الكليه واول يوم فيها ...ياااه شاركنا واحكيلنا

[ahmedko]

على فكرة ياجماعة
اول يوم فى الكلية دة بيكون غريب
يعنى انا شوفت ناس كرهت الكلية من اول يوم
و مدخلتش غير على الامتحانات
و ناس من يوم مدخلت مطلعتش منها و لازقت فى الجناين بتاعتها و على السلالم

[Wild_Angel]

كتير بيكونوا كده بس الاهم ان الواحد يطلع منها على خير وهو معاه فى حقيبة الذكريات لحظات يتمنى ان تظل معه طوال العمر

[white_heart]

انا احب اعقم على الموضوع المهم دة <على راى ابلة نظيفة والقطنة مبتكذبش> انا اول يوم ليا فى المجمع وانا فى ثالثة ثانوى كان اخويا فى تجارة وحبيت اجى المجمع معاه كنت عاوزة اشوف الكلية وبصراحة عجبتنى مفيش يونيفورم ومفيش حاجة اسمها غياب وحضور ولا فية طابور وانا اصلا كلة كان نفسة انى ادخل هندسة وانا اصلا مقرره اداب جغرافيا من وانا فى اولى ثانوى بس انا سبتهم يحلموا انا اصلا مش حاسة ان هندسة تنفع للبنات < دى كانت حجتى> مع شوية عدم تركيز دخلت اداب بعد ما الواحد نظرة ضاع فى الرياضة اتنين والفيزياء والاحصاء بس الحمد للة دخلت اداب جغرافيا وانا مبسوطة وكل الناس زعلانة وعلى راسهم المحروسة ماما لابس انا بعد كدة اكتشفت عيوب الكلية واكتر حاجة تعبتنى هى ان مفيش نظام يعنى كل واحد ماشى بقانون دماغة واحنا اصلا شعب نخاف منختشيش واوحش حاجة بقى بجد عصبتنى ولاول مرة هى السجاير الشباب حسسونى انى فى مصنع تبغ والواحد منهم يشرب سجاير عادى فى القسم وقدام الدكاترة مش لازم نخاف منهم المهم نحترمهم

[AYMAN GAMAL]

انا احب اعقم على الموضوع المهم دة <على راى ابلة نظيفة والقطنة مبتكذبش> انا اول يوم ليا فى المجمع وانا فى ثالثة ثانوى كان اخويا فى تجارة

والله عندك حق عالسجاير

بس على فكرة الدفعة المشهورة بالسجاير هية دفعة سنة تانية السنة اللي فاتت

معظم اللي فيها بيشربوا السجاير ودي حاجة مش مشرفة طبعا

[Wild_Angel]

بالفعل عاده سيئه تشير الى انسان لديه عقده
كيف يصير عبد لشئ لا يتعدى طول سنتيمترات
الله يسامحهم ويجازيهم

نفس الشئ بيستفزنى

وتعقيبا على شئ كان مكتوب فى احد الردود
ان ليس دائما يكون اختيار الاهل صحيح
ولكن علينا ان نتاكد انهم دائما يبعدونا عن تيار ضد الريح

[Wild_Angel]

بجد الموضوع ده انا بحبه
لانه من أول الموضوعات اللى عملتها فى المنتدى
اتمنى انه يعجبكم وياريت تشاركونا بأرائكم :)

[MUHAMED SAMY]

فعلا ذكريااات جميلة..طبعا قسم جغرافيا ده القسم اللى مكنتش أفكر ادخله فى اداب..
كنت بروح الكلية قبل الدراسة وادخل كل الاقسام الا القسم ده..شكل الخرايط اللى على السلم كان بيرعبنى..الا لما سمعت عن شعبة المساحة.
واول يوم رايح الكلية مفكر ان القسم هيكون 7.8طلاب كبيره15..لكن الاعداد كانت كبيرة..واصدقاء اول يوم (شادى ومختار)مازلو اقرب الاصدقاء حتى الان..والواحد اتعرف على ناس محترمة كتيير ...ومادة الجغرافيا العملية بالنسبالى مادة لاتنسى وكنت بفكر احول من القسم بسسبها لكن الحمد لله...موضوع رائع

[Wild_Angel]

جميل اوى انك شاركتنا بالذكريات دى

انا بالنسبالى الجغرافيا العمليه كانت من اجمل المواد كان بيدرسهالى دكتور محمود بشر
هو دلوقتى مسافر تقريبا فى الامارات او السعوديه ربنا يديله الصحه

بس حقيقي قسم الجغرافيا من امتع الاقسام فى دراسته
اشكرك يا محمد
واتمنى الجميع يشاركونا بذكرياتهم فى اول يوم كليه

[ساره احمد عبد الفتاح]

انا اول يوم كنت كرهه الكليه لان حسيت انى حلمى فى انى ادخل الكليه اللى بحلم بيها ضاع

ورغم انى قابلت ناس كتير بقوا من اعز اصحابى وبالرغم من ان فى اساتذه كتير بقدرهم وبحبهم فى القسم

الا انى كل يوم بكره الكليه عن اليوم اللى قبله

[Wild_Angel]

ليه بس كده يا ساره
بصى تعرفى قصة الصياد اللى كل يوم مضايق من البحيره اللى بيصطاد منها كل يوم عشان لونها وحش ؟؟؟!!!
بلاش تبصى للكليه والحاجات اللى مش حلوه اللى بتدايقك فيها
بصى على اجمل حاجه اخدتيها منها
اعز اصحاب
اساتذه بتحبيهم وتقدريهم وبتتعلمى منهم مش المواد بس .. لا احنا كل يوم بنتعلم من اخلاقهم ومن ثقافتهم

فى الاخر بقولك ان الصياد كل يوم بيروح وبياكل أحلى سمك فى الدنيا
بس متبقيش زيه وتضيعى طعم الايام والحاجات الحلوه

حبي الحياه وكل ما فيها عشان وجودك فيها يكون دايما أحلى وله طعم تانى

ملحوظه صغنونه

اول يوم ليا مكنش حلو على فكره
ومع ذلك الحمد لله انا خلصت وكملت دراسات
عشان دورت على احلى حاجه فى الكليه ممكن اعملها