لا للفساد ... لا للظلم سبت جديد 26-2-2011

[Horiaa Swedan]

قول ورايا انا نازل باذن الله المجمع يوم السبت 26-2-2011 اقول لا

لا للاتحاد الطلبه والفلوس اللى منعرفش بتروح فين والانتخابات المزوره
لا للكوسه فى دخول الشعب ولا لكل دكتور مبيشرحش وبيراعى ضميره


لا للامتحانات من خارج المنهج
لا لمعمل مفيهوش اجهزه سليمه ولا سرعه ولا برامج حديثه
لا لماده عملى النظرى فيها عليه 75 %من الدرجه

لا للتعامل الغير ادمى مع الطلبه من الحرس وبعض الدكاتره
لا للمناهج والكتب اللى بقت تاريخ
لا لتاخير الكتب اللى بنستلمها قرب الامتحان

لا لعدد الطلاب الضخم والمدرجات ام كراسى فرح اللى بتعذبنا وبطفشنا
لا فى سعات المحاضره الكتير اللى بناخد فيها مليون معلومه فى نفس واحد
لا للمبانى المكسره والحيطان اللى حتقع علينا والحمامات اللى مغلقه ديما للتحسين والميه المقطوعه والشطفات المسروقه وكل الهواجس دى اللى مش حقيقيه



لا لشباك الشئون اللى بيتقفل فى وشنا والعوجان بتاع الموظفين علينا وكلمه تعاله بعد منفطر .

لا للتامين الصحى اللى بيفتح من 9 ل10 مرتين فالاسبوع ل 7 كليات مطلوب مننا نعمل سبق عليه وفالاخر يقولك الجهاز مش موجود ولا السماعه باظت .


لا للتعليم اللى مبقاش مجانى وفلوس الدمغات اللى ملهاش اول من اخر

لا لعدم التخصص والدكتور بيفهم اكتر منك واى دكتور يدى اى ماده سد خانه

لا لكل المعدين اللى بيتعينوا عشان اوئل الدفعه حتى لو مكنوش بيعرفوا يشرحوا ولا عندهم ملكه توصيل المعلومه.

لا لكل دكتور ومعيد ليس لديه علم كافى فالمواد العملى وبيشرحها نظرى.

لا لعتبار بعض الكليات مجهوله الهويه زى كليتنا كليه الاداب لا ليها نقابه ولا نادى ولا صله بالواقع

لا لتصحيح الامتحان حسب طريقه الدكتور ولو كتب غير كده حتى لو كان صح يبقى يجيب صفر لانه كده يبقى مبيحضرش مهو ممكن يكون بيحب يزود معلوماته دى حاجه غريبه اوى

لا والف لا للفساد
انا مصرى حبداء بنفسى

[olivia nader]

yeaaaaaas NO
بس دي كراسي قهوه يا رورو مش فرح ههههههه
و كمان فعلا لازم بجد كل حاجه تمشي صح و بالزات بتوع الشئون دول مش كل مروح اتخانق معاهم
مستفزيييييييييييييييييين جدا

[KAREEM]

حبدأ كدا همزه ع الألف مش ع السطر


مطالب معظمها مشروعه فعلا
بس انا دلوقتى مش بفكر فى دفعتنا
لان احنا كدا كدا خلاص
احنا ممكن نطلب طلبات تفيد الدفعات الجايه أكتر
ودا اكيد من ضمن الطلبات اللى طلبتيها
بس ياريت يكون تركيزنا على كدا أكتر

انا باذن الله نازل بكره من بدرى
بس عندى ملحوظه ان احنا عملنا ثوره
وكان نتيجتها ان احنا يتعمل معانا حوار لتحقيق مطالبنا
فلما نيجى نطلب نطلب بالمعقول
" اذا أردت ان تطاع فأمر بما يستطاع "
مينفعش نطلب كل المطالب دى مره واحده ولا بالكم دا
كل دا حيجى بالتدريج
بس احنا نركز ع المطالب السهله اللى ممكن تتنفذ بكرة قلم

