في ضيافه فلان ضيف الحلقه ( esraa)

[Mimi]

ها جودى كيفك اشتقنالك واللة كفاية ترحيب نبدا بالاسئلة

أهلين وايت هارت اشتائتلك العافية يلا وانا هبدأ في الاجوبة ههههههههههههه

اولا "اية هية مواصفات شريك حياتك اللى تتمنيها فيه ؟

تعرفي ممكن اتمنى حاجات كتير وفي الاخر نصيبي يكون مع واحد مش فيه مواصفات زي دي بس بحبه زي ما هوا ، بص انا مش هقول مواصفات فتى الاحلام لانه زي ما بنقول أحلام يعني عمره ما هيبقى حقيقي بس هقولك اكتر حاجة ممكن تشدني للي قدامي ، اول حاجة انه يكون هادي وغامض ومش سهل اي حد يفهمه ويكون مؤدب واكيد الشكل مهم مش اولوية بس مهم بردو واحب يكون مثقف اوي ورومنسي اوي بردو ويكون معتدل في دينه مش متسيب ولا متشدد واكيد يكون فاهمني وفهماه والحاجات دي باه متهيألي ممكن يكون في حد فيه الصفات دي .

ثانيا"اية اكتر حاجة بتضايقك فى المنتدى ؟

لما بشوف مواضيع كتيره اوي في يوم واحد ومش بلحق اقراها كلها ولما بفتح موضوع الاقيه كبير اوي ومش منسق بتدايق من شكله

ثالثا"اكتر حلم كنتى حتموتى ويتحقق وما اتحققش ؟ واكتر حلم كان نفسك ميتحققش واتحقق؟

اني ادخل طب اسنان ياوايت وكنت في حالة نفسية صعبة في ايام التنسيق لما طلعت النتيجة وكمان كان نفسي ادرس في القاهرة او عين شمس بس النصيب باه ،بس يعني ايه ياوايت اكتر حلم كان نفسي ميتحققش ؟ هو ازاي الواحد هيحلم بحاجة نفسه متحصلش ، لكن لو تقصد اكتر حاجة مكنتش عايزاها تحصل وحصلت اني اتفرق عن اهلي المدة دي كلها .

رابعا " مين اقرب حد لقلبك يعنى مين اول حد بتروحى تحكيلة لو زعلانة او حتى مبسوطة؟

ماما ودودي صاحبتي

خامسا"اكلة اول مرة تجربيها ومعجبتكيش وقررتى مش تاكليها تانى؟

لاء بصي هما كانو 4 حاجات باكلهم ومعدتش بطيقهم بجد عشان جالي تسمم من هم وهما المكرونة الباشميل والبتنجان المخلل وبابا غنوج والرقاق مش بحبببببببببببببببببببهم والله كنت بحبهم بس دلوقتي مش بحبهم ونفسي اتسدت عنهم

سادسا" اكتر حشرة بتحبيها؟ واكتر حشرة بتتقرفى منها ؟ واكتر حشرة ازيتيها؟

انتي عرفتي منين اني بحب الحشرات ياوايت ؟ دا سؤال جميل اوي بجد اكتر حشرة بحبها الفراشة بس مش بتقرف من حشرة معينة بس ممكن من الصرصور لما يموت مفعوص يعني لما تفعصه بالشبشب او كدا فاهمني .. واكتر حشرة اذيتها هيا الدبور وابن خالي اللي كان بيشجعني على الافعال العدوانية دي عشان كان بيحط في ديلها عود كبريت ويشل حركتها وساعات كانت تموت مننا وبردو وانا صغيره كنت بحب اعذب الصراصير واخليها ماشية واحط عليها كلوركس وديتول واحيانا شامبو واسيبها تتعذب بالكيماويات لحد ما تموت خالص وكنت بغرق الدبان لحد ما يموت .. ربنا يسامحني انا بحاول ابقى صديقتهم ومش بأذيهم دلوقتي عشان اعوض عن ذنوبي دي .

سابعا"لو مكنتيش انسانة كنتى تتمنى تبقى اية؟

كنت احب ابقى ملاك عشان متحاسبش وادخل الجنة بس لو قصدك كائن حي كنت اتمنى ابقى حصان

ثامنا"اكتر مغنى بتحبية ؟ ومغنية؟ وممثل؟ وممثلة؟

مفيش حد معين اوي بس اجنبي انريكي وكريج ديفيد وشاين وورد ومارك انطوني ودانكن جيمز وجوش جروبان وكتير والله والعربي ممكن سامو زين تامر ورامي صبري وعمرو دياب .. في المغنيات باه افريل لافين وسيلين ديون طبعا وايفانسينس واينيا وديلتا جودريم وماندي موروجنيفير لوبيز وغريس ديب وميكاييلا وشيرين وكاتيا حرب دول اللي فاكراهم حاليا وفي الممثلين بلاش احسن هما كتيررررررررررررر جدآ جدآ بحب السقا واحمد حلمي وجون ترافولتا ونيكولاس كيدج وويل سميث وجين كلاود وليوناردو دي كابريو وطبعا التون جون وتوم كروز وجورج كلوني وفي الممثلات منى ذكي وياسمين عبد العزيز ونيكول سابا وانجلينا جوليجنيفر آنستون وجيسيكا البا وسارة ميشيل وسلمى وكتيررر اوي اوي

تاسعا" اكتر اغنية بتردديها دائما؟ اكتر فيلم ومسلسل بتحبى تسمعيهم؟

مش بهتم اوي بالاغاني يعني مش بحفظ اوي كلماتها بس اكتر اغنيه أثرت معايا بتاعه رامي صبري حبيبي الاولاني واغنيه بحلم بيك سامو زين وانا عارفك ساموزين وعرفت معنى الحب سامو بردو

عاشرا" ما معنى الحياة من وجة نظر جودى ؟

الحياة حلوة عيشي فيها حلاوتها وتفادى قساوتها وانا بقول دايما لنفسي ياوايت كل واحد وليه عمر واحد ومحدش ابدآ هيعوضلك اليوم اللي بيروح من عمرك فـ يااما تعيشيه مبسوط او تعيشيه حزين .
الحادى عشر"نفسك تعملى اية دلوقتى ؟

نفسي أكلم ايمي صاحبتي لانها وحشتني اوي اوي اوي بس مستنية اخلص الاجابات وهكلمها ان شاء الله

يا رب اكون ضيفة خفيفة عليكى يا بخت من زار وخفف طبعا مفيش اخف من كدة؟

اني زي العسل والله واسئلتك فريدة من نوعها وجميلة اوي بجد