالبه المثاليه ع مستوى المدرسه
بس السنه الوحيده اللى اتغيرت فيها شويه مش كتير كانت 3 ثانوى
يااااااااااااااااااه
والله كانت ايام جميله
ميرسى ليكى يا جميل على الموضوع الرائع ده
بس انتى ماقولتلناش انتى كنتى بتعملى ايه بقى

انتى اجمل ياميرو واسمحيلى ااقولك الحمدلله انى معرفتكيش فالدراسة عشان انا كنت بتخنق من الطلبة الملتزمين اوى ههههههههههههه لااا بهزرى معاكى ياقمرا بس واضح انك كنتى شطورة ماشاء الله .. اما انا ياسيتى ولا كنت شاطرة اوى ولا كنت بليدة اوى تقدرى تقولى متوسطة بس المواد اللى كنت بحبها كنت بجيب فيها درجات عالية ومشكلتى بقة ان اى مرحلة دراسة ادخلها كنت بكون مميزة يعنى من العيال الباينة دول واقسملك بالله انى مكنتش بعمل اى حاجة فيها تميز لابسى لبس المدرسة وتصرفاتى زى اى طالبة عادية بس تلاااقى الطلبة عارفنى فى جميع المراحل والمدرسين يخدونى فالانشطة يعنى حفلات مدرسة ماشى رحلات ماشى اذاعة ممكن وانا اساسا حد بيحب يعد على جنب كدة هههههه بس مامتى كنت تشجعنى وتقولى اشتركى وجيت بقة فالثانوى لاقيت صحابى اللى هما بيعقدوا ورا اخدونى تبعهم بردة هههههه بس احنا مكناش شلة فاسدة لان مدرستنا كانت مدرسة متفوقين اصلا ففسدنا كان اخرة اننا نعمل غلاااسة شوية على المدرسين بس انا مكنتش بغلس غير على المدرسين الغلسين بجد اما اللى غلبانين دول فمكنتش بعمل حاجة فيهم وبالرغم من كدة كان فى مدرس رياضة يقولى انتى أس الفساد هههههه مهما احاول اقولة انى مبعملش حاجة بردة مصمم وكان عندة حق صحابى يعملوا البلوة ويدبسوها فيا ....ومرة مامتى جت المدرسة الثانوى زى اى ام عادى جدااا ..انا للاسف كانوا مطلعين عليا اسم كدة مينفعش ااقولة ههههههههههههه مش عشان حاجة بس عشان هتعرف لو قولتة ماعلينا المهم انى مامتى قالت اسم بنتها قالولها اطلعى الفصل بتعاها خبطت على الفصل ..المدرسة قالتلها لا مفيش طالبة اسمها كدة فين وفين لحد مانا شوفتها وقلت للميس ايوة دى مامتى ههههههههه ماما اعدت تقول انا بنتى هادية جدااا فالبيت ومطيعة ادة دى مش بنتى اكتشفت الحقيقة المرة ياحرام ... بجد كانت احلى ايام حياتى
بفكر اعمل موضوع اسمة ذكريات عشان اللك اللى انا لكيتة دة