وشكرا

[Horiaa Swedan]

كريم بغض النظر عن التصليح اللغوى بعد كده حبقى اكتبلك بالفرنكوا احسن ههههههههههههه

المطالب دى اكيد مش عشانا خالص لاننا فى عداد المتخرجين حاليا

وانا مكنتش ناويه اعمل اى حاجه ليها علاقه بالكليه لانى قلت احنا خلاص حنتخرج وملناش علاقه يعنى يبقى تركزنا اكبر على القوى العامله وما الى ذلك

بس افتكرت ان احنا من اكتر الدفع اللى عاشت الظلم واللى حتحس بالمطالبه بيه اكتر مش عشانا لا عشان اللى جاى

[MUHAMED SAMY]

قول ورايا انا نازل باذن الله المجمع يوم السبت 26-2-2011 اقول لا

أنا مش نازل أقول لأ بس
لا للاتحاد الطلبه والفلوس اللى منعرفش بتروح فين والانتخابات المزوره
معرفش بصراحة يعنى أيه أتحاد طلبة دول زى الجوالة كده
لا للكوسه فى دخول الشعب ولا لكل دكتور مبيشرحش وبيراعى ضميره

تصدقى كلمة الشٌُعب قعدت أقرائها كتر عشان أفهما
وبالنسبة لدكتور مبيشرحش معرفش تقصدى بيها دكتور من القسم؟؟
لا للامتحانات من خارج المنهج
وأتمنى انه مش على اخر الترم كده نسمع الكتاب كله عليكوا
صحابى فى جامعات تانية بيقولو كده
كأنه كتاب مدرسة ولازم يخلص
لا لمعمل مفيهوش اجهزه سليمه ولا سرعه ولا برامج حديثه
ووحدة نظم المعلومات كمان
بس المعمل بالنسبلى كويس بنسبة 80% ولكنى أعتقد ان من الضرورى زيادة ساعات التدريب
والنقطة اللى كنت قلتها لمهندس محمد جابر وأستاذ محمد سعد
الا وهى"أن السكاشن اللى بناخدها فى المعمل يتم تسجيلها ببرنامج زى الSNAGIT
وبكده يبقى المطلوب منى فى السكشن انى اتابع مع المعيد مش اقعد اكتب فى خطوات وخلاص عشان اعرف اعمل اسكتش اقدمه اخر الترم"



لا لماده عملى النظرى فيها عليه 75 %من الدرجه
فى محاضرة تاكيومترية كنت سألت أستاذ محمد سعد
أننا ليه بندرس أجهزة قديمة ونظرى كتير؟؟
قالى كده أنت عايز تبقى سواق جهاز
وأنا اقتنعت بصراحة انى ادرس نظرى حتى لو مش هيفيدنى كله فى الشغل
لكن فى نفس الوقت مسقطش فيه؟؟

لا للتعامل الغير ادمى مع الطلبه من الحرس وبعض الدكاتره
ولا للتمييز بين طالب واخر...جامعات تانية بيحصل فيها كده
لا للمناهج والكتب اللى بقت تاريخ
اختلف معاكى فى النقطة دى
كنت وما زلت اتمنى ان قسم الجغرافيا يكون 5 سنين
أتمنى ان يكون فى ابحاث تطلب باستمرار
أكتر بحث استفادة منه كان فى الاجهزة المساحية
شفت حجات جديدة
العلاقة بينى وبين المنهج متكنش امتحان
درست جغرافيا طبيعية وجيومورفولوجى وخرائط جيولوجية
وعمرى ما مسكت صخرة بايدى
الرحلة الى عملها دكتور راسد بجد حاجة مفيدة جدا
اننا مندرس ظاهرات نظرى واحفظ واتخيل وخلاص

