نفسك فى ايه ؟؟؟ و بتحلم بايه؟؟؟؟

[Sara Gamal]

سؤال جميل أوى يااستاذ محمد...بس صعب أوى دى تالت مرة اجاوب عليه وأمسح الإجابة

بس سؤالك فكرنى بأبيات حكيمة جداً للعقاد بتقول....

صغيرٌ يطلبُ الكِبرا .. وشيخٌ ود لو صَغُرا
وخالٍ يشتهي عملا ً.. وذو عملٍ به ضَجِرا
ورب المال في تعب .. وفي تعب من افتقرا
وذو الأولاد مهمومٌ .. وطالبهم قد انفطرا
ومن فقد الجمال شكي .. وقد يشكو الذي بُهِِِِرا
ويشقى المرء منهزما .. ولا يرتاح منتصرا
ويبغى المجد في لهفٍ .. فإن يظفر به فترا
شُكاةٌ مالها حَكَمٌ .. سوى الخصمين إن حضرا
فهل حاروا مع الأقدار .. أم هم حيروا القدرا ؟

يمكن الابيات مش بتتكلم عن الاحلام بالتحديد بس عن عدم الرضا بالحال مهما كان....!!!

أما عن أحلامى ...يمكن من ست سنين كان ممكن اجاوب على السؤال ده زى كل الناس ،،،بس دلوقتى للاسف صعب أجاوب إجابة أحس الناس هتفهمها ...بس بردو هجاوب أو بمعنى أصح هفضى اللى فى قلبى

هكلم الاول عن الناس القريبين منى
والدى والدتى بحلم إنى أخليهم يحجوا بيت الله ده فى المستقبل ...أما فى اللحظة دى نفسى أبوس إيدهم أوى

أخويا اختى أتمنى إنى أكون الحضن اللى يرموا همومهم فيه ومشوفش فى عنيهم أى نبرة حزن او حيرة

أصحابى...هو حلم غريب شويه بس نفسى أطمن عليهم ...(أنا بحس إن أصحابى ولادى)

أساتذتى....رغم إنى مش من المتفوقين فى الدراسة بس بجد نفسى أتخرج وكل واحد فيهم حتى لو ميعرفنيش بالاسم بس يكون جواه شئ ليا يخليه لو ربنا اراد وشوفته بعد كدا حتى لو شبه عليا من بعيد أشوف فى عنيه نظرة رضا وإبتسامة

شخص عزيز أوى عليا وهى توامى ...نفسى أشوفها أسعد إنسانة فى الدنيا ولو بإيدى بجد أحضنها فى قلبى وأبعدها عن اى حزن أو جرح

أما عن المجتمع حواليا

الشارع...انا اكتر شئ يسعدنى فى الشارع إنى أسمع دعوة من حد ميعرفنيش ولا أعرفه لمجرد موقف حصل معاه بتكون صادقة اوى ...نفسى أشوف الرحمة بين الناس فى الشارع هتفرق كتير أوى

أما عنى انا ........
دراستى...مش مهم تقدير ولا شهادة بصراحة بس أتمنى إنى اللى درسته ينفعنى فى حياتى وأنفع بيه حد تانى

شغلى...بصراحة سيباها لربنا وإن كنت بشوف إنى خلقت لمهمة اكبر من العمل الوظيفى

شريك حياتى...انا بشوفه حد اكبر من كلمة حلم او امنية لآنه عبارة عن الجزء التانى من الحياة وكانى بتولد من جديد مع فارق انى بكون مدركة شويه للحياة..بس نفسى فى حد أحبه أوى ولما اديه عمرى وحياتى كلها أحس بردو إنى لسه مقصرة فى حقه عندى

أولادى (إن شاء الله) يوسف وفاطمة...نفسى احفظهم القرآن كله بإذن الله

وبعد كل الكلام ده عندى حلم صغير اوى اوى ..........نفسى أحس بالامان