الأستهبال ...فى مراحل التعليم ...

[smart girl]

كلنا مشينا مرحلة كبيرة من التعليم واكيد انها معديتش كدة لازم يكون فيها مواقف وطرائف وعجائب ونوادر يعنى مسلا بالنسبة للبنات:

* لااااازم يكون فى شلة فاسدة فالفصل ...اللى بتعقد ورا ....وكانت تخنق المدرسين وتقرفهم فى عشيتهم وتجبلهم الضغط والسكر وكل الامراض





*والبنات اللى تعمل عكس ماالمدرسة تقرر يعنى :
ياحببتى الطرحة بيضا والقميص ابيض والشراب ابيض وفى كرفاتة نلاقى احنا بقة طرحة رصاصى مدية على رمادى شوية والقميص تركواز والشراب روز والكمام متشمرة ومفيش كرفاتة طبعاااا واحيانا المستيكة عشان الموضوع يكمل ...






*وفى بنات اللى طول الوقت مهاجرة من الفصل وبتلف فالمدرسة...وتهرب من الحصص .





*وفى بنات دحيحة اللى تلاقيها نايمة طول النهار فالفصل عشان عارفة انها مش هتسفيد حاجة فتنام احسن عشان تربى سهرة محترمة للدح طول الليل




*والبنات الرخمة اللى بتروح المدرسة بس عشان تاكل سندوتشات صحبها البنات وتعد تضرب الاكل كلة ومابيهمهاش بئة فسحة ولا حصة عربى ولا انجليزى .. المهم تاكل وخلاص.


*وشلة البنات الكدابة اللى طول النهار تفتكس على بعض وماشاء الله كلهم عارفين انهم بيكدبوا بس عادى عاملين من بنها

وانماط كتيرررة اوى

اما بالنسبة للولاد فالموضوع مختلف تماما انا طبعا محصليش الشرف وكنت ولد قبل كدة عشان اعرف هما بيعملوا اية بالظبط بس على حد معلوماتى :

* ان فى نوع بيحب يزوغ من المدرسة وينط من على السور ويروح يتفسح او يعاكس مدرسة البنات حسب اخلاقة يعنى





*وفى نوع بيحب ينوط من على السور عشان يشرب سجاير وبعدين حاجة غريبة عايزة اعرفها لية بيقفوا يشربوا سجاير قدام المدرسة ؟؟ انت مش زوغت متروح ياسيدى تشربها فمكان تانى ههههههه (يمكن فى وجهة نظر ولا حاجة )






*وفى ولاد بيحبوا المدرسة جدااااا وبيروحواا عشان اصحابهم ويتفقوا هيلعبوا كورة امتى .





*وفى ولاد بتروح عشان تخنق المدرسين .






واكيد الولاد ادرى منى هما كانوا بيعملوا اية
.
.
يلااااا كل واحد يدخل يقولنا كان بيعمل اية فى مراحل تعليمة

[MUHAMED SAMY]

همتحن
بكـــــــــــــــــره
واجى ارد

[smart girl]

همتحن
بكـــــــــــــــــره
واجى ارد

ربنا يوفقك يامحمد وينجح كل الناس اللى بتمتحن يارب واكيد هنستنى ردك

[mostafa hassan]

انا عن نفسي كنت بحب المدرسة جدا
وفى ولاد بيحبوا المدرسة جدااااا وبيروحواا عشان اصحابهم ويتفقوا هيلعبوا كورة امتى
وكنت بحب اصحابي
اما الكورة ديه شئ اساسي في حياتي كل يوم بعد المدرسة نلعب كورة
كانت حياتنا الكورة
موضوع جميل يا سمارت فكرتني بايام زمان كانت اجمل ايام حياتي

[Marwa Magdy]

هههههههههههههههههههههههههههههههه
موضوع جميل اوى يا سمارت
فكرتينى ب ايام ثانوى
بس انا الحمد لله طول عمرى كنت ملتزمه كنت بروح المدرسه بدرى و اقف ف الطابور و كنت بعد ادام
و اكتب ورا المدرسين كل كلمه يقولوها و كرساتى تكون كامله و ادواتى كلها معايا
لدرجه ان اصحابى كانو بيألسو عليا من الالتزام اللى كنت فيه
و ف سنه ثانيه اعدادى كنت الطالبه المثاليه ع مستوى المدرسه
بس السنه الوحيده اللى اتغيرت فيها شويه مش كتير كانت 3 ثانوى
يااااااااااااااااااه
والله كانت ايام جميله
ميرسى ليكى يا جميل على الموضوع الرائع ده
بس انتى ماقولتلناش انتى كنتى بتعملى ايه بقى

[حنين الحياة]

فكرتينا يا سمارت بايامسكر وعسل....انا بقي كنت حاجه تانيه خالص كنت بحب المدرسه والمدرسين وكنت بشترك في مسابقات وحاجات تانيه كتير

[بيبو العاطفى]

انا بقى يا سمارت كان عندى جانب ايجابى وجانب سلبى يعنى الايجابى كنت بحب اروح المدرسة كل يوم مغيبش ولا يوم بس كنت لازم ولابد انى ازوغ من على السور وكنت برجع تانى كنت ازوغ فى الحصة الثالثة وراجع بعد الفسحة عامل عيش باللحمة لى ولصحابى وكنت متفوق جدا بس فى الكورة كان الفصل بتاعى لازم كل سنة ياخد الدورى وكنت احب ارسم جدا كريكاتير واعلقه على الجدران وكنت مشترك فى الاذاعة وكنت باخد شهادات تقدير ياما اوى كانت ايام جميلة جدا والله شكرا ليكى يا سمارت فكرتينى بالذى مضى

[momo_lovely599]

انا بقى كان اخرى فى المدرسه الحصه التالته وبعدين بقى اروح للسور حبيب قلبى وهاتك يا نط بس الحمد لله فى اخر سنه المدرسه عملتنا حديد نطلع من عليه فمعدناش محتاجين حد يرفع التانى بس المشكله مكنتش بروح البيت كان دايما فى النت واللى كنت لسه بتعلمه وافضل لنهايه اليوم بس الحمد لله مشربتش سجاير خالص

[Marwa Magdy]

هههههههههههههههههههههه
ايشمعنى الحصه ال الثاله اللى بتزوغوا فيها



طب ف سؤال بجد عايزة اساله للشباب
بدال انتم بتزوغوا من المدرسه بدرى كدا ليه بتروحوها اصلا
يعنى كنتم تزوغوا من اول اليوم

[mohamed ali]

موضوع حلو ياسمارت فكرتينى بالمدرسة

انا كانت مدرستى والفصل بتاعى على مدار التلت سنين على البحر- مدرسة الانفوشى الثانوية بنين -

كنت فى الغالب مش بحضر الطابور وكنت بنام فى الفصل من الحصة الاولى لغاية الفسحة هواء البحر كان زى المخدر

وهما مرتين نطيت من فوق السور كانت مره فى مباريات الاهلى فى اليابان لازم ازوغ طبعا

ومره طقت فى دماغى و زوغت وبعدها على طول فتحو الباب كان المدرسه فاضية .

وفى بعض الاحيان كنت وكيل الغياب عارفه الطالب اللى يلف على الفصول

عشان ميحضرش هو انا بس كل دا اتغير فى 3 ثانوى وبقيت مروحش المدرسة تقريبا حضرت شهرين فى السنه كلها