انا فكر انى كنت كاتب فى المنتدى هنا اننا المفروض يكون اسبوعيا او كل شهر يكون فى ندوة لطلاب الجغرافيا
يعرض فيها دكتور"موضوع علمى بشكل مفسر"
بعيد عن المنهج
لا لتاخير الكتب اللى بنستلمها قرب الامتحان
وتلاقى الكتاب 400 صفحة

لا لعدد الطلاب الضخم والمدرجات ام كراسى فرح اللى بتعذبنا وبطفشنا
ونقعد 3 على كرسيين
أو نبدل مع بعض واحد يقف وواحد يقعد
لا فى سعات المحاضره الكتير اللى بناخد فيها مليون معلومه فى نفس واحد

لا للمبانى المكسره والحيطان اللى حتقع علينا والحمامات اللى مغلقه ديما للتحسين والميه المقطوعه والشطفات المسروقه وكل الهواجس دى اللى مش حقيقيه


لو تفتكترى يا حورية ان كان فى موضوع فى اول السنة
وقلت فيه ان لو كل طالب يدفع
10جنيه كل شهر
ولو القسم فيه الف طالب والسنة الدراسية 7 شهور
يعنى تقريبا 70 الف جنيه كل سنة يشهيصوو القسم
لكن بالنسبالى دفعت فلوس كتيير فى ظل مسمى تعليم مجانى
نفسى ادخل القسم الاقى نموذج للكرة الارضية فى مدخل القسم
GREEN CARPET

لا لشباك الشئون اللى بيتقفل فى وشنا والعوجان بتاع الموظفين علينا وكلمه تعاله بعد منفطر .
وايام الكرنيهات طوابييييييير
لا للتامين الصحى اللى بيفتح من 9 ل10 مرتين فالاسبوع ل 7 كليات مطلوب مننا نعمل سبق عليه وفالاخر يقولك الجهاز مش موجود ولا السماعه باظت .
فساد

لا للتعليم اللى مبقاش مجانى وفلوس الدمغات اللى ملهاش اول من اخر
بعتقد قريبا هيقولو تعليم مجانى للثانوية العامة
والجامعات بفلووس
ولا الدمغات اى حاجة ب 15 جنيه
والمفروض افادة السمر كورس تتطلع مجانى
ولما اعمل طلب التماس ويبقى ليا درجات يدونى الخمسين جنيه تانى ...... ولا بلاش الا ميدونيش درجات
لو ليا حق هخده يوم القيامة
لا لعدم التخصص والدكتور بيفهم اكتر منك واى دكتور يدى اى ماده سد خانه
بيقولك فى جامعات فيها بيدخلو يملو من ورق....قلتلهم طب ماتصورو الورق وخلاص
وعندهم برضوا هناك دكاترة بتشرح فى غير تخصصها
لا لكل المعدين اللى بيتعينوا عشان اوئل الدفعه حتى لو مكنوش بيعرفوا يشرحوا ولا عندهم ملكه توصيل المعلومه.
ممكن توضيح
لا لكل دكتور ومعيد ليس لديه علم كافى فالمواد العملى وبيشرحها نظرى.
ممكن توضيح
لا لعتبار بعض الكليات مجهوله الهويه زى كليتنا كليه الاداب لا ليها نقابه ولا نادى ولا صله بالواقع
كل لما تقول لحد كلية أداب يحسسنى أنى دبلون
لسه هفهمه يعنى ايه مساحة وجى اى اس
لا لتصحيح الامتحان حسب طريقه الدكتور ولو كتب غير كده حتى لو كان صح يبقى يجيب صفر لانه كده يبقى مبيحضرش مهو ممكن يكون بيحب يزود معلوماته دى حاجه غريبه اوى

وأتمنى ان الامتحان يكون موحد أنتساب وانتظام من سنة أولى
زى مادة العملية معظم دفعتنا جاب مقبول والانتساب جابو تقديرات
وهى مادة من شروط القبول فى شعبة المساحة

لا والف لا للفساد
انا مصرى حبداء بنفسى

أتمنى كلامى ميضيقش حد ولو فى اختلاف فى وجهت النظر نتناقش
واتمنى ان الدكاترة لو بتدخل على المنتدى تتناقش معانا
وزلو فى فكلامنا حاجة مش صح يتم توضيح ده لينا فنحن مازلنا طلبة
وهم استذتنا

فى كلام كتييييير يتقال لكن مازلت اعتقد ان هناك
________________خط أحمر____________

[Horiaa Swedan]

أنا مش نازل أقول لأ بس

وانا معاك يا محمد كلنا مش نزلين نقول لاء وبس لا ونتناقش لحد منوصل للحل ونسعى لتنفيذه كمان

معرفش بصراحة يعنى أيه أتحاد طلبة دول زى الجوالة كده

اتحاده الطلبه ده عباره عن النشاط بتاع الكليه اللى فى الجواله وكله وده ميزنيته بتعدى المليون جنيه عشان دعم النشاط والخدمات ورفع مستوى الطلاب واقامه الحفلات والمهرجنات والرحلات المدعمه والانشطه الاجتماعيه والخ من اوجهه النشاط زى الجمعيه الجغرافيا بس على اكبر وطبعا احنا ولا بنسمع عن الفلوس دى حاجه كل اللى بنشوفه ديجى واغانى ورقص وحاجه لا تليق بجامعه محترمه ولا حرم جامعى

تصدقى كلمة الشٌُعب قعدت أقرائها كتر عشان أفهما
وبالنسبة لدكتور مبيشرحش معرفش تقصدى بيها دكتور من القسم؟؟

انا اسفه ابقى قولى بتتكتب ازاى وانا اعدلها مش اول حد يلفت انتباهى على التصحيح اللغوى بس ده كمان يعتبر فساد تعليمى انى وصلت لاخر سنه كليه وعندى غلطات املائيه

الدكاتره اللى مش بتشرح او بتستخدم اساليب قديمه فالشرح كتير جددددددددا مش عندنا فالقسم بس يمكن ربنا رزقنا بدكاتره يكاد يكون الاغلبيه بيراعوا ربنا فينا الا ان البعض بيستخدم اساليب غير وفى دكاتره لسه بتشرح من الورق وبتملى

فى محاضرة تاكيومترية كنت سألت أستاذ محمد سعد
أننا ليه بندرس أجهزة قديمة ونظرى كتير؟؟
قالى كده أنت عايز تبقى سواق جهاز
وأنا اقتنعت بصراحة انى ادرس نظرى حتى لو مش هيفيدنى كله فى الشغل
لكن فى نفس الوقت مسقطش فيه؟؟

بص يمكن بالنسبه لبعض المواد الكلام اللى بتقوله ده عادى لكن ماده زى الحاسب الالى وماده زى الجى اى اس والاستشعار مينفعش فيها نظرى كتير مش عشان مجال الشغل لا عشان هى اصلا مفيهاش نظرى

اختلف معاكى فى النقطة دى
كنت وما زلت اتمنى ان قسم الجغرافيا يكون 5 سنين

انت موضحتش سبب الاختلاف فى مواد بقت اثريه اطورت واتغيرت المفاهيم فيها ممكن اخد نبذه عن تطورها وتغيرها بدل ما اخد منهج كامل عن فلان قال وفلان نقده وفلان عمل وفلان نقده وفلاخر وصلنا لفلان بالتاريخ واسم فلان ورقم بيته
ممكن ندرس النظريات بصوره مبسطه عشان يبقى عندنا وعى بالتطور اللى موجود لكن مش لمجرد سرد نظريات وحفظها
وان التعريفات ميبقاش حفظها نصى لكن الاخذ بمضمونها انا وحده من الناس ابدا مبعرفش احفظ تعريف كامل
وانا معاك ان يبقى القسم 5 سنين فعلا لان مواده كبيره ومليئه بالافكار


لا لكل المعدين اللى بيتعينوا عشان اوئل الدفعه حتى لو مكنوش بيعرفوا يشرحوا ولا عندهم ملكه توصيل المعلومه.
ممكن توضيح

قانون الجامعات بينص على ان الطالب الاول على الدفعه بالتقدير اللى يحدده مجلس القسم عند الحاجه لمعيدين يتعين معيد

يعنى انا اجيب جيد جدا او امتياز وابقى اولة الدفعه بتعتى يعينونى معيده مع انى ممكن ميبقاش عندى ملكه الشرح بذاكر اه وبحل صح لكن مبقدرش اوصل المعلومه كويس للى قدامى ولا اشرح وده موجود فى معيدين كتير عندنا وبره ممتزين فالشغل لكن يشرحوا تحس انك تايهه او مش فاهم هما عايزين يوصلوا لايه على النقيض ممكن يكون فى طالب تانى ربنا وهبه ملكه الشرح لكن تقديره جيد ده ممكن نعمله اختبار لو معلوماته سليمه يتعين معيد فهمتنى ؟


لا لكل دكتور ومعيد ليس لديه علم كافى فالمواد العملى وبيشرحها نظرى.
ممكن توضيح

فى دكاتره ومعيدين كتير بيدخلوا يشرحوا المعلومه بصوره نظريه خصوصا المواد الخاصه بالكمبيوتر زى الجى اى اس ولما تسالهم يقولك لا ده مش شغلى ده شغل المعيد اللى حيديك العملى او فى المواد الطبيعيه يقولك لما تطلع رابعه حتشوف كله فالبحث الميدانى

كلامك طبعا مفيهوش اى مضايقه بالعكس انا سعيده بيه جدا

[هدى على]

وانا معاكى ياحورية

[esraa marey]

انا يا حورية مكاكنتش بحضر الاجتماعات الى فاتت مع العميد كنت بعرف الاخبار نتائج بس
ولما كنت بقراء القرارات الى بيوصول بيها كانت مش بتعجبنى وكنت بحس انها فض مجالس
وطبعا القرارات الى مكتوبة على موقع الكلية
والنهاردة روحنا انا وصحابى عادى على اساس انه اجتماع عشان اشوف بنفسى
ونقول بنفسنا وتناقش



لكن الى حضرروا لما حكوا لنا عن الى حصل
كان الصراحة بيدل انه مافيش قرار حيتنفذ
وبعدها اتفقنا على طلب واحد طبعا عارفينه وبدانا فيه

ومش على مستوى كلية اداب بس
ع مستوى مجمع

عجبنى جداااااااانقاشك انتى ومحمد
كلامكم ومحقوقنا الى طالبنها واقعية

[KAREEM]

العمييييييييد لااااااااازم يمشى
لاااااااازم يمشى
لااااااازم يمشى

هو دا الطلب يا اسراء مش كدا ؟؟؟
مش حنكسف ان احنا نطلب طلب مشروع بعد كدا
لاننا مش حنسمح بحد يتلووون علينا
خاصة لما يكون عضو لجنة سياسات فى الحزب الوطنى
اللى خرب البلد واللى مازاااال حتى الان بيخطط لخرابها
انا باذن الله نازل بكره وحشارك كل يوم
لحد ما العميد يمشى ان شاء الله
وأبشررررك انه حيمشى قريبا ان شاء الله
هو وكل اللى زيو
فيكون لينا دور وشرف فى دا ياريت
بدل ما نقف نتفرج كمعظمنا

[esraa marey]

ان شاء الله يا كريم

وعلى فكرة فى روؤساء جامعات قدموا استقالتهم
بس مش عارفة مين هما؟؟؟؟؟؟